Wɔn A Wɔko Tia Nyankopɔn No Bedi Nkogu!
Wɔn A Wɔko Tia Nyankopɔn No Bedi Nkogu!
“Wɔne wo bedi ako, nanso wɔrentumi wo.”—YEREMIA 1:19.
1. Adwuma bɛn na wɔde maa Yeremia, na n’adwuma no kɔɔ so bere tenten bɛn?
YEHOWA paw aberante Yeremia sɛ ɔnyɛ odiyifo mma amanaman no. (Yeremia 1:5) Eyi sii wɔ ɔhempa Yosia a odii Yuda so no nniso mu. Yeremia nkɔmhyɛ adwuma no kɔɔ so wɔ basabasayɛ bere no mu ansa na Babilon ko faa Yerusalem, na wɔde Onyankopɔn nkurɔfo kɔɔ nnommumfa mu.—Yeremia 1:1-3.
2. Ɔkwan bɛn so na Yehowa hyɛɛ Yeremia den, na ko a na wɔbɛko atia saa odiyifo no kyerɛ dɛn?
2 Ná Onyankopɔn atemmu nsɛm a ɛsɛ sɛ Yeremia ka no bɛma wɔasɔre atia no. Enti, Onyankopɔn hyɛɛ no den wɔ nea na ɛbɛba no ho. (Yeremia 1:8-10) Sɛ nhwɛso no, wɔde nsɛm yi hyɛɛ odiyifo no den: “Wɔne wo bedi ako, nanso wɔrentumi wo, efisɛ midi w’akyi, [Yehowa, NW] asɛm ni, na megye wo.” (Yeremia 1:19) Ko a wɔbɛko atia Yeremia no bɛkyerɛ sɛ wɔreko atia Onyankopɔn. Ɛnnɛ, Yehowa wɔ asomfo kuw bi a wɔte sɛ adiyifo a adwuma a wɔyɛ no te sɛ Yeremia de no. Te sɛ Yeremia no, wɔde akokoduru ka Onyankopɔn nkɔmhyɛ asɛm no. Na asɛm yi fa ankorankoro ne aman nyinaa ho, sɛ wobenya nkwa anaasɛ wɔbɛsɛe wɔn, na ebegyina sɛnea wɔbɛyɛ wɔn ade wɔ ho no so. Sɛnea na ɛte wɔ Yeremia bere so no, nkurɔfo bi wɔ hɔ a wɔko tia Onyankopɔn denam sɔre a wɔsɔre tia n’asomfo ne nnwuma a Onyankopɔn de ama wɔn no so.
Wɔasɔre Atia Yehowa Asomfo
3. Dɛn nti na wɔasɔre atia Yehowa asomfo?
3 Wɔasɔre atia Yehowa nkurɔfo fi afeha a ɛto so 20 no mfiase. Wɔ aman pii mu no, nnipa a wokura adwemmɔne abɔ mmɔden sɛ wobesiw Onyankopɔn Ahenni ho asɛmpaka adwuma no ano—yiw, sɛ wɔbɛma wɔagyae ho dawurubɔ—koraa. Yɛn Tamfo kɛse, Ɔbonsam a ‘ɔnam sɛ gyata a ɔbobom hwehwɛ nea obenya no amene’ no no na opiapia wɔn. (1 Petro 5:8) Bere a “amanaman no bere” baa awiei wɔ afe 1914 mu no, Nyankopɔn de ne Ba no yɛɛ asase so hene foforo, na ɔmaa no ahyɛde sɛ ‘onkodi nkonim wɔ n’atamfo mfinimfini.’ (Luka 21:24; Dwom 110:2) Bere a Kristo de N’ahenni tumi redi dwuma no, ɔpam Satan fii soro ma ɔbaa asase so ha. Esiane sɛ Ɔbonsam nim sɛ ne bere a ɔwɔ yɛ tiaa nti, ne bo afuw Kristofo a wɔasra wɔn no ne wɔn ayɔnkofo no. (Adiyisɛm 12:9, 17) Dɛn na afi ɔsɔretia a wɔn a wɔko tia Onyankopɔn yi de aba wɔn so no mu aba?
