Yɛyɛ Wɔn A Wɔwɔ Gyidi

Bible Adesua a Wɔde Hyɛ Gyidi Den Wɔ India

EFI Himalaya Mmepɔw akɛse a sukyerɛmma wɔ so a ɛwɔ atifi fam kosi India Po no ano a tutuw wɔ hɔ a ɛwɔ anafo fam no, India yɛ asase a ɛso nneɛma gu ahorow wɔ asase ho nsɛm ne nyamesom mu. Emu nnipa a wɔn dodow boro ɔpepepem biako no mu bɛyɛ ɔha mu 83 yɛ Hindufo, ɔha mu 11 yɛ Nkramofo, na wɔn a aka no yɛ nkurɔfo a wɔfrɛ wɔn ho Kristofo, Sikhfo, Buddhafo, ne Jainfo. Wɔn nyinaa wɔ nyamesom mu ahofadi. The World Book Encyclopedia ka sɛ: “Nyamesom di dwuma titiriw wɔ Indiafo asetra mu.”

Wɔn a wɔtra ase ma ɛne wɔn Kristofo gyidi hyia wɔ India ne Yehowa Adansefo a wɔn dodow boro 21,200 no. Te sɛ wɔn honhom fam mfɛfo a wɔwɔ wiase afã foforo no, Adansefo a wɔwɔ India no bu no sɛ ɛyɛ hokwan a wɔanya sɛ wɔbɛboa wɔn afipamfo ma wɔanya Onyankopɔn Asɛm, Kyerɛw Kronkron Bible, mu gyidi a ɛyɛ den. (2 Timoteo 3:16, 17) Susuw sɛnea abusua bi a ɛwɔ Chennai, wɔ India anafo fam no benyaa Bible mu nokware ho nimdeɛ ho hwɛ.

Ansa na abusua yi rebehu Yehowa Adansefo no, na wɔde wɔn ho ahyɛ Katolekfo honhonsɔre fekuw bi mu denneennen, a na wɔkyerɛ sɛ wonya anisoadehu, ka kasa foforo, na wɔsa yare. Na wɔagye din wɔ asɔre no mu ne wɔn mpɔtam hɔ, a na nkurɔfo mpo frɛ abusua no mufo bi “swami,” a ɛkyerɛ “ɔkyerɛkyerɛfo.” Afei, da koro bi, Ɔdansefo bi kɔsraa abusua no, na ofii Bible mu kyerɛɛ wɔn sɛ Yesu yɛ Onyankopɔn Ba, na ɔnyɛ Ade Nyinaa So Tumfoɔ, sɛnea nnipa pii gye di no. Ɔdansefo no san kyerɛɛ wɔn sɛ Onyankopɔn din ne Yehowa, na Yehowa atirimpɔw ma asase ne sɛ ɔbɛyɛ no paradise fɛfɛɛfɛ.—Dwom 83:18; Luka 23:43; Yohane 3:16.

Esiane sɛ na wɔwɔ obu ma Onyankopɔn Asɛm, na wɔn ani gyee nea wɔtee no ho nti, abusua yi mufo penee so sɛ wɔne Yehowa Adansefo bɛyɛ Bible adesua daa. Eyi maa wɔn asɔre mu amannifo dii wɔn ho fɛw. Nanso, abusua no sii nketekrakye sɛ wɔrennyae wɔn Bible adesua no. Bere a wɔn nimdeɛ nyaa nkɔanim na wɔn gyidi yɛɛ den no, wogyaee atoro som mu nneyɛe no akyidi. Ɛnnɛ, abusua yi mufo baasa yɛ Adansefo a wɔabɔ asu a wɔyɛ nsi, na bere biara a ɛna no benya kwan no, ɔsom sɛ akwampaefo boafo.

Gyidi a Wɔde Bedi Mmerɛwyɛ So

Ná Sunder Lal, aberante bi a ɔte Punjab akuraa bi ase hia gyidi ne akokoduru kɛse na ama watumi aka Onyankopɔn Ahenni ho asɛmpa no akyerɛ afoforo. (Mateo 24:14) Ade biako ne sɛ, na wagyae n’abusua ne n’akuraa hɔ anyame pii som abɛsom Yehowa, nokware Nyankopɔn no. Afei nso, na Sunder Lal nan abien nyinaa atwitwa.

