Wo Ne Yehowa Ahyehyɛde No Mmɔ Anan
Wo Ne Yehowa Ahyehyɛde No Mmɔ Anan
“Asomdwoe Nyankopɔn . . . nsiesie mo ade pa biara mu mma monyɛ nea ɔpɛ.”—HEBRIFO 13:20, 21.
1. Nnipa dodow ahe na wɔwɔ wiase, na wɔn mu dodow ahe na wɔwɔ ɔsom ahorow bi mu?
WƆ AFE 1999 mu no, nnipa a wɔte asase so dodow duu ɔpepepem asia! The World Almanac kyerɛ sɛ saa nnipa dodow yi mu 1,165,000,000 yɛ Nkramofo; 1,030,000,000 yɛ Roma Katolekfo; 762,000,000 yɛ Hindufo; 354,000,000 yɛ Buddhafo; 316,000,000 yɛ Protestantfo; na 214,000,000 yɛ Ortodɔksfo.
2. Dɛn na yebetumi aka afa nyamesom tebea a ɛwɔ hɔ nnɛ no ho?
2 Sɛ yɛhwɛ mpaapaemu ne ntotoe a ɛwɔ nyamesom mu nnɛ no a, so yebetumi aka sɛ nnipa ɔpepem pii yi reyɛ ade a ɛne Onyankopɔn apɛde hyia? Dabi, “efisɛ Onyankopɔn nyɛ sakasakayɛ [Nyankopɔn], na mmom asomdwoe [Nyankopɔn].” (1 Korintofo 14: 33) Na Yehowa asomfo amanaman ntam onuayɛ kuw no nso ɛ? (1 Petro 2:17) Nhwehwɛmu a wɔayɛ no yiye kyerɛ sɛ ‘asomdwoe Nyankopɔn no de ade pa biara asiesie wɔn ama wɔyɛ n’apɛde.’—Hebrifo 13:20, 21.
3. Dɛn na esii wɔ Yerusalem wɔ Pentekoste 33 Y.B., na dɛn ntia?
3 Ɛwom, yentumi nnyina nnipa dodow a wɔyɛ Yehowa Adansefo no so nkyerɛ sɛ ebia wɔwɔ Onyankopɔn anim dom; na saa ara nso na ɛnyɛ nnipa dodow na ɛsɔ Onyankopɔn ani. Ɛnyɛ Israelfo “dodow a ɛsen aman nyinaa” nti na ɔpaw wɔn. Nokwarem no, wɔn na na ‘wosua wɔ aman nyinaa mu.’ (Deuteronomium 7:7) Nanso esiane sɛ Israel anni nokware nti, Yehowa yii ne dom fii wɔn so de maa asafo foforo a na Yesu Kristo akyidifo na wɔwom no, wɔ Pentikoste afe 33 Y.B. mu. Wɔde Yehowa honhom kronkron sraa wɔn, na wɔde nnamyɛ kaa Onyankopɔn ne Kristo ho nokware kyerɛɛ afoforo.—Asomafo no Nnwuma 2:41, 42.
Wonya Nkɔanim Bere Nyinaa
4. Dɛn nti na wobɛka sɛ na tete Kristofo no renya nkɔanim?
4 Wɔ afeha a edi kan no mu no, na Kristofo asafo no nya nkɔanim bere nyinaa, wɔkɔɔ nsasesin foforo mu, yɛɛ asuafo, na wonyaa Onyankopɔn atirimpɔw mu ntease kɛse. Tete Kristofo no bataa honhom fam nhumu a wɔnam nkrataa a Onyankopɔn ma wɔkyerɛwee so nyae no ho. Asomafo no ne afoforo nsrahwɛ kanyan wɔn ma wɔyɛɛ wɔn som adwuma no. Wɔayɛ eyi ho kyerɛwtohɔ a edi mu wɔ Kristofo Hela Kyerɛwnsɛm no mu.—Asomafo no Nnwuma 10:21, 22; 13:46, 47; 2 Timoteo 1:13; 4:5; Hebrifo 6:1-3; 2 Petro 3:17, 18.
