“Muntu Mmirika Saa Ara”

FA NO sɛ wowɔ agumadibea bi a nnipa a wɔreyɛ gyegyeegye ahyɛ hɔ ma. Agumadifo no pue ba agoprama no so. Bere a nnipadɔm yi hu wɔn akatakyie no, wɔbɔ gye wɔn so. Wɔn a wɔbɛhwɛ ma wɔde agumadi ho mmara horow adi dwuma nso wɔ hɔ. Bere a wofi agumadi no ase no, nkonimdi ne abasamtu ma wɔteɛteɛm denneennen. Wɔbɔ wɔn nsam kɛse ma nkonimdifo no!

Ɛnyɛ nnɛyi agumadi na worehwɛ, mmom nea na wosi ho akan bɛyɛ mfirihyia 2,000 a atwam ni wɔ Korinto Asasekɔn no so no. Efi afeha a ɛto so asia A.Y.B. mu kosi afeha a ɛto so anan Y.B. mu no, na wosi Ismia Akan a agye din no mfe abien biara wɔ ha. Ná akansi no gye wɔn a wɔwɔ Greece nyinaa adwene nna pii. Ná agumadi no nyɛ mmirikatu akansi bi ara kɛkɛ. Wɔde agumadifo no yɛɛ sraadi mu ahosiesie ho sɛnkyerɛnne. Wɔma nkonimdifo—a wɔsom wɔn sɛ akatakyie—no abotiri a wɔde wura ayɛ. Wɔma wɔn akyɛde pii, na ɔman no ma wɔn sika a sɛ onyin ma wogyae akansi a, wobedi akosi wɔn wu da.

Ná ɔsomafo Paulo nim Ismia Akan a na wosi wɔ baabi a ɛbɛn Korinto no, na ɔde Kristoni asetra kwan totoo mmirikatu akansi ho. Mmirikatufo, wɔn a wodi atentam, ne akuturukubɔfo a ɔkaa wɔn ho asɛm no maa mfaso a ɛwɔ ahosiesie pa, nsi a wɔde yɛ ade yiye, ne boasetɔ mu no daa adi yiye. Nanso, na akansi no ho nsɛm nyɛ ade foforo mma Kristofo a ɔkyerɛw wɔn no nso. Akyinnye biara nni ho sɛ na wɔn mu binom ka nnipadɔm a wɔteɛteɛɛm wɔ agumadibea hɔ no ho. Enti ɛrenyɛ den sɛ wɔbɛte Paulo nkyerɛkyerɛmu ahorow no ase. Na yɛn a yɛwɔ hɔ nnɛ no nso ɛ? Yɛn nso, yɛretu mmirika bi—daa nkwa ho mmirika. Ɔkwan bɛn so na yebetumi anya mfaso afi Paulo nsɛm a ɔka faa saa akansi no ho no so?

‘Akan a Wosi no Sɛnea Ɛho Mmara Te’

Ná ahwehwɛde a wogyina so si tete akan no mu yɛ den yiye. Dawurubɔfo bi de agumadifo no mu biara ba bɛkyerɛ bɛhwɛadefo no na wateɛm sɛ: ‘Obi wɔ asɛm bi tia ɔbarima yi? Ɔyɛ opoobɔfo anaa owudifo a ne bra asɛe anaa?’ Sɛnea Archaeologia Graeca kyerɛ no, “na wɔmma obi a wonim no sɛ ɔyɛ ɔsɛmmɔnedifo anaa obusuani a [ɔbɛn] onipa a ɔte saa no kwan mma onsi akan no bi.” Na sɛ akansifo no bi bu akansi no mmara horow no bi so a, na wɔde asotwe a ano yɛ den paa ara ma wɔn, na woyi wɔn fi akansi no mu.

