Asetram Nsɛm

Meyɛɛ Me Ho Awiɛmfoɔ De Som Yehowa

SƐNEA CLARA GERBER MOYER KA KYERƐE

Madi mfe 92 na ɛyɛ den ma me sɛ mɛnantew, nanso menyare awerɛfi. Hwɛ aseda ara a mede ma Yehowa sɛ manya hokwan asom no fi me mmofraberem! Awiɛmfoɔ a meyɛɛ me ho no na ama manya saa agyapade no.

MENE panyin wɔ mmofra baanum no mu, na wɔwoo me August 18, 1907, wɔ Alliance, Ohio, U.S.A. Bere a midii mfe awotwe no, bere nyinaa somfo bi a na ɔyɛ Bible Asuafo no mu biako, sɛnea na wɔfrɛ Yehowa Adansefo saa bere no, de sakre baa yɛn nufukyibea hɔ. Ohyiaa me maame Laura Gerber wɔ ɔpon ano na obisaa no sɛ onim nea enti a amumɔyɛ kɔ so no anaa. Ná saa asɛm no haw maame adwene bere nyinaa.

Bere a Maame ne Paapa a saa bere no na ogyina mmoa buw ho no adi nkitaho awie no, Maame hyɛe sɛ wɔmfa Studies in the Scriptures a na ɛwom apo asia no bi mmrɛ no. N’ani gyee ho na Bible mu nokware a na ɔresua no kanyan no kɛse. Maame suaa The New Creation, Po a ɛtɔ so 6 no, na ɔtee hia a ehia sɛ Kristofo bɔ asu wɔ nsu mu no ase yiye. Esiane sɛ na onhu baabi a obehu Bible Asuafo no nti, ɔmaa Paapa bɔɔ no asu wɔ nsu ketewa bi a ɛda afuw no mu no mu, ɛmfa ho sɛ na ɛyɛ awɔw bere wɔ March 1916 mu no.

Ɛno akyi bere tiaa bi no, Maame huu amanneɛbɔ bi wɔ atesɛm krataa bi mu a ɛkyerɛ sɛ wɔbɛma ɔkasa bi wɔ Daughters of Veterans Hall a ɛwɔ Alliance no. Na ɔkasa no asɛmti ne “The Divine Plan of the Ages.” Ɔyɛɛ ahoboa ntɛm ara, esiane sɛ na Studies in the Scriptures nhoma no Po 1 no nso kura asɛmti koro no ara nti. Yɛhyehyɛɛ yɛn teaseɛnam no, na abusua no nyinaa traa pɔnkɔ teaseɛnam so kɔɔ yɛn nhyiam a edi kan. Efi ɛno so no, na yɛkɔ yɛn nhyiam ahorow wɔ  anuanom afie Kwasida ne Wukuda anwummere. Ɛno akyi bere tiaa bi no, Kristofo asafo no nanmusini bi bɔɔ Maame asu bio. Bere bi akyi no, Paapa a na bere nyinaa ɔyɛ adwuma wɔ afum a na onni adagyew no ani begyee Bible adesua ho, na mfe kakraa bi akyi no, wɔbɔɔ no asu.

Mpanyimfo a Yehyia Wɔn

Wɔ June 10, 1917 no, J. F. Rutherford, a na ɔyɛ Ɔwɛn Aban Asafo no titrani saa bere no bɛsraa Alliance kurow no bɛmaa ɔkasa a n’asɛmti ne “Dɛn Nti na Amanaman no Di Ako?” Ná madi mfe akron, na me ne m’awofo ne me nuabarimanom baanu, Willie ne Charles na ɛkɔe. Yenyaa nnipadɔm pii a na wɔboro ɔha maa wobetiei. Bere a Onua Rutherford maa ɔkasa no wiei no, wɔn a wɔbae no mu pii twaa mfonini wɔ Columbia Theater, baabi a ɔmaa ɔkasa no. Dapɛn a edi hɔ no, A. H. Macmillan maa ɔkasa a na n’asɛmti ne “Onyankopɔn Ahenni a Ɛreba No” wɔ beae koro no ara. Na ɛyɛ hokwan kɛse sɛ yenyaa anuanom yi maa wɔbɛsraa yɛn kurow ketewa no.

