Ahenni Adawurubɔfo Bɔ Amanneɛ

Ohu Ɔdɔ Nyankopɔn No

NÁ Brazilni a wɔfrɛ no Antônio a wadi mfe 16 no nni asetra mu anidaso. Te a na ɔte nka sɛ onni anidaso no maa osuaa nnubɔnenom ne asanom. Ná ɔtaa ka no ne tirim sɛ obekum ne ho. Mmere a ɛte sɛɛ mu na ɔkaee nea ne maame ka kyerɛɛ no no: “Onyankopɔn ne dɔ.” (1 Yohane 4:8) Nanso ɛhe na ɔdɔ Nyankopɔn yi wɔ?

Bere a Antônio bɔɔ mmɔden sɛ obegyae nnubɔne ne asanom no, ɔkɔɔ asɔre a na ɛwɔ mpɔtam hɔ sɔfo nkyɛn kɔhwehwɛɛ mmoa. Ɛwom sɛ na Antônio kɔ Katolek Asɔre no yiye de, nanso na nsɛm pii da so ara kyere n’adwene. Sɛ́ nhwɛso no, ná Yesu asɛm a ese, “Mubehu nokware no, na nokware no ama moade mo ho” no kyere n’adwene. (Yohane 8:32, NW) Ahofadi bɛn na Yesu hyɛɛ ho bɔ no? Asɔre no antumi amma ne nsɛmmisa no ho mmuae a ntease wom. Bere bi akyi no, Antônio gyaee asɔre no na ɔsan kɔfaa ne suban dedaw no. Nokwarem no, ne nnubɔnenom ne n’asanom no yɛɛ kɛse sen kan no.

Saa bere no, Antônio yere Maria ne Yehowa Adansefo fii ase suaa Bible no. Ɛwom sɛ Antônio ansɔre antia ne yere adesua no de, nanso obuu Adansefo no sɛ “Amerika nyamesomfo a wɔboa Amerika hempɔnsɛmdi.”

Maria abam ammu na mmom ogyaw Ɔwɛn-Aban ne Nyan! nsɛmma nhoma a osusuwii sɛ Antônio ani begye mu nsɛm ho guguu fie hɔ. Esiane sɛ na Antônio ani gye akenkan ho nti, ɛtɔ da bi a na ɔhwehwɛ nsɛmma nhoma no mu bere a ne yere nni fie hɔ. Eyi ne bere a edi kan wɔ n’asetra mu a onyaa ne Bible mu nsɛmmisa ho mmuae. Na ɔka sɛ: “Mifii ase huu ɔdɔ ne ayamye a na me yere ne Adansefo no reyi no adi akyerɛ me no nso.”

Afe 1992 mfinimfini no, Antônio sii gyinae sɛ ɔno nso bɛpɛ sɛ ɔne Yehowa Adansefo sua Bible no. Nanso ɔkɔɔ so nom nnubɔne ne nsa pii. Anadwo bi a ɔne n’adamfo fi ɔsese bi ase rekɔ fie no, polisifo gyinaa wɔn. Bere a polisifo no huu cocaine wɔ Antônio nneɛma mu no, wofii ase hwee no. Polisini biako sum no hwee atɛkyɛ mu na ɔde tuo kyerɛɛ ne hwene ano pɛɛ. Polisifo a aka no teɛɛm sɛ: “Kum no!”

Bere a Antônio da atɛkyɛ no mu no, ɔkaakaee n’asetra. Nneɛma pa a otumi kaee ara ne n’abusua ne Yehowa. Ɔbɔɔ mpae tiaa bi de srɛɛ Yehowa mmoa. Polisifo no gyaw no hɔ a obi anhu nea enti a wɔyɛɛ saa. Ɔsɔre kɔɔ fie a na ogye di sɛ Yehowa na ɔbɔɔ ne ho ban.

Antônio de ahoɔden foforo fii ase suaa Bible no. Ɔyɛɛ nsakrae nkakrankakra sɛnea ɛbɛyɛ a ɔbɛsɔ Yehowa ani. (Efesofo 4:22-24) Ɛdenam ahosodi a ɔdaa no adi so no, ofii ase gyaee nnubɔne no nom. Nanso na ohia sɛ oduruyɛfo boa no. Asram abien a okodii wɔ ayaresabea bi no maa onyaa hokwan kenkan nhoma horow a wɔde sua Bible no, a Nimdeɛ a Ɛde Kɔ Daa Nkwa Mu nhoma no ka ho. Afei Antônio de nea na wasua afi saa nhoma horow yi mu no kyerɛkyerɛɛ ayarefo afoforo.

Bere a Antônio fii ayaresabea hɔ no, ɔkɔɔ so ne Adansefo no toaa ne Bible sua no so. Ɛnnɛ Antônio, Maria, wɔn mmabea baanu, ne Antônio maame bom som Yehowa sɛ abusua a wɔwɔ anigye ne biakoyɛ. Antônio ka sɛ: “Afei na mate asɛm ‘Onyankopɔn ne ɔdɔ’ no ase yiye.”

[Mfonini wɔ kratafa 8]

Asɛnka wɔ Rio de Janeiro