Onyankopɔn Asɛm Yɛfo Nya Anigye

Akasafo a wodii kan kasae wɔ “Onyankopɔn Asɛm Yɛfo” Ɔmantam Nhyiam a Yehowa Adansefo yɛe ase no biako kae sɛ: “Yegye tom sɛ saa ɔmantam nhyiam yi yɛ Yehowa nsiesiei foforo a ebesiesie yɛn ama yɛakɔ so ayɛ Ahenni adwuma no.” Ɔtoaa so sɛ: “Yɛayɛ aso sɛ wɔnkyerɛkyerɛ yɛn abusua asetra a ɛyɛ anigye ho ade, wɔnhyɛ yɛn nkuran mma yɛmmata Yehowa ahyehyɛde no ho, wɔnkanyan yɛn mma yenkura yɛn nsiyɛ mu wɔ Ahenni som adwuma no mu, na wɔnkae yɛn hia a ehia sɛ yɛkɔ so wɛn.”

EFI May 2000 awiei no, Onyankopɔn asɛm yɛfo ɔpepem pii ne wɔn nnamfonom akɔ nhyiambea mpempem pii wɔ wiase nyinaa akogye Bible nkyerɛkyerɛ a ɛho hia. Dɛn na wosuae wɔ nnansa nhyiam no ase?

Da a Edi Kan—Mommma Mo Werɛ Mmfi Yehowa Nneyɛe

Wɔ kasa a edi kan no mu no, oguamtrani no ka kyerɛɛ atiefo no sɛ wommenya nhyira horow a biakoyɛ a wɔde som Yehowa wɔ ɔmantam nhyiam ahorow ase de ba no bi. Ɔmaa atiefo nyinaa nyaa awerɛhyem sɛ wɔbɛto wɔn gyidi so, na wɔne Yehowa ntam abusuabɔ mu bɛyɛ den.

‘Anigye Nyankopɔn’ no nim nea yehia na ama yɛn mu biara anya anigye. (1 Timoteo 1:11) Enti, ɔkasa a ɛne “Onyankopɔn Apɛdeyɛ Ma Yenya Anigye” no sii so dua sɛ Yehowa Asɛm, Bible no, kyerɛkyerɛ ɔkwan a eye sen biara a yɛbɛfa so atra ase. (Yohane 13:17) Nsɛm a wobisabisaa Yehowa Adansefo a wɔde mmere pii asom no daa sɛnea Onyankopɔn apɛde a yɛyɛ wɔ tebea ahorow mu no ma yɛn asetra yɛ nea atirimpɔw wom no adi. Ɔkasa a edi hɔ a ɛne “Munni Yehowa Papayɛ Ho Ahurusi” no sii so dua sɛ, sɛ́ nkurɔfo a ‘wosuasua Onyankopɔn’ no, ɛsɛ sɛ Kristofo da ‘papayɛ nyinaa’ adi wɔ wɔn asetra mu. (Efesofo 5:1, 9) Ɔkwan biako a ɛda nsow a yɛbɛfa so ayɛ eyi ne sɛ yɛbɛka asɛmpa no na yɛayɛ asuafo.—Dwom 145:7.

Asɛm a ɛne “Munnyina Pintinn Sɛ Wɔn a Wohu Nea Wontumi Nhu No No” daa sɛnea gyidi tumi boa yɛn ma ‘yehu’ Onyankopɔn a wontumi nhu no no adi. Ɔkasafo no kyerɛkyerɛɛ sɛnea nnipa a wɔyɛ honhom mufo nim Onyankopɔn su ahorow a nea ɛka ho ne tumi a otumi hu nea ɛwɔ yɛn adwenem mpo no. (Mmebusɛm 5:21) Wɔn a wobisabisaa wɔn nsɛm no kaa akwan a wɔafa so anya gyidi a ɛyɛ den na wɔde honhom fam nneɛma adi kan wɔ wɔn asetra mu no ho asɛm.