Nokwasɛm yi boa yɛn ma yɛte Paulo asɛm yi ase: “Sɛ obi di aguma ko nso a, wɔmmɔ  no nkonim abotiri, gye sɛ wako no sɛnea ɛho mmara te.” (2 Timoteo 2:5) Saa ara na wɔ nkwa ho mmirikatu mu no, ɛsɛ sɛ yedu Yehowa ahwehwɛde ahorow ho, na yedi n’abrabɔ ho gyinapɛn a ɛkorɔn a ɛwɔ Bible mu no so. Nanso, Bible bɔ yɛn kɔkɔ sɛ: “Onipa komam adwene yɛ bɔne fi ne mmofraase.” (Genesis 8:21) Enti bere a yɛde yɛn ho abɛhyɛ mmirikatu no mu no, ɛsɛ sɛ yɛhwɛ yiye sɛ yɛbɛkɔ so asi akan no sɛnea ɛho mmara te, na ama yɛatumi anya Yehowa anim dom ne daa nkwa.

Nea ebetumi aboa yɛn kɛse ma yɛayɛ ade saa kwan yi so ne sɛ yebenya ɔdɔ ama Onyankopɔn. (Marko 12:29-31) Ɔdɔ a ɛte saa no bɛma yɛanya ɔpɛ sɛ yɛbɛsɔ Yehowa ani na yɛayɛ ade ma ɛne n’apɛde ahyia.—1 Yohane 5:3.

‘Tow Adesoa Biara Gu’

Wɔ tete agumadi no mu no, na ammirikatufo no nhyɛ atade anaa biribi a ɛbɛdɛn wɔn. The Life of the Greeks and Romans nhoma no ka sɛ: “Sɛ wɔretu mmirika a, . . . akansifo no nhyɛ hwee koraa.” Atade biara a na agumadifo no nhyɛ no ma wɔn ho yɛ hare, wɔn ho tɔ wɔn, na wɔn ho hare wɔn. Ná wɔnsɛe wɔn ahoɔden wɔ adesoa biara a enhia ho. Ɛda adi sɛ na eyi na ɛwɔ Paulo tirim bere a ɔkyerɛw Hebrifo Kristofo no: “Momma yɛntow adesoa biara adesoa . . . ngu, na yɛmfa boasetɔ ntu aperepere a ɛda yɛn anim no mu mmirika.”—Hebrifo 12:1.

Adesoa bɛn na ebetumi agye yɛn asabawmu wɔ nkwa ho mmirikatu no mu? Biako ne ɔpɛ a yebenya sɛ yɛbɛpɛ honam fam nneɛma anaa asetra kwan a ɛkyere so a yɛbɛfa ato yɛn ho so. Ebia ebinom bɛpɛ ahobammɔ afi ahonyade mu, anaasɛ wobesusuw sɛ ɛno na ɛbɛma wɔanya anigye. “Adesoa” a ɛkyere so a ɛte saa no bɛbrɛ mmirikatufo no mmirika ase araa ma, awiei koraa no, ebia wabu n’ani agu Onyankopɔn so. (Luka 12:16-21) Daa nkwa betumi abɛyɛ no sɛ anidaso a ɛwɔ akyirikyiri. Ebia obi besusuw sɛ ‘wiase foforo no bɛba da bi, nanso saa bere yi de, yebetumi adi wiase no bi.’ (1 Timoteo 6:17-19) Honam fam ade dodowpɛ ho adwene a ɛte saa a obi benya no betumi atwetwe n’adwene afi nkwa ho mmirikatu no so anaasɛ ɛremma ontumi mfi ase mpo.

Yesu kae wɔ Bepɔw so asɛnka no mu sɛ: “Obiara ntumi nsom awuranom baanu; anyɛ saa a, ɔbɛtan obiako na wadɔ obiako, anaasɛ ɔde ne ho bɛbata obiako ho na wabu obiako animtiaa. Morentumi nsom Onyankopɔn ne mamon [ahonyade].” Ɛno akyi bere a ɔka sɛnea Yehowa di mmoa ne afifide ahiade ho dwuma na ɔka sɛ nnipa som bo koraa sen wɔn no, otu fo sɛ: “Enti munnnwinnwen sɛ: Dɛn na yebedi anaasɛ dɛn na yɛbɛnom anaasɛ dɛn na yebefura? Na eyinom nyinaa akyi na wiase amanaman no di. Na mo soro agya nim sɛ eyi nyinaa hia mo. Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.”—Mateo 6:24-33.

