Ahwɛfo Ne Asafo Mu Asomfo A Wɔpaw Wɔn Teokrase Kwan So
Ahwɛfo Ne Asafo Mu Asomfo A Wɔpaw Wɔn Teokrase Kwan So
“Monhwɛ mo ho ne nguankuw nyinaa a Honhom Kronkron de mo asisi wɔn so ahwɛfo no yiye.”—ASOMAFO NO NNWUMA 20:28.
1, 2. Ɔkwan bɛn so na Yesaia 60:22 renya mmamu?
YEHOWA fi bere tenten ka siei sɛ biribi soronko besi wɔ awiei bere no mu. Wɔnam odiyifo Yesaia so kae sɛ: “Nea osua koraa no bɛdan apem, na akumaa adan ɔman a ɛyɛ den. Me, [Yehowa, NW], mɛyɛ no ntɛm ne bere mu.”—Yesaia 60:22.
2 So adanse bi wɔ hɔ a ɛkyerɛ sɛ saa nkɔmhyɛ yi renya mmamu nnɛ? Yiw, ebi wɔ hɔ! Wɔ 1870 mfe no mu no, wɔhyehyɛɛ Yehowa nkurɔfo asafo biako wɔ Allegheny, Pennsylvania, U.S.A. Asafo ahorow ɔpedudu pii afi nhyɛase ketewaa yi mu aba, na ɛredɔɔso wɔ wiase nyinaa. Ahenni adawurubɔfo ɔpepem pii—ɔman a ɛyɛ den—na wɔwɔ bɛboro asafo 91,000 a ɛwɔ nsase 235 so no mu wɔ wiase nyinaa nnɛ. Akyinnye biara nni ho sɛ eyi di adanse sɛ Yehowa reboaboa nokware asomfo ano ntɛmntɛm ansa na “ahohiahia kɛse” a abɛn yiye no apae agu.—Mateo 24:21; Adiyisɛm 7:9-14.
3. Sɛ́ wɔbɛbɔ obi asu ‘Agya, Ɔba, ne honhom kronkron din mu’ no kyerɛ dɛn?
3 Bere a nnipa ɔpepem yi fi wɔn pɛ mu hyiraa wɔn ho so maa Yehowa ma ɛne Yesu akwankyerɛ hyiae no, wɔbɔɔ wɔn asu ‘hyɛɛ Agya ne Ɔba ne honhom kronkron din mu.’ (Mateo 28:19) Asu a wɔbɔ wɔ ‘Agya no din mu’ no kyerɛ sɛ nnipa a wɔahyira wɔn ho so yi gye Yehowa tom sɛ wɔn soro Agya ne Nkwa Mafo, na wogye ne tumidi tom. Asu a wɔbɔ wɔ ‘Ɔba no din mu’ no kyerɛ sɛ wogye Yesu Kristo tom sɛ wɔn Gyefo, Kannifo, ne Ɔhene. Afei nso wogye dwuma a Onyankopɔn honhom kronkron, anaa n’adeyɛ tumi no di wɔ akwankyerɛ a ɛde ma wɔn wɔ wɔn asetra mu no tom. Eyi kyerɛ sɛ wɔabɔ wɔn asu ‘honhom kronkron din mu.’
4. Ɔkwan bɛn so na wɔpaw Kristofo sɛ asomfo?
4 Wɔ asuafo foforo yi asubɔ mu no, wɔpaw wɔn sɛ Yehowa Nyankopɔn asomfo. Hena na ɔpaw wɔn? Sɛ yɛbɛtrɛw mu a, nsɛm a wɔakyerɛw wɔ 2 Korintofo 3:5 no fa wɔn ho: “Yɛn fata a yɛfata [sɛ asomfo] no fi Nyankopɔn mu.” Dɛn na ɛyɛ fɛ sɛ Yehowa Nyankopɔn ankasa bɛpaw wɔn sɛ asomfo ahyɛ wɔn anuonyam! Wɔn asubɔ akyi no, wɔbɛkɔ so anyin honhom fam sɛ “asɛmpa” no ho asomfo bere tenten a wogye Onyankopɔn honhom no akwankyerɛ ahorow tom na wɔkɔ so de N’asɛm di dwuma no.—Mateo 24:14; Asomafo no Nnwuma 9:31.
