Asetram Nsɛm

Yehowa Tua N’anokwafo Ka Bere Nyinaa

SƐNEA VERNON DUNCOMBE KA KYERƐE

Mididi wiee anwummere no, mesɔɔ me sigaret ano sɛnea metaa yɛ no. Afei mibisaa me yere Aileen sɛ: “Dɛn na esii wɔ nhyiam no ase anadwo yi?”

OGYINAE kakra na ɔkae sɛ: “Wɔkenkanee krataa a ɛkyerɛ wɔn a wɔama wɔn dwumadi foforo no, na wɔbɔɔ wo din. Wo na wobɛhwɛ akasam mfiri no so. Krataa no fã a etwa to no kenkanee sɛ: ‘Sɛ anuanom yi mu bi de tawa di dwuma a, ɛsɛ sɛ wɔkyerɛw Asafo ti no sɛ wontumi nnye dwumadi no ntom.’” * M’ani baa me ho so huu nea ɛsɛ sɛ meyɛ, na mekae sɛ: “Eei! Saa na wɔkae.”

Mekaa me se sii so na meposaa saa sigaret no guu nsõ adaka a na esi me nkyɛn no mu. “Minnim nea enti a me na wɔpaw me sɛ menyɛ saa adwuma yi. Nanso mempoo biribi saa da, na enni m’adwenem nso sɛ mɛyɛ saa.” Mebɔɔ me tirim sɛ merennom sigaret bio da. Saa gyinaesi no nyaa m’asetra so nkɛntɛnso sɛ Kristoni ne odwontofo. Ma menka nea ɛbae a ɛma mebɔɔ me tirim saa no nkyerɛ wo.

Abusua Asetra Mfiase

Wɔwoo me wɔ Toronto, Canada, wɔ September 21, 1914 mu, na na me ne m’awofo Vernon ne Lila a wɔwɔ ɔdɔ, na wɔyɛɛ adwumaden hwɛɛ yɛn, mmabarima baanan ne mmabea baanu no babarima panyin. Ná Yorke na odi m’akyi, afei Orlando, Douglas, Aileen ne Coral dii hɔ. Bere a minyaa mfe akron pɛ no, me maame maa me sanku na ɔyɛɛ nhyehyɛe ma mikosuaa nnwonto ho ade wɔ Harris Sukuu a wɔkyerɛ Nnwom no mu. Ná nneɛma mu nyɛ mmerɛw nanso Maame ne Paapa bɔɔ mmɔden biara de tuaa me kar sika ne sukuu adesua no ho ka. Akyiri yi misuaa nnwonto ho ade ne sɛnea  wɔhyehyɛ no wɔ Royal Conservatory of Music a ɛwɔ Toronto, na midii mfe 12 no, mede me ho hyɛɛ kuropɔn nnwonto akansi mu wɔ Massey Hall, beae bi a wɔto dwom a agye din wɔ kurow no mu no. Woyii me sɛ nea wadi nkonim na wɔde sanku fɛfɛ bi a ɛhyɛ ɔdɛnkyemmirampɔn nhoma kotoku mu maa me.

Bere kɔɔ so no, misuaa sɛnea wɔbɔ adakabɛn ne sanku kɛse nso. Mpɛn pii no na yɛn kuw no mufo taa bɔ nnwom ma fekuw nketewa Fida ne Memeneda anwummere wɔ baabi a wɔtaa saw. Ɛyɛ saa agoru yi biako ase na midii kan huu Aileen. Wɔ m’afe a etwa to wɔ ntoaso sukuu mu no, me ne agofomma pii gorui wɔ kurow kɛse mu. Bere a miwiee m’adesua no, wɔtoo nsa frɛɛ me sɛ memmɛka Ferde Mowry Agofomma no ho, na ɛno bɛyɛɛ adwuma pa maa me kosii 1943.

Sɛnea Mibehuu Yehowa

M’awofo dii kan huu Bible mu nokware no ansa na Wiase Nyinaa Ko 1 no repae agu bere a na Paapa hyehyɛ nneɛma wɔ sotɔɔ kɛse bi a wɔtɔn nneɛma pii mu wɔ Toronto kurom no. Ná paapa tie nkɔmmɔbɔ bi a ɛkɔ so wɔ adwumayɛfo baanu a na wɔyɛ Bible Asuafo (sɛnea na wɔfrɛ Yehowa Adansefo saa bere no) ntam wɔ ɔdan a wodidi mu awia no mu, na na ɔka nea ɔtee no kyerɛ Maame bere a waba fie anwummere no. Mfe bi akyi, wɔ 1927 mu no, Bible Asuafo no yɛɛ nhyiam bi wɔ Toronto wɔ Agumadibea kɛse a ɛwɔ Canada Ɔman Adekyerɛdebea no. Yegyee nnipa 25 a wofi Ohio, U.S.A. bɛtraa yɛn fie a ɛwɔ beae a na wɔreyɛ nhyiam no atɔe fam a adan abien na etwa ntam no mu.

