Monna Kristo Adwene Adi
Monna Kristo Adwene Adi
“Boasetɔ ne awerɛkyekye Nyankopɔn mma munnwen ade koro wɔ mo mu, sɛnea Kristo Yesu kwan te no.”—ROMAFO 15:5.
1. Ɔkwan bɛn so na obi suban betumi anya n’asetra so nkɛntɛnso?
SUBAN wɔ asetra so nkɛntɛnso kɛse. Anibiannaso anaa nsiyɛ, suban pa anaa subammɔne, nitan anaa biakoyɛ, anwiinwii anaa anisɔ yɛ suban ahorow a ebetumi anya sɛnea obi di tebea horow ho dwuma ne sɛnea nnipa foforo yɛ wɔn ade wɔ ne ho no so nkɛntɛnso kɛse. Sɛ obi wɔ suban pa a, n’ani betumi agye wɔ tebea horow a emu yɛ den mpo mu. Obi a ɔwɔ subammɔne fam no, biribiara nteɛ wɔ n’ani so bere mpo a—sɛ wɔde adwempa susuw ho a—asetra kɔ so yiye no.
2. Ɔkwan bɛn so na obi sua suban ahorow?
2 Yebetumi asua suban ahorow—nea eye ne nea enye. Nokwarem no, ɛyɛ ade a ɛsɛ sɛ yesua. Bere a Collier’s Encyclopedia reka akokoaa a wɔawo no foforo ho asɛm no, ɛka sɛ: “Ɛsɛ sɛ osua su ahorow a awiei koraa no obenya te sɛ nea ɛsɛ sɛ osua kasa anaa adwuma foforo biara ɔkwan bi so no.” Ɔkwan bɛn so na yesua suban ahorow? Bere a nneɛma pii na ɛma yenya no, nneɛma a atwa yɛn ho ahyia ne fekubɔ di mu akoten kɛse. Nhoma a ɛka nneɛma pii ho nsɛm a yɛadi kan aka ho asɛm no ka sɛ: “Ɛte sɛ nea yesua ade denam wɔn a yɛne wɔn bɔ fekuw paa no suban ahorow a yenya no so.” Mfirihyia mpempem pii a atwam ni no, Bible kaa biribi a ɛte saa ara sɛ: “Wo ne anyansafo mmɔ, na dan onyansafo, na nea ɔne nkwasea bɔ no hu amane.”—Mmebusɛm 13:20; 1 Korintofo 15:33.
Suban Pa Ho Nhwɛso
3. Hena na ɔyɛɛ nhwɛso pa wɔ ne suban ho, na ɔkwan bɛn so na yebetumi asuasua no?
3 Sɛnea ɛte wɔ nneɛma foforo biara mu no, saa ara nso na Yesu Kristo yɛɛ nhwɛso a eye sen biara wɔ suban ho. Ɔkae sɛ: “Mama mo sɛnnahɔ sɛ, sɛnea mayɛ mo no, mo nso monyɛ saa ara.” (Yohane 13:15) Sɛ yebetumi asɛ Yesu a, ɛsɛ sɛ yedi kan sua ne ho ade. * Yesua Yesu asetra ho ade bere a yɛwɔ adwene sɛ yɛbɛyɛ nea ɔsomafo Petro hyɛɛ ho nkuran no: “Eyi na wɔbɔɔ din frɛɛ mo, efisɛ Kristo nso huu amane maa mo gyaw mo nhwɛso, sɛ munni n’anammɔn akyi.” (1 Petro 2:21) Yɛn botae ne sɛ yɛbɛbɔ mmɔden biara sɛ yɛbɛsɛ Yesu. Nea ɛhwehwɛ ne sɛ yebenya n’adwene.
4, 5. Yesu adwene bɛn na wɔasi so dua wɔ Romafo 15:1-3, na ɔkwan bɛn so na Kristofo betumi asuasua no?
4 Dɛn na Kristo Yesu adwene a yebenya no hwehwɛ sɛ yɛyɛ? Paulo krataa a ɔkyerɛw kɔmaa Romafo no ti 15 no boa yɛn ma yebua saa asɛm no. Paulo ka Yesu suban bi a ɛda nsow ho asɛm wɔ saa ti yi nkyekyem kakra a edi kan no mu sɛ: “Yɛn a yɛyɛ den no, ɛsɛ sɛ yɛsoa wɔn a wɔnyɛ den no mmerɛw na yɛnsɔ yɛn ankasa ani. Momma yɛn mu biara nsɔ ne yɔnko ani mma nea eye, na n’ase atim. Na Kristo nso ansɔ ne ho ani, na mmom sɛnea wɔakyerɛw sɛ: Wɔn a wɔbɔ wo ahohora no ahohora agu me so.”—Romafo 15:1-3.
