“Di Me Mmara Nsɛm So Na Nya Nkwa”

NÁ ƆYƐ aberante, onyansafo a ne “ho ne n’anim yɛ fɛ.” Na n’adwumawura yere wɔ akɔnnɔ bɔne a ɔda no adi pefee. Esiane sɛ na ontumi nyi n’adwene mfi aberante no so nti, da biara da na ɔbɔ mmɔden sɛ ɔbɛdaadaa no. “Saa bere no mu, da bi ɔkɔɔ ɔdan no mu sɛ ɔkɔyɛ n’adwuma, na ofie hɔfo no mu biara nni hɔ no, ɔsoo n’atade mu kae sɛ: Wo ne me mmɛda!” Nanso, Yosef, tete agya Yakob ba no gyaw n’atade hɔ guan fii Potifar yere no nkyɛn.—Genesis 39:1-12.

Nokwarem no, ɛnyɛ obiara na oguan fi sɔhwɛ a ɛte saa mu. Sɛ nhwɛso no, susuw aberante bi a tete Israel hene Salomo huu no abɔnten so anadwo asɛm no ho hwɛ. Bere a ɔbea sowuifo bi daadaa no no, “odii n’akyi prɛko sɛ nantwi a wɔrekokum no.”—Mmebusɛm 7:21, 22.

Wotu Kristofo fo sɛ ‘wonguan aguamammɔ.’ (1 Korintofo 6:18) Ɔsomafo Paulo kyerɛw Kristoni aberante Timoteo sɛ: “Guan mmerante bere mu akɔnnɔ.” (2 Timoteo 2:22) Sɛ yehyia tebea horow bi a ɛtwetwe adwene kɔ aguamammɔ, awaresɛe, anaa ɔbrasɛe foforo so a, ɛsɛ sɛ yɛn nso yɛyɛ yɛn ade ntɛm guan sɛnea Yosef guan Potifar yere no. Dɛn na ɛbɛboa yɛn ma yɛasi yɛn bo ayɛ saa? Salomo ma yɛn afotu bi a ɛso bi nni wɔ Bible mu nhoma a ɛne Mmebusɛm ti 7 no mu. Ɛnyɛ nkyerɛkyerɛ a ɛbɔ yɛn ho ban fi nnipa a wɔn bra asɛe nnaadaa ho asɛm nko na ɔka na mmom ɔda ɔkwan a wɔfa so yɛ saa no adi pefee denam ka a ɔka sɛnea ɔbea bi a ne bra asɛe daadaa aberante bi ho asɛm no so.

‘Fa Me Mmara Nsɛm Kyekyere Wo Nsateaa So’

Ɔhene no de afotu a ɛte sɛ agya de na efi ase: “Me ba, di me nsɛm so, na fa me mmara nsɛm sie. Di me mmara nsɛm so na nya nkwa, na bu me mmara sɛ w’aniwa kurutiayisi.”—Mmebusɛm 7:1, 2.

Awofo, titiriw agyanom, wɔ asɛyɛde a Onyankopɔn de ama wɔn sɛ wɔnkyerɛkyerɛ wɔn mma Onyankopɔn gyinapɛn ahorow a ɛfa papa ne bɔne ho. Mose tuu agyanom fo sɛ: “Nsɛm yi a merehyɛ wo nnɛ yi nna wo koma so; na fa kyerɛkyerɛ wo mma yiye, na kasa ho, w’afitra mu ne wo kwan so nantew mu ne wo nna mu ne wo sɔre mu.” (Deuteronomium 6:6, 7) Na ɔsomafo Paulo kyerɛwee sɛ: “Agyanom, munnyi mo mma abufuw, na mmom monyɛn wɔn [Yehowa, NW] kasakyerɛ ne nyansakyerɛ mu.” (Efesofo 6:4) Enti, akyinnye biara nni ho sɛ ɔwofo akwankyerɛ ahorow a ɛsɛ sɛ wɔkyerɛ ho anisɔ anaa wobu kɛse no bi ne nkaesɛm, ahyɛde ahorow ne mmara horow a ɛwɔ Onyankopɔn Asɛm, Bible, mu no.