Ɛno akyi no, Bible Asuafo no mu biako a wɔfrɛ no Ada Bletsoe, fii ase bɛsraa Maame, na na wogyaw nhoma a aba foforo no bi ma no. Da koro ɔkae sɛ: “Owurayere Duncombe, makɔ so agyaw nhoma fi bere tenten bi ni. So woakenkan emu bi anaa?” Ɛwom sɛ na Maame hwɛ mmofra baasia de, nanso ofii ase kenkan nsɛmma nhoma no fi saa bere no, na wannyae da. Nanso, mamfa m’adwene ankɔ nhoma no so ahe biara. Ná merebewie sukuu, na na mede me ho ahyɛ nnwonto mu fee.

Wɔ June 1935 mu no, me ne Aileen waree wɔ Anglikan asɔre mu. Esiane sɛ migyaee United Church asɔre no kɔ bere a na madi mfe 13 no nti, na menkɔ asɔre biara; ɛno nti mede me nsa hyɛɛ aware nhyehyɛe no ase sɛ meyɛ Yehowa Adansefo no mu biako, ɛwom sɛ na minnya nyɛɛ Ɔdansefo de.

Ná yɛhwɛ kwan sɛ yɛbɛwo daakye na yɛayɛ awofo pa. Ɛno nti yefii ase bɔɔ mu kenkan Apam Foforo no. Nanso, ɛmfa ho adwempa a na yɛwɔ no, nneɛma foforo twitwaree mu. Wɔ mmere kakra akyi no, yɛbɔɔ mmɔden bio nanso ankosi hwee. Afei wɔ 1935, Buronya mu no, yenyaa akyɛde bi a na wɔakyekyere ho a na ɛyɛ nhoma bi a wɔato din The Harp of God. Me yere kae sɛ: “Eei, eyi yɛ Buronya akyɛde soronko a wo maame de abrɛ yɛn.” Nanso, bere a mekɔɔ adwuma akyi no, ɔkenkanee nhoma no, na ɔde nea ɔkenkanee no dii dwuma. Manhu ho hwee kosii bere bi akyi. Ɛdefa nea na yɛhwɛ kwan ho no, amma mu saa. Yɛn babea a yɛwoo no wɔ February 1, 1937 no wui. Hwɛ awerɛhow ara a yedii!

Saa bere yi, na m’awofo de nnamyɛ reyɛ asɛnka adwuma no, na mihui sɛ yɛn abusua mu no, na Paapa nko ara ne Ahenni dawurubɔfo a ɔmmaa obiara nkraa Consolation (seesei Nyan!) nsɛmma nhoma no bi. Ná eyi ne asɛnka adwuma no botae wɔ ɔsram no mu. Ɛwom sɛ na minnya nkenkan Asafo ti no nhoma biara da de, nanso ɛyɛɛ me yaw ma mekae sɛ: “Ɛnyɛ hwee, Paapa, kra bi ma me; na wo ne adawurubɔfo foforo no nyinaa nyɛ pɛ.” Ahohoru bere dui, na agofomma no tu kɔɔ kurom kodii agoru. Afei Consolation no bae. Otwabere dui, na agofomma no san baa Toronto. Na nsɛmma nhoma no kɔ so fa yɛn address foforo no so ba, na na minyii nea edura ho no mu biako mpo mfii ho.

Wɔ Buronya akwamma biako mu no, mehwɛɛ nsɛmma nhoma a esum hɔ no kae sɛ, sɛ mitua eyinom ho ka a, anyɛ yiye koraa no ɛsɛ sɛ mekenkan emu bi na mihu nea ɛwɔ mu. Nea edi kan a metew ano no ma mebɔɔ birim. Ná ɛreka saa bere no mu amammui mu nneyɛe bɔne ne ɔporɔw a na ɛrekɔ so ho asɛm. Mifii ase kaa nea makenkan no ho asɛm kyerɛɛ me yɔnko nnwontofo no. Nanso, wɔkɔɔ so gyee me akyinnye wɔ nokwasɛm a ɛwɔ nea na mereka mu no ho, na  na ɛsɛ sɛ mekɔ so kenkan na matumi atwitwa agye me ho. Ná mafi ase redi Yehowa ho adanse a m’ani nni so. Na efi saa bere no, minnyaee Bible nhoma a efi “akoa nokwafo ne ɔbadwemma” hɔ no kan da.—Mateo 24:45.