5. Dɛn nti na Onyankopɔn ahyehyɛde no renya nkɔanim nnɛ, na dɛn nti na ɛsɛ sɛ yɛne no bɔ anan?
5 Te sɛ tete Kristofo no, nnɛyi Yehowa Adansefo anya nkɔanim afi sɛnea wofii ase ketewaa no mu. (Sakaria 4:8-10) Efi afeha a ɛto so 19 no awiei no, ada adi pefee sɛ Onyankopɔn honhom wɔ n’ahyehyɛde no so. Esiane sɛ yɛamfa yɛn ho anto nnipa ahoɔden so, na mmom yɛde yɛn ho too honhom kronkron akwankyerɛ so nti, yɛakɔ so anya Kyerɛwnsɛm no mu ntease ne Onyankopɔn apɛdeyɛ mu nkɔanim. (Sakaria 4:6) Mprempren a yɛwɔ “nna a edi akyiri” mu no, ehia sɛ yɛne Yehowa ahyehyɛde a ɛrenya nkɔanim no bɔ anan. (2 Timoteo 3:1-5) Saa a yɛbɛyɛ no boa yɛn ma yɛn anidaso mu kɔ so yɛ den, na yenya Onyankopɔn Ahenni a wɔde asi hɔ no ho adansedi mu kyɛfa ansa na awiei koraa a wobeyi nhyehyɛe yi afi hɔ no aba.—Mateo 24:3-14.
6, 7. Akwan abiɛsa a Yehowa ahyehyɛde no anya mu nkɔanim bɛn na yebesusuw ho?
6 Yɛwɔ wɔn a wɔde wɔn ho bɔɔ Yehowa ahyehyɛde no wɔ 1920, 1930, ne 1940 mfe no mu wɔ yɛn ntam. Wɔ saa mfe a na wɔrefi nneɛma ase mu no, yɛn mu hena na osusuwii sɛ yɛbɛdɔɔso kɛse sɛɛ na yɛakɔ so anya nkɔanim wɔ ahyehyɛde no mu abedu nnɛ? Susuw nneɛma atitiriw a yɛatumi ayɛ wɔ yɛn nnɛyi abakɔsɛm mu no ho hwɛ! Nokwarem no, ɛyɛ nea ɛhyɛ nkuran honhom fam sɛ yebesusuw nea Yehowa nam ne nkurɔfo a ɔnam teokrase kwan so ahyehyɛ wɔn no so atumi ayɛ no ho.
7 Dawid a ɔtraa ase tete no ani gyei kɛse bere a osusuw Yehowa nnwuma a ɛyɛ nwonwa ho no. Ɔkae sɛ: “Anka mɛka na makasa ho, ɛdɔɔso sen sɛ wobetumi akan.” (Dwom 40:5) Yɛtɔ sin saa ara, na yentumi nka Yehowa nnwuma akɛse a ɛdɔɔso no nyinaa ho asɛm wɔ yɛn bere yi mu. Nanso, momma yensusuw mmeae abiɛsa a Yehowa ahyehyɛde no anya nkɔanim no ho: (1) honhom fam nhumu a ɛba nkakrankakra, (2) ɔsom adwuma a atu mpɔn na emu atrɛw, ne (3) nsakrae a ɛyɛ ne bere mu de a wɔayɛ wɔ ahyehyɛde no akwankyerɛ ahorow mu.