‘Fa Boasetɔ Tu Mmirika’

Na mmirika a wotu no tete no nyinaa nyɛ ntiantiaa mu. Ná mmirika bi a wɔfrɛ no doʹli·khos no tenten bɛyɛ kilomita anan. Ná egye ahoɔden ne boasetɔ ansa na obi atumi atu. Sɛnea atetesɛm kyerɛ no, wɔ 328 A.Y.B. mu, bere a ogumadifo bi a wɔfrɛ no Ageas dii nkonim wɔ mmirika akansi yi mu wiei no, otuu mmirika twaa kwan tenten kɔɔ ne kurom, Argos, kɔbɔɔ ne nkonimdi no ho amanneɛ. Saa da no, otuu mmirika twaa kwan bɛyɛ kilomita 110!

 Kristofo mmirikatu no ware, na ɛsɔ yɛn boasetɔ hwɛ. Boasetɔ a yebenya akosi awiei no hia na ama yɛanya Yehowa anim dom, ne daa nkwa akatua no. Paulo tuu mmirika no saa kwan no so. Aka kakra ma wawu no, otumi kae sɛ: “Ɔko pa no, mako; mmirika no, mawie tu; gyidi no, maso mu masie. Nea aka a ɛda me hɔ ne trenee abotiri.” (2 Timoteo 4:7, 8) Te sɛ Paulo no, ɛsɛ sɛ yetu mmirika no ‘kodu awiei.’ Sɛ yɛn boasetɔ ano brɛ ase esiane sɛ ɛreyɛ ayɛ te sɛ nea ɔkwan no ware sen sɛnea yɛhwɛɛ kwan mfitiase no a, yɛn nsa renka yɛn akatua no. (Hebrifo 11:6) Hwɛ awerɛhosɛm a ɛno bɛyɛ, bere a yehu sɛ anka aka kakra ma yɛawie no!

Nkonim Bo No

Ná wɔde nhaban a wɔakyekyere de nhwiren ahyehyem na ɛma wɔn a wodi nkonim wɔ tete Hela mmirikatu akansi no mu no. Wɔ Pitia Agumadi mu no, na wɔde abotiri a wɔde nhaban anwene na ɛma nkonimdifo no. Wɔ Olimpik Agumadi mu no, na wonya abotiri a wɔde ngo dua ahaban ayɛ, na wɔ Ismia Agumadi mu no, na wɔma wɔn nhwiren a wɔakyekyere. Bible ho ɔbenfo bi ka sɛ: “Nea ɛbɛyɛ na wɔakanyan akansifo no anigye no, na wɔde abotiri ahorow no, nea sɛ wodi nkonim a wɔn nsa bɛka, ne berɛw, sisi apon so wɔ baabi a obiara ani tua wɔ agumadibea hɔ.” Nkonimdifo no fam no, na abotiri no a ɔbɛhyɛ no, yɛ ade a ɛkyerɛ sɛ wɔadi no ni kɛse. Sɛ ɔkɔ ne kurom a, ɔtra teaseɛnam mu tu aperenten nkonimdi so wɔ kurow no mu.

