Dɛn Nti na Wosom Onyankopɔn?

Ɔhene bi a osuro Onyankopɔn de afotu yi maa ne ba bere bi sɛ: “Hu w’agya Onyankopɔn no, na fa wo koma mũ ne wo kra anisɔ som no.” (1 Beresosɛm 28:9) Ɛda adi pefee sɛ Yehowa pɛ sɛ n’asomfo de anigye ne anisɔ koma som no.

SƐ́ Yehowa Adansefo no, yegye tom ntɛm sɛ bere a wɔkyerɛkyerɛɛ Bible bɔhyɛ ahorow mu kyerɛɛ yɛn nea edi kan no, yenyaa anisɔ kɛse wɔ yɛn koma mu. Yesuaa Onyankopɔn atirimpɔw ahorow ho ade foforo da biara da. Dodow a yesuaa Yehowa ho ade no, dodow no ara na yenyaa ɔpɛ a emu yɛ den sɛ yɛde ‘koma mũ ne yɛn kra anisɔ’ bɛsom no.

Nnipa pii a wɔabɛyɛ Yehowa Adansefo no kɔ so de anigye kɛse som Yehowa wɔn nkwa nna nyinaa. Kristofo binom fi ase yiye, nanso bere a bere kɔ so no, wɔma wɔn werɛ fi nneɛma a ɛkanyan yɛn ma yɛsom Onyankopɔn no. So ato wo saa? Sɛ ɛte saa a, mpa abaw. Wo nsa betumi asan aka anigye a ayera no. Ɔkwan bɛn so?

Susuw Wo Nhyira Ahorow Ho

Nea edi kan no, dwennwen da biara da nhyira ahorow a wunya fi Onyankopɔn hɔ no ho. Susuw Yehowa akyɛde pa ahorow ho: n’adebɔ nnwuma pii—obiara nsa ka bi ɛmfa ho sɛnea wɔn asetra anaa wɔn sikasɛm te—aduan ne anonne ho nsiesiei a wayɛ, akwahosan a wunya, Bible mu nokware nimdeɛ a wowɔ, na ne titiriw no, ne Ba no a ɔde no ama sɛ akyɛde no. Ne wu na ɛbɔɔ kwan maa wode ahonim pa som Onyankopɔn no. (Yohane 3:16; Yakobo 1:17) Dodow a wudwennwen Onyankopɔn papayɛ ho no, dodow no ara na anisɔ a wowɔ ma no no bɛyɛ kɛse. Afei wo koma bɛka wo ma wode anisɔ asom no wɔ nea wayɛ ama wo nyinaa ho. Akyinnye biara nni ho sɛ wubefi ase ate nka bio sɛnea odwontofo no kyerɛwee no: “[Yehowa, NW], me Nyankopɔn, w’anwonwade ne w’adwene, woama adɔɔso ama yɛn, wɔrentumi mfa biribi nto wo ho; . . . ɛdɔɔso sen sɛ wobetumi akan.”—Dwom 40:5.

Dawid, ɔbarima a ohyiaa ɔhaw pii wɔ n’asetram no na ɔkyerɛw saa nsɛm yi. Bere a na Dawid yɛ aberante no, esiane sɛ na Ɔhene Saul tirimɔdenfo no ne n’awɛmfo rehwehwɛ no akum no nti, ɔde ne bere dodow no ara yɛɛ oguanfo. (1 Samuel 23:7, 8, 19-23) Ná Dawid san wɔ n’ankasa mmerɛwyɛ ahorow a ɛsɛ sɛ ɔko tia. Ogyee eyi toom wɔ Dwom 40 mu sɛ: “Bɔne a wonnim ano atwa me ho ahyia, m’amumɔyɛ aso me mu a ɛmma minhu ade bio, ɛdɔɔso sen me ti so nhwi, na me koma agyaw me.” (Dwom 40:12) Yiw, na Dawid wɔ ɔhaw ahorow, nanso ammunkam no so koraa. Ɔde n’adwene sii sɛnea na Yehowa rehyira no, ɛmfa ho ɔhaw ahorow a na ɔrehyia nyinaa no so, na ohui sɛ na saa nhyira ahorow no sen ne haw ahorow no koraa.

Sɛ wote nka sɛ wo nsɛnnennen bi abunkam wo so anaasɛ wote nka sɛ wotɔ sin a, ɛyɛ papa sɛ wugyina na wususuw wo nhyira ahorow ho sɛnea Dawid yɛe no. Akyinnye biara  nni ho sɛ, anisɔ a wunya maa nhyira horow a ɛte saa no na ɛkaa wo ma wuhyiraa wo ho so maa Yehowa; nsusuwii a ɛte saa nso betumi aboa wo ma woasan anya anigye a ayera no, na aboa wo ma wode anisɔ koma asom Onyankopɔn.