Yɛn Ani Sɔ Honhom Fam Nhumu No
8. Nea ɛne Mmebusɛm 4:18 hyia no, dɛn na honhom fam nhumu ama yɛatumi ahu wɔ Ahenni no ho?
8 Ɛdefa honhom fam nhumu a ɛba nkakrankakra ho no, Mmebusɛm 4:18 ayɛ nokware. Ɛka sɛ: “Treneefo kwan te sɛ owia hann, ɛkɔ so hyerɛn kodu awia ketee.” Hwɛ aseda ara a yɛde ma wɔ honhom fam nhumu a ɛba nkakrankakra a yɛanya no ho! Wosii Onyankopɔn Ahenni so dua wɔ Cedar Point, Ohio, nhyiam a wɔyɛɛ no 1919 mu no ase. Yehowa nam Ahenni no so tew ne din ho, na ɔnam so san ne tumidi ho. Nokwarem no, honhom fam nhumu ama yɛatumi ahu sɛ efi Genesis kosi Adiyisɛm no, Bible no di Yehowa atirimpɔw a ɛne sɛ ɔnam Ahenni a ɛhyɛ ne Ba no ase no so bɛtew ne din ho no ho adanse. Emu na wɔn a wɔdɔ trenee nyinaa anidaso wɔ.—Mateo 12:18, 21.
9, 10. Wɔ 1920 mfe no mu no, dɛn na wohui wɔ Ahenni no ne ahyehyɛde a wɔko tia wɔn ho no ho, na ɔkwan bɛn so na eyi aboa?
9 Wɔ Cedar Point nhyiam a wɔyɛɛ wɔ 1922 ase no, ɔkasafo titiriw, J. F. Rutherford hyɛɛ Onyankopɔn nkurɔfo nkuran sɛ “mommɔ, mommɔ, mommɔ Ɔhene no ne n’ahenni dawuru.” Wɔ asɛm “Birth of the Nation,” (Ɔman no Awo) a wotintim wɔ Engiresi Ɔwɛn-Aban a ɛbae March 1, 1925 mu no, wɔtwee adwene sii honhom fam nhumu a ɛfa nkɔmhyɛ a ɛkae sɛ wɔde Onyankopɔn Ahenni besi hɔ wɔ 1914 ho no so. Afei nso wɔbɛtee ase wɔ 1920 mu sɛ ahyehyɛde abien na ɛredi asi—Yehowa de ne Satan de. Akodi no rekɔ so wɔ wɔn ntam, na sɛ yɛpɛ sɛ yegyina nea obedi nkonim no afã a, gye sɛ yɛne Yehowa ahyehyɛde no bɔ anan.
10 Ɔkwan bɛn so na honhom fam nhumu a ɛte saa no aboa yɛn? Esiane sɛ Onyankopɔn Ahenni ne Ɔhene Yesu Kristo nyɛ wiase no fã nti, yɛn nso yentumi nyɛ ne fã. Yɛnam yɛn ho a yɛbɛtwe afi wiase no ho so da no adi sɛ yɛwɔ nokware no afã. (Yohane 17:16; 18:37) Sɛ yɛhwɛ nsɛnnennen pii a ɛhaw nhyehyɛe bɔne yi a, hwɛ aseda ara a yɛde ma sɛ yɛnyɛ Satan ahyehyɛde no fã! Na hwɛ ɔdom ara a yɛanya sɛ yɛwɔ honhom fam ahobammɔ wɔ Yehowa ahyehyɛde no mu!
11. Kyerɛwnsɛm mu din bɛn na Onyankopɔn nkurɔfo fae wɔ 1931 mu?
11 Wɔ Columbus, Ohio, nhyiam ase wɔ 1931 mu no, wɔde Yesaia 43:10-12 dii dwuma wɔ ɔkwan a ɛfata so. Bible Asuafo no faa edin a ɛda nsow, Yehowa Adansefo, too wɔn ho so. Hwɛ hokwan ara a ɛyɛ sɛ yɛbɛma afoforo ahu Onyankopɔn din sɛnea ɛbɛyɛ a wobetumi abɔ na wɔanya nkwa!—Dwom 83:18; Romafo 10:13.