Wɔpaw Wɔn—Teokrase Kwan So—Ɛnyɛ Kwasafo Kwan So
5. So wɔnam kwasafo kwan so na wɔpaw Kristofo ahwɛfo ne asafo mu asomfo? Kyerɛkyerɛ mu.
5 Yehia ahwɛfo a wɔfata a wɔn ho akokwaw ne asafo mu asomfo mmoa na ama wɔadi asomfo a wɔyɛ nnam a wɔredɔɔso no ahiade ho dwuma. (Filipifo 1:1) Ɔkwan bɛn so na wɔpaw mmarima a wɔyɛ honhom mufo yi? Ɛnyɛ akwan a wɔnam so yɛ wɔ Kristoman mu no. Sɛ nhwɛso no, wɔmfa kwasafo kwan so na ɛpaw Kristofo ahwɛfo, te sɛ, ebia aba a nnipa dodow a wɔwɔ asafo bi mu bɛtow de apaw obi. Mmom no, wɔnam teokrase kwan so na ɛpaw eyinom. Dɛn na ɛno kyerɛ?
6. (a) Dɛn ne teokrase ankasa? (b) Dɛn nti na paw a wɔpaw ahwɛfo ne asafo mu asomfo no yɛ teokrase kwan so adeyɛ?
6 Sɛ yɛbɛka no tiawa a, Onyankopɔn na odi nokware teokrase so. Yehowa Adansefo fi wɔn pɛ mu gye ne tumidi tom na wɔyɛ biako sɛnea ɛbɛyɛ a wɔbɛyɛ Onyankopɔn apɛde. (Dwom 143:10; Mateo 6:9, 10) Kristofo ahwɛfo, anaa mpanyimfo, ne asafo mu asomfo a wɔpaw wɔn no yɛ teokrase kwan so de efisɛ wɔnam Onyankopɔn nhyehyɛe a wɔakyerɛw wɔ Kyerɛw Kronkron no mu so na ɛpaw mmarima a wodi asɛyɛde ho dwuma yi. Na sɛ́ “ade nyinaa so ti” no, Yehowa na nokwarem no ɔwɔ hokwan sɛ ɔkyerɛ sɛnea n’ahyehyɛde a aniwa hu no bɛyɛ adwuma.—1 Beresosɛm 29:11; Dwom 97:9.
7. Ɔkwan bɛn so na wɔhwɛ Yehowa Adansefo so?
7 Nea ɛne nyamesom akuw pii a ɛwɔ Kristoman mu de bɔ abira no, ɛnyɛ Yehowa Adansefo ankasa na wosi honhom fam nniso a ɛsɛ sɛ wɔyɛ adwuma wɔ ase no ho gyinae. Saa Kristofo anokwafo yi bɔ mmɔden sɛ wɔbɛbata Yehowa gyinapɛn ho. Ɛnyɛ asɔre mu mpanyimfo, atumfoɔ bi, anaa mpanyimfo kuw bi a wodi asɔre mu tumi na wosisi wɔn mu ahwɛfo no. Sɛ wiase no honhom bɔ mmɔden sɛ ɛde ne ho begye nhyehyɛe yi mu a, Yehowa nkurɔfo nnyae nneɛma mu nsiesie. Wɔyɛ pintinn kura gyinapɛn a asomafo no kuraa mu wɔ afeha a edi kan no mu no mu bere a wɔkae sɛ: “Ɛsɛ sɛ yetie Onyankopɔn mmom sen nnipa” no. (Asomafo no Nnwuma 5:29) Ne saa nti, Adansefo no de wɔn ho hyɛ Onyankopɔn ase wɔ ade nyinaa mu. (Hebrifo 12:9; Yakobo 4:7) Teokrase nhyehyɛe a wodi akyi no ma Onyankopɔn pene nea wɔyɛ no so.