Ɛwom sɛ na adwuma mma minnya kwan wɔ dapɛn no mu de, nanso ankyɛ na me ne Aileen fii ase kɔɔ asafo nhyiam ahorow Kwasida. Da koro Kwasida a yeduu nhyiam no ase wɔ 1938 mu no, anuanom mmea mpanyimfo baanu bekyiaa yɛn, na obiako kae sɛ: “Onua Aberante, so woagyina Yehowa afã dedaw? Wunim, ɛrenkyɛ na Harmagedon aba!” Ná minim sɛ Yehowa nko ara ne nokware Nyankopɔn no, na minim sɛ eyi ne n’ahyehyɛde. Na mepɛ sɛ meyɛ ne fã, enti wɔ October 15, 1938 mu no, wɔbɔɔ me asu. Wɔbɔɔ Aileen asu wɔ ɛno akyi bɛyɛ asram asia. Mede anigye ka sɛ m’abusua no mufo nyinaa bɛyɛɛ Yehowa nkoa a wɔahyira wɔn ho so.

Hwɛ anigye ara a minyae sɛ mede me ho bɔɔ Onyankopɔn nkurɔfo! Ankyɛ na m’ani kaa wɔn mu. Sɛ mantumi ankɔ a, na me ho pere me sɛ mehu nea esii wɔ nhyiam ahorow no ase. Saa anwummere a mekaa ho asɛm mfiase no bɛyɛɛ da titiriw wɔ me som a mede ma Yehowa no mu.

Bere a Yɛyɛɛ Nsakrae Kɛse

Yɛyɛɛ nsakrae titiriw bi wɔ yɛn asetram wɔ May 1, 1943 mu. Ná yɛakɔ yɛn ɔmantam nhyiam kɛse a edi kan, September 1942 Wiase Foforo Teokrase Nhyiam, no bi wɔ Cleveland, Ohio. Bere a na wiase ko a ɛyɛ hu rekɔ so a na yennim bere a ɛbɛba awiei no, yɛtee sɛ Onua Knorr a na ɔyɛ Ɔwɛn Aban Asafo no titrani saa bere no de anigye ne akokoduru rema baguam ɔkasa a ese, “Asomdwoe—So Ɛbɛkyɛ?” Yɛkae sɛnea ofi Adiyisɛm ti 17 mu kyerɛe sɛ asomdwoe bɛba wɔ ɔko no akyi na emu na wɔbɛyɛ asɛnka adwuma no kɛse, no yiye paa.

Nea ɛkanyan yɛn kɛse ne Onua Knorr kasa a na wadi kan ama no, “Yefta ne Ne Bɔhyɛ no.” Ɔde too gua sɛ wɔrehwehwɛ akwampaefo pii! Aileen bɛhwɛɛ m’anim na me nso mekɔhwɛɛ n’anim, afei yɛbɔɔ mu (yɛne nkurɔfo pii wɔ saa bere no) kae sɛ: “Yɛbɛyɛ!” Ntɛm ara yefii ase yɛɛ nhyehyɛe sɛ yɛbɛkɔ akɔyɛ adwuma a ɛho hia yi.

Ná wɔabara Yehowa Adansefo dwumadi no wɔ Canada fi July 4, 1940. Bere a yefii akwampae adwuma no ase wɔ May 1 1943 mu no, na ɛda so ara to aban mmara sɛ wubedi Yehowa ho adanse na wode Asafo ti no nhoma ama wɔ asɛnka mu. Bere a na yɛresom sɛ Kristofo no, yɛn ankasa King James nkyerɛase Bible no nko ara na yetumi de hyɛɛ yɛn ho. Bere a yeduu yɛn akwampae dwumadi a edi kan mu nna kakraa bi akyi wɔ Parry Sound, Ontario no, baa dwumadibea no somaa Stewart Mann, ɔkwampaefo bi a ne ho akokwaw ma ɔbɛkaa yɛn ho ne yɛn yɛɛ adwuma. Hwɛ ɔdɔ nsiesiei a ɛte saa! Onua Mann ho yɛ anika na ɔserew bere nyinaa. Yesuaa nneɛma pii fii ne nkyɛn na ɛmaa yɛn ani gyei. Ná yɛyɛ Bible adesua pii bere a Asafo ti no maa yɛn dwumadi foforo wɔ Hamilton kurow no mu no. Ɛno akyi bere tiaa bi no, ɛmfa ho sɛ na manyin dodo sɛ wɔde me bɛkɔ sraadi no, wɔkyerɛw me din. Esiane sɛ mankɔ sraadi nti wɔkyeree me wɔ December 31, 1943. Bere a asɛnnibea no hwehwɛɛ asɛm no mu akyi no, wobuu me atɛn de me kɔɔ wɔn a wonkura tuo nsraban mu, na metraa hɔ kosii August 1945 mu.

