Koma Pa a Yɛde Hwehwɛ Yehowa

NÁ Israel sɔfo Esra yɛ nhwehwɛmufo, nhomanimfo, ɔkyerɛwfo, ne Mmara kyerɛfo a ɔda nsow. Ɔyɛ ɔkra nyinaa mu a wofi som ho nhwɛso pa ma Kristofo nnɛ. Ɔkwan bɛn so? Ɛne sɛ okuraa ne nyamesom pa ahofama mu bere a na ɔwɔ Babilon, kurow a na atoro anyame ne adaemone som abu so wom no.

Esra nyamesom pa ahofama no amma kwa. Ɔyɛɛ ho adwuma. Nokwarem no, ɔka kyerɛ yɛn sɛ ‘osiesiee ne koma sɛ ɔbɛhwɛ Yehowa mmara na wadi so.’—Esra 7:10.

Te sɛ Esra no, Yehowa nkurɔfo a wɔwɔ hɔ nnɛ pɛ sɛ wɔyɛ nea Yehowa ahyɛ wɔn sɛ wɔnyɛ nyinaa bere a wɔte wiase a ɛmpɛ nokware som mu no. Enti yɛn nso, momma yɛnhwɛ akwan a yebetumi afa so asiesie yɛn koma, yɛn mu nipa a ahintaw—a yɛn nsusuwii, suban, akɔnnɔ, ne nneɛma a ɛkanyan yɛn nso ka ho—na yɛde ‘ahwɛ Yehowa mmara adi so.’

Yɛn Koma a Yebesiesie

‘Sɛ́ yebesiesie’ no kyerɛ sɛ “yebesiesie yɛn ho ato hɔ ama atirimpɔw bi: yɛbɛyɛ krado ama biribi pɔtee, adeyɛ, anaa nhyehyɛe bi.” Nokwarem no, sɛ woanya Onyankopɔn Asɛm mu nokware nimdeɛ na woahyira wo nkwa so ama Yehowa a, ɛnde na akyinnye biara nni ho sɛ woasiesie wo koma, na yebetumi de atoto “asase pa” a Yesu kaa ho asɛm wɔ ogufo ho bɛ mu no ho.—Mateo 13:18-23.

Nanso, ehia sɛ yɛma yɛn ani ku yɛn koma ho bere nyinaa na yesiesie. Dɛn ntia? Nneɛma abien bi ntia. Nea edi kan no, efisɛ nneɛma bi a enye a yɛtɔ kɔ so a ɛte sɛ afuw mu wura bɔne, betumi agye ntini ntɛm, titiriw wɔ “nna a edi akyiri” yi a honam fam nsusuwii atu afra Satan nhyehyɛe yi mu “mframa” a ano yɛ den mu no. (2 Timoteo 3:1-5; Efesofo 2:2) Nea ɛto so abien no fa asase no ho ankasa. Sɛ wɔanyɛ asase so adwuma a, ɛnkyɛ na emu nsu atwe, ayɛ den, na abɛyɛ asasenini. Anaa nnipa pii betumi afa afuw no mu atiatia asase no so ma ayɛ den. Saa ara na yɛn sɛnkyerɛnne kwan so asase a ɛne koma no nso te. Sɛ yebu yɛn ani gu so anaa yɛma nnipa a yɛn honhom fam yiyedi ho nhia wɔn tiatia so a, ebetumi abɛyɛ asasenini.

Enti hwɛ hia a ehia sɛ yɛn nyinaa de Bible afotu yi bedi dwuma: “Kora wo koma so sen nea wode sie nyinaa, na emu na nneyɛe nyinaa fi.”—Mmebusɛm 4:23.

Nneɛma a Esiesie Yɛn Koma “Asase” No

Momma yensusuw nneɛma anaa su horow bi a ebetumi ama yɛn koma “asase” no ayɛ yiye sɛnea ɛbɛyɛ a ɛso nneɛma betumi anyin yiye ho. Ɛwom, nneɛma pii wɔ hɔ a ebetumi asiesie yɛn koma, nanso yebesusuw emu asia ho: hu a yebehu yɛn honhom fam ahiade, ahobrɛase, nokwaredi, osuro pa, gyidi, ne ɔdɔ.