5 Sɛ Kristofo besuasua Yesu suban a, wɔhyɛ wɔn nkuran sɛ wonsiesie wɔn ho sɛ wobefi ahobrɛase mu adi afoforo ahiade ho dwuma sen sɛ wɔbɛsɔ wɔn ankasa ani. Nokwarem no, ahobrɛase mu a wobefi anya ɔpɛ a ɛte saa sɛ wɔbɛsom afoforo no yɛ wɔn a ‘wɔyɛ den’ su. Yesu a na ɔyɛ den wɔ honhom fam sen onipa foforo biara a watra ase pɛn no, kaa n’ankasa ho asɛm sɛ: “Onipa ba no amma sɛ wɔnsom no, na ɔbɛsomee, na ɔde ne kra ayɛ agyede ama nnipa pii.” (Mateo 20:28) Sɛ́ Kristofo no, ɛsɛ sɛ yɛn nso yɛyere yɛn ho som afoforo, a wɔn a “wɔnyɛ den” no ka ho.
6. Ɔkwan bɛn so na yebetumi asuasua Yesu wɔ sɛnea ɔyɛɛ n’ade wɔ ɔsɔretia ne ahohorabɔ ho no mu?
6 Su pa foforo a Yesu daa no adi ne ne nsusuwii ne ne nneyɛe a na ɛyɛ papa bere nyinaa no. Wamma afoforo subammɔne annya n’ankasa adwempa a na ɔwɔ wɔ Onyankopɔn som ho no so nkɛntɛnso da; na ɛnsɛ sɛ yɛma enya yɛn so nkɛntɛnso nso. Bere a wɔbɔɔ Yesu ahohora na wɔtaa no esiane sɛ ɔsom Onyankopɔn nokware mu nti no, ɔde boasetɔ gyinaa mu a wannwiinwii. Na onim sɛ wɔn a wɔbɔ mmɔden sɛ wɔbɛsɔ wɔn yɔnko ani ‘ama nea eye’ no betumi ahyia ɔsɔretia afi wiase a ennye nni na enni ntease no hɔ.
7. Ɔkwan bɛn so na Yesu daa boasetɔ adi, na dɛn nti na ɛsɛ sɛ yɛyɛ saa ara?
7 Yesu daa suban pa adi wɔ akwan foforo so. Wampere ne ho wɔ Yehowa asɛm ho da, na mmom ɔde boasetɔ twɛn maa Yehowa atirimpɔw ahorow baa mu. (Dwom 110:1; Mateo 24:36; Asomafo no Nnwuma 2:32-36; Hebrifo 10:12, 13) Afei nso, Yesu bo amfuw n’akyidifo no. Ɔka kyerɛɛ wɔn sɛ: “Munsua me”; esiane sɛ ‘odwo’ nti, na ne nkyerɛkyerɛ yɛ nea ɛhyɛ den na ɛma abotɔyam. Na esiane sɛ na ‘ɔbrɛ ne ho ase koma mu’ nti, wanteɛteɛ afoforo anaa wammu wɔn animtiaa da. (Mateo 11:29) Paulo hyɛ yɛn nkuran sɛ yensuasua Yesu su ahorow yi bere a ɔka sɛ: “Momma adwene a ɛwɔ Kristo Yesu mu no ara ntra mo mu bi. Ɔno na ɔwɔ Onyankopɔn tebeam de, nanso wammu no mfasode sɛ ɔne Nyankopɔn sɛ, na mmom oyii ne mu guu hɔ faa akoa tebea too ne ho so dan nnipa sɛso, na sɛ ɔyɛɛ n’ade fae no, wohuu no sɛ onipa.”—Filipifo 2:5-7.
8, 9. (a) Dɛn nti na ɛsɛ sɛ yɛyere yɛn ho nya ayamye su? (b) Sɛ yennu nhwɛso a Yesu yɛ too hɔ no ho a, dɛn nti na ɛnsɛ sɛ yɛma yɛn abam bu, na ɔkwan bɛn so na Paulo yɛɛ nhwɛso pa wɔ eyi mu?