Awofo nkyerɛkyerɛ nso betumi aka ahyɛde ahorow—abusua mmara—ho. Eyinom ye ma abusua no mufo. Nokwarem no, ɛbɛsono abusua biako mmara wɔ foforo de ho, a egyina sɛnea abusua no ahiade te so. Nanso, ɛyɛ awofo asɛyɛde sɛ wosi nea eye sen biara ma wɔn ankasa abusua no ho gyinae. Na mpɛn pii no, mmara horow a wɔhyehyɛ no da komam dɔ a wɔwɔ ne dwen a wodwen wɔn abusua no ho adi. Afotu a yɛde ma mmofra ne sɛ  wonni saa mmara ahorow yi ne Kyerɛwnsɛm mu nkyerɛkyerɛ a wɔn awofo de ma wɔn no so. Yiw, ɛho hia sɛ wobu akwankyerɛ ahorow a ɛte saa no ‘sɛ wɔn aniwa kurutiayisi’—na wɔhwɛ so yiye sen biara. Ɛno ne ɔkwan a wɔbɛfa so akwati adeyɛ a ɛyɛ hu a ɛne sɛ wobebu wɔn ani agu Yehowa gyinapɛn ahorow so na wɔnam so ‘anya nkwa.’

Salomo toa so sɛ: “Fa [me mmara nsɛm] kyekyere wo nsateaa so, kyerɛw wo koma pon so.” (Mmebusɛm 7:3) Sɛnea yehu yɛn nsateaa bere nyinaa na ɛho hia wɔ yɛn atirimpɔw ahorow ho dwumadi mu no, ɛsɛ sɛ yɛkae asuade a yenya fi Kyerɛwnsɛm mu ntetee a wɔde ma yɛn no mu anaa Bible mu nimdeɛ a yenya bere nyinaa no, na yɛma ɛkyerɛ yɛn kwan wɔ biribiara a yɛyɛ mu. Ɛsɛ sɛ yɛkyerɛw gu yɛn koma pon so, na yɛde ka nneɛma a ɛkanyan yɛn no ho.

Bere a ɔhene no mma n’ani mpa hia a nyansa ne nhumu ho hia so no, otu fo sɛ: “Ka kyerɛ nyansa sɛ: Me nuabea ne wo! na frɛ nhumu sɛ w’adamfowa.” (Mmebusɛm 7:4) Nyansa ne tumi a wotumi de nimdeɛ a Onyankopɔn de ma di dwuma ɔkwan a ɛfata so. Ɛsɛ sɛ yɛn ani gye nyansa ho sɛnea yɛn ani gye yɛn nuabea a yɛdɔ no yiye ho no. Dɛn ne nhumu? Ɛne tumi a yetumi hu asɛm bi mu na yɛte ase denam asɛm no afã horow ne ne mũ nyinaa mu a yehu so. Ɛsɛ sɛ yɛbɛn nhumu paa sɛ adamfo pa.

Dɛn nti na ɛsɛ sɛ yɛbata Kyerɛwnsɛm mu ntetee ho, na yɛbɛn nyansa ne nhumu paa? Sɛnea ɛbɛyɛ a ‘ɛbɛhwɛ yɛn so afi ɔbea nanani ho, afi ɔbea hɔho a ɔka adɔkɔdɔkɔsɛm ho.’ (Mmebusɛm 7:5) Yiw, saa a yɛbɛyɛ no bɛbɔ yɛn ho ban afi ɔnanani, anaa ɔhɔho—obi a ne bra asɛe—adɔkɔdɔkɔsɛm ne adɛfɛdɛfɛ ho. *