4. Sɔhwɛ ahorow bɛn na Yehowa nkurɔfo hyiae wɔ Wiase Ko I no mu, na dɛn na esii wɔ afe 1919 ne 1922 mu?
4 Wɔ Wiase Ko I no mu no, Yehowa nkoa nkaefo a wɔasra wɔn no hyiaa gyidi ho sɔhwɛ pii. Wodii wɔn ho fɛw kekaa wɔn ho nsɛmmɔne, basabasayɛfo pam wɔn, na wɔhwee wɔn. Sɛnea na Yesu aka asie no, wɔbɛyɛɛ nnipa a ‘aman nyinaa tan wɔn.’ (Mateo 24:9) Wɔ ɔko ho anikrakra no mu no, Onyankopɔn Ahenni ho atamfo no faa kwan bi a wɔnam so ko tiaa Yesu Kristo no so. Wodii atoro kae sɛ Yehowa nkurɔfo no tutu ɔman ase, na wɔde wɔn ani sii Nyankopɔn ahyehyɛde a aniwa hu no mu nnipa atitiriw no so. Wɔ May 1918 mu no, aban no de ahyɛde mae sɛ wɔnkyere Ɔwɛn Aban Asafo no titrani, J. F. Rutherford, ne n’ayɔnkofo baason a wɔbɛn no paa no. Wɔkae sɛ wɔmfa mmarima baawɔtwe yi ngu afiase mfe pii, na wɔde wɔn koguu afiase wɔ Atlanta, Georgia, U.S.A. Woyii wɔn wɔ asram akron akyi. Wɔ May 1919 mu no, asɛnnibea a wɔde asɛm no kɔdan wɔn no kyerɛe sɛ wɔanni wɔn asɛm no yiye, ma enti wɔdan atemmu no ani. Wɔhyɛe sɛ wɔbɛsan adi asɛm no, nanso akyiri yi aban no gyaee asɛm no mu, na wobuu Onua Rutherford ne n’ayɔnkofo no bem koraa wɔ atosɛm a wɔka too wɔn so sɛ wotutu ɔman ase no ho. Wɔsan fii wɔn adwuma no ase yɛɛ ɔmantam nhyiam ahorow wɔ Cedar Point, Ohio, wɔ afe 1919 ne 1922 mu, na wɔsan hyɛɛ Ahenni-asɛnka adwuma no mu den bio.
5. Ɔkwan bɛn so na nneɛma kɔɔ so maa Yehowa Adansefo a na wɔwɔ Nasi Germany no?
5 Kankabi nniso sɔree wɔ 1930 mfe no mu, na Germany, Italy, ne Japan ka boom hyehyɛɛ tumidi a wɔtoo din Axis no. Saa mfe no mfiase no, wɔtaa Onyankopɔn nkurɔfo atirimɔden so, titiriw, wɔ Nasi Germany. Wɔbaraa ɔsom no. Wɔhwehwɛɛ anuanom afie mu, kyekyeree emufo. Esiane sɛ wɔampa wɔn gyidi nti, wɔde mpempem pii koguu nneduaban mu. Nea enti a wɔko tiaa Onyankopɔn ne ne nkurɔfo no ne sɛ wɔbɛtɔre Yehowa Adansefo ase wɔ saa katabaako nniso no ase. * Bere a Adansefo no de asɛm no kɔɔ asɛnnibea wɔ Germany sɛ wɔrekɔpere hokwan ahorow a wɔwɔ no, aban no Atemmu Asoɛe kyerɛw krataa tenteenten bi a ɛbɛma wɔahwɛ ahu sɛ Yehowa Adansefo renni nkonim. Ɛkae sɛ: “Ɛnsɛ sɛ asɛnnibea ahorow no gyina mmara so gyaa wɔn; na mmom ɛsɛ sɛ asɛnnibea no hwehwɛ akwan a wɔbɛfa so ayɛ wɔn nnwuma a ɛho hia no, ɛmfa ho mmara mu nsɛnnennen biara a wobehyia.” Ná eyi kyerɛ sɛ wɔremmu wɔn atɛn trenee mu. Nasifo no ka sii so dua sɛ Yehowa Adansefo adwuma no sɛe ade, ɛde ɔtan ba, na ‘ɛsɛe Ɔman.’
