So Wokae?

So w’ani agye Ɔwɛn-Aban a aba nnansa yi no akenkan ho? Sɛ ɛte saa a, hwɛ sɛ wubetumi abua nsɛmmisa a edidi so yi a:

• Dɛn na amma anyɛ den sɛ wobegye Buronya atom wɔ Korea?

Na tete gyidi bi wɔ Korea ne aman foforo bi so a ɛfa gyaade nyame a na wosusuw sɛ ɔfa wusikwan mu de akyɛde ahorow ba December mu ho. Afei nso, Wiase Ko II akyi no, U.S. asraafo de akyɛde ne mmoa mae wɔ ɛhɔnom asɔredan ahorow mu.—12/15, nkratafa 4, 5.

• Wɔ Yesaia 21:8 mmamu mu no, “ɔwɛnfo” bɛn na Onyankopɔn anya wɔ yɛn bere yi mu?

Kristofo a wɔde honhom asra wɔn a wɔresom sɛ awɛnfo kuw no ama nkurɔfo ate ase sɛ nsɛm a ɛresisi wiase no yɛ Bible nkɔmhyɛ a ɛrenya mmamu. Wɔaboa wɔn Bible asuafo nso ma wɔahu nkyerɛkyerɛ ne nneyɛe ahorow a ennyina Kyerɛwnsɛm so ma wɔatwe wɔn ho afi ho.—1/1, nkratafa 8, 9.

• Na henanom ne “Poland Anuanom” no?

Na wɔyɛ nyamesom kuw ketewaa bi a na wɔwɔ Poland wɔ afeha a ɛto so 16 ne 17 no mu a wɔhyɛɛ Bible no mu nsɛm akyi a wobedi ho nkuran, ma enti wɔpoo asɔre nkyerɛkyerɛ ahorow a na ɛwɔ hɔ te sɛ Baasakoro, nkokoaa asubɔ, ne hellgya. Bere kɔɔ so no, wɔtaa wɔn denneennen ma wɔhwete kɔɔ aman foforo so.—1/1, nkratafa 21-3.

• Dɛn nti na ɛsɛ sɛ yɛde yɛn ho to Bible nkɔmhyɛ ahorow so mmom sen sɛ yɛde yɛn ho bɛto nyansahufo a wɔka nsɛm a ɛbɛba daakye anaa nsoromma mu ahwɛfo nsɛm so?

Abɛda adi sɛ yentumi mfa yɛn ho nto wɔn a wɔkyerɛ sɛ wɔyɛ adiyifo no nsɛm so efisɛ wobu wɔn ani gu Yehowa ne Bible so. Bible nkɔmhyɛ ahorow nkutoo na ebetumi aboa wo ma woahu sɛnea nsɛm a ɛresisi no ne Onyankopɔn atirimpɔw hyia, na ama ɛso aba wo ne w’abusua mfaso daa.—1/15, kratafa 3.

• Adanse horow a ɛda no adi sɛ yɛte nna a edi akyiri no mu bi ne dɛn?

Yetumi hu nea afi Satan a wotuu no fii soro no mu aba no. (Adiyisɛm 12:9) Yɛte ‘ɔhene’ a otwa to a wɔkaa ne ho asɛm wɔ Adiyisɛm 17:9-11 no bere so. Kristofo a wɔasra wɔn ampa no dodow so retew, nanso ɛda adi sɛ ahohiahia kɛse no befi ase bere a wɔn mu binom da so ara wɔ asase so.—1/15, nkratafa 12, 13.

• Bere bɛn na wɔkyerɛw Habakuk nhoma no, na dɛn nti na ɛsɛ sɛ yɛma ɛho hia yɛn?

Wɔkyerɛw Bible nhoma yi bɛyɛ afe 628 A.Y.B. Yehowa atemmu a etia Yuda ne Babilon ho nsɛm na ɛwɔ mu. Ɛka Onyankopɔn atemmu a ɛbɛba nhyehyɛe bɔne a ɛwɔ hɔ mprempren yi so nnansa yi ara no nso ho asɛm.—2/1, kratafa 8.

• Bible fa he na yebetumi ahu ɛna bi afotu a nyansa wom a wɔde ma ɔyepanom?

Mmebusɛm nhoma no ti a etwa to, ti 31, ne beae a ɛfata a yebetumi ahu afotu a ɛte saa.—2/1, nkratafa 30, 31.

• Dɛn nti na yɛn ani betumi agye sɛ Yehowa ada “Kristo adwene” adi akyerɛ yɛn? (1 Korintofo 2:16)

Yehowa nam Asɛmpa no kyerɛwtohɔ so ama yɛahu Yesu nsusuwii, ne nkate, ne dwumadi, ne nneɛma a ɛho hia no sen biara. Eyi betumi aboa yɛn ma yɛasɛ Yesu kɛse, titiriw, wɔ sɛnea yesi asɛnka adwuma a egye nkwa no so dua mu.—2/15, kratafa 25.

• So Onyankopɔn bua mpaebɔ nnɛ?

Yiw. Ɛwom sɛ Bible da no adi sɛ ɛnyɛ mpaebɔ nyinaa na Onyankopɔn bua de, nanso nsɛm a asisi nnansa yi da no adi sɛ watie nkurɔfo a wɔabɔ mpae ahwehwɛ awerɛkyekye ne mmoa wɔ nneɛma te sɛ aware mu nsɛnnennen ho nsiesie mu no.—3/1, nkratafa 3-7.

• Dɛn na yebetumi ayɛ na ama yɛanya Onyankopɔn ahoɔden?

Yebetumi abisa wɔ mpaebɔ mu, anya honhom fam ahoɔden afi Bible mu, na yɛnam Kristofo fekubɔ so anya denhyɛ.—3/1, nkratafa 15, 16.

• Ɔkwan bɛn so na awofo betumi aboa wɔn mma ma wɔanya Kristofo nhyiam horow so mfaso kɛse?

Wobetumi aboa wɔn sɛnea ɛbɛyɛ a wɔrenna, ebia wɔbɛhwɛ ma wɔadi kan ada. Wobetumi ahyɛ mmofra no nkuran ma wɔakyerɛw “nsɛm” agu hɔ denam nsɛmfua anaa din ahorow a wɔtaa te a wɔbɛkyerɛw bere biara a wɔbɛbɔ din no so.—3/15, nkratafa 17, 18.

• Dɛn ne nneɛma bi a yebetumi asua afi Hiob nhwɛso no mu?

Hiob de ɔne Onyankopɔn ntam abusuabɔ dii kan, ɔne ne mfɛfo nnipa dii no trenee mu, bɔɔ mmɔden dii nokware maa ne hokafo wɔ aware mu, n’abusua honhom fam yiyedi ho hiaa no, na ɔde nokwaredi gyinaa sɔhwɛ mu kosii ase.—3/15, nkratafa 25-7.

• So ahintasɛm bi wɔ Bible mu a ɛma wɔte sɛnkyerɛnne kwan so nsɛm ase?

Dabi. Wobetumi aka ahintasɛm a ɛte saa afa wiase nhoma ahorow bi ho. Nsonsonoe a ɛwɔ sɛnea wɔkyerɛw Hebri nsaano nkyerɛwee mu nsɛmfua mu no ma ahintasɛm a wɔkyerɛ sɛ ɛwɔ Bible mu no bɛyɛ nea ntease nnim.—4/1, nkratafa 30, 31.