Wɔahyɛ Wɔn Nkuran Sɛ Wɔnkɔsom

DƐN na ɛbɛkanyan awarefo 24 a afei na wɔasi so ma wɔagyaw wɔn mmusua, wɔn nnamfonom, ne mmeae a wɔn ani aka hɔ no na wɔafa asɛmpatrɛw adwuma ato wɔn ho so akɔsom wɔ amannɔne nsase so? Dɛn nti na wɔn ani begye sɛ wɔbɛkɔ mmeae bi te sɛ Papua New Guinea, Taiwan, Afrika, ne Latin Amerika aman so? So ebetumi ayɛ abaninsɛm a wɔn ani gye ho nti? Dabi. Mmom no, nokware dɔ a wɔwɔ ma Onyankopɔn ne wɔn yɔnko nnipa na ɛhyɛ wɔn nkuran.—Mateo 22:37-39.

Henanom ne saa nkurɔfo yi? Wɔne Ɔwɛn Aban Gilead Bible Sukuu adesuakuw a ɛto so 109 a wɔawie wɔn adesua no. Wɔ Memeneda, September 9, 2000 no, nnipa a wɔn dodow si 5,198 hyiaam wɔ Ɔwɛn Aban Asafo Adesuabea—a ɛwɔ Patterson, New York—ne mmeae a atew ne ho tiee afotu a ɔdɔ wom a ebetumi aboa wɔn a wɔawie wɔn adesua no ma wɔadi yiye wɔ asɛmpatrɛw adwuma no mu.

Na dwumadi no guamtrani ne Stephen Lett, a ɔyɛ Yehowa Adansefo Sodikuw no Nkyerɛkyerɛ Boayikuw no muni no. Ɔde ne nnianim kasa no gyinaa Mateo 5:13 a ese, “Mone asase so nkyene” no so. Onua Lett kyerɛkyerɛɛ mu sɛ akyinnye biara nni ho sɛ Yesu nsɛm no fa wɔn a wɔrewie wɔn adesua no ho. Sɛ nhwɛso no, nkyene tumi ma aduan yɛ dɛ. Saa ara nso na asɛmpatrɛwfo no te sɛ nkyene wɔ sɛnkyerɛnne kwan so, denam wɔn asɛnka adwuma a etu mpɔn no so.

Nkuranhyɛ Nsɛm a Wɔde Di Nkra

Afei Onua Lett frɛɛ Yehowa asomfo a wɔde bere tenten asom no no bi ma wɔbɛmaa ɔkasa ahorow ntiantiaa nanso etu mpɔn a egyina Kyerɛwnsɛm so. Nea odii kan ne John Wischuk, a ɔsom wɔ Akyerɛwfo Dwumadibea no. Ná n’asɛmti a ɛne, “Dwom a Ɛyɛ Tia Sen Biara no Hyɛ Asɛmpatrɛw Ho Nkuran,” no gyina Dwom 117 so. Ɛnnɛ, ɛho abehia sɛ wodi Yehowa ne N’ahenni ho adanse kyerɛ “amanaman” ne ‘mmusuakuw.’ Wɔhyɛɛ asuafo no nkuran sɛ wonni nea Dwom 117 ka no ho dwuma denam afoforo a wɔbɛhyɛ wɔn nkuran ma ‘wɔayi Yah ayɛ’ so.

Nea edi hɔ no, oguamtrani no frɛɛ Guy Pierce a ɔyɛ Sodikuw no muni no. Ɔkasa faa asɛmti a ɛne “Yɛ Fakaa, Nanso Yɛ Pintinn” ho. Onyankopɔn Asɛm yɛ den. Wɔfrɛ Yehowa Nyankopɔn Ɔbotan wɔ Deuteronomium 32:4, nanso N’asɛm yɛ fakaa, kyerɛ sɛ, wɔkyerɛw maa kasa horow ne aman nyinaa—yiw, wɔkyerɛw maa adesamma nyinaa. Wotuu adesuafo no fo sɛ wɔnka Onyankopɔn Asɛm no mu nsɛm, na wɔmma ɛnka nkurɔfo koma ne wɔn ahonim. (2 Korintofo 4:2) Onua Pierce tuu fo sɛ: “Gyina trenee nnyinasosɛm akyi pintinn, nanso yɛ fakaa. Mmu wɔn a worekɔka asɛm akyerɛ wɔn no animtiaa esiane sɛ ɛsono wɔn amammerɛ nti.”

