Nnipa a Woyi Wɔn Wɔ Aegean Po Mu

AEGEAN Po no trɛw kakraa wɔ Mediterranea apuei fam, a Greece asase no ankasa da n’atifi ne n’atɔe fam, supɔw Crete da n’anafo fam, na Turkey da n’apuei fam. Nsupɔw akɛse ne nketewa ayɛ Aegean Po no mu ma, na ɛhɔ na tete anibuei akɛse nyaa ne mfiase. Nsupɔw no ano abotan a ɛyɛ mmonkyemmɔnka a wɔasisi afie nketewa fitafitaa apete so na owia ma ɛhyerɛn no, kaa anwensɛm kyerɛwfo bi ma ɔde totoo “mpɔnkɔ a wɔde abo ayɛ a wɔn kɔn akyi nhwi asɔre” ho.

Ɛnyɛ nwonwa sɛ saa nsupɔw yi abɛyɛ wiase mu mmeae a nkurɔfo kɔ hɔ nsrahwɛ sen biara no mu biako! Su pa a mmarima ne mmea a wɔte hɔ yɛ adwuma wɔ hɔ da no adi no ma ɛhɔ yɛ fɛ kɛse. Saa nkurɔfo yi a wɔyɛ ahobrɛasefo na wɔpɛ ahɔhoyɛ, nanso wɔwɔ ahofadi no ma ɛhɔ yɛ soronko koraa.

Nsupɔw no sofo pii yi mpataa wɔ Aegean Po no mu de hwɛ wɔn ho. Nanso, “mpataayi” foforo a ɛho hia resow aba kɛse wɔ mpɔtam hɔ. “Nnipa yifo,” Onyankopɔn Ahenni ho asɛmpakafo, di akɔneaba wɔ Aegean nsupɔw no so reyɛ nkurɔfo Kristo asuafo.—Mateo 4:18, 19; Luka 5:10.

Bɛyɛ mfeha 19 a atwam ni no, Kristofo asɛmpakafo kɔɔ Aegean nsupɔw no so. Bɛyɛ afe 56 Y.B., bere a na ɔsomafo Paulo fi n’asɛmpatrɛw akwantu a ɛto so abiɛsa mu resan aba ne kurom no, odii nna kakra wɔ nsupɔw Lésvos, Chios, Samos, Kos, ne Rhodes so. Sɛnea na Paulo yɛ ɔsɛmpakafo a ɔyɛ nnam no, ɛbɛyɛ sɛ ɔkaa asɛm kyerɛɛ nsupɔw no sofo. (Asomafo no Nnwuma 20:14, 15, 24; 21:1, 2) Wɔ mfirihyia abien a ɔde daa afiase wɔ Roma akyi no, ɛda adi ankasa sɛ ɔkɔɔ Crete kɔyɛɛ Kristofo som adwuma wɔ hɔ. Bere a afeha a edi kan no reba awiei no, “Onyankopɔn asɛm ne Yesu adanse nti,” wɔde ɔsomafo Yohane kɔɔ supɔw Patmos so. (Adiyisɛm 1:9) Nneɛma rekɔ so dɛn ma nnɛyi asɛmpakafo a wɔwɔ saa nsupɔw yi so no?

Asɛnka Satu Ahorow a Ɛsow Aba

Saa nsupɔw yi so asɛnka yɛ den, na ɔbrɛ wom. Egye mmɔdenbɔ ne ahofama kɛse. Nsupɔw no bi ntam kwan ware. Po so hyɛn ne wimhyɛn taa kɔ ebinom so, nanso ɛnte saa wɔ afoforo ho, titiriw wɔ awɔwbere mu. Ɛpo no tumi yɛ basabasa, titiriw bere a meltemia—atifi fam mframa a ano yɛ den a ɛbɔ bere ne bere mu—rebɔ no. Afei nso, nsupɔw no pii so nkuraase wowɔ akyirikyiri, na ɛhɔ kɔ yɛ den efisɛ mpɛn pii no, ɛyɛ den sɛ wobɛfa ɛhɔnom akwan a wonguu so a mfutuma wɔ so no so. Ahyɛmma nketewa nkutoo na wotumi de kɔ nkuraa no bi ase.