12. Honhom fam nhumu a ɛfa nnipakuw kɛse no ho bɛn na wɔde mae wɔ 1935 mu?
12 Ansa na 1930 mfe no reba no, na Onyankopɔn nkurɔfo pii nni wɔn daakye anidaso ho nimdeɛ a edi mu biara. Ná ebinom wɔ ɔsoro asetra ho adwene nanso na wɔn ani gye Bible nkyerɛkyerɛ a ɛfa asase so paradise ho no ho. Wɔ Washington, D.C., nhyiam ase wɔ 1935 mu no, wɔn ani gyei sɛ wohui sɛ nnipadɔm, anaa nnipakuw kɛse a Adiyisɛm ti 7 ka wɔn ho asɛm no yɛ kuw a wɔwɔ asase so anidaso. Efi saa bere no, nnipakuw kɛse no anoboaboa anya nkɔanim ahoɔhare so. So yɛmfa aseda mma sɛ yɛahu nnipa ko a nnipakuw kɛse no yɛ no? Nokwasɛm a ɛyɛ sɛ wɔreboaboa nnipa pii ano afi aman, mmusua, ne ɔkasa nyinaa mu no kanyan yɛn ma yɛma yɛn nan ase yɛ hare bere a yɛne Yehowa ahyehyɛde no bɔ anan no.
13. Ɔsɛmpɔw titiriw bɛn na wosii so dua wɔ St. Louis nhyiam ase wɔ 1941 mu?
13 Wosii ɔsɛmpɔw kɛse a ɛsɛ sɛ adesamma nyinaa susuw ho no so dua wɔ St. Louis, Missouri, nhyiam ase wɔ 1941 mu. Ɛyɛ amansan sodi anaa tumidi ho asɛm. Eyi ne ɔsɛmpɔw a ɛsɛ sɛ wodi ho dwuma nnansa yi ara, na da kɛse a ɛyɛ hu a wɔde bɛyɛ saa no nso renkyɛ! Nea wɔsan de too gua wɔ 1941 mu ne mũdi mu kura ho ɔsɛmpɔw a ɛne no wɔ abusuabɔ, a ɛma yenya hokwan kyerɛ baabi a yegyina wɔ Onyankopɔn tumidi ho no.
14. Dɛn na wohu faa asafohene a wɔkaa wɔn ho asɛm wɔ Yesaia 32:1, 2 no ho wɔ amanaman ntam nhyiam ase wɔ 1950 mu?
14 Wɔ 1950 amanaman ntam nhyiam a wɔyɛɛ no New York City ase no, wohuu asafohene a wɔkaa wɔn ho asɛm wɔ Yesaia 32:1, 2 no yiye. Bere a Onua Frederick Franz kaa saa asɛmti yi ho asɛm na ɔkyerɛkyerɛɛ mu sɛ asase foforo mu asafohene no wɔ yɛn ntam no, obiara ani gyei yiye. Wɔdaa honhom fam hann a apue pii adi wɔ saa nhyiam no ne afoforo a edidii so bae no ase. (Dwom 97:11) Hwɛ sɛnea yɛn ani sɔ sɛ yɛn kwan ‘te sɛ owia hann a ɛkɔ so hyerɛn’!
Nkɔanim a Yenya Wɔ Yɛn Som Adwuma Mu
15, 16. (a) Ɔkwan bɛn so na yenyaa nkɔanim wɔ yɛn som adwuma no mu wɔ 1920 ne 1930 mfe no mu? (b) Nhoma ahorow bɛn na wɔde ahyɛ Kristofo som adwuma no ho nkuran nnansa yi?
15 Ɔkwan a ɛto so abien a Yehowa ahyehyɛde no anya nkɔanim no fa yɛn adwuma titiriw—Ahenni asɛnka ne asuafoyɛ adwuma no ho. (Mateo 28:19, 20; Marko 13:10) Nea ɛbɛyɛ na yɛawie saa adwuma yi no, ahyehyɛde no akɔ so ama yɛahu hia a ehia sɛ yɛtrɛw yɛn som adwuma mu no. Wɔ 1922 mu no, wɔhyɛɛ Kristofo nyinaa nkuran sɛ wɔmfa wɔn ho nhyɛ asɛnka adwuma no mu. Na ɛyɛ ankorankoro biara asɛm sɛ ɔbɛma ne kanea ahyerɛn na wanya nokware no ho adansedi mu kyɛfa bi. (Mateo 5:14-16) Wɔ 1927 mu no, wɔyɛɛ nhyehyɛe de yii Kwasida sii hɔ sɛ da a wɔde yɛ asɛnka adwuma. Efi February 1940 mu no, baabiara a wobɛfa no, wuhu Adansefo no wɔ kwan so ne mmeae a wɔyɛ nnwuma sɛ wɔrekyekyɛ Ɔwɛn-Aban ne Consolation (mprempren Nyan!).
