Fi Wo Pɛ Mu Som Onyankopɔn

ƆSOMAFO Paulo kyerɛwee sɛ: “Me de, mede fɛw pii mɛhwere m’ade ne me ho mama mo kra.” (2 Korintofo 12:15) Dɛn na saa nsɛm yi ka kyerɛ wo wɔ adwene ne su a ɛsɛ sɛ Yehowa asomfo bɔ mmɔden nya ho? Sɛnea Bible nhomanimfo bi kyerɛ no, bere a Paulo kyerɛw saa nsɛm no kɔmaa Kristofo a wɔwɔ Korinto no, na ɔreka sɛ: “Mepɛ sɛ mede m’ahoɔden, me bere, me nkwa, ne nea mewɔ nyinaa di dwuma ma mo yiyedi, sɛnea agya yɛ ma ne mma anigye so no.” Na Paulo asiesie ne ho sɛ ‘ɔbɛhwere n’ade,’ anaa ‘ɔbɛbrɛ na wayɛ mmerɛw,’ sɛ saa na na ɛhwehwɛ na ama watumi ayɛ ne Kristofo som adwuma no a.

Afei nso, Paulo ‘de fɛw pii’ na ɛyɛɛ eyinom nyinaa. The Jerusalem Bible ka sɛ, na “ɔwɔ ɔpɛ a edi mu koraa” sɛ ɔbɛyɛ saa. Na wo nso ɛ? So wopɛ sɛ wode wo bere, w’ahoɔden, wo dom akyɛde, ne w’ahode som Yehowa Nyankopɔn hwehwɛ afoforo yiyedi, sɛ saa a wobɛyɛ no bɛma ɛtɔ mmere bi a ‘woabrɛ na woayɛ mmerɛw’ mpo a? Na so wode “fɛw pii” na ɛbɛyɛ eyi?

Wɔmpɛ sɛ Wɔbɛsom Koraa

Ɛnyɛ sɛ nnipa dodow no ara twetwɛn wɔn nan ase sɛ wɔbɛsom Onyankopɔn kɛkɛ, mmom no wɔmpɛ sɛ wɔsom no koraa. Wɔda bonniayɛ, pɛsɛmenkominya, ne atuatew honhom mpo adi. Satan daadaa Adam ne Hawa ma wonyaa adwene a ɛte saa. Ɔkaa no atoro so sɛ wɔbɛyɛ “sɛ Onyankopɔn ahu papa ne bɔne”—na wɔatumi asi nea ɛteɛ ne nea ɛnteɛ ho gyinae ama wɔn ankasa ho. (Genesis 3:1-5) Wɔn a wɔda su a ɛte saa ara adi nnɛ no susuw sɛ ɛsɛ sɛ wonya ahofadi koraa de yɛ nea wɔn ankasa pɛ a asodi biara nna wɔn so wɔ Onyankopɔn anim anaasɛ ontwitware wɔn akwan mu. (Dwom 81:11, 12) Wɔpɛ sɛ wɔde wɔn ahode nyinaa yɛ nea wɔn ankasa pɛ.—Mmebusɛm 18:1.

Akyinnye biara nni ho sɛ wunni adwene a ɛtra so yi bi. Ɛda adi sɛ w’ani gye nkwa akyɛde a wowɔ mprempren ne anidaso a ɛyɛ anigye a ɛne sɛ wobɛtra ase daa wɔ paradise wɔ asase so no ho. (Dwom 37:10, 11; Adiyisɛm 21:1-4) Ebia w’ani sɔ nneɛma pa a Yehowa yɛ ma wo no kɛse. Nanso, ɛsɛ sɛ yɛn nyinaa ma yɛn ani da hɔ wɔ asiane a ɛne sɛ Satan betumi asɛe yɛn nsusuwii wɔ ɔkwan bi so a ɛbɛma yɛn som adwuma ayɛ nea ɛnsɔ Onyankopɔn ani ankasa no ho. (2 Korintofo 11:3) Ɔkwan bɛn so na eyi betumi aba?