Fa supɔw Icaria sɛ nhwɛso. Ahenni asɛmpa no ho adawurubɔfo 11 a wɔwɔ hɔ asafo ketewaa no mu no ntumi nkɔ nkuraa a ɛwɔ supɔw akɛse ne nketewa a ɛbemmɛn no nyinaa ase. Enti, Kristofo anuanom mmarima ne mmea a wofi Samos ba bɛboa ma wɔka asɛm no kyerɛ Icariafo ne wɔn a wɔwɔ nsupɔw Phournoi, Patmos, ne Lipsos so no. Nnansa yi ara, wɔ nnanu ɔsatu biako a ɛte  saa mu no, Adansefo no tumi de nsɛmma nhoma 650, nhomawa 99, ne nhoma 25 a ɛkyerɛkyerɛ Bible mu nsɛm mu memae! Wɔn ho dwiriw wɔn sɛ wohyiaa nnipa bi a wonnim Yehowa ho hwee, na wɔsrɛɛ wɔn sɛ wɔntra wɔn nkyɛn na wɔnkyerɛkyerɛ wɔn Bible no mu nsɛm pii. Ɔbea bi ka kyerɛɛ Ɔdansefo bi sɛ: “Seesei morekɔ. Nanso meda so ara wɔ Bible ho nsɛmmisa pii. Hena na ɔbɛboa me?” Onuawa Kristoni no hyɛɛ no bɔ sɛ ɔne no bɛkasa telefon so, na ɔne no fii Bible adesua ase wɔ saa kwan no so.

Bere a ɔhwɛfo kwantufo bi kɔsraa Icaria no, ɔyɛɛ nhyehyɛe de dapɛn awiei biako kɔɔ supɔw no nyinaa so. Ɔmaa Ahenni adawurubɔfo bɛyɛ 30 a wofi Samos bɛboae. Anuanom a wɔbɛsraa hɔ no tuaa ahɔhodan a wɔtraa mu wɔ nnanu a wodii wɔ hɔ no ne kar a wogye tuaa ho ka a na emu bi yɛ nea etumi fa ɔkwan a enye so no ho ka. Ná osu kɛse atɔ ama no adi nnanu, na na wɔhwɛ kwan sɛ osu bɛtɔ kɛse dapɛn no awiei. Nanso, anuanom amma eyi ansiw wɔn kwan, wɔkaee nsɛm a ɛwɔ Ɔsɛnkafo 11:4 no: “Nea ɔhwɛ mframa no rengu aba, na nea ɔhwɛ amununkum no rentwa.” Awiei koraa no, wim tewee kakra, na bere a anuanom no kaa wɔn asɛm a ɛho hia no wɔ supɔw no nyinaa so wiei no, wɔde anigye san kɔɔ fie a na wɔn bo atɔ wɔn yam.

Adawurubɔfo 16 a wɔte supɔw Andros so no bɔɔ mmɔden kɛse yɛɛ supɔw no nyinaa so adwuma. Bere a anuanom baanu duu akuraa bi a atew ne ho ase no, na wɔasi wɔn bo sɛ wɔbɛkasa akyerɛ wɔn a wɔte hɔ no nyinaa. Wɔkasa kyerɛɛ nkurɔfo wɔ wɔn afie mu, mmɔnten so, ne mfuw mu. Wɔkɔɔ polisifo adwumam kɔmaa nhoma wɔ hɔ. Bere a na wogye di sɛ wɔne wɔn a wɔwɔ akuraa no ase nyinaa akasa no, wɔyɛe sɛ wobefi hɔ. Bere a wɔrefi kurow no abɔnten so no, wohui sɛ Greecefo Ortodɔks sɔfo bi reba. Bere a wohuu sɛ wonnii no adanse no, wɔmaa no nhoma ketewa bi, na ɔde anigye gyei. Afei wohuu sɛ wommuu wɔn ani nguu obiara so wɔ wɔn asɛnka adwuma no mu!