Wɔde nhyiam asɛmti ho ɔkasa a n’asɛmti ne “Munyi Yehowa—Nea Ɔyɛ Anwonwade No—Ayɛ” no na ewiee anɔpa nhyiam no. Ɛboaa atiefo no ma wohuu sɛ dodow a yesua Yehowa ho ade no, dodow no ara na yenya nneɛma pii a yebegyina so ayi no ayɛ sɛ  Nea ɔyɛ anwonwade. Ɔkasafo no kae sɛ: “Sɛ yesusuw Onyankopɔn abɔde mu nnwuma a ɛyɛ nwonwa ne nneɛma a ɛyɛ anigye a ɔreyɛ ma yɛn mprempren no ho a, ɛka yɛn ma yefi komam yi no ayɛ. Sɛ yesusuw anwonwade a wayɛ ama ne nkurɔfo wɔ mmere a atwam no ho a, ɛma yeyi no ayɛ. Na bere a yesusuw nneɛma a ɛyɛ anigye a Yehowa ahyɛ bɔ sɛ ɔbɛyɛ no ho no, yɛhwehwɛ akwan a yɛbɛfa so akyerɛ ho anisɔ nso.”

Ɔkasa a n’asɛmti ne “Mommmrɛ Wɔ Papayɛ Mu” a ɛkaee atiefo no nyinaa sɛ nhyɛso a ɛwɔ wiase yi mu di adanse sɛ awiei no abɛn no na wɔde fii awia nhyiam no ase. (2 Timoteo 3:1) Nanso, sɛ yɛampa abaw a, yebetumi ada no adi sɛ ‘yɛfra wɔn a wogye di kɔ ɔkra nkwagye mu no mu.’—Hebrifo 10:39.

Bible mu afotu bɛn na wɔde mae wɔ abusua asetra ho? Ɔkasa a n’asɛmti ne “Bere a Mopaw Aware Mu Ɔhokafo No” na efii ɔmantam nhyiam no ase ɔkasa a wɔakyekyem a edi kan—“Muntie Onyankopɔn Asɛm”—no ase. Gyinae a anibere wom a nnipa sisi no mu biako ne aware mu ɔhokafo a wɔpaw. Enti, Kristofo pɛ sɛ wonyin ansa na wɔaware, na ɛsɛ sɛ “Awurade mu nko” na wɔware. (1 Korintofo 7:39) Ɔkasa a wɔakyekyem no fã a edi hɔ no kaa ɔpɛ a Yehowa wɔ sɛ Kristofo mmusua nyinaa bedi yiye sɛ honhom mufo a wɔyɛ den, na ɛde nyansahyɛ a mfaso wɔ so a wɔnam so betumi anya eyi mae. Ɔfã a etwa to no kaee awofo sɛ sɛ wɔbɛkyerɛ wɔn mma sɛ wɔnnɔ Onyankopɔn a, ɛsɛ sɛ wɔn a wɔyɛ awofo no di kan dɔ no.

Nsɛm a wɔdaa no adi wɔ ɔkasa a n’asɛmti ne “Monhwɛ Yiye Wɔ Atesɛm ne Nsekudi Ho” no boaa obiara ma ohui sɛ ɛwom sɛ nsɛm a ɛyɛ nwonwa sisi de, nanso ɛsɛ sɛ yɛyɛ yɛn ade nyansam, ɛnsɛ sɛ yegye biribiara di, bere a yɛte nsɛm a ɛyɛ ahodwiriw no. Kristofo wɔ gyinabea pa a ɛbɛma wɔaka nea wonim sɛ ɛyɛ nokware—Ahenni ho asɛmpa—no ho asɛm. Atiefo pii hui sɛ ɔkasa a edi hɔ a n’asɛmti ne “‘Ɔhonam Mu Nsɔe’ a Yebegyina Ano” no ma awerɛkyekye, na ɛhyɛ den yiye. Ɛboaa wɔn ma wohui sɛ ɛmfa ho sɔhwɛ ahorow a yebehyia no, Yehowa betumi ama yɛn ahoɔden denam ne honhom kronkron, N’asɛm, ne yɛn Kristofo onuayɛ no so. Eyi mu no, wonyaa nkuranhyɛ pii fii nea ɛtoo ɔsomafo Paulo no mu.—2 Korintofo 12:7-10; Filipifo 4:11, 13.