Woyii me no, ntɛm ara na me ne Aileen nsa kaa akwampae dwumadi a ɛde yɛn kɔɔ Cornwall, Ontario. Ɛno akyi bere tiaa bi no, Asafo ti no Mmara Dwumadibea no maa yɛn dwumadi bi wɔ Quebec ma yekodii asɛm wɔ polisifo asɛnnibea. Ná eyi yɛ bere a wɔtan Yehowa Adansefo  titiriw denneennen wɔ Quebec wɔ Duplessis bere so. Dapɛn biara no, na mede bere pii kɔ asɛnnibea ahorow anan kɔboa yɛn nuanom. Ná saa bere no yɛ anigye bere a ɛhyɛ gyidi den.

Efi Cleveland ɔmantam nhyiam no ase wɔ 1946 mu no, wɔma mekɔyɛɛ ɔmansin ne ɔmantam adwuma, na ɛmaa me ne me yere fii mpoano kɔɔ mpoano. Na nsɛm resisi ntɛmntɛm. Wɔ 1948 mu no, wɔma yɛkɔɔ Ɔwɛn Aban Gilead Bible Sukuu no adesua a ɛto so 11 no bi. Ná anuanom Albert Schroeder ne Maxwell Friend yɛ yɛn akyerɛkyerɛfo no mu baanu, na na yɛn adesua kuw no mufo 108 no mu 40 yɛ wɔn a wɔasra wɔn no mu bi. Bere a na Yehowa asomfo a wɔde mfe pii asom ka yɛn ho no, na ɛyɛ osuahu a ɛhyɛ nkuran na mfaso wɔ so!

Da koro Onua Knorr fi Brooklyn bɛsraa yɛn. Wɔ ne kasa no mu no, ɔkae sɛ nnipa 25 ntu wɔn ho mma nkosua Japan kasa. Nnipa 108 no nyinaa tuu wɔn ho mae! Afei na ɛsɛ sɛ otitrani no paw wɔn a wɔbɛma wɔasua. Migye di sɛ Yehowa hwɛɛ dwumadi no so bere a wɔrepaw bi no efisɛ biribiara kɔɔ so yiye. Yɛn mu 25 a wɔpaw wɔn a wonyaa hokwan buee adwuma no ano wɔ Japan no mu bebree da so ara gu wɔn dwumadi no so—wɔanyinyin, yiw, nanso wɔda so ara wɔ hɔ. Wɔmaa ebinom te sɛ Lloyd ne Melba Barry dwumadi foforo. Ná Lloyd yɛ Sodikuw no muni kosii sɛ owui wɔ afe a etwaam no mu. Yɛne wɔn nyinaa ani gye akatua a Yehowa de ama no ho.

Yɛn adesua awiei no dui, ma wɔmaa yɛn dwumadi wɔ Jamaica. Nanso, esiane asɛm bi a na ɛda so ara wɔ Quebec asɛnnibea no nti, wɔde yɛn san baa Canada.

Nnwom Pii!

Ɛwom sɛ migyaee nnwonto bɛyɛɛ ɔkwampaefo de, nanso ɛte sɛ nea mannyae nnwonto koraa. Afe a edi hɔ no, Asafo ti no titrani ne ne kyerɛwfo, Milton Henschel, baa Maple Leaf Gardens, wɔ Toronto. Onua Knorr baguam kasa a n’asɛmti ne “Ɛwɔ Akyi Sen Sɛnea Wususuw No!” kanyan obiara. Wɔma mehwɛɛ nnwonto no so wɔ nhyiam no ase nea edi kan. Yɛyɛɛ nnwonto ho nhyehyɛe bɔɔ nnwom atitiriw wɔ Kingdom Service Song Book no mu wɔ (1944). Ná anuanom ani gye ho. Bere a wowiee Memeneda dwumadi no, yɛbobɔɔ Kwasida dwumadi no so. Mihui sɛ Onua Henschel reba baabi a yɛwɔ no, enti memaa nnwontofo kuw no gyaee na matumi akohyia no. Obisae sɛ: “Nnwontofo dodow ahe na mowɔ wɔ mo nnwontofo kuw no mu wɔ ha?” Mibuae sɛ: “Sɛ wɔn nyinaa ba a, yɛyɛ bɛyɛ 35.” Ɔkae sɛ: “Wiɛ, wobenya dodow a ɛte saa abien ahohuru bere a ɛreba yi mu wɔ New York.”