Wobu Gavdos (anaa Cauda)—supɔw ketewa bi a ɛwɔ Crete ase a nnipa 38 pɛ na wɔte hɔ—no sɛ nea ɛda Europa anafo paa. (Asomafo no Nnwuma 27:16) Ɔhwɛfo kwantufo bi ne ne yere, ne awarefo foforo bi, de nnansa kaa asɛm wɔ hɔ. Nea ɛbɛyɛ na wɔmmɔ ka pii no, wɔdaa ntamadan mu. Wɔkaa asɛmpa no kyerɛɛ ɛhɔfo nyinaa, na anuanom ani gyei sɛ na ɛhɔfo no nni wɔn ho adwemmɔne. Ná wɔntee Yehowa Adansefo ho asɛm—papa anaa bɔne—biara. Ɛhɔfo, ne ɔsɔfo no nyinaa, gyee nhoma 19 ne nhomawa 13. Bere a na Adansefo no te ahyɛmma ketewa bi mu resan akɔ Crete no, ɛpo no yɛɛ basabasa ma ɛde wɔn nkwa too asiane mu. Wɔkae sɛ: “Yɛdaa Yehowa ase sɛ yeduu fie asomdwoe mu, na yɛhyɛɛ no anuonyam nso sɛ wama yɛakɔhyɛ ne din anuonyam wɔ saa Europa anafo hɔ tɔnn.”

Patmos ne supɔw a na ɔsomafo Yohane wɔ so bere a ɔkyerɛw Bible mu nhoma a etwa to, Adiyisɛm, no. Ná Yehowa Dansefo biara nni Patmos de besi nnansa yi ara. Anuanom a wofi Samos de ahwɛyiye yɛɛ asɛnka ho ɔsatu wɔ saa supɔw no so. Ná wonim sɛ wobetumi ahyia ɔsɔretia a emu yɛ den efisɛ supɔw no yɛ baabi a Greecefo Ortodɔks Asɔre no agye ntini ankasa. Ɔbea bi frɛɛ anuanom mmea baanu a na wɔreka asɛmpa no akyerɛ no no kɔɔ ne fie. Ɔbea no kunu kɔɔ so bisae sɛ hena na ɔsomaa anuanom mmea no baa wɔn fie hɔ. Bere a wɔkyerɛkyerɛɛ mu sɛ wɔresrasra ofie biara no, obisae bio sɛ: “Mugye di sɛ  ɛnyɛ ofipamfo bi na ɔmaa mo baa ha?” Ne yere no a na wate Yehowa Adansefo ho asɛm bere a na ɔwɔ Zaire no kaa nea na asi saa anɔpa no kyerɛɛ anuanom mmea no akyiri yi. Ɔkae sɛ: “Na merebɔ Yehowa mpae, sɛnea na metaa yɛ no, sɛ ɔmma Adansefo mmra supɔw no so. Me kunu serew me. Bere a mihuu mo wɔ ɔpon no ano no, me ne me kunu nyinaa ho dwiriw yɛn. Ɛno nti na ɔkɔɔ so bisaa mo nea ɔmaa mo baa yɛn fie no.” Wɔne ɔbea no fii Bible adesua ase ntɛm ara. Wɔde telefon yɛɛ adesua no asram du, ɛwom sɛ eyi gyee onuawa no ne ɔbea onigyeni no nyinaa sika pii de. Wɔbɔɔ ɔbea no asu, na mprempren ɔno nkutoo ne Ɔdansefo a ɔwɔ saa supɔw a wɔde ɔsomafo Yohane nkutoo kɔtoo so mfirihyia 1,900 a atwam ni no so.