8. Nsonsonoe bɛn na ɛda kwasafo ne teokrase kwan so nhyehyɛe ntam?
8 Sɛ́ Teokrase Sodifo Kɛse, Yehowa, asomfo no, eye sɛ yɛma nsonsonoe a ɛda kwasafo kwan so adeyɛ ne teokrase kwan so de mu no tra yɛn adwenem. Kwasafo kwan so adeyɛ hwehwɛ sɛ afã biara de ananmusifo ba, na mpɛn pii no, ɛma wɔbɔ dibea a wɔpɛ no ho dawuru na ama nnipa dodow atow aba ama wɔn. Wɔmfa akwan a ɛte saa so mpaw afoforo wɔ teokrase mu. Eyi mfi nnipa; na saa ara nso na emfi mmara kwan so ahyehyɛde biara mu. Bere a ɛda adi sɛ na Paulo reka paw a Yesu ne Yehowa paw no sɛ “amanaman mu somafo” ho asɛm no, ɔka kyerɛɛ Galatifo no sɛ “emfi nnipa, nso ɛnnam onipa bi so, na mmom ɛnam Yesu Kristo ne agya Onyankopɔn a onyan no fii awufo mu no so.”—Romafo 11:13; Galatifo 1:1.
Honhom Kronkron na Ɛpaw Wɔn
9. Dɛn na Asomafo no Nnwuma 20:28 ka fa Kristofo ahwɛfo paw ho?
9 Paulo kaee ahwɛfo a na wɔte Efeso no sɛ Onyankopɔn na ɔnam honhom kronkron so apaw wɔn. Ɔkae sɛ: ‘Enti monhwɛ mo ho ne nguankuw nyinaa a honhom kronkron de mo asisi wɔn so ahwɛfo sɛ monyɛn Onyankopɔn asafo a ɔde n’ankasa Ba mogya anya wɔn no yiye.’ (Asomafo no Nnwuma 20:28) Ná ehia sɛ honhom kronkron no di saa Kristofo ahwɛfo no anim bere a wodi wɔn asɛyɛde ahorow ho dwuma sɛ Onyankopɔn nguankuw so ahwɛfo no. Sɛ obi a ɔwɔ dibea nnu ɔsoro gyinapɛn ho bio a, bere kɔ so no, honhom kronkron no bɛyɛ ade ayi no afi ne dibea no so.
10. Dɛn nti na honhom kronkron di dwuma titiriw wɔ paw a wɔpaw nkurɔfo wɔ teokrase kwan so no mu?
10 Dɛn nti na honhon kronkron no di dwuma titiriw no? Nea edi kan koraa no, honhom kronkron no na ɛma wɔkyerɛw ahwehwɛde a wogyina so paw honhom mu ahwɛfo no. Wɔ Paulo krataa a ɔkyerɛw kɔmaa Timoteo ne Tito mu no, ɔkyerɛkyerɛɛ gyinapɛn a ɛsɛ sɛ ahwɛfo ne asafo mu asomfo du ho no mu. Sɛ wɔka ne nyinaa bom a, ɔkaa ahwehwɛde bɛyɛ 16 ho asɛm. Sɛ nhwɛso no, ɛnsɛ sɛ wonya ahwɛfo ho asɛm bi ka, ɛsɛ sɛ wɔn ani so da hɔ, wɔn adwenem tew, wɔyɛ wɔn ho wosee, wɔpɛ ahɔhoyɛ, wohu kyerɛkyerɛ, na wɔda nhwɛso pa adi sɛ mmusua ti. Ná ɛnsɛ sɛ wɔyɛ asadweam, nnipa a wɔn ani bere sika, na na ɛsɛ sɛ wɔda ahosodi adi. Saa ara na wɔde gyinapɛn a ɛkorɔn saa ara sii hɔ maa wɔn a na wɔrepere adu asafo mu asomfo ho no.—1 Timoteo 3:1-10, 12, 13; Tito 1:5-9.
11. Ahwehwɛde ahorow a ɛsɛ sɛ mmarima a wɔrepere adu asafo mu asɛyɛde ho no du ho no bi ne dɛn?
11 Ahwehwɛde yi a yebesusuw ho no ma yehu sɛ ɛsɛ sɛ wɔn a wodi anim wɔ Yehowa som mu no yɛ nhwɛso pa wɔ Kristofo abrabɔ ho. Ɛsɛ sɛ mmarima a wɔpere du asafo mu dibea ho no ma ɛda adi sɛ honhom kronkron de wɔn redi dwuma. (2 Timoteo 1:14) Ɛsɛ sɛ ɛda adi sɛ Onyankopɔn honhom rema mmarima yi ada “ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ” adi. (Galatifo 5:22, 23) Aba a ɛte saa no bɛda adi wɔ ɔkwan a wɔfa so ne mfɛfo gyidifo ne afoforo di mu. Ɛwom, ebinom betumi abɔ wɔn ho mmɔden paa wɔ honhom no aba no bi ho, bere a afoforo nso betumi adu ahwehwɛde ma ahwɛfo foforo ho ma asɔ ani kɛse. Nanso, ɛsɛ sɛ wɔn a wɔhwɛ kwan sɛ wɔbɛpaw wɔn sɛ ahwɛfo anaa asafo mu asomfo no fa sɛnea wɔbɔ wɔn bra nyinaa so kyerɛ sɛ wɔyɛ honhom mufo, na wodu Onyankopɔn Asɛm mu ahwehwɛde ho.
