Ahenni Adawurubɔfo Bɔ Amanneɛ

Wotuaa Wɔn Gyidi no So Ka

NÁ ƆSOMAFO Paulo yɛ ɔbarima a ɔwɔ gyidi soronko, na ɔhyɛɛ ne mfɛfo gyidifo nso nkuran sɛ wonnya gyidi. Ɔkae sɛ: “Ɛsɛ nea ɔba Onyankopɔn nkyɛn no sɛ ogye di sɛ ɔwɔ hɔ, na ɔyɛ wɔn a wɔhwehwɛ n’akyi kwan no katuafo.” (Hebrifo 11:6) Osuahu ahorow a efi Mozambique yi kyerɛ sɛnea Yehowa tua gyidi a ɛyɛ den so ka na obua mpaebɔ.

• Ná onuawa kunafo bi a ofi Niassa mansin no atifi fam no dwennwen sɛnea ɔbɛyɛ a ɔne ne mma baasia no bɛkɔ “Onyankopɔn Asetra Kwan” Ɔmantam Nhyiam no bi ho. Ɔkwan koro pɛ a na ɔnam so nya sika ne sɛ ɔtɔn nneɛma wɔ wɔn mpɔtam hɔ gua so, nanso bere a nhyiam da no bɛnee no, na wanya sika a ebetumi de ɔne ne mma no afa keteke akɔ nkutoo. Nanso na ɔwɔ Yehowa mu ahotoso na ɔkɔɔ so ara yɛɛ ne nhyehyɛe sɛ ɔbɛkɔ ɔmantam nhyiam no.

Ɔne ne mma baasia no nyinaa foroo keteke no. Bere a wɔrekɔ no ɔkwankyerɛfo no bisaa no tekiti. Ohuu ne lapɛl baagye a ɛbɔ no no, obisaa no nea ɛkyerɛ. Onuawa no ka kyerɛɛ no sɛ ɛkyerɛ sɛ ɔka wɔn a wɔreyɛ Yehowa Adansefo ɔmantam nhyiam no ho. Ɔkwankyerɛfo no bisaa no sɛ “ɛhe na wɔbɛyɛ saa ɔmantam nhyiam no?” Bere a ohui sɛ wɔbɛyɛ nhyiam no wɔ Nampula mansin a efi hɔ kɔ bɛyɛ kilomita 300 no, ogyee no tekiti no bo fã pɛ! Afei ɔsan twaa tekiti a ɔne n’abusua no bɛsan de aba maa wɔn gyee bo no fã. Hwɛ anigye ara a onyae sɛ onyaa Yehowa mu ahotoso!—Dwom 121:1, 2.

• Ɔbea bi a na ɔpɛ nyamesom yiye bɔɔ mpae bɛyɛ mfe 25 srɛɛ Onyankopɔn sɛ ɔnkyerɛ no ɔkwan pa a ɔbɛfa so asom no. Asɔre a na ɔkɔ no de amammerɛ frafraa nyamesom guasodeyɛ mu, na na n’adwenem yɛ no nãa sɛ ebia Onyankopɔn ani sɔ ɔsom a ɛte saa no anaa.

Ɔka sɛ: “Bere nyinaa na mekae asɛm a Yesu kae a ɛwɔ Mateo 7:7 no: ‘Mummisa, na wɔbɛma mo, monhwehwɛ, na mubehu, mompem na wobehiɛ mo.’ Bere a saa kyerɛwsɛm yi wɔ m’adwenem no, mebɔɔ mpae daa sɛ Onyankopɔn nkyerɛ me nokware no. Da koro bi yɛn sɔfo no kae sɛ wɔn a wɔyɛ adwuma wɔ gua so no nyinaa mfa sika bi nka nneɛma a wɔtɔn no bi ho mmrɛ no mma onhyira so. Misusuw sɛ saa adesrɛ yi nnyina Bible no so, enti mamfa hwee ankɔ. Bere a ɔsɔfo no hui sɛ mamfa ‘afɔrebɔde’ amma no, ofii ase didii me atɛm wɔ asɔremma no nyinaa anim. Saa da no mihui sɛ ɛnyɛ ɔkwan a Onyankopɔn pɛ sɛ wɔfa so som no ne no, enti migyaee asɔre no. Ne nyinaa mu no, mekɔɔ so bɔɔ mpae sɛnea mehu nokware no.

“Awiei koraa no, minyaa akokoduru na mekɔɔ me busuani bi a ɔyɛ Yehowa Ɔdansefo hɔ. Ɔmaa me kratawa bi, na bere a mekenkanee no, mihui sɛ Onyankopɔn ama me mpaebɔ no ho mmuae. Bere bi akyi no, me hokafo no nso ani begyee Bible mu nokware no ho, na yɛde yɛn aware no kɔhyɛɛ mmara ase. Nanso akyiri yi, me kunu bɛyaree denneennen. Nanso ansa na ɔrebewu no, ɔhyɛɛ me nkuran sɛ menkɔ so nkura nokware no mu pintinn na ebia yebehyia wɔ Paradise.

“Mede anisɔ da Yehowa ase daa sɛ watie me mpaebɔ na wakyerɛ me ɔkwan pa a mɛfa so asom no. Watie me mpaebɔ no nso efisɛ me mma baawɔtwe no nyinaa abɛyɛ Yehowa asomfo a wɔahyira wɔn ho so.”