Asafo Nhyiam Ahorow Betumi Aboa

Yehowa papayɛ ho a yɛn ankasa bedwennwen akyi no, ehia sɛ yɛne yɛn mfɛfo Kristofo bɔ. Ɛhyɛ nkuran sɛ yɛne mmarima, mmea, ne mmofra a wɔdɔ Onyankopɔn na wɔasi wɔn bo sɛ wɔbɛsom no no hyiam daa. Wɔn nhwɛso betumi akanyan yɛn ma yɛafi ɔkra nyinaa mu asom Yehowa. Ahenni Asa so a yɛbɛkɔ no betumi ahyɛ wɔn nso nkuran.

Nokwarem no, sɛ yɛkɔyɛ adwumaden ba fie, anaa bere a esiane asɛnnennen anaa mmerɛwyɛ bi nti yɛn abam abu no, ɛrenyɛ mmerɛw sɛ yebenya adwene sɛ yɛbɛkɔ asafo nhyiam wɔ Ahenni Asa so. Mmere a ɛte saa no, ɛsɛ sɛ yɛhyɛ yɛn ho so, sɛnea yɛbɛka no no, ‘yɛhyɛ yɛn nipadua ahometew,’ na ama yɛatumi adi ahyɛde a ɛne sɛ yɛne yɛn mfɛfo Kristofo nhyiam no so.—1 Korintofo 9:26, 27; Hebrifo 10:23-25.

Sɛ ɛno ho behia a, so ɛsɛ sɛ yɛka sɛ yɛnnɔ Yehowa ankasa? Ɛnte saa koraa. Na ɛsɛ sɛ tete Kristofo a wɔn ho akokwaw a akyinnye biara nni ho sɛ na wɔdɔ Onyankopɔn no yere wɔn ho denneennen na ama wɔayɛ Onyankopɔn apɛde. (Luka 13:24) Ná ɔsomafo Paulo yɛ Kristoni a ɔte saa. Ɔkaa ne nkate ho asɛm pefee wɔ saa kwan yi so sɛ: “Minim sɛ me mu, ɛne sɛ me honam mu de, papa bi nte mu; efisɛ ɔpɛ de, ɛwɔ me hɔ, na ɔyɛ a mɛyɛ nea eye no de, minhu. Na papa a mepɛ no, menyɛ, na mmom bɔne a mempɛ no, ɛno na meyɛ.” (Romafo 7:18, 19) Na ɔka kyerɛɛ Korintofo no sɛ: “Na sɛ meka asɛmpa no a, ɛnyɛ me ahohoahoa, na etwa me sɛ meka, . . . Na sɛ meyɛ no anigye so a, mewɔ akatua; sɛ nso manyɛ no anigye so a, wɔde ofiehwɛ adwuma no ahyɛ me nsa ara.”—1 Korintofo 9:16, 17.

Te sɛ yɛn mu bebree no, na Paulo wɔ bɔne su ahorow a esii ɔpɛ a na ɔwɔ sɛ ɔbɛyɛ nea ɛteɛ no kwan. Nanso, ɔko tiaa saa su horow no denneennen, na odii nkonim mpɛn pii. Nokwarem no, ɛnyɛ Paulo ankasa ahoɔden na ɛma otumi yɛɛ eyi. Ɔkyerɛwee sɛ: “Mitumi ade nyinaa yɛ, nea ɔhyɛ me den no mu.” (Filipifo 4:13) Sɛ wohwehwɛ Yehowa a ɔhyɛɛ Paulo den no mmoa a, ɔbɛhyɛ wo nso den ma woayɛ nea ɛteɛ. (Filipifo 4:6, 7) Enti ‘pere gyidi no ho,’ na Yehowa behyira wo.—Yuda 3.

Ɛnsɛ sɛ wo nkutoo ko saa ko yi. Kristofo mpanyimfo a wɔn ho akokwaw a wɔn ankasa ‘repere gyidi no ho’ a wɔayɛ krado sɛ wɔbɛboa wo no wɔ Yehowa Adansefo asafo ahorow mu. Sɛ wokɔ ɔpanyin bi nkyɛn kɔhwehwɛ mmoa a, ɔbɛbɔ mmɔden ‘akyekye’ wo werɛ. (1 Tesalonikafo 5:14) Ne botae ne sɛ ɔbɛyɛ “sɛ mframa ano hintabea ne osu ano guankɔbea.”—Yesaia 32:2.

“Onyankopɔn ne dɔ,” na ɔpɛ sɛ n’asomfo fi ɔdɔ mu som no. (1 Yohane 4:8) Sɛ ɛsɛ sɛ wohyɛ ɔdɔ a wowɔ ma Onyankopɔn no mu den a, fa akwan a ɛfata a yɛaka ho asɛm wɔ atifi hɔ no so yɛ saa. W’ani begye sɛ woyɛɛ saa.