 Karl Adams, Gilead akyerɛkyerɛfo no biako, a aka kakra na wasom wiase nyinaa adwumayɛbea ti hɔ mfirihyia 53 no, kaa asɛm bi a ɛkanyan adwene a n’asɛm ti ne “Wufi Ha a Ɛhe na Worekɔ?” Ampa, awarefo 24 no nyaa asɛmpatrɛw dwumadi wɔ aman ahorow 20 so wɔ wiase nyinaa, nanso wobisae sɛ, Sɛ wunya du hɔ na wuhu a, dɛn na wobɛyɛ? Yɛte wiase a nnipa ntumi ntra faako mu. Nkurɔfo pɛ sɛ wɔkɔ mmeae foforo na wɔyɛ nneɛma foforo de sɔ wɔn ho ani. Nanso, Yehowa na wama adesuafo no dwumadi ma wɔakɔ baabi a ɔpɛ sɛ wɔkɔ no, na wofi ayamye mu kɔhwɛ ne “nguan” no. Ɛnsɛ sɛ wɔyɛ sɛ wɔn a na wɔwɔ tete Israel a esiane pɛsɛmenkominya nti wɔhweree hokwan a ɛne sɛ Yehowa de wɔn bedi dwuma ma wɔahyira adesamma nyinaa no. Mmom no, ɛsɛ sɛ wosuasua Yesu Kristo a ofii ayamye mu yɛɛ N’agya apɛde bere nyinaa, na ɔyɛɛ osetie wɔ tebea biara a ohyiae mu, no.—Yohane 8:29; 10:16.

“Bu Onyankopɔn Ade a Emu Dɔ No” ne Wallace Liverance, Gilead Sukuu no kyerɛwfo no kasa no asɛmti. Mpɛn pii na Kyerɛwnsɛm no de Onyankopɔn Asɛm toto ahonyade, aboɔden abo, fagude a ɛsom bo, ne nneɛma a ɛwɔ bo kɛse na wokyin hwehwɛ ho. Mmebusɛm 2:1-5 da no adi sɛ, sɛ yebehu “Onyankopɔn ho nimdeɛ” a, ɛsɛ sɛ yɛhwehwɛ no sɛ “akorade a ahintaw.”  Ɔkasafo no hyɛɛ adesuafo no nkuran sɛ wɔnkɔ so nhwehwɛ Onyankopɔn nneɛma mu nkɔ akyiri bere a wɔresom wɔ wɔn nsasesin foforo mu no. Onua Liverance kae sɛ: “Eyi fata, efisɛ ɛma yenya Yehowa mu gyidi ne ahotoso, na ɛbɛhyɛ wo den ma woakɔ so akura wo dwumadi mu. Ɛbɛboa wo ma wode ahotoso akasa na woayɛ ɔkyerɛkyerɛfo a otu mpɔn kɛse bere a wokyerɛkyerɛ Onyankopɔn atirimpɔw mu kyerɛ afoforo no.”

Te sɛ nea wɔresua ade wɔ sukuudan mu no, Gilead Sukuu no kyerɛkyerɛfo foforo kaa sɛnea Yehowa ahyira adesuafo no asɛnka adwuma so wɔ asram anum no mu ho asɛm. Lawrence Bowen kaa ɔsomafo Paulo nsɛm a ɛwɔ Asomafo no Nnwuma 20:20 a ɛfa ɔsom adwuma a ɔyɛe wɔ Efeso no ho asɛm, sii so dua sɛ Paulo de hokwan ahorow biara a onyae dii adanse. Adesuafo no suahu ahorow daa no adi sɛ, te sɛ ɔsomafo Paulo no, wɔn a ɔdɔ a wɔwɔ ma Onyankopɔn ne wɔn yɔnko nnipa kanyan wɔn wɔ yɛn bere yi mu no ntwentwɛn wɔn nan ase sɛ wɔbɛka nokware no ho asɛm, na wɔama Onyankopɔn Asɛm mu tumi ayɛ adwuma wɔ afoforo mu. Eyi de Yehowa nhyira pii ba.

Wɔn a Wɔwɔ Osuahu Kasa

Wɔ Gilead adesuakuw yi sukuu bere mu no, wonyaa mfaso titiriw denam Baa Boayikuw mufo a wofi nsase 23 so a na wɔn nso aba Patterson Adesuabea hɔ rebegye ntetee titiriw a wɔne wɔn bɔe so. Leon Weaver ne Merton Campbell a wɔyɛ adwuma wɔ Ɔsom Dwumadibea no bisabisaa Baa Boayikuw mufo ahorow, a na wɔn mu binom awie Gilead no nsɛm. Ɛyɛɛ awerɛkyekye maa adesuafo ne wɔn mmusua ne wɔn nnamfonom sɛ wotiee saa asɛmpatrɛwfo a wɔn ho akokwaw yi.

