Nnwom a Ɛsɔ Onyankopɔn Ani

Wɔaka nnwom ho asɛm sɛ “ade a akyɛ sen biara wɔ adwini pa nyinaa mu.” Te sɛ kasa no, ɛyɛ akyɛde soronko a ɛma nnipa da nsow koraa fi mmoa ho. Nnwom kanyan nkurɔfo nkate. Ebetumi ayɛ w’asom dɛdɛɛdɛ, atra w’adwenem, na nea ɛsen biara no, nnwom betumi asɔ Onyankopɔn ani.

SƐNEA Bible kyerɛ no, na Israelfo no yɛ nkurɔfo a wonim dwonto. Unger’s Bible Dictionary ka sɛ, na nnwom yɛ “adwini kɛse wɔ tete Bible mmere mu.” Sɛ́ wɔn asetra fã no, da biara na wɔde wɔn nne ne sanku so dwom di dwuma wɔ wɔn som mu. Nanso na ɛyɛ nnipa nne titiriw na wɔtaa de bɔ nnwom.

Ɔhene Dawid yii Lewifo no mu bi “maa wodii dwonto anim” wɔ ntamadan no mu kosii sɛ wohyiraa asɔrefie a ne ba Salomo sii no so. (1 Beresosɛm 6:31, 32) Bere a wɔde apam adaka a na egyina hɔ ma wɔ a Yehowa wɔ wɔn ntam no duu Yerusalem no, Dawid yɛɛ nhyehyɛe maa Lewifo no mu bi sɛ “wɔnkamfo [Yehowa, NW] Israel Nyankopɔn nna no ase nyi no ayɛ.” Wɔde “mmɛnta asanku ne nsankuten, . . . nnawuru a egyigye, . . . ntorobɛnto” kaa wɔn nne a wɔde yi Yehowa ayɛ no ho. “Wɔpaw” mmarima a “wɔbobɔɔ wɔn din no nkae, sɛ wɔnna [Yehowa, NW] ase, sɛ n’adɔe wɔ hɔ daa.”—1 Beresosɛm 16:4-6, 41; 25:1.

Asɛm ‘Yehowa adɔe wɔ hɔ daa’ a wɔtaa tĩ mu no pue mpɛn pii wɔ Nnwom, Bible nhoma a nnwom ayɛ mu ma no mu. Sɛ nhwɛso no, ɛno na wɔde twa Dwom 136 nkyekyem ahorow 26 no biara to. Bible ho ɔbenfo bi ka sɛ “sɛnea  ɛyɛ tiawa no ma nkurɔfo ano tɔ so. Obiara a wɔate pɛn no betumi akae.”

Nnwom no atifi nsɛm no ma yehu sɛnea na wɔde nnwinnade a wɔde bɔ nnwom di dwuma. Dwom 150 bobɔ ntorobɛnto, sankuten, mpintin, atɛntɛbɛn ne nnawuru din. Nanso emu nea edi mũ paa ne nnipa nne. Nkyekyem 6 hyɛ sɛ: “Momma nea ɛhome nyinaa nyi Yah ayɛ. Munyi [Yah, NW] ayɛ!”

Esiane sɛ nnwom da yɛn nkate adi nti, nsɛm a na ɛyɛ awerɛhow wɔ Bible mmere mu no ma wotwaa kwadwom ahorow. Nanso na saa nnwom yi nnɔɔso wɔ Israelfo nnwom a wɔahyehyɛ mu. Bible nhoma a ɛka nneɛma pii ho nsɛm Insight on the Scriptures * ka sɛ, “kwadwom mu nkutoo na ɛfata sɛ wotwa agyaadwo na ɛnyɛ nnwom a wɔto gye ani anaa nnwom a ɛyɛ dɛ mu.”

Yesu ne n’asomafo anokwafo no too ayeyi dwom maa Yehowa anadwo ansa na Yesu rebewu no, a akyinnye biara nni ho sɛ emu nsɛm no fi Hallel Nnwom no mu. (Dwom 113-118) Hwɛ sɛnea na eyi bɛhyɛ Yesu asuafo no den ma wɔagyina hwere a wɔbɛhwere wɔn Wura no ano! Nea ɛsen saa no, wɔn tirim a na wɔabɔ sɛ wɔbɛyɛ Amansan Hene Yehowa asomfo anokwafo no mu yɛɛ den bere a wotĩĩ mu mpɛn anum sɛ, “n’adɔe wɔ hɔ daa” no.—Dwom 118:1-4, 29.

