‘Bere a Wɔbɛsan Asiesie Nneɛma’ No Abɛn!

Bere tiaa bi ansa na Yesu reforo akɔ soro no, n’asuafo no binom bisaa no sɛ: “Awurade, bere yi mu na wobɛsan de ahenni no ama Israel anaa?” Yesu mmuae no kyerɛe sɛ bere bi betwam ansa na Ahenni no aba. Saa bere no, n’akyidifo benya adwuma kɛse bi ayɛ. Ná ɛsɛ sɛ wɔyɛ Yesu adansefo wɔ ‘Yerusalem ne Yudea nyinaa ne Samaria de kɔpem asase ano nohɔ.’—Asomafo no Nnwuma 1:6-8.

NÁ WƆRENTUMI mfa nna, adapɛn, anaa asram kakraa bi nwie saa adwuma no. Nanso, asuafo no antwentwɛn wɔn nan ase koraa na wofii ase kaa asɛm no. Ne nyinaa mu no, wɔn ani ampa bere a wɔbɛsan asiesie nneɛma ho asɛm no so. Ɔsomafo Petro kaa ho asɛm kyerɛɛ nnipadɔm bi a na wɔabehyiam wɔ Yerusalem sɛ: “Monsakra mo adwene, na monnan mo ho, na wɔapopa mo bɔne, na ɛyɛ a, ahodwo nna afi [Yehowa, NW] anim aba, na wasoma nea wɔayi no asi hɔ ama mo dedaw no, Yesu Kristo a ɛsɛ sɛ ɔsoro gye no de kosi bere a wɔbɛhyɛ nneɛma a Onyankopɔn nam n’adiyifo kronkron anom fi teteete kae no nyinaa ananmu.”—Asomafo no Nnwuma 3:19-21; yɛn na yɛasi ɔfã bi so dua no.

Ná saa ‘bere a wɔbɛsan asiesie nneɛma’ yi no de “ahodwo nna” a efi Yehowa nkyɛn na ɛbɛba. Ná nsiesie a wɔbɛsan ayɛ a wɔaka ho asɛm asie mmamu no benya afã abien. Nea edi kan no, na ɛsɛ sɛ wɔsan siesie honhom fam nneɛma wɔ ɔkwan a abotɔyam wom so a ɛrekɔ so nnɛ no. Nea ɛto so abien no, na asase so paradise a wɔde besi hɔ ankasa bedi akyi aba.

Bere a Wɔbɛsan Asiesie Nneɛma no Afi Ase

Sɛnea ɔsomafo Petro daa no adi kyerɛɛ nnipadɔm a na wɔwɔ Yerusalem no, ‘ɔsoro ankasa gyee Yesu.’ Ná eyi te saa de besii 1914 mu bere a Yesu faa n’ahenni tumi na ofii ase dii ade sɛ Onyankopɔn Hene a wapaw no no. Saa bere no, Petro ka siei sɛ, Yehowa ‘somaa’ ne Ba no a na ɛkyerɛ sɛ Ɔbɛma Yesu kwan ma wayɛ n’adwuma sɛ onipa titiriw wɔ Onyankopɔn atirimpɔw ahorow mu. Bible ka asɛm a esii no wɔ sɛnkyerɛnne kwan so: “Na [Onyankopɔn soro ahyehyɛde no woo] ɔbabanin [Onyankopɔn Ahenni a ɛhyɛ Yesu Kristo nsa] a ɔde dade poma rebɛyɛn amanaman nyinaa.”—Adiyisɛm 12:5.

Nanso na amanaman no nyɛɛ wɔn adwene sɛ wɔbɛbrɛ wɔn ho ase ahyɛ Kristo nniso no ase. Nokwarem no, wɔtow hyɛɛ n’ahenni no nkoa a wɔwɔ asase so, a ɛnnɛ wɔfrɛ wɔn Yehowa Adansefo, no so. Te sɛ asomafo a wodii wɔn anim kan no, Adansefo no afa adwuma a ɛne sɛ ‘wobedi Yesu Kristo ho adanse’ no ato wɔn ho so. (Adiyisɛm 12:17) Wɔsɔre tiaa adwuma a na saa Kristofo anokwafo yi reyɛ no wɔ amanaman so. Wɔ 1918 mu no, wɔbɔɔ mpanyimfo a asɛyɛde hyehyɛ  wɔn nsa wɔ Ɔwɛn Aban Asafo no adwumayɛbea ti a ɛwɔ Brooklyn, New York no atoro sobo, twee wɔn kɔɔ asɛnnibea kobuu wɔn atɛnkyea sɛ wɔmfa wɔn nkogu afiase mfe pii. Eduu bere bi no, na ɛte sɛ nea wɔrentumi nyɛ adansedi adwuma no ‘nkosi asase ano nohoa.’—Adiyisɛm 11:7-10.