8 Ɛnyɛ den sɛ yɛbɛka sɛ yɛpɛ sɛ yɛsom afoforo na yɛde wɔn ahiade di yɛn ankasa de kan. Nanso, sɛ yefi nokwaredi mu hwehwɛ yɛn adwenem a, yebetumi ahu sɛ yɛn koma ntɔ nkɔ saa kwan no so koraa. Dɛn nti na ɛnte saa? Nea edi kan no, efisɛ yɛanya pɛsɛmenkominya su ahorow afi Adam ne Hawa hɔ; nea ɛto so abien no, yɛte wiase a ɛhyɛ pɛsɛmenkominya ho nkuran mu. (Efesofo 4:17, 18) Mpɛn pii no, nea ɛbɛma yɛanya ayamye su ne sɛ yebenya nsusuwii a ɛbɔ sintɔ a wɔde woo yɛn no abira. Ɛno gye akokoduru ne mmɔdenbɔ.
9 Ɛtɔ mmere bi a, Yesu nhwɛso a ɛyɛ pɛ a ɔyɛ too hɔ a ɛne yɛn sintɔ a ɛda adi pefee no bɔ abira koraa no betumi ama yɛn abam abu. Yɛn adwenem betumi ayɛ yɛn nãã sɛ ebia yebetumi anya adwenkoro a na Yesu kura no bi anaa. Nanso, hyɛ ɔsomafo Paulo nkuranhyɛ nsɛm yi nsow: “Minim sɛ me mu, ɛne sɛ me honam mu de, papa bi nte mu; efisɛ ɔpɛ de, ɛwɔ me hɔ, na ɔyɛ a mɛyɛ nea eye no de, minhu. Na papa a mepɛ no, menyɛ, na mmom bɔne a mempɛ no, ɛno na meyɛ. Na me mu-nipa fam de, m’ani gye Onyankopɔn mmara ho; nanso mihu mmara foforo bi wɔ me honam akwaa mu a ɛne m’adwene mu mmara ko na ɛfa me dommum ma bɔne mmara a ɛwɔ me honam akwaa mu no.” (Romafo 7:18, 19, 22, 23) Nokwarem no, mpɛn pii na Paulo sintɔ amma wantumi anyɛ Onyankopɔn apɛde sɛnea ɔpɛ, nanso na ne suban—Yehowa ne Ne mmara ho adwene ne nkate a na ɔwɔ no—ye. Yɛn de betumi ayɛ saa ara.
Suban Horow a Enye a Yɛbɛsesa
10. Adwene bɛn na Paulo hyɛɛ Filipifo no nkuran sɛ wonnya?
10 So na ebinom betumi asesa wɔn suban a enye no? Yiw. Ɛda adi sɛ na eyi te saa wɔ afeha a edi kan no mu Kristofo binom fam. Wɔ Paulo krataa a ɔkyerɛw kɔmaa Filipifo no mu no, ɔkaa suban pa a ɛsɛ sɛ ebinom nya ho asɛm. Ɔkyerɛwee sɛ: “Ɛnyɛ sɛ me nsa anya aka [ɔsoro asetra denam owusɔre a edi kan no so], anaasɛ manya mawie pɛyɛ dedaw, na mmom mekɔ m’anim ara na me nsa aka, sɛnea Kristo Yesu nso nsa aka me no. Anuanom, me de, minsusuw sɛ me nsa anya aka biribi; nanso ade biako pɛ na meyɛ: mema me werɛ fi akyiri de, na metwe me mu mepɛ anim de. Mede mmirika mepɛ botae no ho madu, na makonya ɔsoro frɛ a Onyankopɔn nam Kristo Yesu mu afrɛ me no mu nkonimbo no. Enti momma yɛn mu dodow a yɛyɛ pɛ no nnwen sa.”—Filipifo 3:12-15; yɛn na yɛasi ɔfã bi so dua no.
11, 12. Akwan bɛn so na Yehowa da adwempa adi kyerɛ yɛn?