Wɔhwehwɛ sɛ Yefi Yɛn Pɛ Mu Som

Yehowa hwehwɛ sɛ yefi yɛn pɛ mu ne yɛn koma nyinaa mu som no. Ɔnhyɛ yɛn da sɛ yɛnyɛ n’apɛde. Satan na ɔbɔ mmɔden biara sɛ ɔbɛhyɛ nkurɔfo anaa ɔbɛdaadaa wɔn ma wɔayɛ n’apɛde. Ɛdefa Onyankopɔn som ho no, Bible ka asɛyɛde, ahyɛde, ahwehwɛde, ne nea ɛkeka ho ho asɛm. (Ɔsɛnkafo 12:13; Luka 1:6) Nanso, botae titiriw a yɛde som Onyankopɔn ne sɛ yɛdɔ no.—Exodus 35:21; Deuteronomium 11:1.

 Ɛmfa ho bere dodow a na Paulo de yɛ Onyankopɔn som adwuma no, na onim sɛ sɛ ‘onni dɔ’ a na eyi renkyerɛ hwee. (1 Korintofo 13:1-3) Sɛ Bible akyerɛwfo frɛ Kristofo Onyankopɔn nkoa a, ɛnyɛ ɔsom porɔwee a egyina ɔhyɛ so ho asɛm na wɔka. (Romafo 12:11; Kolosefo 3:24) Nea ɛkyerɛ ne ɔpɛ mu a wofi brɛ wɔn ho ase, a egyina Onyankopɔn ne ne Ba, Yesu Kristo ho dɔ a efi koma nyinaa mu so.—Mateo 22:37; 2 Korintofo 5:14; 1 Yohane 4:10, 11.

Ɛsɛ sɛ ɔsom a yɛde ma Onyankopɔn no nso da ɔdɔ kɛse a yɛwɔ ma nnipa no adi. Paulo kyerɛw Tesalonika asafo no sɛ: “Yɛyɛɛ yɛn ho brɛbrɛ wɔ mo mu, sɛnea ɔbagyigyefo bi yɛn n’ankasa mma.” (1 Tesalonikafo 2:7) Wɔ nsase pii so nnɛ no, ɛnanom na mmara hwɛ kwan sɛ wɔhwɛ wɔn mma. Nanso, nokwarem no, so mmara sodi kɛkɛ nti na ɛnanom dodow no ara yɛ eyi? Dabi. Wɔhwɛ wɔn mma esiane sɛ wɔn ani gye wɔn ho nti! Hwɛ, ɔbaatan de nneɛma pii bɔ afɔre ma ne mma. Esiane sɛ na Paulo “pɛ” wɔn a ɔsom wɔn no “asɛm” nti, na ‘ɛyɛ no anigye’ (‘ɔpɛ,’ King James Version; “ɛyɛ no dɛ,” New International Version) sɛ ɔde ne nkwa bɛto hɔ aboa wɔn. (1 Tesalonikafo 2:8) Ɔdɔ kanyan yɛn ma yesuasua Paulo nhwɛso no.—Mateo 22:39.

Na Ɔsom a Efi Amemenemfe Mu Nso Ɛ?

Nokwarem no, ɛnsɛ sɛ yɛma ahopɛ bunkam ɔdɔ a yɛwɔ ma Onyankopɔn ne nnipa no so. Anyɛ saa na sɛ yɛanhwɛ yiye a, yebefi amemenemfe mu de koma a enni mũ asom. Yebetumi afi ase anya menasepɔw, na yɛahaw sɛ yentumi ntra ase nyɛ nea yɛn ankasa pɛ. Eyi too Israelfo bi a wɔhweree ɔdɔ a na wɔwɔ ma Onyankopɔn nanso wɔkɔɔ so de ɔsom bi maa no sɛ adwuma a ɛsɛ sɛ wɔyɛ no. Dɛn na efii mu bae? Onyankopɔn som bɛyɛɛ “ɔbrɛ” maa wɔn.—Malaki 1:13.

Na ɛsɛ sɛ afɔrebɔde biara a wɔde ma Onyankopɔn no yɛ nea ‘edi mũ,’ a dɛm biara nni ho. (Leviticus 22:17-20; Exodus 23:19) Nanso, sɛ́ anka Malaki bere sofo de mmoa a wodi mũ bɛma Yehowa no, wofii ase de nea wɔn ankasa mpɛ na ɛmaa no. Dɛn na Yehowa yɛe? Ɔka kyerɛɛ asɔfo no sɛ: “Sɛ mode aboa ofurafo bi ba bɛbɔ afɔre a, so ɛnyɛ bɔne? Na sɛ mode apakye anaa ɔyarefo bi ba a, so ɛnyɛ bɔne? Fa kɔma w’amrado: so n’ani bɛsɔ wo, anaasɛ ɔbɛhwɛ w’anim? . . . na mode afow ade ne apakye ne ɔyarefo ba, na mode bɛyɛ ayɛyɛde; so megye mo nsam ma ayɛ me fɛ anaa?”—Malaki 1:8, 13.