6. Mmɔden bɛn na wɔbɔe sɛ wɔbɛma yɛagyae yɛn adwuma no wɔ Wiase Ko II no mu ne akyi?
6 Wɔ Wiase Ko II mu no, wɔbaraa Onyankopɔn nkurɔfo de anohyeto ahorow too wɔn so wɔ Australia, Canada, ne aman foforo a wɔka Britania Adehyeman ho no mu—wɔ Afrika, Asia, Caribbean ne Pacific nsupɔw so. Wɔ United States no, atamfo a wɔwɔ tumi ne nkurɔfo a wɔaka atosɛm akyerɛ wɔn no ‘nam mmara so haw wɔn.’ (Dwom 94:20) Wɔde frankaakyia ne amantam mmara a wɔde baraa afie afie adwuma no ho asɛm kɔɔ asɛnnibea, na bem a wodii wɔ United States asɛnnibea ahorow no ma wonyaa nnyinaso a ɛyɛ den a wɔde hwehwɛɛ ɔsom mu ahofadi. Yehowa nti, atamfo no mmɔdenbɔ ankosi hwee. Bere a ɔko no baa awiei wɔ Europa no, wɔmaa adwuma no ho kwan. Wogyaee Adansefo mpempem pii a wɔde wɔn guu nneduaban mu no, nanso na ɔko no to ntwae. Apuei ne Atɔe famfo aman ntam ntawntawdi no fii ase wɔ Wiase Ko II no akyi pɛɛ. Europa Apuei fam aman de nhyɛso foforo baa Yehowa nkurɔfo so. Aban ahorow yɛɛ nneɛma a ɛbɛma yɛagyae yɛn asɛnka adwuma, Bible ho nhoma a yɛde mema, ne nhyiam ahorow kɔ. Wɔde pii guu afiase anaasɛ adwumayɛban mu.
Asɛnka Adwuma no Kɔ So!
7. Dɛn na Yehowa Adansefo anya wɔ Poland, Russia, ne aman foforo so mfe kakra a abɛsen ni?
7 Mfe bi akyi no, Ahenni ho asɛmpaka adwuma no trɛwee. Wɔ afe 1982 mu no, ɛwom sɛ na Poland wɔ Komunis nniso ase de, nanso wɔmaa kwan ma wɔyɛɛ da koro ɔmantam nhyiam. Wɔyɛɛ amanaman ntam nhyiam wɔ hɔ wɔ afe 1985 mu. Ɛno akyi no wɔyɛɛ amanaman ntam nhyiam akɛse wɔ afe 1989 mu, na mpempem pii fi Russia ne Ukraine kɔɔ bi. Saa afe no ara, Hungary ne Poland gyee Yehowa Adansefo toom wɔ mmara mu. Wobubuu Berlin Ɔfasu no wɔ twabere mu wɔ afe 1989 mu. Asram kakraa bi akyi no, wogyee yɛn toom wɔ mmara mu wɔ East Germany, na ɛno akyi pɛɛ no, wɔyɛɛ amanaman ntam nhyiam wɔ Berlin. Afeha a ɛto so 20 no mfe du a etwa to no mfiase no, wɔbɔɔ mmɔden sɛ wɔne anuanom a wɔwɔ Russia no bedi nkitaho. Anuanom kɔɔ aban mpanyimfo a wɔwɔ Moscow no mu binom nkyɛn, na wogyee Yehowa Adansefo toom wɔ mmara mu wɔ afe 1991 mu. Efi saa bere no, adwuma no atrɛw yiye wɔ Russia, ne afei aman a na wɔka Soviet Union ho no nso mu.