11 Paulo nsɛm no kyerɛ sɛ sɛ obi bɛyɛ Kristoni na ɔnte nka sɛ ɛsɛ sɛ onya nkɔso a, na okura adwene a ɛmfata. Wannya Kristo adwene. (Hebrifo 4:11; 2 Petro 1:10; 3:14) So onipa a ɔte saa no tebea yɛ nea anidaso biara nnim? Dabida. Sɛ yɛpɛ sɛ yɛsesa yɛn suban ampa a, Onyankopɔn betumi aboa yɛn. Paulo toa so ka sɛ: “Sɛ biribi wɔ hɔ a mudwen no foforo a, ɛno nso Onyankopɔn beyi adi akyerɛ mo.”—Filipifo 3:15.
12 Nanso, sɛ yɛpɛ sɛ Yehowa yi suban pa adi kyerɛ yɛn a, ɛsɛ sɛ yɛyɛ yɛn fam de. Mpaebɔ a wɔde sua Onyankopɔn Asɛm ne Kristofo nhoma a “akoa nokwafo ne ɔbadwemma” ayɛ no betumi aboa ma wɔn a ‘wodwen nneɛma foforo ho’ no anya suban pa. (Mateo 24:45) Kristofo mpanyimfo a honhom kronkron apaw wɔn sɛ ‘wɔnhwɛ Onyankopɔn nguankuw so’ no ani begye ho sɛ wɔbɛboa wo. (Asomafo no Nnwuma 20:28) Hwɛ aseda ara a yɛde ma sɛ Yehowa susuw yɛn sintɔ ahorow ho na ofi ɔdɔ mu boa yɛn! Momma yennye ntom.
Ade a Yebesua Afi Afoforo Hɔ
13. Suban pa ho ade bɛn na yesua fi Bible mu nhoma a ɛne Hiob no mu?
13 Paulo da no adi wɔ Romafo ti 15 sɛ abakɔsɛm mu nhwɛso ahorow a yebesusuw ho betumi aboa yɛn ma yɛasesa yɛn suban. Ɔkyerɛwee sɛ: “Biribiara a wɔakyerɛw ato hɔ no, wɔakyerɛw ama yɛn kyerɛkyerɛ sɛ yɛmfa boasetɔ ne kyerɛw nsɛm no mu awerɛkyekye so nnya anidaso.” (Romafo 15:4) Ná ɛsɛ sɛ Yehowa asomfo anokwafo a wɔtraa ase tete mmere no mu no binom sesa wɔn suban ahorow bi. Sɛ nhwɛso no, na wɔn mu dodow no ara, te sɛ Hiob, wɔ suban pa. Wanka Yehowa ho asɛmmɔne da, na saa ara na amanehunu a ohyiae no amma ahotoso a na ɔwɔ wɔ Onyankopɔn mu no anhinhim. (Hiob 1:8, 21, 22) Nanso, obuu ne ho bem. Yehowa somaa Elihu sɛ ɔnkɔboa Hiob mma ɔnsesa ne suban yi. Sɛ anka Hiob bɛte nka sɛ wɔadidi no atɛm no, ofii ahobrɛase mu gyee hia a ehia sɛ ɔsesa ne suban no toom, na ofii ase ntɛm ara yɛɛ nsakrae.—Hiob 42:1-6.
14. Sɛ wotu yɛn fo wɔ yɛn suban bi ho a, ɔkwan bɛn so na yebetumi ayɛ yɛn ade sɛ Hiob?
14 Sɛ yɛn yɔnko Kristoni bi fi ayamye mu ka kyerɛ yɛn sɛ yɛreda subammɔne bi adi a, so yɛbɛyɛ yɛn ade te sɛ nea Hiob yɛe no? Te sɛ Hiob no, ɛmmra sɛ ‘yɛremmu asɛm biara a enni aso mma Onyankopɔn’ da. (Hiob 1:22) Sɛ wobu yɛn ntɛnkyea a, ɛmmra sɛ yɛrennwiinwii ntia Yehowa da anaasɛ yɛremfa yɛn amanehunu ho asodi nto no so. Ɛmmra sɛ yɛremmu yɛn ho bem, na yɛnkae sɛ ɛmfa ho hokwan ahorow biara a yɛwɔ wɔ Yehowa som mu no, yɛda so ara yɛ “nkoa a mfaso nni yɛn ho.”—Luka 17:10.
15. (a) Subammɔne bɛn na Yesu akyidifo no binom daa no adi? (b) Ɔkwan bɛn so na Petro daa suban pa adi?