Bere a na eyi wɔ Paulo tirim no, obisaa Korintofo akenkanfo no sɛ: “Munim sɛ wɔn a wosi ammirika kane no, wɔn nyinaa tu mmirika no de, nanso obiako na onya nkonim bo no? Muntu mmirika saa ara, na moanya bi. . . . Wɔn de, wɔyɛ na wɔanya abotiri a ɛsɛe, na yɛn de, nea ɛrensɛe.” (1 Korintofo 9:24, 25; 1 Petro 1:3, 4) Hwɛ nsonsonoe ara a ɛwom! Nea ɛnte sɛ tete agumadi mu abotiri a ɛsɛe no, nkonim bo a ɛda hɔ retwɛn wɔn a wobetu nkwa ho mmirika no akosi awiei no rensɛe da.

Ɔsomafo Paulo kyerɛw abotiri a eye kyɛn so yi ho asɛm sɛ: “Oguanhwɛfo panyin no yi ne ho adi a, moanya anuonyam abotiri a ɛrensɛe da no.” (1 Petro 5:4) So yebetumi de nkonim bo biara a wiase yi de ma no atoto nkwa a owu nni mu, daa nkwa a ɛnsɛe a wɔne Kristo nya wɔ ɔsoro anuonyam mu no ho?

Ɛnnɛ, Onyankopɔn mfaa honhom nsraa Kristofo mmirikatufo no mu fã kɛse no ara sɛ wɔnyɛ ne honhom mu mma, na wonni ɔsoro anidaso. Ɛnyɛ nkwa a owu nni mu a wobenya ho mmirika na wɔretu. Nanso, Onyankopɔn de nkonim bo a ɛso nni bi asi wɔn anim. Ɛyɛ daa nkwa wɔ pɛyɛ mu wɔ asase so paradise wɔ ɔsoro Ahenni ase. Ɛmfa ho nkonim bo biara a Kristoni mmirikatufo de n’ani asi so no, ɛsɛ sɛ ɔde akokoduru ne ahoɔden a ɛsen nea mmirikatufo biara de si akan na etu mmirika no. Dɛn ntia? Efisɛ nkonim bo no rensɛe da: “Ɛbɔ a ɔde ahyɛ yɛn ne daa nkwa no.”—1 Yohane 2:25.

Esiane sɛ nkonim bo a ɛnsɛe da yi si Kristoni mmirikatufo anim nti, dɛn na ɛsɛ sɛ obu wiase yi mu nneɛma a ɛtwetwe adwene no? Ɛsɛ sɛ ɛyɛ te sɛ nea Paulo kae no: “Mibu nneɛma nyinaa adehwere, m’Awurade Kristo Yesu hu a ɛkyɛn so no nti. Ɔno nti na mehweree nneɛma no nyinaa na mibu no sɛ sumina so ade.” Nea ɛne eyi hyia no, hwɛ sɛnea Paulo tuu mmirika denneennen fae! “Anuanom, me de, minsusuw  sɛ me nsa anya aka biribi; nanso ade biako pɛ na meyɛ: mema me werɛ fi akyiri de, na metwe me mu mepɛ anim de. Mede mmirika mepɛ botae no ho madu.” (Filipifo 3:8, 13, 14) Paulo tuu mmirika a na n’ani si akatua no so denneennen. Saa ara na ɛsɛ sɛ yɛyɛ.

Yɛn Nhwɛsofo a Ɔsen Biara

Wɔ tete agumadi mu no, nnipa pii kyerɛɛ wɔn a na wodi nkonim no ho anigye. Anwensɛm akyerɛwfo kyerɛw wɔn ho asɛm, na adwinniyɛfo yɛɛ wɔn ahoni. Abakɔsɛm kyerɛwfo Věra Olivová ka sɛ “wɔhyɛɛ wɔn anuonyam pii na wogyee din kɛse.” Afei nso wɔbɛyɛɛ nhwɛsofo maa nkonimdifo a afei na wɔresi so no.