8. Dɛn na ɛtoo Yehowa nkurɔfo wɔ Wiase Ko II no akyi mfirihyia 45 no mu?
8 Bere a ɔtaa ano brɛɛ ase wɔ mmeae bi no, emu yɛɛ den wɔ mmeae foforo. Aman pii ampene sɛ wobegye Yehowa Adansefo atom wɔ mmara mu wɔ mfe 45 a edii wiase ko a ɛto so abien no akyi no mu. Afei nso, wɔbaraa yɛn de wɔn nsa too yɛn adwuma so wɔ aman 23 mu wɔ Afrika, 9 mu wɔ Asia, 8 mu wɔ Europa, 3 mu wɔ Latin Amerika, ne 4 mu wɔ nsupɔw bi so.
9. Tebea bɛn na Yehowa asomfo afa mu wɔ Malawi?
9 Wofii ase taa Yehowa Adansefo a wɔwɔ Malawi no atirimɔden so wɔ afe 1967 mu. Esiane afã biara a yɛn nuanom a wɔwɔ saa ɔman no mu nni sɛ nokware Kristofo no nti, wɔantɔ amanyɔkuw nkrataa no. (Yohane 17:16) Bere a Malawi Congress Amanyɔkuw no yɛɛ nhyiam bi wɔ afe 1972 mu akyi no, wɔsan fii ase yɛɛ wɔn atirimɔdenne no. Wɔpam anuanom no fii wɔn afie mu, na woyii wɔn adi fii adwumam. Mpempem pii guan fii ɔman no mu de peree wɔn nkwa. So wɔn a wɔko tiaa Onyankopɔn ne yɛn nuanom no dii nkonim? Dabida! Bere a nsɛm tebea sakrae no, Ahenni adawurubɔfo a wɔn dodow yɛ 43,767 na wobuu akontaa wɔ Malawi wɔ afe 1999 mu, na nnipa bɛboro 150,000 ne akyi na wɔkɔɔ ɔmantam nhyiam ahorow wɔ hɔ. Wɔasi baa dwumadibea foforo wɔ ahenkurow no mu.
Wɔhwehwɛ sɛ Wobenya Yɛn Ho Asɛm Bi
10. Sɛnea na ɛte wɔ Daniel asɛm no mu no, dɛn na nnɛyi asɔretiafo ayɛ Onyankopɔn nkurɔfo ?
10 Awaefo, asɔfo, ne amammuifo nnaadaafo ntumi nnyina Onyankopɔn Asɛm a yɛka no ano. Esiane sɛ Kristoman asɔre ahorow hyɛ asɔretiafo no nti, wɔahwehwɛ mmara kwan bi a wobegyina so abu wɔn ho bem wɔ ko a wɔko tiaa yɛn no ho. Ɛtɔ mmere bi a, ɔkwan bɛn na wɔfa so? Dɛn na atirisopamfo yɛe de sɔre tiaa odiyifo Daniel? Yɛkenkan wɔ Daniel 6:4, 5 sɛ: “Ɛnna abirɛmpɔn ne amantam ahene no hwehwɛe sɛ wobehu Daniel ho asɛm bi, ahenni no fam; nanso wɔannya asɛm anaa bɔne biara, efisɛ odi nokware, na wonhu ne ho mfomso anaa bɔne biara. Ɛnna mmarima no kae sɛ: Yɛrennya Daniel yi ho asɛm biara, gye sɛ yehu bi ne Nyankopɔn mmara ho.” Ɛnnɛ nso asɔretiafo hwehwɛ sɛ wobenya yɛn ho asɛm bi. Wɔka “ɔsom ahorow a ɛyɛ hu” ho asɛm denneennen, na wɔbɔ mmɔden sɛ wɔbɛka sɛ Yehowa Adansefo ka ho. Wɔnam anototo, akutiabɔ, ne atosɛm ankasa so kasa tia yɛn som ne Onyankopɔn nnyinasosɛm so a yedi no.