Ɔkasa a ɛne “Yehowa Ahyehyɛde a Yɛne no Bɛbɔ Anan Anantew” no na ɛde da a edi kan no baa awiei. Wosusuw mmeae abiɛsa a Onyankopɔn ahyehyɛde no anya mu nkɔanim titiriw  ho: (1) honhom fam hann no a Yehowa ama yɛakɔ so anya mu ntease, (2) ɔsom adwuma a Onyankopɔn de ahyɛ yɛn nsa, ɛne (3) nsakrae a ɛyɛ ne bere mu de a wɔayɛ wɔ ahyehyɛde no dwumadi mu. Afei ɔkasafo no de ahotoso kae sɛ: “Yɛde ahopere rehwɛ anidaso a ɛda yɛn anim no kwan.” Obisae sɛ: “So ɛnyɛ nokware sɛ yɛwɔ nea yebetumi agyina so akɔ so akura ahotoso a na yɛwɔ kan no mu akosi awiei pɛɛ?” (Hebrifo 3:14) Na mmuae no da adi pefee. Ɛno akyi no, woyii nhomawa foforo a n’asɛmti ne Wubetumi Ayɛ Onyankopɔn Adamfo! no adi. Wɔde bedi dwuma sɛ nkyerɛkyerɛ nhoma a tumi wom a wɔde bɛboa nnipa a wɔn nhomanim anaa wɔn akenkan nkɔɔ anim pii ma wɔasua Yehowa ho ade.

Da a Ɛto so Abien—Monkɔ so Nka Onyankopɔn Anwonwade Ho Asɛm

Bere a wosusuw daa asɛm ho wiei no, wɔde ɔkasa a wɔakyekyem a n’asɛmti ne “Onyankopɔn Asɛm Ho Asomfo” toaa nhyiam no da a ɛto so abien no so. Ɔfã a edi kan no twee adwene sii nkɔso a aba wɔ yɛn wiase nyinaa asɛnka adwuma no mu no so. Nanso, nnipa dodow no ara a wɔpo Ahenni asɛm no yɛ asɛnnennen ma yɛn wɔ adwuma yi a yɛbɛkɔ so ayɛ no mu. Adawurubɔfo a wɔde bere tenten asom no kyerɛkyerɛɛ sɛnea wɔnam wɔn adwene ne wɔn koma a wɔhyɛɛ no den so gyinaa anibiannaso anaa ɔsɔretia ano kɔɔ so kuraa wɔn anigye mu wɔ ɔsom adwuma no mu no mu. Ɔfã a ɛto so abien no kaee nhyiamfo no sɛ Yehowa Adansefo bɔ mmɔden kɔ nkurɔfo nkyɛn baabiara, kodi adanse wɔ afie afie ne bɔnnɔ so. Na ɔfã a etwa to no kyerɛkyerɛɛ akwan pii a Kristofo betumi afa so atrɛw wɔn som adwuma mu no mu. Ɔkasafo no sii so dua sɛ nea ɛbɛyɛ na yɛatumi ayɛ eyi no, ɛsɛ sɛ yɛde Onyankopɔn Ahenni di kan wɔ yɛn asetra mu, sɛ ɛba sɛ saa a yɛbɛyɛ no bɛma yɛn ho akyere yɛn na yɛahwere biribi mpo a.—Mateo 6:19-21.

