Yɛyɛ Wɔn A Wɔwɔ Gyidi

Ahenni Ho Asɛm a Wɔka Wɔ Altiplano Wɔ Peru

ALTIPLANO da apuei ne atɔe fam wɔ Andes Mmepɔw no mfinimfini—baabi a Bolivia ne Peru bɔ hye no. Ne din no kyerɛ “nkoko,” anaa “asasetamaa.” Ne fã kɛse no ara wɔ Bolivia.

Altiplano trɛw yɛ kilomita 100, na ne tenten boro kilomita 1,000, na ne sorokɔ sen po mita 3,700. Sɛ woforo wimhyɛn fi Peru ahenkurow a ɛda mpoano, Lima, mu rekɔ hɔ a, wotwam wɔ El Misti ogya bepɔw a sukyerɛma wɔ atifi a n’atifi ka mununkum a ne sorokɔ yɛ mita 5,822 no ho. Mmepɔw atenten abien a sukyerɛma wɔ so a ɛwowɔ akyirikyiri, Nevado Ampato ne Nevado Coropuna, a ne sorokɔ boro mita 6,000 nso wɔ hɔ. Sɛ w’ani bɔ so a, ade a wuhu mpofirim ne asasetamaa tɛtrɛɛ—Peru anafo fam Altiplano no.

Peru Altiplano no ahenkurow ne Puno, a ɛda Ɔtare Titicaca, ɔtare a po so hyɛn fa so sen biara wɔ wiase no, atifi fam atɔe. Esiane sɛ ɔmantam no da soro bɛboro kilomita abiɛsa nti, egye bere kakra ansa na ahɔho a wɔba hɔ atumi ahome ɛhɔ mframa a ɛnnɔɔso no ma ɛne wɔn ho agye. Quechua ne Aymara Indiafo na wɔte Ɔtare Titicaca ho. Wubetumi ahu wɔn sɛ wɔreyɛ adwuma wɔ wɔn charas, anaa mfuw nketewa mu a wɔhyehyɛ ntade a ɛyɛ fɛ a ebi kɔla yɛ kɔkɔɔ, ahabammono, anaa bruu. Ɛwom sɛ Spania ne kasa titiriw a wɔka wɔ Peru de, nanso wɔka Quechua ne Aymara nso wɔ Altiplano.

Wɔn a Wodi Asɛnka Adwuma no Anim

Nnipa ahobrɛasefo a wɔyɛ adwumaden a wɔka Quechua ne Aymara kasa no abenya Bible mu nokware nimdeɛ nnansa yi. Nea ama eyi aba titiriw ne bere nyinaa Ahenni asɛmpakafo a wɔresom sɛ akwampaefo atitiriw no nsiyɛ a Yehowa ahyira so pii no.

Sɛ nhwɛso no, wɔde akwampaefo atitiriw José ne Silvia kɔɔ Putina kurow a efi Ɔtare Titicaca ho rekɔ hɔ bɛyɛ kilomita 50 no. Asram abien ntam no, na Silvia reyɛ ofie Bible adesua 16, na José reyɛ 14. Wɔ asram asia pɛ mu no, asafo no mu adawurubɔfo dodow kɔɔ anim fi 23 koduu 41. Na nnipa a wɔba asafo nhyiam no dodow kɔɔ soro fi 48 koduu 132.

José ka sɛ: “Bere a yɛrefi asafo nhyiam ahorow ase wɔ amansin a atew ne ho yi mu no, yehui sɛ ɛbɛyɛ papa sɛ yɛde Baguam Nhyiam ne Asafo Nhoma Adesua na efi ase. Eyi ma ɛyɛ mmerɛw sɛ wɔn a wɔanya anigye foforo no befi ase aba nhyiam horow no.”

Anuanom mmea baanu—biako yɛ ɔkwampaefo—na wodii kan de asɛmpa no baa Muñani ɔmansin a atew ne ho, a efi Putina rekɔ hɔ bɛyɛ kilomita 20 no. Ɛhɔ no, wofii ase ne ɔbarima onifuraefo bi a ne din de Lucio yɛɛ Bible adesua. * Ɔtoo nsa frɛɛ ne nuabarima Miguel a ɔyɛ Katolek ɔsɛmpatrɛwfo a ɔnkɔɔ asɔfodi sukuu na ɔyɛ ɔmansin bi a ɛbɛn hɔ mu panyin no. Bere a Miguel adamfo bi bisaa no nea enti a ɔkɔ Muñani dapɛn biara no, ɔkae sɛ ɔkɔ hɔ kosua Yehowa ne N’asɛm ho ade. Afei asɛmmisa no bae sɛ: “Dɛn nti na yensua Bible no wɔ ha?” Esiane anigye a nkurɔfo a wɔwɔ Miguel mansin no mu daa no adi nti, ankyɛ na Adansefo no yɛɛ asafo nhyiam ahorow ho nhyehyɛe wɔ hɔ.