Tete Kristofo a na wɔwɔ Efeso ne Kolose no too “sanku so nnwom ne ayeyi nnwom” (honhom mu “nnwom”) maa Onyankopɔn. Wɔde “honhom mu nnwom” kaa nnwom a na wofi komam to no ho. (Efesofo 5:19; Kolosefo 3:16) Wɔ dwonto ne kasa nyinaa mu no wɔde wɔn ano yii no ayɛ. So Yesu anka sɛ “nea ayɛ koma ma abu so no na ano ka”?—Mateo 12:34.

Nnwom a Ɛnsɔ Onyankopɔn Ani

Ɛnyɛ nnwom a wɔaka ho asɛm wɔ Bible mu no nyinaa na ɛsɔɔ Onyankopɔn ani. Susuw nea esii wɔ Bepɔw Sinai ho bere a na Mose regye Mmara, a na Mmara nsɛm Du ka ho no ho hwɛ. Bere a Mose resian afi bepɔw no so no, dɛn na ɔtee? “Ɛnyɛ nkonimdi ho sebɔ gyegyeegye na ɛnyɛ nkogu ho nteɛm gyegyeegye, na mmom dwomsogye gyegyeegye.” Ná eyi yɛ nnwom a ɛfa abosonsom ho, ade a ɛhyɛɛ Onyankopɔn abufuw na ɛmaa nnwontofo no mu 3,000 wuwui.—Exodus 32:18, 25-28.

Ɛwom sɛ nnipa tumi hyehyɛ nnwom, bɔ nnwom, nya ho anigye de, nanso ɛno nkyerɛ sɛ ne nyinaa sɔ Onyankopɔn ani. Dɛn nti na ɛnte saa? Kristoni somafo Paulo kyerɛkyerɛ mu sɛ: “Wɔn nyinaa ayɛ bɔne, na Onyankopɔn anuonyam abɔ wɔn.” (Romafo 3:23) Wɔtaa de abosonsom abawo ho amanne, nnipa kra a enwu da nkyerɛkyerɛ, ne nidi a wɔde ma Maria sɛ “Onyankopɔn ne nã” no hyehyɛ nnwom. Nanso gyidi ne nneyɛe a ɛtete saa no nsɔ nokware Onyankopɔn ani, efisɛ ɛne nea wɔada no adi wɔ N’asɛm Bible mu no bɔ abira koraa.—Deuteronomium 18:10-12; Hesekiel 18:4; Luka 1:35, 38.

Nyansam a Obi Befi Apaw Nnwom

Ɛnyɛ mmerɛw sɛ wobɛpaw nnwom a abu so no mu bi. Wɔasiesie compact discs akyi nnuraho sɛnea ɛbɛtwetwe nkurɔfo ma wɔatɔ nnwom biara a wɔakyerɛw. Nanso sɛ Onyankopɔn somfo pɛ sɛ ɔsɔ N’ani a, ɛsɛ sɛ ɔyɛ ahwɛyiye na ofi nyansam kwati nnwom a wɔde ano ne sanku to a efi atoro nyamesom gyidi mu anaa ɛtwe adwene si ɔbrasɛe ne adaemone dwumadi so no.

Albert a wasom sɛ Kristoni ɔsɛmpatrɛwfo wɔ Afrika pɛn no gye tom sɛ, wannya hokwan pii amfa ammɔ adakabɛn wɔ hɔ. Nanso, otiee nnwom a wɔakyere agu apaawa so a ɔde kɔe no bere ne bere mu. Mprempren a Albert asan kɔ ne kurom no, ɔresrasra Kristofo asafo horow sɛ ɔhwɛfo kwantufo. Onnya bere pii mfa ntie dwom. Ɔka sɛ: “Dwontofo a m’ani gye ne ho paa ne Beethoven. Makɔ so anya ne nnwom ahorow a wabɔ ne akwan a ɔfaa so hyehyɛɛ emu nnyigyei no ho anigye mfe pii.” Eyinom a otie no ama no anya anigye kɛse. Ɛwom sɛ obiara wɔ nnwom a n’ani gye ho de, nanso sɛ́ Kristofo no, yɛma Paulo afotu yi tra yɛn adwenem: “Enti sɛ mudidi oo, monom oo, moyɛ biribiara oo, monyɛ ne nyinaa nhyɛ Onyankopɔn anuonyam!”—1 Korintofo 10:31.