Esiane sɛ yɛte wiase bɔne a honam fam nneɛma agye nkurɔfo adwene kɛse mu nti, na ɔkasa a n’asɛmti ne “Monna Onyamesom Pa Adi Denam Nea Mowɔ a Mobɛpene So no So” no yɛ ne bere mu de ankasa. Bere a ɔkasafo no de ne nsɛm no bi gyinaa 1 Timoteo 6:6-10, 18, 19 so no, ɔkyerɛɛ sɛnea onyamesom  pa boa Kristofo ma wɔkwati sikanibere a ebetumi ama wɔayera kwan na wɔadi yaw pii no. Osii so dua sɛ sɛnea yɛn sikasɛm te biara no, anigye a yebenya no gyina yɛne Yehowa ntam abusuabɔ ne yɛn honhom fam yiyedi so. Ɔkasa a ɛne “Monnyɛ Ade a Ɛbɛma Onyankopɔn Ani Awu” no mu nsɛm hyɛɛ nnipa pii nkuran kɛse. Osii nokwasɛm a ɛyɛ sɛ Yehowa werɛ mfi N’adansefo anokwafo no so dua. Yesu Kristo—a ɔwɔ “hɔ nnɛra, ɛnnɛ, ɛne daapem nyinaa”—nhwɛso a ebiara ne no nsɛ no bɛboa nnipa pii ma wɔde boasetɔ atu nkwa ho mmirika no.—Hebrifo 13:8.

Nea wɔde wiee anɔpa nhyiam no ne asubɔ kasa—a ɛyɛ Yehowa Adansefo nhyiam ahorow mu ade titiriw bere nyinaa no. Hwɛ anigye ara a ɛyɛ sɛ yehuu wɔn a wɔahyira wɔn ho so foforo a wodi Yesu anammɔn akyi denam nsu mu asubɔ so no! (Mateo 3:13-17) Wɔn a wotu saa anammɔn yi nyinaa ayɛ pii dedaw sɛ Onyankopɔn asɛm yɛfo. Afei nso, sɛ wɔbɔ asu a wɔbɛyɛ asɛmpa no ho asomfo, na wonya anigye pii fi nim a wonim sɛ wɔreboa ma wɔatew Yehowa din ho no mu.—Mmebusɛm 27:11.

Wɔde afotu a ɛyɛ tee mae wɔ ɔkasa a ɛne “Ehia Ahokokwaw na ‘Yɛahu Papa ne Bɔne’” no mu. Nea ɛteɛ ne nea ɛnteɛ ho gyinapɛn ahorow a wiase no wɔ no nni mũ koraa. Enti ehia sɛ yɛde yɛn ho to Yehowa gyinapɛn ahorow so. (Romafo 12:2) Wɔhyɛɛ obiara nkuran sɛ ɔnyere no ho nnya Onyankopɔn akwan ho ntease a ɛyɛ pɛ  na onnyin. Afei, sɛ yɛde yɛn nkatede di dwuma a yɛbɛtete no ma ‘ayiyi papa ne bɔne mu.’—Hebrifo 5:11-14.

Ɔkasa a wɔakyekyem a ɛne “Yere Wo Ho Nya Honhom Fam Nkɔso” na edii hɔ. Nokware Kristofo nim hia a ɛho hia sɛ wonya nkɔso wɔ honhom fam na wokura mu. Eyi gye adwumaden—akenkan, adesua, ne nneɛma ho a wosusuw. (Mateo 7:13, 14; Luka 13:24) Nnipa a wɔyɛ honhom mufo nso kɔ so ‘bɔ mpae srɛ bere nyinaa.’ (Efesofo 6:18) Yehu sɛ yɛn mpaebɔ da sɛnea yɛn gyidi ne yɛn ahofama, yɛn honhom fam yiyedi, ne nea yebu no sɛ ‘nneɛma a ɛho hia koraa’ mu dɔ fa no adi. (Filipifo 1:10) Wosii hia a ɛho hia sɛ yɛne Yehowa benya abusuabɔ a ɔdɔ wom te sɛ nea abofra a ɔyɛ osetie ne agya a ɔwɔ ayamye, nya no so dua nso. Ɛnyɛ ɔsom kɛkɛ na yɛwɔ—ɛwom sɛ ɛne nokware som de—na mmom yɛpɛ sɛ yenya gyidi a ɛyɛ den te sɛ nea ‘yehu Onyankopɔn no.’—Hebrifo 11:6, 27.

Wosusuw honhom fam nkɔso ho bio wɔ ɔkasa a ɛne “Ma Wo Nkɔso Nna Adi” mu. Wosusuw nkɔso a ɛte saa afã abiɛsa ho: (1) nimdeɛ, ntease, ne nyansa mu nkɔso a yebenya, (2) Onyankopɔn honhom aba a yɛbɛsow, ne (3) yɛn asɛyɛde ahorow ho dwuma a yebedi sɛ abusuafo.