12. Henanom na yebetumi aka wɔn ho asɛm sɛ honhom kronkron na apaw wɔn?
12 Bere a Paulo hyɛɛ afoforo nkuran sɛ wonsuasua no no, na obetumi aka saa a ɛrenyɛ no den efisɛ na n’ankasa resuasua Yesu Kristo, a ‘ogyaw yɛn nhwɛso sɛ yenni n’anammɔn akyi pɛpɛɛpɛ no.’ (1 Petro 2:21; 1 Korintofo 11:1) Enti yebetumi aka wɔn a wodu Kyerɛwnsɛm mu ahwehwɛde ho bere a na wɔrepaw wɔn sɛ ahwɛfo anaa asafo mu asomfo no ho asɛm sɛ honhom kronkron na ɛpaw wɔn.
13. Ɔkwan bɛn so na honhom kronkron no boa wɔn a wɔrekamfo mmarima akyerɛ ma wɔasom wɔ asafo ahorow mu no?
13 Ade foforo wɔ hɔ a ɛma yehu sɛnea honhom kronkron no yɛ adwuma wɔ sɛnea wɔkamfo ahwɛfo na wɔpaw wɔn no mu. Yesu kae sɛ ‘Agya a ɔwɔ soro no de honhom kronkron ma wɔn a wobisa no no.’ (Luka 11:13) Enti sɛ mpanyimfo a wɔwɔ asafo bi mu hyia sɛ wɔrebɛkamfo mmarima de asafo mu asɛyɛde ahyehyɛ wɔn nsa a, wɔbɔ mpae sɛ Onyankopɔn honhom nkyerɛ wɔn kwan. Wogyina nea wɔaka wɔ Onyankopɔn Asɛm a efi honhom mu no so na wɔkamfo obi, na honhom kronkron no boa wɔn ma wohu sɛ nea wɔresusuw ne ho apaw no no du Kyerɛwnsɛm mu ahwehwɛde no ho anaa. Ɛnsɛ sɛ wɔn a wɔrekamfo obi akyerɛ no ma ɔhonam ani hwɛbea, nhomanim, anaa ne dom akyɛde nya wɔn so nkɛntɛnso wɔ ɔkwan a ɛmfata so. Ade titiriw a ɛsɛ sɛ wɔde wɔn adwene si so ne sɛ ebia onipa no yɛ honhom muni, obi a asafo no mufo rentwentwɛn wɔn nan ase sɛ wɔbɛkɔ ne nkyɛn akogye honhom mu afotu.
14. Dɛn na yesua fi Asomafo no Nnwuma 6:1-3?
14 Ɛwom sɛ asafo mu mpanyimfo ne ahwɛfo akwantufo na wɔbom kamfo anuanom ma wɔsom sɛ mpanyimfo anaa asafo mu asomfo de, nanso wogyina afeha a edi kan nhyehyɛe no so na ɛpaw wɔn. Bere bi, ɛho behiae sɛ wonya mmarima a wɔfata wɔ honhom fam ma wɔyɛ adwuma bi a na ehia. Sodikuw no de akwankyerɛ a edidi so yi mae: “Mompɛ mo mu mmarima baason a wɔwɔ din pa a Honhom ne nyansa ayɛ wɔn ma, na yɛmfa wɔn nsi adwuma yi so.” (Asomafo no Nnwuma 6:1-3) Ɛwom sɛ mmarima a na wɔwɔ hɔ no na ɛkamfoo wɔn kyerɛe de, nanso mmarima a na asɛyɛde hyehyɛ wɔn nsa wɔ Yerusalem no na ɛpaw wɔn. Nhyehyɛe a ɛte saa ara so na wodi nnɛ.
15. Ɔkwan bɛn so na Sodikuw no ka ho bi na wɔpaw mmarima no?