Aberante no Hyia ‘Ɔbea a N’ani Atew’

Afei, Israel hene no ka tebea bi a ɔno ankasa ahu ho asɛm sɛ: “Mifi me dan mfɛnsere mu, m’ahunuaniankansa mu mehwɛe; na mehwɛɛ ntetekwaafo mu, mihuu mmofra no mu aberantewa bi a onni ti: ɔperee abɔnten bɛn ne twea, na ɔsen faa ne fi kwan, ɛbere a ade resa, anadwofa, anadwo kɔnkɔn ne sum mu.”—Mmebusɛm 7:6-9.

Ahunuaniankansa wɔ mfɛnsere a Salomo hwɛ mu no mu—ɛda adi sɛ nsisim wɔ mfɛnsere no mu, na ebia wɔadi adwini a ɛyɛ fɛ wɔ mpuran no so. Bere a owia tɔ no, esum ba abɔnten so. Ohu aberante bi a ɔyɛ mmerɛw ankasa. Onni nhumu, anaa atɛmpa, na onni  ti. Ɛda adi sɛ, onim borɔn a wadu so no ne nea ebetumi ato no wɔ hɔ. Aberante no bɛn ‘ɔbea no twea,’ a ɛbɛn ne fie kwan so no so. Hena ne ɔbea no? Dɛn na ɔrehwehwɛ?

Ɔhene a ɔrehwɛ ade no toa so sɛ: “Hwɛ, ɔbea bi hyiaa no, ofura aguamantam, ne koma asen; wagyigya na n’aso asorow, ne nan ntra ne fi; mprempren ɔwɔ mmorɔn so, seesee yi ɔwɔ gua so, na ɔtetɛw twea nyinaa so.”—Mmebusɛm 7:10-12.

Sɛnea ɔbea yi asiesie ne ho no ma wohu sɛnea ɔte ankasa. (Genesis 38:14, 15) N’ahosiesie nkyerɛ obi a n’ani wu ade, ɛte sɛ tuutuuni. Afei nso, ne koma asen—ɔyɛ “nkontomponi,” na n’atirimpɔw yɛ “nnaadaa.” (An American Translation; New International Version) Wagyigya, na ne koma asen, ɔpɛ kasa na ne tirim yɛ den, ɔpɛ dede na ɔyɛ ahopɛ, ɔwɔ akokoduru bɔne na onsuro hwee. Sɛ anka ɔbɛtra ne fie no, ɔmpa mmɔnten so, na ɔtetɛw mmɔnten twea so pɛ nea obenya no. Ɔretwɛn obi te sɛ aberante no.

‘Bradato Pii’

Enti aberante yi hyia ɔbea daadaafo a ne bra asɛe yi. Hwɛ sɛnea ɛbɛyɛ sɛ eyi gyee Salomo adwene! Ɔka sɛ: “Ɛnna osoo no mu, na ofew n’ano, na ɔhyɛɛ n’ani den ka kyerɛɛ no sɛ: Asomdwoe afɔrebɔ da me so, ɛnnɛ na mama m’aboade: enti na mifi mibehyiaa wo yi, mebɛhwehwɛɛ w’anim, na mahu wo yi.”—Mmebusɛm 7:13-15.