Wɔ da no kasa a etwa to a ɛne, “Monnantew Wɔ Onyankopɔn Asɛm Mu Hann a Ɛkɔ So Hyerɛn no Mu” awiei no, nhyiamfo no ani gyei sɛ wɔn nsa kaa nhoma foforo a ɛne Yesaia Nkɔmhyɛ No—Hann Ma Adesamma Nyinaa I no. Eyi yɛ Bible mu nhoma a ɛne Yesaia no a wɔasusuw ti ahorow no ho mmiako mmiako no apo abien no mu nea edi kan. Ɔkasafo no kae sɛ: “Yesaia nhoma no wɔ nsɛm bi ma yɛn nnɛ.” Ɔtoaa so sɛ: “Yiw, emu nkɔmhyɛ no pii nyaa mmamu wɔ Yesaia bere so. . . . Nanso, Yesaia nkɔmhyɛ no fã kɛse no ara renya mmamu nnɛ, na ebi nso benya mmamu wɔ Onyankopɔn wiase foforo a wahyɛ ho bɔ no mu.”

Da a Ɛto so Abiɛsa—Monyɛ Yehowa Asɛm no Yɛfo

Daa asɛm na wosusuw ho de fii nhyiam no da a etwa to no ase. Afei ɔkasa a wɔakyekyem a n’asɛmti ne “Sefania Nkɔmhyɛ a Ɛkyerɛ Biribi Ma Wɔn a Wɔreyɛ Onyankopɔn Apɛde No” na edii hɔ. Kasa abiɛsa a ɛwɔ saa ɔkasa a wɔakyekyem yi mu no kyerɛɛ sɛnea Yehowa de ahohia bɛba wɔn a wontie ne kɔkɔbɔ nnɛ no so sɛnea ɔyɛe wɔ Yudafo asoɔdenfo no bere so no. Esiane sɛ Onyankopɔn na wɔyɛ no bɔne nti, wɔbɛnantew basabasa sɛ anifuraefo, na wonnya ogye. Nanso, nokware Kristofo fi nokwaredi mu kɔ so hwehwɛ Yehowa, na wɔbɛkora wɔn so Onyankopɔn abufuw da no. Afei nso, mprempren  mpo, wonya anigye pii. Wɔanya hokwan a ɛyɛ anigye sɛ wɔbɛka ‘kasa kronn,’ nokware a ɛwɔ Bible mu no ho asɛm. (Sefania 3:9) Ɔkasafo no sii so dua sɛ: “Kasa kronn a yɛbɛka no nkyerɛ nokware no a yebegye adi na yɛde akyerɛkyerɛ afoforo kɛkɛ, na mmom, ɛkyerɛ nso sɛ yɛbɛma yɛn abrabɔ ne Onyankopɔn mmara ne nnyinasosɛm ahorow ahyia.”

Nhyiamfo no de anigye hwɛɛ drama a ɛne “Kɔkɔbɔ Nhwɛso Ma Yɛn Bere Yi” no kwan. Saa drama yi a wɔhyɛ tete ntade wom no kyerɛɛ sɛnea Israelfo mpempem pii hweree wɔn nkwa wɔ Bɔhyɛ Asase no hye so esiane sɛ wɔn werɛ fii Yehowa, na abosonsomfo mmea daadaa wɔn ma wɔbobɔɔ aguaman som abosom nti. Nnipa a wɔwom no mu biako—Yamin—adwene hinhimii mfiase no wɔ Moabfo mmea no nnaadaa ne ahofama a ɔwɔ ma Yehowa no ntam, a na onhu nea ɔnyɛ. Simri ɔbɔnefo no adwemmɔne ne ne nnaadaa no daa adi yiye wɔ mu, na saa ara na Pinehas gyidi ne n’ahofama nso daa adi. Ɛdaa asiane a ɛwɔ hɔ sɛ yebetumi de yɛn ho abɔ wɔn a wɔnnɔ Yehowa no adi pefee.