Ɔmantam Nhyiam Ahorow a Midii Kan Kɔe a Mekae

Wɔyɛɛ ɔmantam nhyiam a edi kan a mekɔe no wɔ 1918 mu wɔ Atwater, Ohio, a ɛne Alliance ntam kwan nware pii no. Maame bisaa Asafo no nanmusini a na ɔwɔ hɔ no sɛ ebia manyin sɛ wobetumi abɔ me asu anaa. Ná mete nka sɛ mayɛ ahosohyira a edi mũ ama Onyankopɔn sɛ mɛyɛ n’apɛde, enti wɔpenee so maa wɔbɔɔ me asu saa da no wɔ asubura bi a ɛbɛn aprɛ afuw kɛse bi mu. Mesesaa m’ataade wɔ ntamadan bi a na anuanom asi ama saa atirimpɔw no mu, na mede ataade bi a wɔhyɛ da a emu yɛ duru na ɛbɔɔ asu no.

September 1919 mu no, me ne m’awofo de keteke kɔɔ Sandusky, Ohio, a ɛwɔ Ɔtare Erie so no. Yɛfaa ahyɛmma, na ankyɛ koraa na yeduu Cedar Point, baabi a na wɔbɛyɛ yɛn ɔmantam nhyiam a yɛn werɛ remfi da no. Bere a yefii ahyɛmma no mu sii no, na wɔasiesie baabi a yɛbɛtɔ aduan adi awiabere no wɔ hyɛn gyinabea hɔ. Wɔmaa me paanoo a nantwinam a wɔayam hyem, a saa bere no na ɛyɛ m’akɔnnɔ aduan paa. Na ɛyɛ dɛ yiye! Nnipa dodow a ɛsen biara a wɔbaa nnawɔtwe ɔmantam nhyiam no dodow sii 7,000. Ná akasam mfiri biara nni hɔ saa bere no, nti na ɛsɛ sɛ mitie no yiye paa.

Ɛyɛ saa ɔmantam nhyiam yi ase na woyii nsɛmma nhoma a ɛka Ɔwɛn-Aban ho, a wɔtoo din The Goden Age (nnɛ wɔfrɛ no Nyan!) no. Nea ɛbɛyɛ na matumi akɔ ɔmantam nhyiam no bi no, mankɔ sukuu dapɛn a edi kan no, nanso na mfaso wɔ so kɛse. Ná Cedar Point yɛ ahomegyebea, na na wɔwɔ nkurɔfo wɔ adidibea hɔ a wɔnoa aduan ma nhyiamfo no. Nanso tebea bi nti aduannoafo no gyaee adwuma no, enti Kristofo anuanom a wonim aduannoa baa hɔ bɛyɛɛ aduan maa nhyiamfo no. Ɛno akyi mfe pii mu no, Yehowa nkurɔfo ankasa yɛ wɔn aduan wɔ nhyiam nketewa ne akɛse ase.

Yɛsan nyaa hokwan kɔɔ Cedar Point ɔmantam nhyiam a wɔyɛɛ no nna akron wɔ September 1922 mu no bi, na nnipa dodow a ɛsen biara a wɔbae no boro 18,000. Ɛhɔ na Onua Rutherford hyɛɛ yɛn nkuran sɛ ‘yɛmmɔ, yɛmmɔ, yɛmmɔ Ɔhene no ne n’ahenni ho dawuru’ no. Nanso na menam nkratawa ne The Golden Age a na makyekyɛ mfe pii no so afi me som adwuma no ase.

Ɔsom Adwuma no Ho Anisɔ

Wɔ 1918 mfiase no, mede me ho hyɛɛ The Fall of Babylon nkratawa a wɔkyekyɛɛ no mfuw a ɛbemmɛn yɛn no mu mu. Esiane awɔw no nti, na yɛde ɔbo bɛtɛbɛtɛ bi to sutof so wɔ fie ma no yɛ hyew na sɛ yɛte yɛn pɔnkɔ teaseɛnam no mu a, yɛde yɛn nan asisi so de atu yɛn ho awɔw. Ná yɛhyehyɛ ntade ne kyɛw a emu yɛ duru, esiane sɛ na pɔnkɔ teaseɛnam no soro ne ne nkyɛnmu nko ara na ɛwɔ nkataanim na na enni afiri a ɛma ɔhyew. Nanso na saa bere no yɛ anigye.