Saa ɔbea yi ano yɛ fremfrem. Ɔde akokoduru kaa ne nsɛm ahotoso mu. Ɔhwɛ biribiara a ɔka yiye sɛnea ɛbɛyɛ a ɔbɛdaadaa aberante no. Ɔnam ka a ɔkae sɛ wabɔ asomdwoe afɔre saa da no ara atua n’aboade no so kyerɛe sɛ ɔyɛ ɔtreneeni, kyerɛ sɛ, ɔnyɛ obi a ne honhom fam yiyedi asɛe. Ná wɔde nnam, asikresiam, ngo, ne bobesa na ɛbɔ asomdwoe afɔre wɔ Yerusalem asɔrefie hɔ. (Leviticus 19:5, 6; 22:21; Numeri 15:8-10) Esiane sɛ nea ɔbɔ asomdwoe afɔre no tumi fa bi ma ɔne n’abusua nti, ɔnam saa a ɔka no so kyerɛ sɛ nnuan ne anonne pii wɔ ne fie. Asɛm no mu da hɔ pefee: Aberante no ani begye wɔ hɔ. Ɔno titiriw nti na ɔhyɛɛ da fii ne fie bɛhwehwɛɛ no. Hwɛ sɛnea ɛka koma—asɛm a ɛte saa yɛ dɛ dodo sɛ obi betumi agye adi. Bible ho ɔbenfo bi ka sɛ: “Ɛyɛ ampa sɛ ɔrehwehwɛ obi, nanso saa nipa pɔtee yi na ɔrehwehwɛ no? Ɔkwasea nkutoo—ebia oyi nkutoo—na obegye no adi.”

Bere a ɔdaadaafo no nam n’atade, n’adɛfɛdɛfɛsɛm, n’atuuyɛ, ne ne mfewano so ama ne ho ayɛ anika awie no, ɔtoa so ka ahuamhuamde ho asɛm. Ɔka sɛ: “Mede mmomo makata me mpa so, Misraim nkyeremu; mede kurobow ne pɛprɛ ne dupapo mapete me nnae so.” (Mmebusɛm 7:16, 17) Ɔde Misraim nkyeremu a ɛyɛ fɛ asiesie ne mpa so fɛfɛɛfɛ, na ɔde kurobow, pɛprɛ, dupapo, apetepete so ma ɛso ayɛ huam.

Ɔbea no toa so sɛ: “Bra ma ɔdɔ mmee yɛn nkosi anɔpa, ma yɛmfa akɔnnɔde nsɛpɛw yɛn ho.” Frɛ a ɔfrɛ no sen anwummeduan a ɛyɛ dɛ kɛkɛ a wɔn baanu bedi. Ɔbea no bɔhyɛ no yɛ nna mu kyɛfa a wobenya. Aberante no de, ɛbɛyɛ ade a ɛyɛ anigye a ɔpɛ sɛ ɔsɔ hwɛ! Ɔbea no kɔ so daadaa no, na ɔde ka ho sɛ: “Ofiwura nni fie, watu kwan kɔ akyirikyiri; wafa foto ne sika akura, ɔsram korokumatwa da mu ansa na ɔbɛba fie.” (Mmebusɛm 7:18-20) Ɔbea no hyɛ no bɔ sɛ ɔhaw biara nni hɔ, efisɛ ne kunu atu kwan rekodi gua, na ɔbɛkyɛ ansa na waba. Hwɛ sɛnea otumi fa anifere kwan so daadaa aberante no! “Ɔde brada pii too no, ɔde n’ano fremfrem nyaa no de no kɔe.” (Mmebusɛm 7:21) Gye ɔbarima a ɔte sɛ Yosef na obetumi ako atia nnaadaa yi. (Genesis 39:9, 12) So aberante yi betumi agyina ano?

‘Te sɛ Nantwi a Wɔrekokum No’

Salomo bɔ amanneɛ sɛ: “Odii n’akyi prɛko sɛ nantwi a wɔrekokum no, sɛ mpokyerɛ a  wɔde twe ogyimfo asõ, kosii sɛ agyan hwirew ne mmerɛbo mu, te sɛ anomaa de ahoɔhare kɔ afiri mu, na onnim sɛ ne nkwa na ɛda mu.”—Mmebusɛm 7:22, 23.