Drama no siesiee atiefo no adwene maa kasa a edi akyi a ɛne “Monnyɛ Atiefo Awerɛfirifo” no. Nhwehwɛmu a wɔyɛe wɔ 1 Korintofo 10:1-10 no daa no adi sɛ Yehowa sɔ yɛn setie hwɛ de hwɛ sɛ yɛfata sɛ yenya wiase foforo no anaa. Ebinom fam no, mprempren mpo a yɛabɛn nhyehyɛe foforo no, wɔama honam akɔnnɔ aka wɔn honhom fam nneɛma ahyɛ. Wɔhyɛɛ obiara nkuran sɛ ɔmmma hokwan a ɔwɔ sɛ ‘ɔbɛhyɛn Yehowa home mu’ no mmmɔ no.—Hebrifo 4:1.

Ná baguam kasa no asɛmti ne “Nea Enti a Ɛsɛ sɛ Wudwen Yehowa Anwonwade Ho.” Yehowa “anwonwade” da ne nyansa ne ne tumi a ɔwɔ wɔ abɔde a aniwa hu a atwa yɛn ho ahyia no nyinaa so no adi. (Hiob 37:14) Na nsɛmmisa a wɔde hwehwɛ nsɛm mu pii a Yehowa bisae no ara dɔɔso sɛ ɛbɛma Hiob ahu ade nyinaa Bɔfo no tumi. Yehowa bɛyɛ “anwonwade” nso ama n’asomfo anokwafo daakye. Ɔkasafo no de baa awiei sɛ: “Yɛwɔ nneɛma pii a enti ɛsɛ sɛ yedwen Yehowa anwonwade ho—nea wayɛ tete mmere mu, nea ɔreyɛ wɔ abɔde mu a yehu nnɛ, ɛne nea wahyɛ bɔ sɛ ɔbɛyɛ daakye.”

Bere a wɔbɔɔ dapɛn no mu Ɔwɛn-Aban adesua mu nsɛm mua wiei no, wɔmaa nhyiam no kasa a etwa to no. Saa kasa yi a ɛkanyan adwene a na n’asɛmti ne “Bu Hokwan a Wowɔ Sɛ Onyankopɔn Asɛm Yɛfo no Yiye” no sii so dua sɛ nidi wom sɛ yɛbɛyɛ Onyankopɔn asɛm yɛfo. (Yakobo 1:22) Wɔkaee atiefo no sɛ hokwan a yɛanya sɛ Onyankopɔn asɛm yɛfo no som bo, na dodow a yɛde di dwuma no, dodow no ara na yebenya obu kɛse ama. Wɔhyɛɛ atiefo no nyinaa nkuran sɛ wɔmma saa ɔmantam nhyiam yi nsɛm a mfaso wɔ so a ɛkanyan adwene no nna adi wɔ ɔpɛ a wɔwɔ sɛ wɔbɛyɛ Onyankopɔn asɛm yɛfo akosi ase no mu. Ɛno ne ɔkwan koro pɛ a wobetumi afa so anya anigye a ɛsen biara.

[Adaka/Mfonini wɔ kratafa 25]

Wubetumi Ayɛ Onyankopɔn Adamfo!

Fida awia no, woyii nhomawa foforo a wɔato din Wubetumi Ayɛ Onyankopɔn Adamfo! no adi. Wohia Bible nkyerɛkyerɛ a asete nyɛ den kɛse wɔ wiase no afã pii, na yɛde saa nhomawa yi bedi saa ahiade no ho dwuma. Ɛbɛyɛ nhyira kɛse ama nkurɔfo a wonsuaa nhoma pii anaa wonnim akenkan papa.

[Adaka/Mfonini wɔ kratafa 26]

Yesaia Nkɔmhyɛ No—Hann Ma Adesamma Nyinaa

Nhyiamfo no ani gyei sɛ wɔn nsa kaa Yesaia Nkɔmhyɛ No—Hann Ma Adesamma Nyinaa no po abien no mu Po I no. Mfaso a ɛwɔ Yesaia nkɔmhyɛ no so ma yɛn bere yi na wɔasi so dua wɔ nhoma yi mu.