Mumfi Ahotoso a Emu Yɛ Den Mu Nnyina Hɔ Pɛ

“Adwuma Bi a Edi Mũ”

YEHOWA ADANSEFO fi wɔn nnɛyi abakɔsɛm mfiase mu akyerɛ Yesu Kristo nkɔmhyɛ ahorow no mu biako ho anigye kɛse: “Wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.” (Mateo 24:14) Bere a afe 1914—“nna a edi akyiri” mfiase—rebɛn no, Bible Asuafo a wɔwɔ koma pa no de gyidi a emu yɛ den fii nkyerɛkyerɛ adwuma bi a ɛso bi nni a egyina Kyerɛw Kronkron so wɔ wiase nyinaa ase.—2 Timoteo 3:1.

Nea ɛbɛyɛ na Yehowa asomfo yi adu wɔn botae a ɛne sɛ wɔbɛka asɛmpa no wɔ asase nyinaa so ho no, wɔfaa kwan bi a na ɛyɛ foforo, egye akokoduru, na emu da hɔ so. Nea ɛbɛyɛ na yɛahu ho nsɛm pii no, ma yensusuw nsɛm bi a esii tete no ho nhwɛ.

Ɔkwan Foforo a Wɔfa so Ka Asɛmpa No

Ɛyɛ January afe 1914. Fa no sɛ wo ne nnipa foforo 5,000 na ɛte nhyiam asa a wɔadum mu nkanea so wɔ New York City. Sini a emu mfonini keka ne ho ntama kɛse bi sɛn w’anim. Ɔbarima bi a ɔhyɛ atade nkataso a ɛka kotodwe a ne tiri nhwi fitaa ba ntama no so. Woahwɛ sini ahorow a mfonini a ɛwom nkeka wɔn ho pɛn, nanso saa barima yi kasa, na wutumi te nsɛm a ɔka no. Worehwɛ biribi foforo koraa, na asɛm a ɔka no yɛ soronko. Ɔkasafo no ne Charles Taze Russell, Ɔwɛn Aban Asafo no titrani a odi kan, na sini no ne “Photo-Drama of Creation.”

C. T. Russell huu mfaso a ɛwɔ so sɛ wɔde sini a ahokeka wom bɛkɔ nnipadɔm nkyɛn. Enti, wɔ afe 1912 mu no, ofii ase yɛɛ “Photo-Drama of Creation” no. Awiei koraa no, ɛbɛyɛɛ sini a mfonini a ɛwom no bi nkeka ne ho na ebi keka ne ho a kɔla ne ɛnne nnyigyei wom na woyi no nnɔnhwerew awotwe.

“Photo-Drama” no a wɔyɛɛ no sɛ wobeyi no afã anan no maa wɔn a wɔhwɛ no huu adebɔ mfiase kosii adesamma abakɔsɛm a ɛfa Yehowa Nyankopɔn atirimpɔw ma asase ne tebea a adesamma bɛbam wɔ Kristo Mfirihyia Apem nniso no awiei ho. Ná mfirihyia pii betwam ansa na wɔde mfiridwuma ho nimdeɛ a ɛte saa adi dwuma de agye sika. Nanso, nnipa ɔpepem pii hwɛɛ “Photo-Drama of Creation” no kwa!

Wɔyɛɛ nnwom a ɛyɛ dɛ, ɛne ɔkasa ahorow 96 a wɔakyere agu mpaawa so maa “Photo-Drama” no. Wɔyɛɛ mfonini a ɛyɛ fɛ a ɛnkeka ne ho de kyerɛkyerɛɛ wiase abakɔsɛm mu. Na ɛho hia nso sɛ wɔyɛ mfonini foforo pii. Wɔyeree wɔn ho de wɔn nsa yɛɛ mfonini a ɛnkeka ne ho no bi. Na ɛsɛ sɛ wɔyɛ eyi mpɛn dodow pii, efisɛ bere  bi akyi no, wɔyɛɛ afã anan a na mfonini 20 wɔ emu biara mu. Eyi maa wotumi yii “Photo-Drama” no wɔ nkurow 80 mu da koro!

Nnwuma a Wɔyɛe Wɔ Kokoam

Dɛn na ɛkɔɔ so wɔ kokoam bere a na wɔreyi “Photo-Drama” no? Bible Suani Alice Hoffman kae sɛ: “Sɛ wofi Drama no ase a, na Onua Russell bɛda so. Na bere a waba so na wafi ase rebuebue n’ano no, yefi ase bɔ gramofon no . . . na na yɛn ani gye sɛ yɛte ne nne.”