16 Woyii nhomawa Model Study, adi wɔ 1937 mu, de sii hia a ehia sɛ yɛyɛ sankɔhwɛ sɛnea ɛbɛyɛ na yɛakyerɛkyerɛ afoforo Bible mu nokware no so dua. Wɔ mfe a edi ɛno akyi no, wosii Bible adesuayɛ so dua kɛse. Wɔhyɛɛ ɔsom adwuma no fã yi ho nkuran denam “Ma Onyankopɔn Nyɛ Ɔnokwafo” nhoma a wotintimii wɔ 1946 mu ne Nokware a Ɛde Kɔ Daa Nkwa Mu, nhoma a wotintimii wɔ 1968 mu no so. Mprempren yɛde Nimdeɛ a Ɛde Kɔ Daa Nkwa Mu nhoma no na edi dwuma. Nhoma a ɛte saa a wosua no to Kyerɛwnsɛm mu nhyɛase pa a yegyina so yɛ afoforo asuafo.
Nkɔanim a Yenya Wɔ Nsakrae Ahorow a Wɔyɛ Wɔ Ahyehyɛde no Akwankyerɛ Mu no Mu
17. Nea ɛne Yesaia 60:17 hyia no, ɔkwan bɛn so na Yehowa ahyehyɛde no anya nkɔanim?
17 Ɔkwan a ɛto so abiɛsa a Yehowa ahyehyɛde no anya nkɔanim no fa nsakrae a wɔayɛ wɔ ahyehyɛde no akwankyerɛ ahorow mu ho. Sɛnea Yesaia 60:17 kyerɛ no, Yehowa hyɛɛ bɔ sɛ: “Kɔbere ananmu na mede sika mesi maba, na dade ananmu na mede dwetɛ mesi maba, na kɔbere asi nnua ananmu, na dade asi abo ananmu. Na mɛma asomdwoe adi wo so panyin ahwɛ wo, na mede trenee mayɛ wo kãfo.” Nea ɛne nkɔmhyɛ yi hyia no, yɛayɛ sɛnea wɔhwɛ Ahenni asɛnka adwuma no ne nguankuw no so ma etu mpɔn no ho biribi.
18, 19. Nsakrae ahorow bɛn na wɔayɛ wɔ ahyehyɛde no mu wɔ mfe a abɛsen kɔ no mu?
18 Wɔ 1919 mu no, wɔpaw ɔsom adwuma kwankyerɛfo wɔ asafo biara mu kae sɛ wɔnyɛ asɛnka ho nhyehyɛe. Eyi hyɛɛ yɛn asɛnka adwuma no ho nkuran. Wotwaa mpanyimfo ne asɔfo nkumaa a wɔtow aba paw wɔn no mu wɔ 1932 mu, de kyerɛe sɛ yɛatwe yɛn ho afi kwasafo kwan so adeyɛ ho. Yeduu botae titiriw foforo ho wɔ 1938 mu bere a yedii teokrase kwan a na tete Kristofo no fa so paw asomfo a wɔwɔ asafo no mu nyinaa no akyi pɛɛ no. (Asomafo no Nnwuma 14:23; 1 Timoteo 4:14) Wɔ 1972 mu no, wɔpaw ahwɛfo ne asafo mu asomfo ma wɔsomee, sɛnea na mmarima a wɔte saa no yɛ wɔ tete Kristofo mu no ara pɛ. Sɛ́ anka onipa biako pɛ bɛsom sɛ asafo bi mu ɔhwɛfo no, Filipifo 1:1 ne kyerɛw nsɛm foforo kyerɛ sɛ wɔn a wodu Kyerɛwnsɛm mu ahwehwɛde ma ahwɛfo ho no yɛ mpanyimfo kuw.—Asomafo no Nnwuma 20:28; Efesofo 4:11, 12.