Wɔ 1920 mu no, wɔhyɛɛ da yɛɛ The Finished Mystery soronko bi te sɛ nsɛmma nhoma a na wɔfrɛ no ZG. * Me ne m’awofo de saa nhoma yi bi kɔɔ asɛnka wɔ Alliance. Saa bere no, na ankorankoro na ɛkɔ afie afie mu, enti mede ehu foroo ntwirinoa bi a na nnipa pii tete hɔ. Bere a  mekasa wiei no, ɔbea bi kae sɛ: “So ne kasa yi nyɛ kasa tiawa a ɛyɛ dɛ,” na ogyee nhoma no. Mede ZG no 13 mae saa da no, na ɛno ne bere a edi kan a mitumi kasa kyɛe wɔ afie afie dwumadi no mu.

Bere a na mewɔ sukuu a madi bɛyɛ mfe 15 no, mpafe sii Maame ma ɛkaa no too hɔ bɛboro ɔsram. Ná me nuabea Hazel yɛ akokoaa, ne saa nti migyaee sukuu sɛnea ɛbɛyɛ a mɛboa afumdwuma na mahwɛ mmofra no. Ne nyinaa akyi no, na yɛn abusua no ntoto Bible adesua ase koraa na na yɛkɔ asafo nhyiam horow nyinaa daa.

Wɔ 1928 mu bere a wɔyɛɛ Kristo Nkaedi afahyɛ no, wɔkyekyɛɛ kratawa bi a na wɔato din “Where Are the Nine?” maa yɛn a yɛkɔɔ ase no nyinaa. Esusuw Luka 17:11-19 ho, baabi a Bible no ka sɛ akwatafo du a wɔn ho fii no mu biako pɛ na ofi ahobrɛase mu daa Yesu ase wɔ anwonwakwan so ayaresa no ho no. Ɛkaa me koma yiye. Mibisaa me ho sɛ, ‘ɔkwan bɛn so na mekyerɛ anisɔ?’

Esiane sɛ na afei de nneɛma rekɔ so yiye wɔ fie, na mewɔ ahoɔden a asɛyɛde pii biara nna me so nti, misii gyinae sɛ mefi fie na mede me ho ahyɛ akwampae adwuma no, sɛnea na wɔfrɛ bere nyinaa som adwuma no, mu. M’awofo hyɛɛ me nkuran sɛ menyɛ saa adwuma no. Ne saa nti, me ne me yɔnko, Agnes Aleta, nsa kaa yɛn dwumadi, na August 28, 1928 no, yɛforoo keteke anwummere 9:00. Ná yɛn mu biara wɔ adaka biako pɛ a yɛde yɛn nneɛma begu mu, ne bag a yɛde yɛn Bible ho nhoma ahorow begu mu. Wɔ keteke gyinabea hɔ no, na me nuabeanom ne m’awofo resu, na yɛn nso yesui. Misusuwii sɛ merenhu wɔn bio da, efisɛ na yegye di sɛ Harmagedon abɛn. Ade kyee no, yeduu Brooksville, Kentucky, baabi a wɔmaa yɛn dwumadi no.

Yegyee ahɔhodan ketewa bi tuaa ho ka na yɛtɔɔ talia a ɛwɔ kankyee mu, na yɛyɛɛ paanoo de nam hyehyɛɛ mu. Na ɛsono nea obiara fa da biara, na na obiara yɛ n’adwuma de nhoma anum bom ma afiewuranom gye ntoboa U.S dɔla 1.98. Yɛde nkakrankakra wiee kurow no mu adwuma, na yehyiaa nnipa pii a wɔn ani gye Bible no ho.

Wɔ bɛyɛ asram abiɛsa ntam no, na yɛakɔ obiara a ɔwɔ Brooksville ne Augusta mpɔtam hɔ nkyɛn. Enti yɛtoaa so kɔyɛɛ adwuma wɔ Maysville, Paris, ne Richmond nkurow no mu. Wɔ mfe abiɛsa a edi ɛno anim no mu no, yɛyɛɛ adwuma wɔ aman pii a ɛwɔ Kentucky, baabi a na asafo biara nni hɔ no. Na nnamfo ne abusuafo a wofi Ohio fa kar bɛboa yɛn wɔ asɛnka adwuma no mu bɛyɛ sɛ dapɛn biako anaa nea ɛboro saa.