Nanso, wɔtoo nsa frɛɛ me kɔɔ Brooklyn ansa na saa ahohuru bere no redu. Esiane nsɛm tebea bi nti Aileen antumi ne me ankɔ mfiase no. Ná wonsii 124 Columbia Heights dan no nwiei, enti wɔmaa me ne anuanom baanu a wɔasra wɔn—Onua Payne a na n’ani afi ne Karl Klein, a na eyi ne bere a edi kan a merehyia no kɔtraa dan dedaw no mu dan ketewa bi mu. So na yɛkyere so? Yiw. Nanso, yetumi traa hɔ asomdwoe mu. Na anuanom a wɔn ani afi no wɔ abodwokyɛre ne boasetɔ. Mebɔɔ mmɔden sɛ mintwitware wɔn akwan mu! Na ɛyɛ asuade pa wɔ nea Onyankopɔn honhom tumi yɛ no ho. Minyaa nhyira pii wɔ hyia a mihyiaa Onua Klein na me ne no boom yɛɛ adwuma no mu! Ná ɔyɛ ayamyefo ne ɔboafo bere biara. Yɛboom yɛɛ adwuma yiye na yɛakɔ so ayɛ nnamfo paa bɛboro mfe 50 ni.

Minyaa hokwan boae ma wɔtoo nnwom wɔ Yankee Stadium ɔmantam nhyiam ase wɔ 1950, 1953, 1955, ne 1958, na saa ara nso na na meka nnwontofo kuw no ho wɔ Al Kavelin wɔ 1963 ɔmantam nhyiam a wɔyɛe wɔ Rose Bowl, a ɛwɔ Pasadena, California no ase. Wɔ 1953 ɔmantam nhyiam a wɔyɛɛ no Yankee Stadium no ase no, wɔdaa nnwonto dwumadi adi Kwasida no ansa na wɔrema baguam ɔkasa no. Erich Frost maa Edith Shemionik (akyiri yi wɔbɛfrɛɛ no Weigand), a na ne nne yɛ dɛ, too ne dwom a na wahyehyɛ “Mo Adansefo, Monkɔ Mo Anim!” no ma yɛbɔɔ sanku dii akyiri. Yɛn ani gyei yiye bere a yɛtee bere a edi kan sɛ yɛn nuanom mmarima ne mmea a wɔwɔ Afrika no de wɔn nne dɛdɛ reto nnwom no. Ná ɔsɛmpatrɛwfo Harry Arnott de nnwom dɛdɛ bi a wakyere agu hama so fi Northern Rhodesia (seesei Zambia) abrɛ yɛn sɛ yɛmmɔ ntie. Nnwom no gyigyee agumadibea hɔ nyinaa.

 Yɛkyeree 1966 Nnwom Nhoma no Guu Hama So

So wokae nnwom nhoma kɔkɔɔ, “Monto Dwom Na Mommɔ Sanku Mo Komam?” no. Bere a yɛrebewie koraa no, Onua Knorr kae sɛ: “Yɛrebɛkyere nnwom no agu hama so. Mepɛ sɛ wode nnwontofo kuw kakraa bi, sanku ne atɛntɛbɛn kakraa bi na edi ho dwuma. Mempɛ sɛ obiara bɔ abɛn!” Yɛbɛyɛ no Betel Ahenni Asa no so, nanso na ɔhaw bi wɔ ɛhɔ a yɛbɛyɛ no no ho. Sɛ nnyigyei no pue abɔnten esiane ɔdan no afasu a wɔmfaa hwee ntetaree mu, fam hɔ a wɔde abo asam, ne dade nkongua a wɔbobɔ a ɛwɔ hɔ no nti nso ɛ? Hena na ɔbɛboa ama yɛadi nnyigyei ho nsɛnnennen yi ho dwuma? Obi susuwii sɛ: “Tommy Mitchell! Ɔyɛ adwuma wɔ ABC Network Studios.” Yehuu Onua Mitchell, na n’ani gyei sɛ ɔde mmoa a ɛho hia bɛma.