Ɔkwan bɛn so na eyi betumi ato yɛn mu biara? Sɛ yenni koma ne honhom a ɛpɛ ankasa a, yɛn afɔrebɔ betumi abɛyɛ ade a ɛhyɛ yɛn “brɛ.” (Exodus 35:5, 21, 22; Leviticus 1:3; Dwom 54:6; Hebrifo 13:15, 16) Sɛ nhwɛso no, so yɛn bere a yɛmfa nyɛ hwee no na yɛde ma Yehowa?

So obi betumi asusuw ho anibere so sɛ sɛ obusuani bi a ɔwɔ adwempa anaa Lewini a ɔyɛ nsi bi hyɛɛ Israelni bi a onni koma a ɛpɛ wɔ ɔkwan bi so ma ɔpaw aboa a odi mũ de bɔɔ afɔre bere a na ɔmpɛ sɛ ɔyɛ saa a, anka Onyankopɔn ani bɛsɔ? (Yesaia 29:13; Mateo 15:7, 8) Yehowa poo afɔre a ɛtete saa no, ne awiei koraa no, nkurɔfo a wɔbɔe no.—Hosea 4:6; Mateo 21:43.

Anigye a Yɛde Bɛyɛ Onyankopɔn Apɛde

Sɛ yɛbɛyɛ Onyankopɔn som adwuma ma asɔ n’ani a, ɛsɛ sɛ yedi Yesu Kristo nhwɛso akyi. Ɔkae sɛ: “Menhwehwɛ nea m’ankasa mepɛ, na mmom nea ɔsomaa me no apɛde.” (Yohane 5:30) Yesu nyaa anigye kɛse wɔ ne pɛ mu a ofi som Onyankopɔn no mu. Yesu maa Dawid nkɔmhyɛ nsɛm no nyaa mmamu: “Nea mepɛ ne sɛ mɛyɛ nea wo, me Nyankopɔn, wopɛ.”—Dwom 40:8.

Ɛwom sɛ na Yesu ani gye sɛ ɔbɛyɛ Yehowa apɛde de, nanso na eyi nyɛ mmerɛw. Susuw nea esii bere a na aka kakra ma wɔakyere no adi n’asɛm akum no no ho hwɛ. Bere a na Yesu wɔ Getsemane turom hɔ no, na “awerɛhow ahyɛ” no so, na ɔwɔ “owu yaw mu.” Na nkate  fam nhyɛso no mu yɛ den araa ma bere a ɔrebɔ mpae no, “ne ho fifiri yɛe sɛ mogya atɔwatɔw a ɛsosɔ fam.”—Mateo 26:38; Luka 22:44.

Dɛn nti na Yesu dii yaw a ɛte saa? Ɛda adi sɛ ɛnyɛ pɛsɛmenkominya anaa Onyankopɔn apɛde a ɔbɛyɛ ho amemenemfe bi ntia. Na wasiesie ne ho sɛ obewu, ma enti ɔkasa tiaa nsɛm a Petro kae sɛ: “Ɛmpare wo, Awurade! Eyi remma wo so” no denneennen. (Mateo 16:21-23) Nea na ɛhaw Yesu ne sɛnea owu a na obewu sɛ nsɛmmɔnedifo a wɔabu no fɔ no bɛka Yehowa ne Ne din kronkron no. Na Yesu nim sɛ ɛbɛyɛ N’agya yaw kɛse sɛ obehu sɛ wɔreyɛ ne Dɔba no basabasa atirimɔden so saa.

Na Yesu te ase nso sɛ ɔrebɛn Yehowa atirimpɔw mmamu bere a ɛho hia no. Na nokware a obedi abata Onyankopɔn mmara ho no bɛma ada adi koraa sɛ anka Adam betumi ayɛ biribi a ɛte saa. Na Yesu nokwaredi no bɛma Satan asɛm a ɛne sɛ nnipa remfi wɔn pɛ mu nsom Onyankopɔn nokware mu bere a wɔwɔ sɔhwɛ mu no ayɛ atoro koraa. Ɛdenam Yesu so no, na awiei koraa no Yehowa bɛpɛtɛw Satan na wayi nneɛma bɔne a n’atuatew no de aba nyinaa afi hɔ.—Genesis 3:15.