19 Wɔ 1975 mu no, wɔyɛɛ nhyehyɛe maa Yehowa Adansefo Sodikuw no boayikuw ahorow hwɛɛ nnwuma a Onyankopɔn ahyehyɛde no yɛ wɔ wiase nyinaa so. Wɔpaw Baa Boayikuw ahorow na wɔahwɛ adwuma no so wɔ wɔn nsasesin ahorow mu. Efi saa bere no, wɔatwe adwene asi adwuma a wɔyɛ wɔ adwumayɛbea ti hɔ ne Ɔwɛn Aban Asafo no baa dwumadibea ahorow a wɔbɛma ayɛ mmerɛw no so sɛnea ɛbɛyɛ a ‘wɔbɛsɔ nneɛma a eye koraa no ahwɛ.’ (Filipifo 1:9, 10) Asɛyɛde a ɛda Kristo ahwɛfo nkumaa no mmati so no bi ne sɛ wobedi anim wɔ asɛmpaka adwuma no mu, akyerɛkyerɛ wɔ asafo no mu, na wɔahwɛ Onyankopɔn nguankuw no yiye.—1 Timoteo 4:16; Hebrifo 13:7, 17; 1 Petro 5:2, 3.
Yesu Akanni a Ɛda Adi
20. Yehowa ahyehyɛde no a yɛne no bɛbɔ anan no hwehwɛ sɛ yegye Yesu dibea bɛn tom?
20 Yehowa ahyehyɛde a enya nkɔanim a yɛne no bɛbɔ anan no hwehwɛ sɛ yegye dwuma a Onyankopɔn de ahyɛ Yesu Kristo nsa sɛ “asafo no ti” no tom. (Efesofo 5:22, 23) Nea ɛfata sɛ yɛhyɛ no nsow nso ne Yesaia 55:4, faako a wɔka kyerɛ yɛn sɛ: “Hwɛ, mede no mayɛ aman dansefo, aman safohene ne mmarahyɛfo” no. Akyinnye biara nni ho sɛ Yesu nim sɛnea wodi anim. Afei nso onim ne nguan ne wɔn nnwuma. Nokwarem no, bere a ɔbɛhwɛɛ asafo ahorow ason a na wɔwɔ Asia Kumaa no, ɔkaa no mpɛn anum sɛ: “Minim wo nnwuma.” (Adiyisɛm 2:2, 19; 3:1, 8, 15) Yesu nso nim yɛn ahiade sɛnea N’agya, Yehowa, nim no ara pɛ. Ansa na Yesu rekyerɛ Mpaebɔ Nhwɛso no, ɔkae sɛ: “Mo agya Onyankopɔn nim nneɛma a ehia mo ansa na mubisa no.”—Mateo 6:8-13.
21. Ɔkwan bɛn so na Yesu akanni da adi wɔ Kristofo asafo no mu?
21 Ɔkwan bɛn so na Yesu akanni no da adi? Ɔkwan biako a ɔnam so ne Kristofo ahwɛfo, ‘nnipa mu akyɛde’ no. (Efesofo 4:8) Adiyisɛm 1:16 ka ahwɛfo a wɔasra wɔn ho asɛm sɛ wɔwɔ Kristo nsa nifa mu wɔ ne hwɛ ase. Ɛnnɛ, Yesu kyerɛ nhyehyɛe a wɔyɛ ma mpanyimfo no kwan, sɛ ebia mmarima a wɔte saa wɔ ɔsoro anidaso anaa asase so de no. Sɛnea yɛakyerɛkyerɛ mu wɔ asɛm a edi eyi anim mu no, honhom kronkron na ɛpaw wɔn denam Kyerɛwnsɛm mu ahwehwɛde so. (1 Timoteo 3:1-7; Tito 1:5-9) Wɔ afeha a edi kan mu no, mpanyimfo kuw bi a na wɔwɔ Yerusalem na na wɔbom yɛ sodikuw a na ɛhwɛ asafo ahorow no ne Ahenni asɛnka adwuma no nyinaa so. Ɔkwan a ɛte saa ara so na Yehowa ahyehyɛde no nam nnɛ.