11. Atosɛm bɛn na wɔn a wɔsɔre tia Yehowa Adansefo binom akeka?
11 Wɔ aman bi mu no, nyamesomfo ne amammuifo mpɛ sɛ wogye tom sɛ yɛde “onyamesom a ɛho tew na ɛho nni fĩ agya Onyankopɔn anim” bɔ yɛn bra. (Yakobo 1:27) Ɛwom sɛ yɛyɛ yɛn Kristofo adwuma no wɔ aman 234 mu de, nanso yɛn asɔretiafo kyerɛ sɛ, yɛnyɛ “ɔsom a wonim” yɛn. Bere a aka nna kakraa bi ma wɔayɛ amanaman ntam nhyiam wɔ afe 1998 mu no, Athens atesɛm krataa bi kae sɛ Greecefo Ortodɔks asɔfo kyerɛ sɛ, “[Yehowa Adansefo] nyɛ ‘asɔre a wonim,’” ɛmfa ho sɛ na Europa Asɛnnibea a Ɛhwɛ Hokwan Ahorow a Nnipa Wɔ So no aka sɛ yɛyɛ ɔsom a wogye tom no. Nna kakraa bi akyi no, saa kurow no ara mu atesɛm krataa foforo bɔɔ amanneɛ sɛ asɔre bi kasamafo kae sɛ: “[Yehowa Adansefo] ntumi nyɛ ‘Kristofo asafo,’ efisɛ wonnim gyidi a Kristofo wɔ wɔ Yesu Kristo mu no ho hwee.” Eyi yɛ nwonwa, efisɛ ɔsom foforo biara nni hɔ a esi so dua mpɛn pii sɛ wonsuasua Yesu sen Yehowa Adansefo!
12. Bere a yɛreko honhom fam ko no, dɛn na ɛsɛ sɛ yɛyɛ?
12 Yɛbɔ mmɔden sɛ yɛbɛfa mmara kwan so abɔ asɛmpa no ho ban. (Filipifo 1:7) Afei nso, yentumi mpa yɛn gyidi, na yentumi mmrɛ sɛnea yedi Onyankopɔn trenee gyinapɛn so denneennen no nso ase. (Tito 2:10, 12) Te sɛ Yeremia no, ‘yɛbɔ yɛn asen, na yɛka nea Onyankopɔn ahyɛ nyinaa,’ na ɛnsɛ sɛ yɛma wɔn a wɔko tia Onyankopɔn no yi yɛn hu. (Yeremia 1:17, 18) Yehowa Asɛm Kronkron no akyerɛ yɛn ɔkwan pa a yɛmfa so no pefee. Yɛmpɛ sɛ yɛde yɛn ho to “ɔhonam nsa” a enni ahoɔden so, anaasɛ yɛhwehwɛ ‘guankɔbea wɔ Misraim nwini mu,’ a ɛkyerɛ wiase yi mmoa. (2 Beresosɛm 32:8; Yesaia 30:3; 31:1-3) Bere a yɛreko yɛn honhom fam ko no, ɛsɛ sɛ yɛkɔ so de yɛn koma nyinaa to Yehowa so, na yɛma ɔteɛ yɛn akwan, na ɛnsɛ sɛ yɛde yɛn ho to yɛn ankasa nhumu so. (Mmebusɛm 3:5-7) Sɛ Yehowa ammoa yɛn na wanwɛn yɛn a, yɛn nnwuma nyinaa bɛyɛ “kwa.”—Dwom 127:1.