Miguel fii ase kaa nea na ɔresua no ho asɛm kyerɛɛ afoforo. Nanso, ne dibea sɛ Katolek ɔsɛmpatrɛwfo a ɔnkɔɔ asɛmpatrɛwfo sukuu ne amrado abadiakyiri a ɔyɛ no nso ɛ? Wɔ nhyiam bi a wɔyɛe wɔ ɔmansin no asa so ase no, ɔde too gua sɛ ɔregyae Katolek ɔsɛmpatrɛwfo a ɔyɛ no. So na wɔbɛpaw onipa foforo? Obi a ɔwɔ atiefo no mu kae sɛ: “Dɛn nti na yehia ɔsɛmpatrɛwfo foforo bere a yɛresua  nokware no?” Nokwarem no, na eyi fa nneɛma a Yehowa Adansefo akyerɛkyerɛ wɔn no ho. Onipa foforo de too so sɛ: “Yɛne wo nyɛ adwene sɛ wo nkutoo wubegyae. Dɛn nti na yɛn nyinaa yennyae?” Afei atiefo no nyinaa de nokoro teɛɛm sɛ: “Yɛn nyinaa yɛagyae!”

Ɛno akyi bere tiaa bi no, wosusuw ahoni ne mmeamudua ahorow no ho wɔ ɔmansin no nhyiam bi ase. Ɔbarima bi kae sɛ wɔn a wɔwɔ hɔ no nyinaa nkenkan Deuteronomium 7:25, a ɛkenkan sɛ: “Wɔn anyame ahoni no, momfa ogya nhyew; mma w’ani mmmere ho dwetɛ ne sika, na mfa bi, na ansum wo afiri, efisɛ ɛyɛ [Yehowa, NW] wo Nyankopɔn akyide.”

Afei ɔbarima no bisae sɛ wɔn a wɔne no yɛ adwene sɛ wɔnhyew ahoni no nyinaa mma wɔn nsa so. Wɔn nyinaa maa wɔn nsa so ntɛm ara. (Asomafo no Nnwuma 19:19, 20) Mprempren mmusua 25 a ɛwɔ ɔmansin no mu 23 resua Onyankopɔn Asɛm no. Nnipa baanu resom sɛ adawurubɔfo a wɔmmɔɔ wɔn asu, na awarefo baanum reyɛ nhyehyɛe de wɔn aware ahyɛ mmara ase sɛnea ɛbɛyɛ a wobenya gyinabea pa wɔ Yehowa anim.—Tito 3:1; Hebrifo 13:4.

Nsɛm a Wɔakyere Agu Kasɛt so a Wɔde Kyerɛkyerɛ

Esiane sɛ nhomanimfo pii nni Altiplano nti, Ɔwɛn Aban Asafo no video ne kasɛt ahorow a ɛwɔ ɛhɔnom kasa mu no yɛ mmoa kɛse—wɔ ofie Bible adesua yɛ mu. Ɔkwampaefo titiriw bi a ne din de Dora de Dɛn na Onyankopɔn Hwehwɛ Fi Yɛn Hɔ? nhomawa no mu nsɛm a wɔakyere agu kasɛt so yɛ Bible adesua ahorow. Sɛ ɔbɔ nkyekyem biako a, na wabisa ne Bible suani no asɛm a watie no mu nsɛm.

Ɛhɔnom radio adwumayɛbea bi bɔ Ahwehwɛde nhomawa no afã bi daa wɔ Quechua kasa mu. Wɔyɛ Nyan! nsɛmma nhoma no nso saa ara wɔ Spania kasa mu. Enti, nnipa pii nim Ahenni asɛm no na wɔpɛ sɛ wosua pii bere a Yehowa Adansefo aba wɔn fie no.

Wiase no ani so no, Altiplano wɔ akyirikyiri, nanso ɛnte saa wɔ Onyankopɔn ani so. Yehowa dɔ a ɔwɔ ma adesamma nti, nnipa pii a wɔte Andean Altiplano bepɔw so no rebɛka nnipadɔm a wɔhyɛ ne nokware som fie kɛse anuonyam no ho.—Hagai 2:7.

[Ase hɔ asɛm]