15 Yehowa Adansefo Sodikuw no na ɛpaw Baa Boayikuw mufo no tẽẽ. Sɛ Sodikuw no resusuw nea obetumi adi asɛyɛde a emu yɛ duru a ɛte saa ho dwuma a, wɔma Yesu asɛm yi tra wɔn adwenem: “Obiara a wɔama no pii no, ne nkyɛn na wɔbɛhwehwɛ pii; na nea wɔde pii ahyɛ ne nsa no, ɔno na wobebisa no nea ɛboro so.” (Luka 12:48) Baa Boayikuw mufo a Sodikuw no paw wɔn akyi no, wɔpaw Betel mpanyimfo ne ahwɛfo akwantufo nso. Nanso, wɔma anuanom a wɔfata si wɔn ananmu paw mpanyimfo foforo bi. Eyi nso ho nhwɛso wɔ Kyerɛwnsɛm no mu.
‘Paw Mpanyimfo Sɛnea Mehyɛɛ Wo No’
16. Dɛn nti na Paulo gyaw Tito wɔ Kreta, na dɛn na eyi kyerɛ wɔ paw a wɔpaw afoforo wɔ teokrase kwan so nnɛ no ho?
16 Paulo ka kyerɛɛ ne yɔnko dwumayɛni Tito sɛ: “Eyi nti na mede wo migyaw Kreta, na woasiesie nneɛma a aka no pɛpɛɛpɛ, na woasisi kurow biara kurow so mpanyimfo, sɛnea mehyɛɛ wo no.” (Tito 1:5) Afei, Paulo kyerɛɛ ahwehwɛde a ɛsɛ sɛ Tito hwehwɛ fi mmarima a wɔbɛfata ama dibea horow a ɛte saa no ho. Enti ɛnnɛ, Sodikuw no paw anuanom a wɔfata wɔ baa dwumadibea ahorow ma wosi wɔn ananmu paw asafo mu mpanyimfo ne asomfo. Wɔyɛ ahwɛyiye sɛ wɔn a wogyina Sodikuw no ananmu no te Kyerɛwnsɛm mu akwankyerɛ a wogyina so paw nkurɔfo no ase yiye na wodi akyi. Enti, Sodikuw no akwankyerɛ ase na wɔpaw mmarima ma wɔsom wɔ Yehowa Adansefo asafo ahorow mu wɔ wiase nyinaa.
17. Ɔkwan bɛn so na baa dwumadibea di nnipa a wɔakamfo wɔn sɛ ahwɛfo ne asafo mu asomfo no ho dwuma?
17 Sɛ wɔkamfo ahwɛfo ne asafo mu asomfo kyerɛ Ɔwɛn Aban Asafo no baa dwumadibea a, mmarima a wɔn ho akokwaw a wɔwɔ hɔ no de wɔn ho to Onyankopɔn honhom so hwehwɛ akwankyerɛ a wɔde bɛpaw wɔn. Saa mmarima yi hu sɛ wɔwɔ akontaa bi bu, bere a wohu sɛ ɛnsɛ sɛ wɔpɛ ntɛm de wɔn nsa gu obi so na wɔamfa wɔn ho amfra ne bɔne mu no.—1 Timoteo 5:22.
18, 19. (a) Ɔkwan bɛn so na wɔnam ma nsa ka paw a wɔapaw ebinom no? (b) Ɔkwan bɛn so na wɔnam di kamfo a wɔkamfo nkurɔfo kyerɛ na wɔpaw wɔn no nyinaa ho dwuma?
18 Wotumi fa krataa a wɔde stampo a efi mmara kwan so ahyehyɛde mu tim akyiri so paw ebinom. Wɔnam krataa a ɛte saa so betumi apaw nea ɛboro onua biako wɔ asafo bi mu.
19 Teokrase kwan so a wɔnam paw obi no fi Yehowa denam ne Ba no, ne Onyankopɔn asase so ahyehyɛde a aniwa hu, “akoa nokwafo ne ɔbadwemma” no ne ne Sodikuw no so. (Mateo 24:45-47) Honhom kronkron na ɛkyerɛ nhyehyɛe a wɔnam so kamfo na wɔpaw obi no nyinaa kwan. Eyi te saa efisɛ wɔakyerɛw ahwehwɛde no nyinaa wɔ Onyankopɔn Asɛm a honhom kronkron na ɛma wɔkyerɛwee no mu, na onipa a wɔpaw no no da no adi sɛ ɔsow honhom no aba. Enti, ɛsɛ sɛ yebu paw a wɔpaw obi no sɛ efi honhom kronkron. Sɛnea wɔnam teokrase kwan so paw ahwɛfo ne asafo mu asomfo wɔ afeha a edi kan mu no, saa ara na ɛte ɛnnɛ.