Wɔtaa Wɔn Nanso Wonnyae Mu
13. Dɛn nti na yebetumi aka sɛ Satan ntua a ɔde baa Yesu so no ankosi hwee?
13 Nea ɔyɛɛ ahofama a emu yɛ den ma Yehowa ho nhwɛso a ɛsen biara ne Yesu a wotwaa atoro too no so sɛ otutu ɔman ase na ɔsɛe nhyehyɛe a wɔde asi hɔ no. Bere a Pilato hwehwɛɛ Yesu asɛm no mu wiei no, na ɔpɛ sɛ ogyaa no. Ɛwom sɛ na asɛm biara nni Yesu ho de, nanso nkurɔfokuw no a nyamesom akannifo no piapiaa wɔn no teɛteɛɛm sɛ wɔmmɔ no asɛndua mu. Wɔkae sɛ wonnyaa Baraba—obi a ɔman ase tutu ne awudi nti na wɔde no ato afiase no mmom sen sɛ wobegyaa Yesu! Pilato san bɔɔ mmɔden sɛ ɔbɛma asɔretiafo a wɔnte asɛm ase no asesa wɔn adwene, nanso awiei koraa no, ɔpenee nea ɔmanfo no kae no so. (Luka 23:2, 5, 14, 18-25) Ɛwom sɛ Yesu wui wɔ asɛndua so de, nanso ɔsɔretia a ɛyɛ hu sen biara a Satan de baa Onyankopɔn Ba a ne ho nni asɛm no so no ankosi hwee koraa, efisɛ Yehowa nyanee Yesu, na ɔde no kɔtraa Ne nsa nifa so. Na wɔ Pentekoste afe 33 Y.B. mu no, ɔnam Yesu a ɔhyɛɛ no anuonyam no so hwiee honhom kronkron gui de hyehyɛɛ Kristofo asafo—“abɔde foforo” no.—2 Korintofo 5:17; Asomafo no Nnwuma 2:1-4.
14. Dɛn na ɛbae bere a Yudafo nyamesomfo sɔre tiaa Yesu akyidifo no?
14 Ɛno akyi pɛɛ no, nyamesomfo no hunahunaa asomafo no, nanso saa tete Kristo akyidifo no annyae nea wohui ne nea wɔtee no ho asɛm ka. Yesu asuafo no bɔɔ mpae sɛ: “[Yehowa, NW], hwɛ wɔn ateɛteɛ, na ma wo nkoa mfa nnam nyinaa nka w’asɛm.” (Asomafo no Nnwuma 4:29) Yehowa tiee wɔn mpaebɔ denam honhom kronkron a ɔde hyɛɛ wɔn ma no so, na ɔhyɛɛ wɔn den ma wɔkɔɔ so de akokoduru kaa wɔn asɛm no. Ankyɛ na wɔsan hyɛɛ asomafo no sɛ wonnyae asɛnka no, nanso Petro ne asomafo foforo no buae sɛ: “Ɛsɛ sɛ yetie Onyankopɔn mmom sen nnipa.” (Asomafo no Nnwuma 5:29) Ahunahuna, ɔkyere, ne ɔhwe no ansiw Ahenni adwuma no a wɔbɛtrɛw mu no kwan.
15. Hena ne Gamaliel, na afotu bɛn na ɔde maa nyamesomfo a wɔsɔre tiaa Yesu akyidifo no?
15 Dɛn na nyamesom mu atumfoɔ no yɛe? “Etwiw wɔn na wotuu agyina sɛ wobekum [asomafo no].” Nanso, na Mmarakyerɛfo bi a wɔfrɛ no Gamaliel wɔ hɔ, na na nnipa no nyinaa bu no. Bere a ɔma wɔde asomafo no pue fii Sanhedrin no mu bere tiaa bi no, otuu nyamesomfo asɔretiafo no fo sɛ: “Israel mmarima, monhwɛ mo ho yiye nnipa yi ho wɔ nea mo ne wɔn rebedi yi ho. . . . Mise mo sɛ: Munyi mo ho mfi nnipa yi ho, na munnyaa wɔn! Na sɛ ebia agyina yi anaa adwuma yi fi nnipa a, ɛbɛsɛe. Na sɛ nso efi Onyankopɔn a, muntumi nsɛe wɔn, na moammɛyɛ sɛ mo ne Onyankopɔn po na ɛreko.”—Asomafo no Nnwuma 5:33-39.