“Mpataayi” Wɔ Ahyɛn Gyinabea

Edu ahohuru bere a, po so ahyɛn gyina Aegean nsupɔw so ahyɛn gyinabea hɔ de nkurɔfo a wɔrebedi akwamma wɔ hɔ ba. Enti, Yehowa Adansefo nya hokwan soronko ne nnipa a wofi aman ne kasa horow mu kasa. Asafo horow a ɛwɔ hɔ no gye Bible ho nhoma wɔ kasa horow mu, na adawurubɔfo no de nsɛmma nhoma mpempem pii ma nkurɔfo a wɔba hɔ nsrahwɛ no. Po so ahyɛn bi kɔ ahyɛn gyinabea biako no ara dapɛn biara, na ɛma anuanom nya hokwan a ɛfata yɛ sankɔhwɛ ahorow, na mpo wɔne po so ahyɛn mu adwumayɛfo no binom yɛ Bible adesua.

Wɔ afe 1996 ahohuru bere mu no, onuawa bi a ɔyɛ bere nyinaa somfo wɔ Rhodes supɔw no so dii Jamaicani aberante bi a ɔyɛ adwuma wɔ po so hyɛn bi a ɛba saa hyɛn gyinabea hɔ Fida biara mu adanse. Fida a edi hɔ no, wɔtoo nsa frɛɛ ɔbarima no ma ɔkɔɔ ɔmantam nhyiam bi a wɔyɛe wɔ supɔw no so ase. Bere a na okura Engiresi kasa mu Bible no, onuawa kwampaefo no boaa no ma ɔtee Bible mu nokware ahorow a wɔkaa ho asɛm wɔ dwumadi no mu no bi ase. Ɔdɔ ne anigye a Adansefo no daa no adi wɔ nhyiam no ase no kaa ɔbarima no kɛse. Fida a edi hɔ no, ɔtoo nsa frɛɛ akwampaefo baanu kɔɔ po so hyɛn no mu. Akwampaefo no de nhoma a ɛwɔ Engiresi ne Spania kasa mu kɔe. Annu dɔnhwerew biako na wɔn nhoma a wɔde redi adanse no sae! Jamaicani aberante no suaa Bible no Fida biara kosii sɛ ahohuru bere no twaam. Ɔsan baa hɔ ahohuru bere a edi  hɔ no, na wasiesie ne ho sɛ ɔbɛsan afi n’adesua no ase. Nanso, saa bere yi de ɔsesaa n’adwuma sɛnea ɛbɛyɛ a obetumi anya honhom fam nkɔso. Afei, ɔsan kɔe. Hwɛ sɛnea anuanom a wɔwɔ Rhodes no ani gyei bere a wɔtee sɛ saa aberante yi bɔɔ asu wɔ afe 1998 mfiase no!

Woyi “Mpataa” a Wokyinkyin

Mpataa pii a wokyinkyin te sɛ mmane ne yaa anofeaa taa twam ba Aegean Po mu bɛtɔ mpataayifo a wɔn ho akokwaw asau mu paa. Saa ara na Ahenni asɛmpakafo nya adwumayɛfo a wotutu akwan fi Europa Apuei fam aman pii mu ba Greece no mu komapafo pii.

Bere a edi kan a Rezi kenkan Yehowa ne n’atirimpɔw ahorow ho nsɛm wɔ Ɔwɛn-Aban ne Nyan! mu no, na wadi mfirihyia du. Ná ɔwɔ Albania. Mfirihyia abiɛsa akyi no, ɔne n’abusua tu kɔɔ Rhodes supɔw no so. Da koro, Rezi bɔɔ Yehowa mpae sɛ ɔmmoa no mma onhu Ne nkurɔfo wɔ ne kurow foforo yi mu. Ade kyee no, ne papa de saa nsɛmma nhoma no, Ɔwɛn-Aban ne Nyan!, baa fie maa Rezi ani gyei. Rezi huu onuawa a ɔde nsɛmma nhoma maa ne papa no, na ankyɛ na wofii ase suaa Nimdeɛ a Ɛde Kɔ Daa Nkwa Mu nhoma no. Ɛtɔ mmere bi a na ɔsrɛ sɛ wonsua nhoma no mprɛnsa da no ara! Asram abien akyi no, ɔbɛyɛɛ ɔdawurubɔfo a wɔmmɔɔ no asu, na March 1998 mu no, wɔbɔɔ no asu bere a na wadi mfirihyia 14. Saa da no ara, ofii ase yɛɛ akwampaefo aboafo adwuma, na asram asia akyi no, ɔde ne ho hyɛɛ daa akwampae, anaa bere nyinaa som adwuma mu.