15 Wɔ afeha a edi kan no mu no, ebinom a wotiee Yesu kasa no anna suban pa adi. Bere bi, Yesu kaa biribi a na ɛyɛ den sɛ wɔbɛte ase. Nea efii mu bae ne sɛ “n’asuafo mu pii tee no, wɔkae sɛ: Asɛm yi yɛ yɛn den, hena na obetumi atie?” Na ɛda adi pefee sɛ wɔn a wɔkasaa saa kwan yi so no wɔ subammɔne. Na wɔn subammɔne no amma wɔantie Yesu asɛm bio. Kyerɛwtohɔ no ka sɛ: “Efi ɛno so no, n’asuafo mu pii san wɔn akyi, na wɔne no annantew bio.” So na wɔn nyinaa wɔ subammɔne? Dabi. Kyerɛwtohɔ no toa so sɛ: “Ɛnna Yesu see dumien no sɛ: Mo nso, mopɛ sɛ mokɔ bi anaa? Simon Petro buaa no sɛ: Awurade, hena nkyɛn na yɛbɛkɔ?” Enti, afei, Petro san buaa n’ankasa asɛmmisa no sɛ: “Wo na wowɔ daa nkwa nsɛm.” (Yohane 6:60, 66-68) Suban pa bɛn ara ni! Sɛ yehyia Kyerɛwnsɛm mu nkyerɛkyerɛmu anaa nsakrae bi a mfiase no na ɛyɛ yɛn den sɛ yebegye atom a, so ɛrenyɛ papa sɛ yɛbɛda suban a Petro daa no adi no bi adi? Hwɛ sɛnea ɛbɛyɛ nea nyansa nnim sɛ yebegyae Yehowa som anaasɛ yɛbɛkeka nsɛm bi a ɛne “nsɛm pa a eye” no nhyia esiane sɛ mfiase no na ɛyɛ den sɛ yɛbɛte nneɛma bi ase nti!—2 Timoteo 1:13.
16. Suban a ɛyɛ hu bɛn na Yudafo nyamesom akannifo a na wɔwɔ Yesu bere so no daa no adi?
16 Afeha a edi kan no mu Yudafo nyamesom akannifo no anna adwene a na Yesu kura no bi adi. Wɔn tirim a na wɔabɔ denneennen sɛ wɔrentie Yesu no daa adi bere a onyan Lasaro fii awufo mu no. Na saa anwonwade no bɛma obiara a ɔwɔ suban pa ahu sɛ Onyankopɔn na ɔsomaa Yesu. Nanso, yɛkenkan sɛ: “Ɛnna asɔfo mpanyin ne Farisifo no ma wokohyiaa baguafo no, na wɔkae sɛ: Dɛn na yɛbɛyɛ, efisɛ onipa yi yɛ nsɛnkyerɛnne pii. Sɛ yegyaa no saa a, nnipa nyinaa begye no adi, na Romafo aba abɛfa yɛn ha yi ne yɛn man.” Gyinae bɛn na wosii? “Efi da no ara wotutuu agyina wɔn mu sɛ wobekum no.” Ɛpɔ a wɔbɔe sɛ wobekum Yesu akyi no, wɔyɛe sɛ wɔbɛsɛe adanse a edi mũ a ɛkyerɛ sɛ ɔyɛ anwonwade no. “Asɔfo mpanyin no tuu agyina sɛ wobekum Lasaro nso.” (Yohane 11:47, 48, 53; 12:9-11) Hwɛ sɛnea enye sɛ yɛn nso yebenya suban a ɛte saa na yɛama nneɛma ayɛ yɛn ahi anaa yɛn bo afuw wɔ nneɛma a anka ɛsɛ sɛ yedi ho ahurusi no ho! Yiw, na hwɛ sɛnea ɛyɛ hu fa!
Kristo Suban Pa no a Yebesua
17. (a) Tebea horow bɛn mu na Daniel daa akokoduru adi? (b) Ɔkwan bɛn so na Yesu daa ne ho adi sɛ ɔkokodurufo?
