Nsɛmmisa a Efi Akenkanfo Hɔ

Ɛhe na ɛsɛ sɛ ɔyere Kristoni ko tia awaregyae a ne hokafo de ba kodu?

Bere a nnipa aware fii ase no, Onyankopɔn kae sɛ ɛsɛ sɛ okunu ‘bata’ ne yere ho. (Genesis 2:18-24) Nnipa tɔɔ sin, na ɛde nsɛnnennen pii aba aware mu, nanso Onyankopɔn pɛ ne sɛ awarefo bɛkɔ so atra. Ɔsomafo Paulo kyerɛwee sɛ: “Wɔn a wɔaware no de, mehyɛ wɔn, ɛnyɛ me, na mmom ɛyɛ Awurade, sɛ ɔbea nnnyaa ne kunu, na sɛ ogyaa no a, ɔnnware; anyɛ saa a, ɔnsan ne ne kunu nkɔbom, na okunu nso nnnyaa ne yere.”—1 Korintofo 7:10, 11.

Saa nsɛm no kyerɛ sɛ wɔ nnipa a yɛnyɛ pɛ mu no, ɛtɔ mmere bi a, ɔhokafo bi besi gyinae agyae aware. Sɛ nhwɛso no, Paulo kae sɛ sɛ ɔhokafo bi gyae aware a, ɛnsɛ sɛ wɔn baanu nyinaa ‘ware.’ Dɛn ntia? Wiɛ, ɛwom sɛ ɔhokafo no gyaee aware de, nanso wɔ Onyankopɔn ani so no na wɔda so ara yɛ awarefo. Na Paulo betumi aka eyi efisɛ na Yesu de Kristofo aware ho gyinapɛn asi hɔ: “Sɛ ɛnyɛ aguamammɔ [Hela, por·neiʹa] nti na obi gyaa ne yere na ɔware ɔfoforo a, na wasɛe aware.” (Mateo 19:9) Yiw, ade biako pɛ a wogyina so gyae aware a ɛma aware gu wɔ Kyerɛwnsɛm mu ne “aguamammɔ,” kyerɛ sɛ, nna mu ɔbrasɛe. Ɛda adi sɛ, wɔ nea na Paulo reka ho asɛm mu no, na awarefo no mu biara mfaa ne ho nhyɛɛ ɔbrasɛe mu, enti bere a okunu anaa ɔyere no tete mu no, na aware no ngui wɔ Onyankopɔn ani so.

Afei Paulo kaa tebea bi a ɛfa nokware Kristoni a ɔwɔ ɔhokafo a onnye nni ho no ho asɛm. Susuw Paulo akwankyerɛ ahorow no ho hwɛ: “Nea onnye nni no tew mu kɔ a, ma ɔnkɔ, na wɔnhyɛ onua ko anaa onuawa ko no sɛ akoa saa nsɛm yi mu. Na asomdwoe mu na Onyankopɔn afrɛ yɛn.” (1 Korintofo 7:12-16) Dɛn na ɔyere gyidini betumi ayɛ bere a ne kunu a onnye nni gyae no, na mpo ɔpɛ sɛ ɔde fa mmara kwan so no?

Ebia na ɔbɛpɛ sɛ ɔkɔ so ne no tra. Ebia na ɔda so ara dɔ no, nim wɔn nkate ne nna fam ahiade, na onim sɛ ɔne ne mma nkumaa a wɔwɔ biara no hia honam fam mmoa. Obetumi ahwɛ kwan nso sɛ, bere kɔ so no, ne kunu no bɛba abɛyɛ gyidini na ama wɔagye no nkwa. Nanso, sɛ ɔbarima no fa ɔkwan bi so sɛ obegu aware no (a ennyina Kyerɛwnsɛm so) a, “ma ɔnkɔ” sɛnea Paulo kyerɛwee no. Sɛ okunu a ɔyɛ gyidini bu n’ani gu Onyankopɔn adwene wɔ aware ho so na ɔhyɛ ketee sɛ ɔbɛtetew mu a, asɛnkoro yi ara na wɔde bedi ho dwuma.

Nanso, ebia ɔbea no behu hia a ehia sɛ ɔbɔ ɔne ne mma ho ban. Ɔkwan bɛn so? Ɔbɛpɛ sɛ ɔne ne mma a ɔdɔ wɔn no bɛtra na ama wakɔ so ayi ɔdɔ adi akyerɛ wɔn sɛ ɛna, ama wɔn abrabɔ ho ntetee pa, na ama wɔanya ɔsom mu gyidi a egyina Bible nkyerɛkyerɛ pa so. (2 Timoteo 3:15) Awaregyae no betumi ama asɛm aba hokwan ahorow a ɔwɔ ho. Enti, ebia ɔbɛfa akwan bi so a ɛbɛma wɔaka n’asɛm ama no yiye wɔ atumfoɔ no anim sɛnea ɛbɛyɛ a ɔbɛbɔ hokwan a ɔwɔ no ho ban, na ama watumi anya ne mma, na wɔahwɛ ama ne kunu no aboa abusua a ɔregyaw wɔn hɔ no.