Afotusɛm a wɔde maa sukuufo a wɔrewie no ma aboa wɔn ma wɔayɛ nsakrae atumi atra wɔn amannɔne dwumadi mu no bi ni: “Munnya adwempa. Sɛ wuhyia biribi a wunhuu bi da koraa anaasɛ wuntumi nte ase a, mpa abaw. Fa wo ho to Yehowa so”; “sua sɛ wobɛma w’ani agye nea wowɔ ho, na nya ahotoso sɛ Yehowa bɛma wo nsa aka w’asetram ahiade ahorow.” Nsɛm a afoforo twee adwene sii so ne nneɛma a ɛbɛboa adesuafo no ma wɔakɔ so anya anigye wɔ wɔn dwumadi no mu. Nsɛm no bi ne sɛ: “Mfa baabi a woakɔ no ntoto baabi a wufi ho”; “sua ɛhɔ kasa na ka no yiye sɛnea ɛbɛyɛ a wubetumi ne nkurɔfo adi nkitaho”; “sua nkurɔfo no amammerɛ ne amanne, efisɛ eyi bɛboa wo ma woatra wo dwumadi no mu.” Nsɛm yi hyɛɛ asɛmpatrɛwfo foforo no nkuran kɛse.

Wɔ nsɛmmisa no akyi no, David Splane, a na ɔyɛ ɔsɛmpatrɛwfo ne Gilead adesuakuw a ɛto so 42 no muni a mprempren ɔresom sɛ Yehowa Adansefo Sodikuw no muni no maa ɔkasa titiriw faa asɛmti bi a ɛkanyan adwene ho a ɛne “Adesuafo Anaa Wɔn a Wɔawie Adesua—Emu Nea Ɛwɔ He na Moyɛ?” Obisaa adesuakuw a wɔrewie no sɛ: “Mubebu mo ho dɛn bere a morekɔ mo asɛmpatrɛw dwumadi mu no? Sɛ́ adesuafo a wɔawie a wonim asɛmpatrɛw adwuma ho biribiara anaasɛ adesuafo a wɔda so wɔ nneɛma pii sua?” Onua Splane daa no adi sɛ obi a wawie sukuu a onim nyansa no bu no ho sɛ osuani. Ɛsɛ sɛ asɛmpatrɛwfo no nya adwene sɛ obiara a wobehyia no wɔ wɔn asɛmpatrɛw dwumadi no mu no betumi akyerɛkyerɛ wɔn biribi. (Filipifo 2:3) Wɔhyɛɛ adesuafo no nkuran sɛ wɔne wɔn mfɛfo asɛmpatrɛwfo, baa dwumadibea no, ne wɔn asafo mufo nyɛ biako. Onua Splane hyɛɛ wɔn nkuran sɛ: “Moayɛ mo sɔhwɛ a edi akyiri awie adi nkonim, nanso moda so yɛ asuafo. Momma obiara nhu no fann sɛ morebesua ade.”

Ɔkasa yi akyi no, adesuafo no gyee wɔn adesua ho adansedi nkrataa, na wɔbobɔɔ mmeae a wɔrekɔyɛ adwuma no kyerɛɛ atiefo no. Na bere a adesuakuw no nanmusifo bɛkenkan adesuafo no bo a wɔasi sɛ wɔbɛma nea wɔasua afi Onyankopɔn Asɛm mu akanyan wɔn ma wɔde wɔn ho ahyɛ ɔsom kronn mu pii no, ɛkaa adesuafo a wɔrewie no yiye.

Atiefo no nyinaa begye atom sɛ afotu a adesuafo a wɔawie no nyae no hyɛɛ wɔn den ma wosii wɔn bo sɛ wɔbɛda Onyankopɔn dɔ ne yɔnkodɔ adi. Afei nso, ɛmaa wosii wɔn bo kɛse koraa sɛ wɔbɛboa nkurɔfo wɔ honhom fam wɔ wɔn asɛmpatrɛw dwumadi no mu.

[Adaka wɔ kratafa 25]

ADESUAKUW NO HO NSƐM

Aman dodow a wofi so: 10

Aman dodow a wɔama wɔn hɔ dwumadi: 20

Adesuafo no dodow: 48

Mfe a wɔadi nkyekyem: 33.7

Mfe dodow a wɔadi wɔ nokware no mu: 16.2

Mfe dodow a wɔayɛ bere nyinaa som adwuma no nkyekyem: 12.5

[Mfonini wɔ kratafa 26]

Ɔwɛn Aban Gilead Bible Sukuu Adesuakuw a Ɛto so 109 a Wɔawie Wɔn Adesua

Wɔahyehyɛ akuw no fi anim kɔ akyi, na kuw biara mu din no fi benkum kɔ nifa, wɔ ase hɔ din no mu.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.