Memeneda anɔpa a edi kan a yɛbɛkyere nnwom no agu hama so no dui, na bere a wɔdaa nnwontofo no adi no, na onua biako kura abɛn. Mekaee Onua Knorr kɔkɔbɔ no: “Mempɛ sɛ obiara ‘bɔ abɛn’!” Afei, dɛn na metumi ayɛ? Mihui sɛ onua no ayi n’abɛn no afi ne kotoku no mu, na ɔde ade a wɔtwetwe abɔ ho, na ofii ase bɔe. Ná onua no ne Tom Mitchell, na na ne nnyigyei a edi kan no yɛ dɛ yiye. Ɔmaa abɛn no gyigyei te sɛ sanku pɛpɛɛpɛ! Minyaa adwene sɛ ɛsɛ sɛ ‘saa onua no ka yɛn ho!’ Onua Knorr penee so.

Ná yɛwɔ anuanom mmarima ne mmea a wɔwɔ ɔdɔ yiye wɔ saa nnwontofo kuw no mu. Ná nnipa a wɔhaw adwene biara nni yɛn mu! Nnwom a wɔkyere gu ahama so yɛ adwumaden, nanso obiara annwiinwii. Bere a yewiee dwumadi no, na yɛn ani ataataa nusu; na ayɔnkofa pa a emu yɛ den abɛda wɔn a wonyaa mu kyɛfa no ntam. Obiara ani gyee hokwan a yenyae no ho, na yɛda Yehowa ase sɛ yetumi yɛɛ adwuma no.

Hokwan Afoforo a Mfaso Wɔ So

Wɔ mfe pii akyi no, makɔ so ayɛ bere nyinaa som adwuma no. Mede mfe 28 ayɛ ɔmansin ne ɔmantam adwuma—emu biara yɛ anigye. Nea ɛka ho bio ne mfe anum a mede ahwɛ Norval Nhyiam Asa no so wɔ Ontario no. Ná me ne Aileen nni adagyew koraa esiane ɔmansin nhyiam a wɔyɛ no dapɛn biara awiei ne afei ɔmantam nhyiam ahorow a wɔyɛ no kasa foforo mu no nti. Wɔ 1979/80 mu no, adansi ne mfiridwuma ho animdefo de nneɛma a ɛwɔ Nhyiam Asa no so no dii dwuma, bere a na wɔresusuw baa dwumadibea a na Asafo ti no besi no daakye wɔ Halton Hills ho no. Yewiee Nhyiam Asa no ho adwumayɛ no, dwumadi foforo maa mede me ho hyɛɛ nnwonto mu bio wɔ Brooklyn, fi 1982 kosi 1984.

Yedii yɛn aware afe a ɛto so 59 no akyi dapɛn biako pɛ na me yere a medɔ no no wui wɔ June 17, 1994. Na yɛde ahofama abom ayɛ akwampae adwuma mfe 51.

Sɛ mehwɛ osuahu pii a manya wɔ asetram no a, mihu sɛ Bible no ayɛ me kwankyerɛfo a ɛsom bo. Ɛtɔ da a mede Aileen Bible no di dwuma na ɛma menya anigye kɛse wɔ nea ɛkaa ne koma no ho—nkyekyem bi nyinaa, kasasin pɔtee bi, ne nsɛm bi a wasensan ase. Sɛnea na ɛte wɔ Aileen ho no, me nso mewɔ kyerɛw nsɛm bi a ɛwɔ ntease pɔtee ma me. Emu biako ne Dwom a ɛto so 137 a ɛkyerɛ mpae fɛfɛ a wɔbɔ Yehowa no: “Yerusalem, sɛ me werɛ fi wo a, ma me werɛ mfi sɛnea wɔbɔ sanku. Sɛ mankae wo a, mma menkae sɛnea wɔto dwom bio, sɛ mammu wo sɛ m’anigye a ɛsen biara a!” (Dwom 137:5, 6 Today’s English Version) Ɛwom sɛ mepɛ nnwom de, nanso m’anigye kɛse no fi ɔdɔ mu a mifi som Yehowa a wama me asetra a ɛyɛ anigye no.

[Ase hɔ asɛm]

[Mfonini wɔ kratafa 28]

Me ne Aileen wɔ 1947 mu

[Mfonini wɔ kratafa 30]

Bere a edi kan a yɛrekyere nnwom agu hama so