Yesu kae sɛ: ‘Anigye ne wɔn a wɔn honhom mu nneɛma ho hia wɔn.’ (Mateo 5:3, NW) Te sɛ honam fam kɔm a ɛkae yɛn hia a ehia sɛ yedidi no, hu a yebehu yɛn honhom fam ahiade no ma honhom mu kɔm de yɛn. Nnipa fi awosu mu nya akɔnnɔ ma aduan a ɛte saa efisɛ ɛma asetra yɛ anigye na atirimpɔw ba mu. Sɛ edu bere a ɛsɛ sɛ yesua ade a, nhyɛso a efi Satan nneɛma nhyehyɛe no mu  anaa anihaw betumi abrɛ hia a yehia eyi no ase. Ne saa mpo no, Yesu kae sɛ: “Ɛnyɛ abodoo nko so na onipa nam bɛtra ase, na asɛm biara a efi Onyankopɔn anom so.”—Mateo 4:4.

Honam fam no, aduan pa a wodi no bere pa mu bere nyinaa no ma apɔwmuden, na ɛma nipadua no nya aduan foforo ho akɔnnɔ bere a adidi bere so no. Saa ara na ɛte wɔ honhom fam. Ebia wummu wo ho sɛ obi a ɔpɛ adesua de, nanso sɛ wode yɛ wo su sɛ wobɛkenkan Onyankopɔn Asɛm da biara na wotaa sua Bible ho nhoma horow a, wubehu sɛ wubenya ho akɔnnɔ kɛse. Nokwarem no, wode ahopere bɛhwɛ bere a wode yɛ Bible adesua no kwan. Enti nnyae mu saa ara kɛkɛ; bɔ mmɔden nya honhom fam aduan ho akɔnnɔ a ɛfata.

Ahobrɛase Ma Koma Yɛ Bɛtɛɛ

Ahobrɛase yɛ ade titiriw a ebetumi aboa yɛn ma yɛasiesie yɛn koma efisɛ ɛma wotumi kyerɛ yɛn ade, na ɛboa yɛn ma yegye afotu ne nteɛso tom ntɛm so. Susuw Ɔhene Yosia nhwɛso pa no ho hwɛ. Ne nniso bere so no, wohuu kyerɛwtohɔ bi a Onyankopɔn Mmara a ɔnam Mose so de mae no wom. Bere a Yosia tee Mmara no mu nsɛm na ohuu sɛnea ne nananom aman afi ɔsom kronn ho no, osunsuanee ne ntade mu sui Yehowa anim. Dɛn nti na Onyankopɔn Asɛm no kaa ɔhene no koma saa? Kyerɛwtohɔ no ka sɛ na ne koma yɛ “bɛtɛɛ” araa ma, bere a ɔtee Yehowa nsɛm no ɔbrɛɛ ne ho ase. Yehowa hyɛɛ Yosia koma a na ɛte asɛm na ɛbrɛ ne ho ase no nsow na ɔnam so hyiraa no.—2 Ahene 22:11, 18-20.

Ahobrɛase na ɛmaa Yesu asuafo a na “wonsuaa nhoma da, na mmom wɔyɛ mpapahwekwaa” no tumi tee honhom mu nokware a na asete yɛ ‘honam fam anyansafo’ den no ase. (Asomafo no Nnwuma 4:13; Luka 10:21; 1 Korintofo 1:26) Na honam fam anyansafo no nsiesiee wɔn ho sɛ wobegye Yehowa Asɛm atom efisɛ na ahantan ama wɔn koma ayɛ den. So ɛyɛ nwonwa sɛ Yehowa kyi ahantan?—Mmebusɛm 8:13; Daniel 5:20.

