Yɛyɛ Wɔn A Wɔwɔ Gyidi

Onyankopɔn Ahenni Ho Asɛm a Wɔka Wɔ Fiji Nsupɔw no So

YESU KRISTO kaa akwan abien bi ho asɛm bere bi. Biako sõ, na ɛkɔ owu mu. Biako sua nanso ɛkɔ nkwa mu. (Mateo 7:13, 14) Nea ɛbɛma nnipa atumi apaw ɔkwan a ɛteɛ no, Yehowa Nyankopɔn bɔɔ ne tirim sɛ ɔbɛma wɔaka Ahenni no ho asɛmpa wɔ wiase nyinaa. (Mateo 24:14) Enti, nnipa a wɔwɔ mmaa nyinaa retie Ahenni no ho asɛm no, na ebinom repaw nkwa denam ‘gye a wɔregye di kɔ ɔkra nkwagye mu’ no so. (Hebrifo 10:39) Yɛto nsa frɛ wo sɛ kenkan sɛnea ebinom apaw nkwa wɔ Fiji ne nsupɔw foforo a ɛbemmɛn a ɛwɔ South Pacific nsupɔw no so ho asɛm.

Wonyaa Yehowa Mu Ahotoso

Na Mere yɛ abeawa a ɔkɔ sukuu bere a odii kan tee Ahenni no ho asɛm wɔ afe 1964 mu no. Esiane sɛ na ɔte supɔw bi a atew ne ho so nti, ɔne Yehowa Adansefo anni nkitaho ahe biara. Nanso, bere bi akyi no, otumi nyaa Bible mu nokware nimdeɛ. Saa bere no, na waware ɔbarima bi a ɔyɛ ɔhene wɔ n’akuraa ase. Esiane sɛ Mere pawee sɛ ɔde Bible mu nnyinasosɛm bɛbɔ ne bra nti, ne kunu no ne n’abusuafo yɛɛ no basabasa, na ne mfɛfo nkuraasefo no buu no animtiaa. Nanso, ɔbɔɔ asu wɔ afe 1991 mu.

Ɛno akyi bere tiaa bi no, Mere kunu, Josua, gow ne nneyɛe mu ma mpo ofii ase traa Bible adesua a na Mere ne wɔn mma no yɛ no mu. Josua gyaee Metɔdist Asɔre a na ɔkɔ no. Nanso, sɛ́ ɔhene no, na ɔda so hwɛ dapɛn dapɛn nhyiam a wɔyɛ wɔ akuraa no ase no so. Nkuraasefo no buu Josua sɛ ɔfatwafo, efisɛ Metɔdist Asɔre no yɛ Fiji akuraa no asefo abrabɔ fã. Enti, ɛhɔnom sɔfo no hyɛɛ Josua sɛ ɔnsan mmra ne kan asɔre no.

Josua de akokoduru kae sɛ ɔne n’abusua asi wɔn gyinae, na wɔasi wɔn bo sɛ wɔbɛsom Yehowa Nyankopɔn “honhom ne nokware mu.” (Yohane 4:24) Wɔ akuraa no ase nhyiam a edi hɔ ase no, ɔmanhene no hyɛe sɛ wɔmpam Josua ne n’abusua mfi akuraa no ase. Wɔmaa wɔn nnanson sɛ wɔmfa mfi supɔw no so, wonnyaw wɔn fie, wɔn asase, ne wɔn nnɔbae—yiw, wɔn asetrade nyinaa hɔ.

Honhom fam anuanom a wɔwɔ supɔw foforo so boaa Josua ne n’abusua, maa wɔn baabi trae ne asase a wɔbɛyɛ so afuw. Mprempren Josua ne ne babarima panyin abɔ asu, na wɔn babarima foforo nso som sɛ asɛmpa no ho dawurubɔfo a wɔmmɔɔ no asu. Mere de ne ho ahyɛ daa akwampae (bere nyinaa Ahenni dawurubɔ) adwuma no mu nnansa yi. Paw a wɔpawee sɛ wɔbɛsom Yehowa no ma wɔhweree dibea ne honam fam nneɛma, nanso te sɛ Paulo no, sɛ wɔde eyi toto nneɛma a wɔanya no ho a, wommu no hwee.—Filipifo 3:8.

Gyinaesi a Ahonim Ho Asɛm Wom

Egye gyidi ne akokoduru na obi atumi de n’ahonim a ɔde Bible atete no adi dwuma. Na eyi te saa wɔ Suraang, ababaa bi a ɔte Tarawa, Kiribati nsupɔw no biako so a na wabɔ no asu foforo no asɛm no mu. Suraang srɛe sɛ wonyi no mfi ne nnwuma a ɔyɛ sɛ ɔyarehwɛfo wɔ ayaresabea no biako mu. N’adesrɛ no anyɛ wɔn dɛ, na ɛma woyii no kɔɔ ayaresabea ketewaa bi a ɛwɔ supɔw bi a atew ne ho so, baabi a na ɔmmɛn ne som mufo afoforo koraa.