Ɛde besi afe 1992 no, na ade biako na Sunder Lal yɛ wɔ n’asetra mu. Ná ɔyɛ adwuma sɛ oduruyɛfo boafo, na na ɔne n’ankasa abusua bom som anyame pii wɔ wɔn nyamekyerɛfo bi a wɔapaw no akwankyerɛ ase. Afei da koro anadwo, ɔhwee ase bere a na ɔretwa keteke kwan mu. Keteke faa no so twitwaa ne nan abien nyinaa. Ɛwom sɛ wanwu de, nanso n’asetra sɛee koraa. Sɛnea ntease  wom no, Sunder Lal werɛ howee kɛse, na ɔbɔɔ ne tirim mpo sɛ obekum ne ho. N’abusuafo boaa no, nanso na onni daakye ho anidaso biara.

Afei Yehowa Ɔdansefo bi kɔɔ Sunder Lal nkyɛn fi Bible mu kyerɛɛ no sɛ Onyankopɔn ahyɛ bɔ sɛ ɔbɛyɛ asase paradise a anigye wom, na ɔbɛma wɔn a wɔdɔ no na wosuro no nyinaa anya akwahosan a edi mũ. Sunder Lal penee Bible adesua so, na ɔde afe biako suaa ade denneennen. Wɔtoo nsa frɛɛ no kɔɔ Kristofo nhyiam ahorow, na awiei koraa no, na ɔtra n’adamfo bi sakre akyi kɔ. Ɛwom sɛ na sakre no so tra yɛ yaw de, nanso onyaa so mfaso kɛse. Ohuu nea na wasua wɔ ne kokoam Bible adesua mu no ankasa, bere a ohyiaa afoforo a wɔwɔ Onyankopɔn Asɛm mu bɔhyɛ ahorow mu gyidi, na wɔmaa wɔn asetra ne Bible nkyerɛkyerɛ hyiae no.

Sunder Lal fii ase kaa asɛmpa no kyerɛɛ n’afipamfo, na ɔbɔɔ asu wɔ afe 1995 mu. Nea edi kan no, ɔtwee ne ho ase, sɛnea na ɔyɛ nantew daa no, kɔɔ afie afie wɔ akuraa no ase. Nanso, mprempren ne honhom fam anuanom no ama no akyɛde bi—sakre a ɛwɔ nan abiɛsa a wayɛ ma wɔde nsa “kyinkyim.” Esiane ne sakre no nti, otumi yɛ nneɛma pii, na ɔno ankasa tumi twa kwan kilomita dumien kɔ asafo nhyiam ahorow. Ɛtɔ da bi a, ɔde sakre no fa nsu kɛse a ɛretɔ mu; ɛne bere a ɛhɔ wim hyew boro digrii Celsius 43 no.

Asafo nhyiam ahorow a Sunder Lal kɔ akyi no, ɔne afoforo pii a wɔhwehwɛ mmoa a ɛbɛma wɔanya nokware Nyankopɔn, Yehowa, mu gyidi a ɛyɛ den yɛ Bible adesua. Nokwarem no, ne kan Bible asuafo baason, ne nnipa foforo baasa a ofii ase dii wɔn adanse a ne mfɛfo Adansefo ne wɔn suaa Bible no, abɔ asu mprempren.

Sɛnea Bible kyerɛ no, “ɛnyɛ nnipa nyinaa na wɔwɔ gyidi.” (2 Tesalonikafo 3:2) Nanso, wɔn a ‘wɔpɛ daa nkwa’ no fam de, Onyankopɔn Asɛm a wobesua no daa no betumi ama wɔanya gyidi a ɛyɛ den. (Asomafo no Nnwuma 13:48) Adesua a ɛte saa nso ma wɔde anigye hwɛ daakye a ɛyɛ anigye kwan—biribi a Indiafo dodow no ara renya mu gyidi.

[Asase mfonini wɔ kratafa 30]

(Wopɛ nsɛm a wɔahyehyɛ awie no a, hwɛ nhoma no mu)

AFGANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Asɛm Fibea]

Mountain High Maps® Copyright © 1997 Digital Wisdom, Inc.