Nhyiam Afoforo a Yɛkae

Ɔmantam nhyiam a wɔyɛɛ no wɔ Columbus, Ohio, July 24-30, 1931 yɛ nea ɛfata sɛ yɛkae paa. Ɛhɔ na wɔbɔɔ amanneɛ sɛ wɔde edin a egyina Bible so, a ɛne Yehowa Adansefo, bɛfrɛ yɛn no. (Yesaia 43:12) Ansa na ɛno reba no, sɛ nkurɔfo bisa yɛn sɛ yɛyɛ nyamesom bɛn mufo a, na yɛka sɛ yɛyɛ “Amanaman Ntam Bible Asuafo.” Nanso na ɛno mma yɛnna nsow papa, efisɛ na Bible asuafo ahorow pii wɔ nyamesom akuw no mu.

Na me yɔnko Agnes aware, ma na aka me nkoaa; enti m’ani gyei bere a wɔde amanneɛbɔ mae sɛ wɔn a wɔrehwehwɛ ayɔnkofo a wɔne wɔn bɛyɛ akwampae adwuma no nkohyia baabi no. Mihyiaa Bertha ne Elsie Garty ne Bessie Ensminger wɔ hɔ. Na wɔwɔ kar abien na na wɔrehwehwɛ onuawa kwampaefo biako ama wabɛka wɔn ho. Yɛn nyinaa fii ɔmantam nhyiam no ase prɛko ɛmfa ho sɛ na yenhyiae da no.

Wɔ ahohuru bere no mu no, yɛyɛɛ adwuma wɔ Pennsylvania man no nyinaa mu. Afei bere a awɔw no rebɛn no, yebisae sɛ wɔmma yɛn dwumadi wɔ anafo aman a ɛhɔ yɛ hyew a ɛne North Carolina, Virginia, ne Maryland no mu. Eduu osutɔbere mu no, yɛsan kɔɔ atifi fam hɔ. Saa na na akwampaefo taa yɛ saa bere no. Wɔ 1934 mu no, John Booth ne Rudolph Abbuhl, a na wɔtaa yɛ saa no de Ralph Moyer ne ne nuabarima ketewa Willard kaa wɔn ho kɔɔ Hazard, Kentucky.

Ná metaa ne Ralph hyia mpɛn pii, na yebehuu yɛn ho yiye bere a wɔyɛɛ ɔmantam nhyiam kɛse wɔ May 30–June 3, 1935 wɔ Washington, D.C. no. Ná me ne Ralph nyinaa te abranaa so bere a wɔrema ɔkasa a ɛfa “nnipakuw kɛse” ho no. (Adiyisɛm 7:9-14) Ansa na saa bere no reba no, na yegye di sɛ nnipakuw kɛse no ne wɔn a wɔwɔ ɔsoro anidaso a wɔn nokwaredi nnuru 144,000  de no. (Adiyisɛm 14:1-3) Enti na mempɛ sɛ meyɛ wɔn mu biako!

Bere a Onua Rutherford kyerɛkyerɛɛ mu sɛ nnipakuw kɛse no ne anokwafo a wobefi mu aka wɔ Harmagedon no, ɛyɛɛ nnipa pii ahodwiriw. Afei ɔtoo nsa frɛɛ wɔn a wɔyɛ nnipakuw kɛse mufo no nyinaa sɛ wɔnsɔre nnyina hɔ. Mansɔre, nanso Ralph sɔree. Akyiri yi nneɛma mu bɛdaa hɔ yiye maa me, enti 1935 ne afe a etwa to a migyaee sɛnkyerɛnne kwan so abodoo ne bobesa a na midi no Kristo wu Nkae ase no. Nanso maame kɔɔ so dii kosi sɛ owui wɔ November 1957 mu.

Me Yɔnko a Me ne No Bɛtra Daa

Me ne Ralph kɔɔ so dii nkrataa-kyerɛw. Ná mesom wɔ Lake Placid, New York, na na ɔno nso wɔ Pennsylvania. Wɔ 1936 mu no, ɔyɛɛ dan ketewa bi a na otumi de ne kar twe. Otuu lɔre no fii Pottstown, Pennsylvania, kɔɔ ɔmantam nhyiam bi a wɔyɛɛ no October 16-18 wɔ Newark, New Jersey no bi. Anwummere bi a na dwumadi no aba awiei no, yɛn a yɛyɛ akwampaefo no pii kɔhwɛɛ Ralph dan a esi lɔre so no. Ná me ne no gyina kar no mu baabi a ɔhohoro nneɛma mu no na obisaa me sɛ, “W’ani gye dan a esi lɔre so yi ho?”

Bere a mebɔɔ me ti nko no, obisaa me sɛ “So wobɛpɛ sɛ wotra mu anaa?”