Ná onua bi a ɔwɔ Kos supɔw no so ne nkurɔfo bi a wofi Russia resua ade. Bere a obisaa wɔn sɛ ebia wɔwɔ nnamfo bi a wɔn ani begye Bible adesua ho no, wɔde no kɔɔ Armeniafo awarefo bi—Leonidas ne ne yere, Ophelia—nkyɛn wɔ akuraa bi a ɛwɔ akyiri bɛyɛ kilomita 30 ase. Anuanom no kohuu anwonwasɛm. Armeniafo awarefo no de bag a Armenia ne Russia Bible ho nhoma a Ɔwɛn Aban Asafo no atintim ayɛ no ma bɛkyerɛɛ wɔn! Wɔkae sɛ wɔne Yehowa Adansefo asua Bible, na wɔanya nkɔso adu baabi a anka wɔrebɛyɛ adawurubɔfo a wɔmmɔɔ wɔn asu. Nanso, esiane amammui mu basabasayɛ ne sikasɛm mu nsɛnnennen nti, na ɛsɛ sɛ wofi wɔn kurom. Bere a woduu Kos pɛ na wɔne Leonidas maame ne ne nuabea a na wɔwɔ hɔ dedaw fii adesua ase. Adansefo no nyaa Bible adesua foforo abiɛsa ntɛm ara—wɔne Ophelia yɛɛ biako, Leonidas yɛɛ biako, na wɔne ne maame ne ne nuabea no nso yɛɛ biako. Na eyi hwehwɛ sɛ wɔde moto twa kwan kilomita 30 di akɔneaba mprɛnsa dapɛn biara. Leonidas ne ne yere bɔɔ asu asram bi akyi. Hwɛ akatua a efii ahofama honhom a ɛhɔnom anuanom daa no adi mu bae!

Yehowa na Ɔma Enyin

Yehowa nhyira ada adi wɔ mmɔden kɛse a Ahenni adawurubɔfo bɛboro 2,000 a wɔwɔ saa Aegean nsupɔw yi so abɔ no so. Mprempren Yehowa Adansefo asafo ahorow 44 ne akuw 25 na ɛwɔ hɔ. Akuw no mu 17 na wɔde aman foforo so kasa horow di dwuma, efisɛ Yehowa pɛ ne sɛ “wogye nnipa nyinaa nkwa na wɔba nokware nimdeɛ mu.” (1 Timoteo 2:4) Afei nso, akwampaefo atitiriw 13 na wɔrebɔ wɔn ho mmɔden sɛ wobedu nnipa pii nkyɛn wɔ nsasesin a atew ne ho no mu.

Mfehaha pii ni na Aegean Po no so ayɛ baabi a amammerɛ ne aguadi akɔ so. Nnansa yi, abɛyɛ baabi a nsrahwɛfo ɔpehaha pii kogye wɔn ahome. Nanso, nea ɛho hia kɛse no, sɛ́ “nnipa yifo” no, Ahenni adawurubɔfo no anya nnipa komapafo pii a wɔn ani gye ho sɛ wɔbɛkamfo Yehowa, wɔ saa nsupɔw yi so. Wɔn nyinaa de anigye agye nkɔmhyɛ kwan so nsato no so: “Wɔnhyɛ [Yehowa, NW] anuonyam, na wɔnka n’ayeyi nsu ano aman mu.”—Yesaia 42:12.

[Asase mfonini wɔ kratafa 22]

(Wopɛ nsɛm a wɔahyehyɛ awie no a, hwɛ nhoma no mu)

Aegean Po

GREECE

Lésvos

Chios

Samos

Icaria

Phournoi

Patmos

Kos

Rhodes

Crete

TURKEY

[Mfonini wɔ kratafa 24]

Lésvos Supɔw

[Mfonini wɔ kratafa 24]

Patmos Supɔw

[Mfonini wɔ kratafa 24]

Crete Supɔw