Aberante no antumi ankwati ɔfrɛ no. Obu n’ani gu biribiara so kodi n’akyi “sɛ nantwi a wɔrekokum no.” Sɛnea ɔbarima a wɔagu no mpokyerɛ ntumi nkwati asotwe no, saa ara na wɔtwe aberante no kɔ bɔne mu. Onhu asiane a ɛwɔ mu no kosi sɛ “agyan hwirew ne mmerɛbo mu,” kyerɛ sɛ, wopira no pira a ebetumi akum no. Owu no betumi ayɛ paa ara efisɛ obetumi anya nyarewa a wonya fi nna mu a ebetumi akum no. * Apirakuru no nso betumi akum no wɔ honhom fam; ‘ne nkwa da asiane mu.’ Ɛka ne nipadua ne n’asetra nyinaa anibere so, na wayɛ bɔne a anibere wom atia Onyankopɔn. Enti ɔde ahoɔhare kɔ owu mu te sɛ anomaa a ɔkɔhyɛ afiri mu!

“Mfom Nkɔ N’akwan So”

Bere a ɔhene nyansafo no reka asuade a ɛwɔ nea wahu no mu ho asɛm no, ɔhyɛ nkuran sɛ: “Afei, me mma, muntie me, na monyɛ asõ mma m’anom nsɛm. Mma wo koma mmmãn nnkɔ n’atempɔn so, mfom nkɔ n’akwan so. Na wapirapira nnipa pii agugu hɔ, na wɔn a wakunkum wɔn dɔɔso; ne fi ne asaman kwan, esian kɔ owu mpia mu.”—Mmebusɛm 7:24-27.

Ɛda adi pefee sɛ, Salomo afotu ne sɛ yɛmman mfi onipa a ne bra asɛe nneyɛe a ɛkɔ owu mu no ho na ‘yennya nkwa.’ (Mmebusɛm 7:2) Hwɛ sɛnea afotu yi fata ma yɛn nnɛ! Nokwarem no, ɛho hia sɛ yɛkwati mmeae a nkurɔfo taa tɛw sɛ wobenya afoforo no. Dɛn nti na ɛsɛ sɛ wokɔ mmeae a ɛtete saa de wo ho kɔto wɔn mfiri mu? Nokwarem no, dɛn nti na ɛsɛ sɛ woyɛ obi a “onni ti” na wofom kɔ ‘ɔnanani’ akwan so?

“Ɔbea nanani” a ɔhene no huu no no nam nsa a ɔto frɛɛ aberante no sɛ ɔmmra mma ‘wɔmfa akɔnnɔde nsɛpɛw wɔn ho’ no so na ɛdaadaa no. So wɔnnaadaa mmofra pii—titiriw mmeawa—wɔ saa kwan yi so? Nanso, susuw ho hwɛ: Sɛ obi pɛ sɛ ɔtwetwe wo ma wode wo ho kɔhyɛ nna mu ɔbrasɛe mu a, so ɛyɛ nokware dɔ anaa pɛsɛmenkominya akɔnnɔ? Dɛn nti na ɔbarima a ɔdɔ ɔbea nokwarem bɛhyɛ no ma wabu Kristofo ntetee a wanya ne n’ahonim so? Salomo tu fo sɛ ‘yɛmmma yɛn koma mmmãn nnkɔ’ akwan a ɛtete saa so.

Ɔdaadaafo nsɛm taa yɛ fremfrem a wasusuw ho yiye. Sɛ yenya nyansa ne nhumu a, ɛbɛboa yɛn ma yɛate ase ankasa. Yɛn werɛ a yɛremma emfi nea Yehowa aka no, bɛbɔ yɛn ho ban. Enti, momma yɛmmɔ mmɔden bere nyinaa sɛ ‘yebedi Onyankopɔn mmara nsɛm so na yɛanya nkwa’ daa.—1 Yohane 2:17.

[Ase hɔ nsɛm]

[Mfonini ahorow wɔ kratafa 29]

Wubu awofo mmara dɛn?

[Mfonini wɔ kratafa 31]

Onyankopɔn mmara nsɛm so a yebedi bɛma yɛanya nkwa