Mekaa sɛ “yiw,” na ofew m’ano a me werɛ remfi da. Nna bi akyi no, yegyee aware nhyehyɛe tumi krataa. Wɔ October 19, ɔmantam nhyiam no akyi da a edi kan no, yɛkɔɔ Brooklyn kɔhwehwɛɛ faako a Ɔwɛn Aban Asafo no tintim ne nhoma no. Afei yebisaa asasesin a yɛbɛyɛ mu adwuma. Ná Grant Suiter na ɔhwɛ asasesin no so, enti obisaa yɛn onipa a ɔbɛyɛ mu adwuma. Ralph kae sɛ, “Sɛ yebetumi aware a, yɛbɛyɛ mu adwuma.”

Onua Suiter kae sɛ, “sɛ moba anwummere 5:00 a, yebetumi ayɛ ho nhyehyɛe.” Enti yɛwaree saa anwummere no wɔ Ɔdansefo bi fie wɔ Brooklyn Heights. Yɛne nnamfonom binom didii wɔ hɔnom adidibea bi na yɛfaa kar kɔɔ Newark, New Jersey, baabi a na Ralph dan a esi lɔre so wɔ no.

Ɛno akyi bere tiaa bi no, yesiim kɔɔ yɛn akwampae dwumadi a edi kan no mu wɔ Heathsville, Virginia. Yɛyɛɛ adwuma wɔ Northumberland County na yetu kɔɔ Fulton ne Franklin amansin a ɛwɔ Pennsylvania no mu. Wɔtoo nsa frɛɛ Ralph sɛ ɔmmɛyɛ dantaban sohwɛfo wɔ 1939 mu, a na ɛbɛma yɛasra asafo ahorow bere ne bere mu. Yɛsom asafo horow a na ɛwɔ Tennessee mantam mu no. Afe a edi hɔ no yɛwoo yɛn babarima Allen, na 1941 mu no, yegyaee yɛn dantaban adwuma no. Enti wɔde yɛn kɔɔ Marion, Virginia sɛ akwampaefo atitiriw. Saa bere no na ɛhwehwɛ sɛ yɛde nnɔnhwerew 200 yɛ ɔsom adwuma no ɔsram biara.

Nsakrae Horow a Meyɛ

Wɔ 1943 mu no, ɛho behiae sɛ migyae akwampae titiriw som adwuma no. Esiane sɛ  na mete dan ketewa a esi lɔre so mu, na mehwɛ abofra, noa nnuan, si yɛn nyinaa ntade na mehwɛ sɛnea yɛn nyinaa ho bɛtew nti. Nea na mitumi yɛ nyinaa wɔ ɔsom adwuma no mu ne sɛ mede nnɔnhwerew 60 ka asɛmpa no ɔsram biara. Nanso Ralph kɔɔ so yɛɛ adwuma sɛ ɔkwampaefo titiriw.

Yɛsan kɔɔ Alliance, Ohio, wɔ 1945 mu, na yɛtɔn yɛn dan a esi lɔre so a na ayɛ yɛn fie mfe akron no, na yɛsan ne m’abusuafo kɔtraa akuraase. Ɛhɔ na yɛwoo yɛn babea, Rebekah wɔ adiwo abranaa so no. Ralph de ne bere fã yɛɛ adwuma wɔ kurom na ɔkɔɔ so yɛɛ daa akwampae adwuma no. Meyɛɛ adwuma wɔ afum na meyɛɛ nea metumi nyinaa de boaa no sɛnea ɛbɛyɛ a ɔbɛkɔ so ayɛ akwampae adwuma no. Ɛwom sɛ m’awofo kyɛɛ yɛn asase ne ofie de, nanso Ralph annye. Na ɔmpɛ sɛ ɔde nneɛma pii to ne ho so sɛnea ɛbɛyɛ a yebetumi adi Ahenni nneɛma akyi kɛse.

Wɔ 1950 mu no, yɛsan kɔɔ Pottstown, Pennsylvania, na yegyee fie a na ɔsram biara yetua ho ka $25. Bɛboro mfe 30 a edii hɔ mu no, ɛho ka no kɔɔ soro koduu $75 pɛ. Yɛtee nka sɛ na Yehowa reboa yɛn ama yɛayɛ awiɛmfoɔ. (Mateo 6:31-33) Na Ralph de nnansa yɛ adwuma wɔ dapɛn mu sɛ obi a oyi ti. Dapɛn biara na yɛne yɛn mma baanu no sua Bible, kɔ asafo nhyiam horow, ka Ahenni ho asɛmpa no sɛ abusua. Ná Ralph som sɛ ɔhwɛfo guamtrani wɔ ɛhɔnom asafo no mu. Esiane sɛ yɛbɔɔ yɛn bra sɛ awiɛmfoɔ nti, yetumi yɛɛ pii wɔ Yehowa som adwuma no mu.