 Dwonto ne Ahosohyira

Ade a edi kan a Susie ani gyee ho ne dwom. Ɔkyerɛkyerɛ mu sɛ: “Mifii ase bɔɔ adakabɛn bere a na madi mfe 6, mebɔɔ sanku a ɛwɔ hama anan bere a midii mfe 10, na awiei koraa no mebɔɔ sanku a n’ahama dɔɔso bere a midii mfe 12 no.” Akyiri yi Susie kɔɔ Royal College of Music wɔ London, England, kosuaa sankubɔ. Ɔde mfe anan suae wɔ Spania sankubɔfo bi a wagye din yiye nkyɛn, de afe bio suae wɔ Paris Conservatoire, bɔɔ digrii wɔ dwonto mu san nyaa adesua ho adansedi krataa wɔ sankubɔ ne adakabɛn adekyerɛ ho.

Susie de ne ho bɔɔ Yehowa Adansefo asafo a ɛwɔ London no. Ɛhɔ na ohuu nokware anigye a na ɛwɔ Adansefo no ntam no. Ɔdɔ a na ɔwɔ ma Yehowa no de nkakrankakra yɛɛ kɛse na nsi a na ɔwɔ ma ne som adwuma no maa ɔhwehwɛɛ akwan a ɔbɛfa so asom no. Eyi kowiee ahosohyira ne asubɔ mu. Susie ka sɛ: “Sɛ́ obi a na mahyira m’asetra so ama nnwonto no, na me nkwa so a mehyira no nyɛ me ade foforo.” Ne bere a na ɔde di agoru wɔ agoprama so no so tewee bere a ɔde ne ho hyɛɛ Kristofo som adwuma a ɛne Onyankopɔn Ahenni ho asɛmpa a wɔbɛka, sɛnea Yesu hyɛe, mu no.—Mateo 24:14; Marko 13:10.

Mprempren a ɔde bere kakraa bi na ɛbɔ nnwom yi, ɔte nka dɛn? Ɔka sɛ: “Ɛtɔ da a na ɛhaw me kakra sɛ minnya bere pii mfa nyɛ ahosiesie nanso meda so ara de me nsanku bɔ nnwom de gye m’ani. Nnwom yɛ akyɛde a efi Yehowa hɔ. Seesei a mede ne som adi kan wɔ m’asetra mu no m’ani gye ho kɛse.”—Mateo 6:33.

Nnwom a Eyi Yehowa Ayɛ

Albert ne Susie a wɔka Yehowa Adansefo a wɔreyɛ adu ɔpepem asia ho no de nnwonto yi Yehowa Nyankopɔn ayɛ daa. Wɔ Kristofo nhyiam a wɔyɛ no Ahenni Asa so wɔ nsase 234 so no, sɛ wonya hokwan a wɔto nnwom ma Yehowa de fi ase na wɔde awie. Sɛ wɔde nne akɛse ne nketewa to a, nnwom dɛdɛ no mu nsɛm a egyina Kyerɛwnsɛm so no ma woyi Yehowa Nyankopɔn ayɛ.

Wɔn a wɔba no nyinaa ma wɔn nne so to dwom ɔhyew so de kyerɛ sɛ Yehowa yɛ Onyankopɔn a odwen yɛn ho ankasa (Dwom a ɛto so 44). Wɔto ayeyi dwom ma Yehowa (Dwom a ɛto so 190). Wɔn nnwom da anigye ne asɛyɛde a ɛwɔ Kristofo onuayɛ, Kristoni asetra, ne Kristoni su horow mu no adi. Nea ɛma no yɛ anika kɛse ne sɛnea Adansefo a wɔwɔ Asia, Australia, Europa, Amerika Atifi ne Anafo fam to wɔn nnwom a wɔde di dwuma bere a wɔrehyehyɛ nnwom no. *

Honhom mu nsɛm a odwontofo no kyerɛw de fii ne nnwom a agye din kɛse no ase ne ‘Monto dwom foforo mma Yehowa. Mo a mote asase so nyinaa monto dwom mma Yehowa. Monto dwom mma Yehowa, monhyira ne din. Monka ne nkwagye da biara da. Monka n’anuonyam, amanaman mu, n’anwonwade aman nyinaa mu.’ (Dwom 96:1-3) Eyi ne nea Yehowa Adansefo reyɛ wɔ wo mpɔtam hɔ, na wɔto nsa frɛ wo sɛ bɛka wɔn ho ma wɔnto saa ayeyi nnwom yi. Wɔbɛyɛ wo awaawaa-atuu aba wɔn Ahenni Asa ahorow so, baabi a wubetumi asua sɛnea woyi Yehowa ayɛ denam nnwonto a ɛsɔ n’ani so.

[Ase hɔ nsɛm]

[Mfonini wɔ kratafa 28]

Monto ayeyi nnwom mma Yehowa