17 Yehowa asomfo akura suban pa mu bere nyinaa. Bere a Daniel atamfo bɔɔ ne ho pɔw bɔne ma wɔhyɛɛ mmara sɛ wɔmmmɔ onyame anaa onipa bi mpae gye ɔhene nko ara nnafua 30 no, na Daniel nim sɛ eyi bɛsɛe ɔne Yehowa Nyankopɔn ntam abusuabɔ. So na obegyae mpae a ɔbɛbɔ Onyankopɔn no nnafua 30 no? Dabi, ɔde akokoduru kɔɔ so bɔɔ Yehowa mpae mprɛnsa da biara sɛnea na ɔyɛ daa no. (Daniel 6:6-17) Yesu nso amma n’atamfo anhunahuna no. Homeda bi, ohuu ɔbarima bi a ne nsa awu. Na Yesu nim sɛ sɛ ɔsa obi yare Homeda a, Yudafo a wɔwɔ hɔ no pii ani rennye ho. Ɔka kyerɛɛ wɔn pefee sɛ wɔnkyerɛ wɔn adwene wɔ asɛm no ho. Bere a wɔammua Yesu no, ɔsaa ɔbarima no yare. (Marko 3:1-6) Yesu antwe ansan da wɔ biribi a ɔtee nka sɛ ɛfata sɛ ɔyɛ ho.
18. Dɛn nti na ebinom sɔre tia yɛn, nanso ɔkwan bɛn so na ɛsɛ sɛ yɛyɛ yɛn ade wɔ wɔn subammɔne no ho?
18 Yehowa Adansefo a wɔwɔ hɔ nnɛ nso nim sɛ ɛnsɛ sɛ wɔma asɔretiafo nneyɛe a ɛmfata a wobetumi ada no adi no hunahuna wɔn da. Sɛ wɔanyɛ saa a, wɔrenna Yesu adwene adi. Nnipa pii sɔre tia Yehowa Adansefo, a ebinom yɛ saa esiane sɛ wonnim wɔn ho nokwasɛm nti, na afoforo nso de, esiane sɛ wɔtan Adansefo no anaa asɛm a wɔka no nti. Nanso, mommma wɔn nitan no nnnya yɛn suban pa so nkɛntɛnso da. Ɛnsɛ sɛ yɛma afoforo kyerɛ ɔkwan a ɛsɛ sɛ yɛfa so som da.
19. Yɛbɛyɛ dɛn atumi ada Yesu Kristo adwene no bi adi?
19 Yesu nyaa n’akyidifo ne Onyankopɔn nhyehyɛe ho adwempa bere nyinaa, ɛmfa ho sɛnea na ɛyɛ den sɛ ɔbɛyɛ saa no. (Mateo 23:2, 3) Ɛsɛ sɛ yesuasua ne nhwɛso no. Nokwarem no, yɛn nuanom nyɛ pɛ, na saa ara na yɛn nso yɛte. Na ɛhe na yebetumi anya ayɔnkofo a woye ne nnamfo a wodi nokware ankasa sen yɛn wiase nyinaa nuayɛkuw no mu? Yehowa mfaa N’asɛm a wɔakyerɛw no mu nkyerɛkyerɛmu nyinaa mmaa yɛn, nanso nyamesom kuw bɛn na wɔte ase yiye sen yɛn? Momma yɛnkɔ so nkura adwempa mu, adwene a na Yesu Kristo kura no, bere nyinaa. Nea ɛka nneɛma a yebehu ho bere a yɛresusuw asɛm a edi hɔ no ho ne ɔkwan a yɛbɛfa so atwɛn Yehowa.
[Ase hɔ asɛm]
^ nky. 3 Onipa a Ɔsen Biara a Watra Ase Pɛn nhoma a Watchtower Bible and Tract Society of New York, Inc., tintimii no ka Yesu asetra ne ne som adwuma ho asɛm.
Wubetumi Akyerɛkyerɛ Mu?
• Ɔkwan bɛn so na yɛn suban nya yɛn asetra so nkɛntɛnso?
• Ka Yesu Kristo adwene ho asɛm.
• Dɛn na yebetumi asua afi Hiob suban no mu?
• Sɛ yehyia ɔsɔretia a, suban a eye bɛn na ɛsɛ sɛ yenya?
[Adesua no ho Nsɛmmisa]
[Mfonini ahorow wɔ kratafa 7]
Kristoni a ɔwɔ suban pa hwehwɛ sɛ ɔbɛboa afoforo
[Mfonini wɔ kratafa 9]
Mpaebɔ a yɛde sua Onyankopɔn Asɛm boa yɛn ma yenya Kristo adwene