Nokwaredi ne Osuro Pa

Odiyifo Yeremia kyerɛwee sɛ “koma wɔ hɔ yi, ɛyɛ okontomponi sen ade nyinaa na emuɔ, hena na obenya mu ahuye?” (Yeremia 17:9) Saa nkontompo yi da ne ho adi wɔ akwan pii so, te sɛ bere a yeyiyi yɛn ho ano bere a yɛadi mfomso no. Ɛsan da ne ho adi bere a yennye nipasu mu sintɔ a ɛyɛ anibere ntom no. Nanso, nokwaredi bɛboa yɛn ma yɛadi koma nkontomponi no so nkonim denam boa a ɛbɛboa yɛn ma yɛagye sɛnea yɛte ankasa atom na ama yɛatumi ayɛ nsakrae no so. Odwontofo no daa nokwaredi a ɛte saa adi bere a ɔbɔɔ mpae sɛ: “[Yehowa, NW], hwehwɛ me mu na sɔ me hwɛ, nan m’asaabo ne me koma.” Ɛda adi pefee sɛ na odwontofo no asiesie ne koma sɛ ɔbɛma Yehowa ayiyi ne mu na wasɔ no ahwɛ, ɛwom mpo sɛ na saayɛ betumi ama su bɔne bi a ɛwɔ ne ho ada adi na ama watumi adi so.—Dwom 17:3; 26:2.

Osuro pa, a nea ɛka ho ne sɛ ‘yebekyi bɔne’ no boa wɔ nhwehwɛmu yi mu. (Mmebusɛm 8:13) Bere a obi a osuro Yehowa ampa kyerɛ n’adɔe ne ne papayɛ ho anisɔ no, onim nso sɛ Yehowa wɔ tumi a ɔde bɛtwe wɔn a wontie no no aso, na mpo wakum wɔn. Yehowa nam nea ɔka kyerɛɛ Israelfo yi so ma ɛdaa adi sɛ wɔn a wosuro no no betie no nso: “O, sɛ anka wobenya koma a ɛte sɛɛ na wɔde asuro me adi me mmara nsɛm so nna nyinaa, na asi wɔn ne wɔn mma yiye daa ɛ!”—Deuteronomium 5:29.

Ɛda adi pefee sɛ, ɛnyɛ osuro pa botae ne sɛ ɛbɛka yɛn ahyɛ ehu ase, na mmom sɛ ɛbɛkanyan yɛn ma yɛatie yɛn Agya a ɔwɔ dɔ a yenim sɛ ɔwɔ yɛn ho adwempa no. Nokwarem no, osuro pa ma nkɔso na ɛkanyan anigye, ade a Yesu Kristo ankasa daa no adi yiye no.—Yesaia 11:3; Luka 12:5.

Gyidi Ahyɛ Koma a Wɔasiesie Ma

Koma a gyidi ahyɛ no ma no nim sɛ biribiara a Yehowa nam N’asɛm so bisa anaa ɔde ho akwankyerɛ ma no teɛ bere nyinaa, na eye ma yɛn. (Yesaia 48:17, 18) Onipa a ɔwɔ koma  a ɛte saa no nya abotɔyam kɛse fi nkuranhyɛsɛm a ɛwɔ Mmebusɛm 3:5, 6, mu, faako a ɛka sɛ: “Fa wo koma nyinaa bata [Yehowa, NW] ho, na mfa wo ho ntweri wo nhumu. Hu no wakwan nyinaa mu, na ɔno na ɔbɛteɛ wakwan.” Nanso koma a ennye nni ntumi nnya Yehowa mu ahotoso, titiriw sɛ saa a ɛbɛyɛ no hwehwɛ sɛ ɛde biribi te sɛ asetra kwan a ɛkorɔn bɔ afɔre na ama watumi de n’ani asi Ahenni nneɛma so a. (Mateo 6:33) Ntease wom sɛ Yehowa bu koma a ennye nni sɛ ɛyɛ “bɔne.”.—Hebrifo 3:12.

Yehowa mu gyidi a yɛwɔ no da adi wɔ nneɛma pii mu, a nea yɛyɛ wɔ kokoam wɔ yɛn ankasa fie nso ka ho. Fa nnyinasosɛm a ɛwɔ Galatifo 6:7 no sɛ nhwɛso: “Monnnaadaa mo ho, Onyankopɔn, wonsi no atwetwe; efisɛ nea onipa gu no, ɛno ara na obetwa.” Gyidi a yɛwɔ wɔ nnyinasosɛm yi mu no betumi ada adi wɔ nneɛma te sɛ sini a yɛhwɛ, nhoma a yɛkenkan, Bible adesua dodow a yɛyɛ, ne yɛn mpaebɔ mu. Yiw, gyidi a emu yɛ den a ɛkanyan yɛn ma yegu gu “honhom” so no boa ma yenya koma a ayɛ krado sɛ ebegye Yehowa asɛm atom na adi so.—Galatifo 6:8.