Akode Biara a Wɔbɔ Hyɛ Yɛn Renyɛ Yiye
16. Ɔkwan bɛn so na wode w’ankasa nsɛm bɛka awerɛhyem a Yehowa de ama ne nkurɔfo no?
16 Na ntease wɔ Gamaliel afotu no mu, na sɛ nnipa bi kasa ma yɛn saa a, yɛn ani sɔ. Yegye tom nso sɛ atemmufo a wɔnyɛ animhwɛ nam wɔn atemmu so ama ɔsom mu ahofadi atra hɔ. Nokwarem no, Kristoman asɔfo ne Babilon Kɛse no nyamesom akannifo afoforo ani nnye Onyankopɔn Asɛm akyi a yedi no ho. (Adiyisɛm 18:1-3) Ɛwom sɛ wɔne nkurɔfo a wopiapia wɔn no ko tia yɛn de, nanso yɛwɔ saa bɔhyɛ yi sɛ: “Akode biara a wɔbɔ hyɛ wo renyɛ yiye, na tɛkrɛma biara a ɛbɛsɔre ne wo ayi ntɛn no, wobebu no fɔ; ɛno ne [Yehowa, NW] nkoa agyapade ne wɔn trenee a efi me no, [Yehowa, NW] asɛm ni.”—Yesaia 54:17.
17. Ɛwom sɛ asɔretiafo ko tia yɛn de, nanso dɛn nti na yɛwɔ akokoduru?
17 Yɛn atamfo ko tia yɛn bere a yɛnyɛɛ wɔn hwee, nanso yɛn abam mmu. (Dwom 109:1-3) Yɛremma wɔn a wɔmpɛ Bible mu asɛm a yɛka no nhunahuna yɛn mma yennyae yɛn gyidi mu da. Ɛwom sɛ yɛhwɛ kwan sɛ yɛn honhom fam akodi no mu bɛyɛ den de, nanso yenim nea ebefi mu aba. Te sɛ Yeremia no, yebehu nkɔmhyɛ nsɛm yi mmamu: “Wɔne wo bedi ako, nanso wɔrentumi wo, efisɛ midi w’akyi, [Yehowa, NW] asɛm ni, na megye wo.” (Yeremia 1:19) Yiw, yenim sɛ wɔn a wɔko tia Onyankopɔn no bedi nkogu!
[Ase hɔ asɛm]
^ nky. 5 Hwɛ asɛm a ɛne “Wɔde Nokwaredi ne Akokoduru Gyinaa Nasi Nhyɛso Ano” a ɛwɔ nkratafa 24-8 no.
Wubebua Dɛn?
• Dɛn nti na wɔsɔre tia Yehowa asomfo?
• Akwan bɛn so na asɔretiafo ako atia Yehowa nkurɔfo?
• Dɛn nti na yebetumi anya awerɛhyem sɛ wɔn a wɔko tia Onyankopɔn no bedi nkogu?
[Adesua no ho Nsɛmmisa]
[Mfonini wɔ kratafa 17]
Wɔmaa Yeremia awerɛhyem sɛ Yehowa bedi n’akyi
[Mfonini wɔ kratafa 18]
Wɔn a wonyaa wɔn ti didii mu wɔ nneduaban mu
[Mfonini wɔ kratafa 18]
Yehowa Adansefo a wɔreyɛ wɔn basabasa
[Mfonini wɔ kratafa 18]
J. F. Rutherford ne n’ayɔnkofo
[Mfonini wɔ kratafa 21]
Wɔ Yesu asɛm no mu no, wɔn a wɔko tiaa Onyankopɔn no dii nkogu