Asɛyɛde a emu yɛ duru bɛn ara na na ɛda Yesu mmati so sɛɛ yi! Ná n’agya din, amansan asomdwoe, ne adesamma abusua nkwagye nyinaa gyina nokware a Yesu bedi no so. Bere a na onim eyi no, ɔbɔɔ mpae sɛ: “M’agya, sɛ ebetumi a, ma kuruwa yi ntwa me ho nkɔ! Nanso ɛnyɛ sɛnea mepɛ, na sɛnea wopɛ.” (Mateo 26:39) Wɔ ɔhaw a emu yɛ den kɛse saa mu mpo no, Yesu anni mfomso wɔ ɔpɛ a na ɔwɔ sɛ ɔbɛyɛ N’agya apɛde no mu.

‘Honhom Pɛ, na Ɔhonam Yɛ Mmerɛw’

Esiane sɛ Yesu kɔɔ ahoyeraw kɛse mu wɔ Yehowa som mu nti, yebetumi ahwɛ kwan sɛ Satan de nhyɛso bɛba yɛn so sɛ Onyankopɔn asomfo. (Yohane 15:20; 1 Petro 5:8) Afei nso, yɛnyɛ pɛ. Enti sɛ yefi yɛn pɛ mu som Onyankopɔn mpo a, ɛrenyɛ mmerɛw mma yɛn. Yesu huu sɛnea na n’asomafo brɛ wɔ nneɛma a ɔka kyerɛɛ wɔn sɛ wɔnyɛ no nyinaa mu no. Ɛno nti na ɔkae sɛ: “Honhom pɛ de, na ɔhonam na ɛyɛ mmerɛw.” (Mateo 26:41) Na mmerɛwyɛ bi a onya fii awo mu nni ne nipadua a ɛyɛ pɛ no mu. Nanso, na ɔkae ɔhonam mmerɛwyɛ, sintɔ a n’asuafo no nya fii Adam mu no. Na Yesu nim sɛ esiane sintɔ a wonya fii awo mu ne nnipa mmerɛwyɛ nti, na ɛsɛ sɛ wɔpere ansa na wɔatumi ayɛ nea wɔpɛ sɛ wɔyɛ wɔ Yehowa som mu no nyinaa.

Enti afei, yebetumi ate nka te sɛ ɔsomafo Paulo a ɔhaw pii bere a sintɔ amma wantumi ansom Onyankopɔn sɛnea na ɔpɛ no no. Paulo kyerɛwee sɛ: “Ɔpɛ de, ɛwɔ me hɔ, na ɔyɛ a mɛyɛ nea eye no de, minhu.” (Romafo 7:18) Yɛn nso yehu sɛ yentumi nyɛ nneɛma pa a yɛpɛ sɛ yɛyɛ no nyinaa koraa. (Romafo 7:19) Ɛnyɛ pɛ a yɛmpɛ sɛ yɛyɛ nti na ɛte saa. Nea enti ne sɛ ɔhonam mmerɛwyɛ siw nneɛma a yɛbɔ mu mmɔden no mpo kwan.

Mommma yɛmmpa abaw. Sɛ yɛasiesie yɛn koma sɛ yɛbɛyɛ nea yebetumi nyinaa a, akyinnye biara nni ho sɛ Onyankopɔn ani bɛsɔ yɛn som adwuma no. (2 Korintofo 8:12) Ɛmmra sɛ ‘yɛbɛbɔ mmɔden’ asuasua Kristo su a ɛne sɛ ɔbɛyɛ Onyankopɔn apɛde awie koraa no. (2 Timoteo 2:15; Filipifo 2:5-7; 1 Petro 4:1, 2) Yehowa betua ɔpɛ honhom a ɛte saa so ka na waboa yɛn. Ɔbɛma yɛn “tumi a ɛboro so” de ahyɛ yɛn mmerɛwyɛ no ananmu. (2 Korintofo 4:7-10) Ɛdenam Yehowa mmoa so no, te sɛ Paulo no, ‘yɛde fɛw pii bɛhwere yɛn ade’ wɔ Ne som a ɛsom bo no mu.

[Mfonini wɔ kratafa 21]

Paulo fii ne pɛ mu som Onyankopɔn sɛnea obetumi

[Mfonini wɔ kratafa 23]

Wɔ ɔhaw a emu yɛ den kɛse mu mpo no, Yesu yɛɛ N’agya apɛde