Yɛkyerɛ Yehowa Akwankyerɛ Ho Anisɔ
20. Dɛn nti na yɛne Dawid yɛ adwene wɔ asɛm a ɔkae wɔ Dwom 133:1 no ho?
20 Saa bere yi a teokrase dwumadi renya nkɔso wɔ Ahenni asɛnka adwuma mu no, yɛda Yehowa ase sɛ odi anim ma wɔpaw ahwɛfo ne asafo mu asomfo. Kyerɛwnsɛm mu nhyehyɛe yi boa ma yekura Onyankopɔn trenee gyinapɛn a ɛkorɔn no mu wɔ yɛn mu sɛ Yehowa Adansefo. Bio nso, Kristofo su ne mmɔden a saa mmarima yi bɔ no ka ho bi kɛse na ama yɛanya asomdwoe ne biakoyɛ kɛse sɛ Yehowa asomfo no. Te sɛ odwontofo Dawid no, ɛka yɛn ma yɛteɛm sɛ: “Hwɛ oye a eye ne fɛ a ɛyɛ sɛ anuanom bom tra faako!”—Dwom 133:1.
21. Ɔkwan bɛn so na Yesaia 60:17 renya mmamu nnɛ?
21 Hwɛ aseda ara a yɛde ma Yehowa sɛ ɔnam N’asɛm ne honhom kronkron so ma yɛn akwankyerɛ! Na nsɛm a wɔakyerɛw wɔ Yesaia 60:17 no fata ankasa: “Kɔbere ananmu na mede sika mesi maba, na dade ananmu na mede dwetɛ mesi maba, na kɔbere asi nnua ananmu, na dade asi abo ananmu. Na mɛma asomdwoe adi wo so panyin ahwɛ wo, na mede trenee mayɛ wo kãfo.” Esiane sɛ teokrase nhyehyɛe adi dwuma yiye wɔ Yehowa Adansefo mu nti na yɛanya tebea a nhyira wom yi wɔ Onyankopɔn asase so ahyehyɛde no mu nyinaa no.
22. Dɛn na yɛkyerɛ ho anisɔ ma ɛfata, na dɛn na ɛsɛ sɛ yesi yɛn bo sɛ yɛbɛyɛ?
22 Yɛn ani sɔ teokrase nhyehyɛe a yɛwom no yiye. Na yɛkyerɛ adwumaden a ɛma akomatɔyam a ahwɛfo ne asafo mu asomfo a wɔnam teokrase kwan so paw wɔn no yɛ no ho anisɔ kɛse. Yefi koma nyinaa mu kamfo yɛn soro Agya a ɔwɔ dɔ a wama yɛadi yiye honhom fam na wahyira yɛn pii saa no. (Mmebusɛm 10:22) Enti momma yensi yɛn bo sɛ yɛne Yehowa ahyehyɛde no bɛbɔ anan. Nea ɛsen ne nyinaa no, momma yɛnkɔ so mfa biakoyɛ nsom, mfa nhyira Yehowa din kɛse no nyi no ayɛ nhyɛ no anuonyam.
Wubebua Dɛn?
• Dɛn nti na yebetumi aka sɛ sɛnea wɔpaw ahwɛfo ne asafo mu asomfo no yɛ teokrase kwan so adeyɛ, na ɛnyɛ kwasafo de?
• Ɔkwan bɛn so na honhon kronkron paw Kristofo mmarima a asɛyɛde hyehyɛ wɔn nsa no?
• Ɔkwan bɛn so na Sodikuw no ka ho bi na wɔpaw ahwɛfo ne asafo mu asomfo no?
• Ɛdefa paw a wɔpaw nkurɔfo teokrase kwan so ho no, dɛn nti na ɛsɛ sɛ yɛda Yehowa ase wɔ ho?
[Adesua no ho Nsɛmmisa]
[Mfonini ahorow wɔ kratafa 15]
Asafo mu mpanyimfo ne asomfo anya hokwan sɛ wɔnam teokrase kwan so apaw wɔn sɛ wɔnsom