Mehwere Me Dɔfo

Wɔ May 17, 1981 no, na yɛte Ahenni Asa so retie baguam ɔkasa. Ná Ralph nte apɔw, enti ofii asa no so kɔɔ akyiri na ɔkyerɛw krataa ketewa bi maa ɔsomfo bi de brɛɛ me sɛ ɔrekɔ fie. Na Ralph nte saa enti memaa obi tuu kar de me kɔɔ fie ntɛm ara. Ralph fã dwudwoe na owui wɔ dɔnhwerew biako mu. Bere a wowiee Ɔwɛn-Aban adesua saa anɔpa no, wɔbɔɔ asafo no amanneɛ sɛ Ralph awu.

Ná Ralph adi kan de nnɔnhwerew bɛboro 50 ayɛ ɔsom adwuma no dedaw wɔ ɔsram no mu. Ná mfe dodow a ɔde ayɛ bere nyinaa som adwuma sɛ ɔkwampaefo no boro 46. Ná ɔne nnipa bɛboro ɔha asua Bible no ma wɔn mu binom agye asubɔ abɛyɛ Yehowa Adansefo. Honhom mu nhyira a yenyae no sen biribiara a yɛde bɔɔ afɔre wɔ mfe a abɛsen kɔ no mu.

M’ani Asɔ Hokwan Ahorow a Manya No

Mede mfe 18 a atwam no atra ase a obiara nka me ho, mekɔ nhyiam ahorow, ka asɛmpa no kyerɛ afoforo sɛnea metumi biara, na mesua Onyankopɔn Asɛm no. Seesei mete baabi a wɔn a wɔn mfe akɔ anim a wɔapɔn adwuma wɔ. Nneɛma a wɔde siesie dan mu kakraa bi na mewɔ na mempɛ sɛ minya television. Nanso m’asetra di mũ na meyɛ ɔdefo wɔ honhom fam. M’awofo ne me nuabarimanom baanu no dii nokware kosii bere a wowui, na me nuabeanom baanu no da so ara de nokwaredi resom wɔ nokware no mu.

M’ani gye sɛ me ba barima Allen, resom sɛ Kristoni panyin. Mfe pii ni a wahyehyɛ Ahenni Asa ne Nhyiam Asa so akasam mfiri na wayɛ adwuma wɔ baabi a wɔhyehyɛ akasam mfiri wɔ ɔmantam nhyiam ase wɔ ahohuru bere mu. Ne yere yɛ Onyankopɔn somfo nokwafo, na wɔn mmabarima baanu no som sɛ mpanyimfo. Me babea Rebekah Karres, adi bɛboro mfe 35 wɔ bere nyinaa som adwuma no mu, na ɔde mu mfe anan asom wɔ Yehowa Adansefo wiase nyinaa adwumayɛbea ti a ɛwɔ Brooklyn no. Ɔne ne kunu de mfe 25 a atwam no asom wɔ akwantu adwuma no mu wɔ United States mmeae pii.

Yesu kae sɛ Ahenni no te sɛ ademude bi a ahintaw a wobetumi ahu. (Mateo 13:44) Mede aseda ma sɛ m’abusua no huu saa agyapade no mfe pii a atwam ni. Hwɛ hokwan kɛse a ɛyɛ sɛ mitumi dan m’ani hwɛ m’akyi wɔ mfe 80 a mede nokwaredi asom Onyankopɔn no mu—na minnuu me ho da! Sɛ anka metumi afi m’asetra ase foforo bio a, anka saa kwan no ara so na mɛfa efisɛ nokwarem no, ‘Onyankopɔn adɔe yɛ sen nkwa.’—Dwom 63:3.

[Ase hɔ asɛm]

[Mfonini wɔ kratafa 23]

Yetiee Onua Rutherford kasa wɔ 1917 mu wɔ Alliance, Ohio

[Mfonini wɔ kratafa 23]

Me ne Ralph gyina ne dan a esi lɔre so a ɔyɛe no anim

[Mfonini wɔ kratafa 24]

Me ne me mma baanu no nnɛ