Bere a Zola Hoffman reka mfonini a etwam ntɛmntɛm ho asɛm no, ɔkae sɛ: “Na mete hɔ a ahodwiriw ama mahaa m’ani bere a na yɛrehwɛ adebɔ mmere no. Na yehu sɛ sukooko de nkakrankakra refifi.”

Karl F. Klein a n’ani gye nnwom ho a ɔyɛ Yehowa Adansefo Sodikuw no muni de ka ho sɛ: “Bere a wɔreyi saa mfonini yi kyerɛ no, na wɔbɔ nnwom a ɛyɛ dɛ yiye te sɛ Narcissus ne Humoreske ka ho.”

Nsɛm foforo nso wɔ hɔ a yɛkae. Clayton J. Woodworth, Kumaa kae sɛ: “Ɛtɔ mmere bi a na nsɛm a ɛyɛ serew pue mu. Bere bi a na wɔrebɔ nnwom a ɛne ‘Tu sɛ Anomaa Kɔ Wo Bepɔw So’ no, gigantosaurus kɛse bi, aboa bi a na ɔwɔ hɔ ansa na Nsuyiri no reba no mfonini puei ntama no so”!

“Photo-Drama of Creation” a woyii akyi no, ankyɛ na wɔyɛɛ “Eureka Drama” no afã horow no. (Hwɛ adaka no mu.) Na emu biako yɛ ɔkasa ahorow ne nnwom a wɔakyere agu mpaawa so. Na nnwom ne mfonini a ɛnkeka ne ho wɔ nea ɛka ho no mu. Ɛwom sɛ na “Eureka Drama” no mu mfonini nkeka ne ho de, nanso sɛ woyi wɔ mmeae a nnipa nni hɔ pii a, na edi dwuma yiye.

Adansedi Adwinnade a Tumi Wom

Bere a afe 1914 baa awiei no, na wɔayi “Photo-Drama” no akyerɛ nnipa bɛboro 9,000,000 wɔ Amerika Atifi fam, Europa, ne Australia. Ɛwom sɛ na Bible Asuafo no nnɔɔso de, nanso na wɔwɔ ahotoso koraa sɛ wɔnam ade foforo yi so bɛka asɛmpa no. Wɔde anigye yii ntoboa a wɔde begye mmeae atua ho ka de ayi sini ahorow yi akyerɛ nkurɔfo. Enti “Photo-Drama of Creation” no yɛɛ adwuma kɛse maa wɔn a wɔhwɛe no huu Onyankopɔn Asɛm ne n’atirimpɔw ahorow yiye.

Wɔ krataa bi a obi kyerɛw kɔmaa C. T. Russell mu no, ɔkae sɛ: “Bere a edi kan a mehwɛɛ mo Drama no na meyɛɛ nsakrae titiriw wɔ m’asetra mu; anaa mɛka sɛ, ɛne bere titiriw a ɛmaa minyaa Bible mu nimdeɛ.” Obi foforo kae sɛ: “Ná gyidi a mewɔ wɔ nyamesom mu no reyɛ agu asu, na metee nka sɛ ‘Photo-Drama of Creation’ no a wobeyii wɔ ha wɔ ahohuru bere mu no na egyee me. . . . Mprempren mewɔ asomdwoe a wiase no ntumi mma minnya, na n’ahode nyinaa akyi no, meremfa me ho nhyɛ mu.”

Demetrius Papageorge, a ɔde bere tenten ayɛ adwuma wɔ Asafo no adwumayɛbea ti no kae sɛ: “Sɛ yesusuw sɛnea na Bible asuafo no nnɔɔso ne sika kakraa bi a na wɔwɔ no ho a, na ‘Photo-Drama’ no yɛ adwuma bi a edi mũ. Na Yehowa honhom taa akyi ankasa!”

[Adaka/Mfonini wɔ kratafa 8, 9]

“Eureka Drama” No

Bere a wofii ase yii “Photo-Drama” no akyi asram awotwe no, Asafo ti no huu hia a ɛho hia sɛ wɔyɛ foforo, na wɔtoo din “Eureka Drama.” Bere a wɔkɔɔ so yii “Photo-Drama” no nyinaa wɔ nkurow akɛse mu no, woyii “Eureka” no wɔ nkuraase ma ɛdaa asɛnkoro no ara adi. Wɔkaa “Eureka Drama” no fã bi ho asɛm sɛ ɛmaa “anuanom mmea nyaa hokwan soronko” de kaa asɛm no. Dɛn nti na ɛte saa? Efisɛ na n’adaka no ne gramofon mpaawa no nyinaa mu duru yɛ kilogram 14 pɛ. Nanso, sɛ wobeyi akyerɛ a, na ɛho behia nso sɛ wɔfa gramofon ka ho.