Ɔdɔ—Su a Ɛsen Biara

Nea ɛsen su ahorow no nyinaa no, ɔdɔ na ɛma yɛn koma asase no tie Yehowa Asɛm. Ne saa nti bere a ɔsomafo Paulo de ɔdɔ retoto gyidi ne anidaso ho no, ɔkaa ho asɛm sɛ ɛyɛ su horow yi mu “kɛse.” (1 Korintofo 13:13) Koma a Onyankopɔn ho dɔ ahyɛ no ma no nya abotɔyam ne anigye kɛse fi tie a etie no no mu; akyinnye biara nni ho sɛ emmu ani ngu Onyankopɔn ahwehwɛde ahorow so. Ɔsomafo Yohane kae sɛ: “Eyi ne Nyankopɔn dɔ, sɛ yebedi n’ahyɛde so, na n’ahyɛde no nyɛ den.” (1 Yohane 5:3) Wɔ tebea bi a na ɛte saa ara mu no, Yesu kae sɛ: “Sɛ obi dɔ me a, obedi m’asɛm so, na m’agya bɛdɔ no.” (Yohane 14:23) Hyɛ no nsow sɛ ɔdɔ a ɛte saa no yɛ nsa kɔ na nsa aba. Yiw, Yehowa dɔ wɔn a wofi ɔdɔ mu ba ne nkyɛn no kɛse.

Yehowa nim sɛ yɛnyɛ pɛ, na bere nyinaa yɛyɛ bɔne tia no. Ne saa mpo no, ɔntwe ne ho mfi yɛn ho. Nea Yehowa hwehwɛ wɔ n’asomfo ho ne “koma mũ,” nea ɛkanyan yɛn ma yefi yɛn pɛ mu de ‘ɔkra anisɔ’ som no no. (1 Beresosɛm 28:9) Ɛwom, Yehowa nim sɛ egye bere ne mmɔdenbɔ ansa na yɛatumi ada suban pa adi wɔ yɛn komam na ama yɛasow honhom aba. (Galatifo 5:22, 23) Ne saa nti, ɔtɔ ne bo ase ma yɛn ‘efisɛ onim yɛn su, na ɔkae sɛ yɛyɛ mfutuma.’ (Dwom 103:14) Bere a Yesu reda su a ɛte saa ara adi no, wanteɛteɛ n’asuafo no denneennen wɔ wɔn mfomso horow ho, na mmom ofi boasetɔ mu boaa wɔn hyɛɛ wɔn nkuran. So ɔdɔ, mmɔborohunu, ne boasetɔ a Yehowa ne Yesu da no adi no nka wo mma wonnɔ wɔn kɛse?—Luka 7:47; 2 Petro 3:9.

Sɛ ɛtɔ mmere bi na sɛ wuhu sɛ ɛyɛ wo den sɛ wubetutu suban ahorow a ɛte sɛ nwura agu anaasɛ wubegyae su horow bi a, mma wo koma nntu na mma w’abam mmmu. Mmom no, kɔ so bɔ mmɔden sɛ wubenya nkɔso, na ‘kura mpaebɔ mu bere nyinaa,’ na afei srɛ Yehowa ma ɔmma wo ne honhom no. (Romafo 12:12) Ɛdenam Yehowa mmoa a ofi ne pɛ mu de ma so no, te sɛ Esra no, wubetumi anya koma a wɔasiesie no koraa ‘sɛ wobɛhwɛ Yehowa mmara na woadi so.’

[Mfonini wɔ kratafa 31]

Wɔ Babilon mpo no, Esra kuraa ne Nyamesom pa ahofama mu

[Mfonini Fibea wɔ kratafa 29]

Garo Nalbandian