Wɔ saa supɔw no so no, ɛyɛ amammerɛ sɛ ahɔho biara a wɔba hɔ no de ayɛyɛde ma ɛhɔnom “bosom” no. Nkurɔfo no gye di sɛ sɛ obi anyɛ a, obewu. Esiane sɛ Suraang amma wɔanyɛ abosonne  yi amma ɔne ne nkurɔfo no nti, nkuraasefo no hwɛɛ kwan sɛ honhom a ne bo afuw no betim ne mene akum no. Bere a hwee anyɛ Suraang anaa ne nkurɔfo no mu bi no, onyaa hokwan pii de dii adanse yiye.

Nanso, na Suraang sɔhwɛ ahorow no to ntwae. Supɔw no so mmerante binom bu no sɛ ɛyɛ anuonyam sɛ wobetumi adaadaa mmabaa ahɔho a wɔba hɔ no ne wɔn ada. Nanso, Suraang ko tiaa wɔn adɛfɛdɛfɛsɛm no kuraa ne mudi mu maa Onyankopɔn. Nokwarem no, sɛ́ ɔyarehwɛfo no, na ɔyɛ adwuma nnɔnhwerew 24 da koro de, nanso otumi de ne ho hyɛɛ daa akwampae adwuma no mu.

Ansa na wɔrebɛto pon bi ama Suraang bere a na ɔrebefi supɔw no so no, akuraa no ase mpanyimfo no kae sɛ, ɔne ɔsɛmpatrɛwfo ankasa a odi kan a wabɛsra wɔn. Esiane Bible mu nnyinasosɛm a ɔde dii dwuma pintinn nti, afoforo a wɔwɔ supɔw no so no akyerɛ Ahenni asɛm no ho anigye.

Honam Fam Nsɛnnennen

Sɛnea nkuraa no bi atew ne ho wɔ akyirikyiri no nti, ɛsɛ sɛ Yehowa nkurɔfo bɔ mmɔden kɛse na ama wɔatumi akɔ asɛnka ne Kristofo nhyiam ahorow. Susuw Adansefo baanan bi a wɔabɔ asu—ɔbarima biako ne mmea baasa—a wɔde nnɔnhwerew pii twa kwan di akɔneaba kɔ nhyiam ahorow no nhwɛso no ho hwɛ. Ɔkwan a wotwa no hwehwɛ sɛ wotwa nsubɔnten abiɛsa ansa na wɔakɔ na sɛ wɔreba a wɔasan atwa. Sɛ nsu no yiri a, onuabarima no de wɔn bag, nhoma, ne ntade a wɔde kɔ asafo nhyiam no gu kyɛnsee kɛse bi mu di kan guare twa nsu no. Na afei, wasan aguare abɛboa anuanom mmea baasa no.

Kuw ketewaa bi nso a wɔkɔ asafo nhyiam wɔ supɔw Nonouti a atew ne ho a ɛwɔ Kiribati so no hyia ɔhaw ahorow. Fie a wohyia wɔ mu no fa nnipa baawɔtwe pɛ. Wɔn a aka no tra abɔnten wɔ nkantankantan a wɔde ayɛ ɔfasu no akyi na wotie. Nkuraasefo foforo a wofi wɔn asɔredan akɛse mu reba ne wɔn a wɔrekɔ no hu beae a wɔyɛ asafo nhyiam no yiye. Nanso, Yehowa asomfo nim sɛ ɛnyɛ adan na Onyankopɔn ani gye ho ankasa na mmom nnipa. (Hagai 2:7) Onuawa bi a ne mfe akɔ anim a wabɔ asu a ɔwɔ supɔw no so no ntumi nnantew nkɔ akyiri. Nanso, ɔtra teaseɛnam bi a wopia mu ma ababaa bi a ɔyɛ ɔdawurubɔfo a wɔmmɔɔ no asu pia no ne no kɔ asɛnka. Nokware no ho anisɔ a wɔkyerɛ bɛn ara ni!

Adawurubɔfo bɛboro 2,100 a wɔresom wɔ Fiji nsupɔw no so no asi wɔn bo sɛ wɔbɛkɔ so aka Onyankopɔn Ahenni ho asɛmpa no. Na wɔwɔ ahotoso sɛ nnipa pii bɛba abɛyɛ “wɔn a wogye di kɔ ɔkra nkwagye mu.”

[Asase mfonini wɔ kratafa 8]

(Wopɛ nsɛm a wɔahyehyɛ awie no a, hwɛ nhoma no mu)

Australia

Fiji