Kɔ so ne No Mmɔ Anan!
22. Mmoa bɛn na Sodikuw no de ma?
22 Wɔde Ahenni nneɛma ahyɛ “akoa nokwafo ne ɔbadwemma,” a Yehowa Adansefo Sodikuw no gyina hɔ ma no no nsa. (Mateo 24:45-47) Sodikuw no adwuma titiriw ne sɛ ɛde honhom fam nkyerɛkyerɛ ne akwankyerɛ bɛma Kristofo asafo no. (Asomafo no Nnwuma 6:1-6) Nanso sɛ asiane ahorow to mfɛfo asomfo a, Sodikuw no ma mmara kwan so ahyehyɛde no mu biako anaa nea ɛboro saa de mmoa kɔma, na wosiesie anaa wɔsan sisi adan ne Ahenni Asa horow a asɛe no. Sɛ wɔne Kristofo bi di no atirimɔden so anaasɛ wɔde ɔtaa a ano yɛ den ba wɔn so a, wɔfa akwan horow so hyɛ wɔn den honhom fam. Na wɔbɔ mmɔden biara a wobetumi sɛ wɔbɛma asɛnka adwuma no anya nkɔanim wɔ “bere a enye mu.”—2 Timoteo 4:1, 2.
23, 24. Ɛmfa ho nea ɛba Yehowa nkurɔfo so no, dɛn na Yehowa kɔ so de ma bere nyinaa, na dɛn na ɛsɛ sɛ yesi yɛn bo sɛ yɛbɛyɛ?
23 Ɛmfa ho nea ɛba Yehowa nkurɔfo so biara no, ɔkɔ so ma wɔn honhom fam aduan ne akwankyerɛ a wohia. Afei nso Onyankopɔn ma anuanom a asɛyɛde hyehyɛ wɔn nsa no nya nhumu ne nimdeɛ ma wɔde siesie wɔn ho ma nkɔanim ne nsakrae a ɛba teokrase nhyehyɛe mu no. (Deuteronomium 34:9; Efesofo 1:16, 17) Yehowa ma yɛn nsa ka nea yehia na ama yɛatumi ayɛ yɛn asuafoyɛ adwuma no na yɛawie yɛn som adwuma no wɔ wiase nyinaa.—2 Timoteo 4:5.
24 Yɛwɔ ahotoso koraa sɛ Yehowa rennyaw n’anokwafo da; obegye wɔn afi ‘ahohiahia kɛse’ a ɛreba no mu. (Adiyisɛm 7:9-14; Dwom 94:14; 2 Petro 2:9) Yɛwɔ biribiara a yebegyina so akura ahotoso a yedii kan nyae no mu pintinn de akosi awiei pɛɛ. (Hebrifo 3:14) Enti momma yensi yɛn bo sɛ yɛne Yehowa ahyehyɛde no bɛbɔ anan.
Wubebua Dɛn?
• Dɛn nti na yebetumi aka sɛ Yehowa ahyehyɛde no kɔ so nya nkɔanim?
• Adanse bɛn na ɛwɔ hɔ a ɛkyerɛ sɛ Onyankopɔn nkurɔfo nya honhom fam nkɔanim bere nyinaa?
• Ɔkwan bɛn so na Kristofo som adwuma no atu mpɔn?
• Nsakrae a ɛyɛ ne bere mu de bɛn na wɔayɛ wɔ nhyehyɛe a ɛma Yehowa asomfo akwankyerɛ no mu?
[Adesua no ho Nsɛmmisa]
[Mfonini wɔ kratafa 17]
Te sɛ Dawid no, yɛrentumi nka Yehowa nnwuma a ɛyɛ nwonwa no nyinaa ho asɛm
[Mfonini wɔ kratafa 18]
Onyankopɔn nguankuw no anya mfaso afi nsakrae a ɛyɛ ne bere mu de a wɔyɛ wɔ ahyehyɛde no akwankyerɛ mu no mu