Hena ne “nkonimdifo” a ɔyɛ nhwɛso a ɛsen biara ma Kristofo? Paulo bua sɛ: “Yɛmfa boasetɔ ntu aperepere a ɛda yɛn anim no mu mmirika, nhwɛ gyidi mu dikanfo ne ne wiefo Yesu a ɔhwɛɛ anigye a ɛda n’anim tɔɔ ne bo ase huu asɛndua ho amane, na wammu aniwu, na wakɔtra Onyankopɔn ahengua nifa.” (Hebrifo 12:1, 2) Yiw, sɛ yebedi nkonim wɔ yɛn daa nkwa ho mmirikatu no mu a, ehia sɛ yegyen yɛn ani hwɛ yɛn Nhwɛsofo, Yesu Kristo. Yebetumi ayɛ eyi denam Nsɛmpa no a yɛbɛtaa akenkan na yɛasusuw akwan a yɛbɛfa so asuasua no no ho. Adesua a ɛte saa bɛboa yɛn ma yɛahu sɛ Yesu Kristo yɛɛ osetie maa Onyankopɔn, na ɔnam ne boasetɔ so daa sɛnea ne gyidi te adi. Sɛ́ ne boasetɔ ho akatua no, onyaa Yehowa Nyankopɔn anim dom ne hokwan a ɛyɛ anigye pii.—Filipifo 2:9-11.

Nokwarem no, Yesu su a na ɛda nsow titiriw ne ne dɔ. “Obi nni dɔ kɛse a ɛsen eyi: sɛ obi de ne kra bɛto hɔ ama ne nnamfo.” (Yohane 15:13) Ɔkyerɛɛ yɛn sɛnea “ɔdɔ” te ankasa denam ka a ɔka kyerɛɛ yɛn sɛ yɛnnɔ yɛn atamfo mpo no so. (Mateo 5:43-48) Esiane sɛ na Yesu dɔ ne soro Agya nti, onyaa anigye wɔ N’agya apɛdeyɛ mu. (Dwom 40:9, 10; Mmebusɛm 27:11) Yesu a yɛbɛhwɛ no sɛ yɛn Nhwɛsofo, ne sɛ nea odi yɛn anim wɔ nkwa mmirikatu dennen no mu no nso bɛkanyan yɛn ma yɛadɔ Onyankopɔn ne yɛn mfɛfo, na yɛanya anigye wɔ ɔsom kronn a yɛde ma no no mu. (Mateo 22:37-39; Yohane 13:34; 1 Petro 2:21) Ma ɛntra w’adwenem sɛ Yesu nhwehwɛ nea ɛboro yɛn ahoɔden so. Ɔma yɛn awerɛhyem sɛ: “Midwo na mebrɛ me ho ase koma mu; na mubenya ɔhome ama mo kra. Na me kɔndua yɛ mmerɛw, na m’adesoa yɛ hare.”—Mateo 11:28-30.

Te sɛ Yesu no, ehia sɛ yɛde yɛn ani si akatua a wɔde asie ama wɔn a wobegyina akodu awiei no nyinaa so. (Mateo 24:13) Sɛ yesi akan no sɛnea ɛho mmara te, yi adesoa biara fi yɛn ho so, na sɛ yɛde boasetɔ tu mmirika no a, yebetumi ahwɛ nkonimdi kwan. Anidaso a ɛda yɛn anim no na ɛhyɛ yɛn nkuran ma yɛpere kɔ yɛn anim! Esiane anigye a ɛkanyan wɔ yɛn mu, anigye a ɛma ɔkwan a ɛda yɛn anim no twa yɛ mmerɛw no nti, ɛma yenya ahoɔden foforo.

[Mfonini wɔ kratafa 29]

Kristofo mmirikatu no yɛ nea ɛware—egye boasetɔ

[Mfonini wɔ kratafa 30]

Nea ɛnte sɛ agumadifo a wɔbɔ abotiri no, Kristofo betumi de wɔn ani asi nkonim bo a ɛnsɛe so

[Mfonini wɔ kratafa 31]

Nkonim bo no wɔ hɔ ma wɔn a wobegyina akodu awiei nyinaa

[Mfonini Fibea wɔ kratafa 28]

Copyright British Museum