Ahenni Adawurubɔfo Bɔ Amanneɛ

“Munim Bible no mu Yiye”

BERE a Yesu a na wadi mfe 12 de akokoduru kasa kyerɛɛ nyamesom akannifo a na wɔwɔ Yerusalem no, ‘ne nyansa ne ne mmuae yɛɛ wɔn a wotiee no nyinaa, nwonwa.’ (Luka 2:47) Saa ara nso na nnɛ, Yehowa asomfo nkumaa pii de akokoduru ka Onyankopɔn ne Bible no ho asɛm kyerɛ wɔn akyerɛkyerɛfo ne wɔn sukuufo, na mpɛn pii no, wonya osuahu ahorow a ɛyɛ anigye.

Ná Tiffany a wadi mfe 14 no wɔ adesuakuw bi mu na na wɔresusuw Bible nkɔmhyɛ a ɛfa adapɛn 70 a ɛyɛ mfe no ho wɔ Daniel 9:24-27. Ɔkyerɛkyerɛfo no de emu nkyerɛkyerɛmu kakraa bi na ɛmae na ɔtotoo nea aka no paapaa so ntɛmntɛm.

Mfiase no, na ɛyɛ Tiffany den sɛ ɔbɛma ne nsa so. Ɔka sɛ: “Biribi nti, na ɛhaw me sɛ wankyerɛkyerɛ nkyekyem no nyinaa mu anwie. Nea mihui ara ne sɛ me nsa wɔ soro.” Ɛyɛɛ ɔkyerɛkyerɛfo no nwonwa sɛ obi wɔ biribi ka wɔ asɛm no ho, efisɛ na adesuafo no mu dodow no ara nte ase papa.

Bere a wɔmaa no kwan sɛ ɔnka nea onim fa nkɔmhyɛ no ho no, Tiffany sɔre gyinaa hɔ kasae a na ɔnhwɛ krataa biara so. Bere a owiei no, na adesuadan no mu hɔ ayɛ dinn. Na ehu aka Tiffany kakra. Afei adesuakuw no bɔɔ wɔn nsam denneennen de kyerɛɛ ho anisɔ.

Ɔkyerɛkyerɛfo no kaa no mpɛn pii sɛ: “Woama me ho adwiriw me, Tiffany, woama me ho adwiriw me.” Ogye toom sɛ na onim sɛ ɛbɛyɛ sɛ nkyerɛkyerɛmu pii wɔ saa nkyekyem no mu, nanso Tiffany ne obi a odi kan a watumi akyerɛkyerɛ mu yiye. Bere a wɔpɔn adesua no, obisaa Tiffany nea ɛyɛe a otumi huu Bible no mu saa.

Obuae sɛ: “Meyɛ Yehowa Adansefo no mu biako. M’awofo kyerɛkyerɛɛ saa nkɔmhyɛ no mu kyerɛɛ me mpɛn pii ansa na merete ase.”

Bible mu nimdeɛ a na ɔwɔ no yɛɛ n’adesuakuw no mufo no nso nwonwa. Osuani biako ka kyerɛɛ Tiffany sɛ: “Afei na mahu nea enti a mo Yehowa Adansefo tumi kɔ afie afie no; efisɛ munim Bible no mu yiye.” Afoforo nso hyɛɛ no bɔ sɛ wɔrenni ne gyidi ho fɛw bio da.

Bere a Tiffany kaa ne suahu no kyerɛɛ n’awofo no, wɔmaa no nyansahyɛ sɛ ɔmfa Nimdeɛ A Ɛde Kɔ Daa Nkwa Mu nhoma no bi nkɔma ne kyerɛkyerɛfo no. Bere a ɔyɛɛ saa na ɔkyerɛɛ no ɔfã a ɛkyerɛkyerɛ Daniel nkɔmhyɛ no mu no, ɔde ahopere gyee nhoma no, daa no ase.

Nokwarem no, sɛ Kristofo mmofra de akokoduru da nea wɔn awofo akyerɛ wɔn fa Onyankopɔn ne Bible no ho adi a, wɔde ayeyi ne nidi ma Yehowa na ɛde nhyira brɛ wɔn ankasa.—Mateo 21:15, 16.