Mpɔtam hɔfo ne asafo no mufo dodow no ara renhu asɛm no mu nyinaa, te sɛ nea awaregyae no akyi no, awarefo no mu biara betumi abu aware no sɛ engui wɔ Kyerɛwnsɛm mu no. Nanso ansa na nneɛma bedu akyiri saa no, ɛbɛyɛ papa sɛ ɔbea no bɛma asafo no mu guamtrani ne ɔpanyin foforo ate wɔ kokoam (ɛbɛyɛ papa sɛ ɔkyerɛw) sɛnea ɛbɛyɛ a sɛ asɛm bi sɔre—saa bere no anaa akyiri yi—a wobehu nokwasɛm a ɛwɔ mu no. Sɛ ɔbea no ma asafo no ananmusifo te sɛ ‘ɔrema wakɔ’ kɛkɛ, na ne fam de, ɔpɛ sɛ ɔkɔ so ware no a, ɛbɛkyerɛ sɛ onnyaee no. Nea ɛyɛ nwonwa no, okununom a wonnye nni binom adwene aba wɔn ho so akyiri yi, a wɔpɛ sɛ wɔba wɔn abusua mu, san ware wɔn yere dedaw no wɔ mmara kwan so, na wɔsom Yehowa.

Momma yɛnsan nkɔ Yesu asɛm no so: “Sɛ ɛnyɛ aguamammɔ nti na obi gyaa ne yere na ɔware ɔfoforo a, na wasɛe aware.” Sɛ okunu bi di fɔ ankasa wɔ nna mu ɔbrasɛe mu nanso ɔpɛ sɛ ɔkɔ so ware ne yere a, ɛsɛ sɛ ɔbea no (a ne ho nni asɛm wɔ Yesu nhwɛso no mu no) paw sɛ ebia  ɔde bɛkyɛ no na wakɔ so ne no ada anaasɛ obegyae no. Sɛ ɔpɛ sɛ ɔde kyɛ no na ɔkɔ so ne no tra sɛ ne mmara kwan so kunu a, ne ho nguu fĩ wɔ abrabɔ fam sɛ wayɛ saa.—Hosea 1:1-3; 3:1-3.

Sɛ okunu a ne bra asɛe no hwehwɛ awaregyae a, ebia na ɔbea no da so ara pɛ sɛ ɔde kyɛ no a ɔhwɛ kwan sɛ ɔbɛsan anya no. Sɛ́ ebia ɔbea no bɛko atia awaregyae no anaasɛ ɔrenyɛ saa no yɛ ɔno ara asɛm, a egyina n’ahonim ne ne nsɛm tebea so. Wɔ mmeae bi no, ɔbea a ɔreko atia awaregyae betumi de ne nsa ahyɛ nkrataa bi a ɛkyerɛkyerɛ mmofra sohwɛ ne sika fam mmoa mu ase a ɔnkyerɛ sɛ ɔpene awaregyae a ne kunu akɔfa aba no so. Nkrataa a ɛte saa a ɔde ne nsa bɛhyɛ ase no renkyerɛ sɛ ɔregyae ɔbarima no. Nanso, wɔ mmeae foforo no wobetumi ama ɔyere a ɔkyerɛ sɛ ɔreko atia awaregyae no de ne nsa ahyɛ nkrataa bi a emu nsɛm kyerɛ sɛ ɔpene awaregyae so no ase. Awaregyae nkrataa a ɛte saa ase a ɔde ne nsa bɛhyɛ no bɛda no adi pefee sɛ ɔregyae ne kunu a odi fɔ no.

Sɛnea ɛte biara no, nea ɛbɛyɛ na ɔyere no akwati ntawntawdi biara a ebetumi aba no, ɛbɛyɛ nea nyansa wom sɛ ɔkyerɛw krataa kɔma asafo no ananmusifo no de kyerɛkyerɛ akwan a wɔrefa so no ne adwene a ɛwɔ akyiri no mu. Obetumi aka sɛ ɔka kyerɛɛ ne kunu no sɛ ɔpɛ sɛ ɔde kyɛ no na ɔyɛ ne yere. Ɛno bɛkyerɛ sɛ ɔmpene awaregyae no so; sɛ anka obegyae ne kunu no, ɔda so ara asiesie ne ho sɛ ɔde bɛkyɛ no. Bere a wama emu ada hɔ saa sɛ ɔpɛ sɛ ɔde kyɛ no na ɔkɔ so ware no akyi no, ne nsa a ɔde bɛhyɛ nkrataa a ɔde redi sikasɛm ho dwuma ase no renkyerɛ sɛ ɔregyae ne kunu no. *

Sɛ ɔkyerɛ sɛ ɔpɛ sɛ ɔde kyɛ no bere mpo a wɔagyae no akyi a, ɔbea no anaa ne kunu no mu biara nni ho kwan sɛ ɔware obi foforo. Sɛ akyiri yi, ɔbea no a ɔyɛ ɔhokafo a ne ho nni asɛm a ɔkae sɛ ɔde akyɛ a wɔannye antom no si gyinae sɛ wagyae ɔbarima no esiane ne brasɛe no nti a, ɛnde wɔn baanu nyinaa bɛde wɔn ho. Yesu daa no adi sɛ ɔhokafo a ne ho nni asɛm no wɔ hokwan sɛ osi gyinae a ɛte saa.—Mateo 5:32; 19:9; Luka 16:18.

[Ase hɔ nsɛm]