Nanso, wɔ 1919 mu no, woyii adwumayɛfo a wɔwɔ adwumayɛbea ti hɔ a wɔde wɔn guu afiase no, na akyiri yi woyii atosɛm a wotwa too wɔn so no nyinaa fii wɔn so. Wɔansɛe bere koraa sɛ wɔbɛsan afi honhom fam nsiesie adwuma no ase bio. Efi saa bere no, Yehowa nkurɔfo anya honhom fam nkɔso a ɛso bi mmae da.

Wɔyɛɛ ɔsatu kɛse bi na ama wɔakyerɛkyerɛ nnipa a wɔwɔ aman nyinaa so ma wɔadi nneɛma a Kristo hyɛɛ n’akyidifo sɛ wonni so no nyinaa so. (Mateo 28:20) Hwɛ anigye araa a ɛyɛe sɛ wohui sɛ ebinom a na kan no wɔda suban a ɛte sɛ mmoa de adi no sesaa wɔn suban! Woyii nipasu dedaw a ɛde nneɛma bi te sɛ “abufuw,” “abususɛm” ne “aniwusɛm” ba no gui, na wɔhyɛɛ onipa foforo a “wɔyɛ no foforo kɔ nimdeɛ mu [Onyankopɔn a] ɔbɔɔ no no suban so no.” Wɔ honhom fam no, odiyifo Yesaia nsɛm no rebam nnɛ: “Habɔdɔm [onipa a kan no na ɔyɛ keka] ne oguanten ba [onipa a odwo] bɛtra, na ɔsebɔ ne apapowa ada, na nantwi ba ne gyata ba ne nantwi a wadɔ bɛtra faako.”—Kolosefo 3:8-10; Yesaia 11:6, 9.

Bere a Wɔbɛsan Asiesie Nneɛma Bio Abɛn!

Nea ɛka nneɛma a wɔasan asiesie ama yɛanya honhom fam paradise nnɛ no ho ne sɛ, aka bere tiaa bi na yɛn okyinnsoromma yi adan paradise ankasa. Asase no fã ketewaa bi na na ɛyɛ paradise bere a Yehowa de yɛn nananom, Adam ne Hawa, too Eden turo mu no. (Genesis 1:29-31) Ɛno nti na yebetumi aka Paradise ho asɛm sɛ nea wɔasan de asi hɔ no. Nanso, ansa na ɛno bɛba no, ɛsɛ sɛ woyi atoro som a ɛnhyɛ Onyankopɔn anuonyam no fi hɔ. Wiase yi mu amammui nhyehyɛe no na ebedi eyi ho dwuma. (Adiyisɛm 17:15-18) Afei wobegu amammui ne aguadi nhyehyɛe ne wɔn akyitaafo nyinaa ase. Awiei koraa no, wɔde Onyankopɔn tamfo a otwa to—Satan Ɔbonsam ne n’adaemone—besie mfirihyia apem—bere tenten a ebegye ma wɔasan de asiesie nneɛma no. Saa bere no, “sare so ne nkyerekyerewa benya anika, na anhwea pradada adi ahurusi, na ahan sɛ nhwiren.” (Yesaia 35:1) Wɔrenhaw adwene bio wɔ asase so nyinaa. (Yesaia 14:7) Nnipa ɔpepem pii a wɔawuwu no po bɛsan aba nkwa mu wɔ asase so. Wɔn nyinaa benya tumi a agyede afɔre no wɔ sɛ etumi san siesie nneɛma no so mfaso. (Adiyisɛm 20:12-15; 22:1, 2) Wɔrenhu onifuraefo, ositifo, anaa apakye wɔ asase so bio. “Ɔmanfo no mu bi renka sɛ: Magurow!” (Yesaia 33:24) Sɛ Kristo Mfirihyia Apem Nniso no ba awiei pɛ a, wobegyae Ɔbonsam ne n’adaemone no kakra de ahwɛ sɛnea Onyankopɔn atirimpɔw ma asase no ayɛ adwuma akodu. Awiei koraa no, wɔbɛsɛe wɔn afebɔɔ.—Adiyisɛm 20:1-3.

Sɛ wɔsan siesie nneɛma nyinaa wie wɔ asase so wɔ mfirihyia apem no awiei a, ‘nea ɛhome nyinaa’ beyi Yehowa ayɛ, na wɔbɛyɛ saa daa mmeresanten. (Dwom 150:6) So wobɛka wɔn ho? Wubetumi aka wɔn ho.