So Wokae?

So w’ani agye Ɔwɛn-Aban a aba nnansa yi akenkan ho? Ɛnde, hwɛ sɛ wubetumi abua nsɛmmisa a edidi so yi anaa:

• Dɛn ne ade titiriw a enti ɛsɛ sɛ yɛne obi siesie yɛn ntam nsɛm?

Ɛsɛ sɛ yedi kan hu sɛ yɛn nyinaa tumi nya nsusuwii bɔne na yɛda subammɔne adi. Ɛnde ɛsɛ sɛ yesusuw ho anibere so hwɛ sɛ ebia ɔhaw no fi yɛn mmom sen sɛ yebesusuw sɛ efi onipa foforo no.—8/15, kratafa 23.

• Bere bɛn na ‘bere a wɔbɛsan asiesie nneɛma nyinaa’ a wɔkaa ho asɛm wɔ Asomafo no Nnwuma 3:21 no bɛba?

Nneɛma a wɔbɛsan asiesie no wɔ afã abien. Nea edi kan ne nneɛma asiesie a wɔde kɔ honhom fam paradise mu a ɛrekɔ so fi afe 1919 no. Nneɛma asiesie foforo bɛba bere a wobesiesie yɛn asase yi ma ayɛ paradise ankasa no.—9/1, nkratafa 17, 18.

• Ɔkwan bɛn so na ɔtɛtea nni otitiriw, sɛnea wɔaka ho asɛm wɔ Mmebusɛm 6:6-8 no, nanso ɔyɛ nhwɛso pa ma yɛn?

Wɔ ɔtɛtea abusua mu no, ɔhemmaa wɔ hɔ de, nanso nkesua a ɔtow nti na ɔyɛ hemmaa, na ɔne ntɛtea abusua no na. Ntɛtea yɛ nsi, na ɛsɛ sɛ yɛn nso yɛyɛ nsi, na yɛbɔ mmɔden yɛ yɛn adwuma yiye, bere mpo a obi nhwɛ yɛn no.—9/15, kratafa 26.

• Esiane sɛ wopiraa Yosia wɔ ɔko mu ma owui nti, so Hulda nkɔmhyɛ a wɔayɛ ho kyerɛwtohɔ wɔ 2 Ahene 22:20 sɛ obewu wɔ “asomdwoe mu” no baa mu pɛpɛɛpɛ?

Yiw, owui wɔ asomdwoe mu kyerɛ sɛ owui ansa na amanehunu a ɛbae wɔ afe 609-607 A.Y.B. mu no reba, bere a Babilonfo betwaa Yerusalem ho hyiae na wɔsɛee no no.—9/15, kratafa 30.

• Dɛn nti na na ɛyɛ nkamfo sɛ Salomo bɛfrɛ ɔyere sɛ “mmepɔw so abirekyi a ne ho yɛ fɛ”? (Mmebusɛm 5:18, 19, NW)

Akakragya bere, anaa mmepɔw so abirekyi ho dwo na ne ho yɛ fɛ. Nanso, otumi tra abotan so, beae a ɛhɔ kɔ yɛ den na aduan ho yɛ na no, na ɔwo wɔ hɔ.—10/1 nkratafa 30, 31.

• Henanom ne Henry Grew ne George Storrs?

Mmarima baanu yi traa ase wɔ 1800 mfe no mu, na na wɔyɛ nkurɔfo a wɔn ani gye Bible sua ho. Grew hui sɛ Baasakoro no nnyina Kyerɛwnsɛm so te sɛ ɔkra a enwu da ne hellgya nkyerɛkyerɛ no ara pɛ. Storrs hui sɛ ebinom benya daa nkwa wɔ asase so. Wɔn baanu nyinaa traa ase ansa na Charles Taze Russell a ofii ase tintim saa nsɛmma nhoma yi wɔ afe 1879 mu no reba.—10/15, nkratafa 26-30.

• Ɔkwan bɛn so na Yehowa Adansefo bu aduruyɛ mu akwan a wɔfa so de obi ankasa mogya di dwuma no?

Esiane sɛ wɔn gyidi gyina Bible so nti, wɔmfa wɔn ankasa mogya nsie na wɔde ama wɔn akyiri yi. Kristoni biara si sɛnea wɔde ne mogya bedi dwuma wɔ oprehyɛnyɛ, aduruyɛ mu nhwehwɛmu, anaa mprempren ayaresa mu no ho gyinae. Ɛsɛ sɛ odi kan susuw nea Bible ka fa mogya ho no ho na ɔkae sɛ wahyira ne ho so koraa ama Onyankopɔn.—10/15, nkratafa 30, 31.

• Ahiade titiriw bɛn na nhwehwɛmu a wɔyɛe wɔ afe yi mfiase no daa no adi sɛ Yehowa Adansefo a wɔwɔ wiase nyinaa hia?

Yehia Ahenni Asa bɛboro 11,000 wɔ aman a wonnyaa nkɔso pii, na wonni sika pii, no mu. Wɔde ntoboa a Kristofo a wɔwɔ nsase pii so yi no reboa ma wɔasisi asafo nhyiambea ahorow a ɛfata.—11/1, kratafa 30.

• Dɛn ne mfitiase kasa mu nsɛmfua bi a wɔde dii dwuma wɔ Bible mu a ɛne ɔsom wɔ abusuabɔ?

Biako ne lei·tour·giʹa, a wɔkyerɛ ase “baguam som adwuma.” Foforo ne la·treiʹa a wɔkyerɛ ase “ɔsom kronn.” ( Hebrifo 10:11, NW; Luka 2:36, 37)—11/15, nkratafa 11, 12.

• Dɛn ne asuade titiriw a yebetumi anya afi Bible kyerɛwtohɔ a ɛfa Adam ne Hawa ho no mu?

Ahofadi biara a wɔhwehwɛ fi Yehowa Nyankopɔn akyi no kowie huammɔdi mu.—11/15, nkratafa 24-7.

• Kyerɛwnsɛm mu adanse bɛn na ɛwɔ hɔ a ɛkyerɛ sɛ Onyankopɔn ma n’asomfo tumi?

Dawid, Habakuk, ne ɔsomafo Paulo nyinaa maa adanse a ɛkyerɛ sɛ Yehowa Nyankopɔn maa wɔn ahoɔden anaa tumi. (Dwom 60:12; Habakuk 3:19; Filipifo 4:13) Enti, yebetumi anya ahotoso sɛ Onyankopɔn wɔ ɔpɛ, na obetumi ahyɛ yɛn den.—12/1, nkratafa 10, 11.