Yehowa Adansefo Wɔde Ahotoso a Emu Yɛ Den Rekɔ Wɔn Anim!

Afe Afe Nhyiam Ho Amanneɛbɔ

ƐNNƐ bere yi a akyinnyegye ne adwenem naayɛ abu so no, Yehowa Adansefo da nsow sɛ Kristofo a wɔwɔ ahotoso a emu yɛ den. Wɔdaa eyi adi pefee wɔ Watch Tower Bible and Tract Society of Pennsylvania, afe afe nhyiam a wɔyɛe wɔ Yehowa Adansefo Nhyiam Asa so wɔ Jersey City, New Jersey, Memeneda, October 7, 2000, no ase. *

Wɔ oguamtrani, John E. Barr, a ɔyɛ Yehowa Adansefo Sodikuw no muni nnianim kasa mu no, ɔkae sɛ: “Nnipa ɔpepepem pii a wɔwɔ asase so nyinaa mu no, yɛn na yenim na yegye di sɛ wɔde Yehowa Dɔba, Yesu Kristo, asi agua so wɔ soro redi ade wɔ n’atamfo mfinimfini mprempren.” Amanneɛbɔ asia a efi wiase nyinaa a wɔde too gua no di ahotoso a ɛte saa ho adanse.

Bible Mu Nokware a Wɔde Di Ahonhonsɛm so Wɔ Haiti

Ahonhonsɛmdi abu so kɛse wɔ Haiti. Baa Boayikuw no guamtrani John Norman kae sɛ: “Nkurɔfo taa fa akɔmfosɛm so bɔ wɔn ho ban.” Ɔkɔmfo bi adwenem yɛɛ no nãã bere a ɔhweree ne nan biako wɔ akwanhyia bi mu no. Ɔkae sɛ: ‘Sɛ ahonhom na wɔbɔ me ho ban a, dɛn nti na asɛm yi ato me?’ Te sɛ afoforo pii no, Yehowa Adansefo kyerɛkyerɛɛ ɔbarima yi nokware no, na wɔboaa no ma ɔtwee ne ho fii ahonhonsɛmdi ho. Adanse a ɛkyerɛ sɛ nkɔso betumi aba wɔ Haiti ne nokwasɛm a ɛne sɛ wɔ April 19, 2000 no, nnipa dodow a wɔbaa Kristo wu Nkaedi ase wɔ saa asase no so no yɛɛ Ahenni adawurubɔfo dodow a wɔwɔ hɔ no mmɔho anan.

Nsi a Wɔde Yɛ Korea Asasesin Kɛse no Mu Adwuma

Wɔ Korea no, Yehowa Adanse a wɔwɔ hɔ no ɔha biara mu 40 yɛ bere nyinaa som adwuma. Baa Boayikuw no guamtrani Milton Hamilton kae sɛ: “Esiane sɛ yɛwɔ adawurubɔfo pii yi nti, yɛyɛ yɛn asasesin a nnipa bɛboro ɔpepem 47 na wɔwom no mu adwuma nyinaa bɛyɛ pɛnkoro ɔsram biara.” Nea ɛyɛ nwonwa koraa ne nkɔso a aba wɔ Mum Kasa asafo ahorow mu no. Wɔreyɛ ofie Bible adesua ahorow 800 wɔ mum kasa mansin biako mu. Sɛ wɔkyekyem pɛpɛɛpɛ a, ɔdawurubɔfo biara yɛ adesua biako. Awerɛhosɛm ne sɛ, wɔda so de anuanom mmerante gu afiase esiane afã biara a wonni nti. Nanso,  wɔne Kristofo anokwafo yi di no yiye, wɔtaa ma wɔyɛ nnwuma a ɛhwehwɛ nokwaredifo.

Nkɔso a Aba Wɔ Mexico Ho Dwuma a Wodi

Ahenni adawurubɔfo 533,665 na wobuu asɛnka adwuma no ho akontaa wɔ Mexico wɔ August 2000 mu. Nnipa dodow a wɔbaa Nkaedi no ase no yɛɛ bɛboro dodow a ɛte saa no mmɔho abiɛsa. Baa Boayikuw no guamtrani Robert Tracy kae sɛ: “Yɛn botae ne sɛ yebesisi Ahenni Asa foforo 240 afe yi.” Ɔde kaa ho sɛ: “Nanso, yehia pii aka ho.”

Yehowa Adansefo mmerante ne mmabaa a wɔwɔ Mexico no yɛ nhwɛso pa. Katolek sɔfo bi ka faa aberante bi ho sɛ: “M’ani begye sɛ menya ne sɛso biako pɛ wɔ m’akyidifo mu. M’ani gye saa nkurɔfo yi ho esiane ɔpɛ ne nyansa mu a wofi de Bible no di dwuma nti. Wɔagyina Onyankopɔn akyi, na wɔde wɔn nkwa mpo to asiane mu.”

Mũdi Mu Kura Wɔ Basabasayɛ Mu Wɔ Sierra Leone

Efi April 1991 a ɔmanko fii ase wɔ Sierra Leone no, wɔakunkum nnipa pii apirapira bi, na wɔadi ebinom dɛm. Baa Boayikuw no guamtrani Bill Cowan bɔɔ amanneɛ sɛ: “Ɔko ne ahokyere aka nkurɔfo kɛse. Nnipa pii a na wɔmfa yɛn asɛm no nyɛ hwee no de anigye retie nnɛ. Nkurɔfo taa bɔ wura yɛn Ahenni Asa so prɛko pɛ de fi ase ba asafo nhyiam. Nkurɔfo taa gyina yɛn nuanom wɔ abɔnten so srɛ sɛ wɔne wɔn mmɛyɛ Bible adesua.” Ɛmfa ho asomdwoe a enni ɔman no mu no, Ahenni asɛnka adwuma no resow aba wɔ Sierra Leone.

Adansi Adwuma Kɛse a Ɛrekɔ so Wɔ South Africa

Mprempren, ehia sɛ wosisi Ahenni Asa pii wɔ nsase a South Africa baa dwumadibea no hwɛ so no so. Wɔasisi asa horow ɔhaha pii dedaw. Baa Boayikuw no muni, John Kikot, kae sɛ: “Sɛ́ anka yɛn nuanom behyiam wɔ ɔdangow anaa dua bi ase sɛnea na wɔyɛ bere bi no, afei de wotumi hyiam wɔ beae a ɛfata nya nkongua pa tra so. Ɛwom sɛ saa Ahenni Asa horow yi mu dodow no ara yɛ nea ɛnkyere so de, nanso adan no taa da nsow wɔ mmeae a esisi no sɛ nea edi mũ sen biara. Wɔ mmeae bi no, wɔahu sɛ sɛ wosi Ahenni Asa a, asafo no mufo dodow bu bɔ ho bɛboro abien afe a edi hɔ no.”

Wɔn a Wɔabɛyɛ Adansefo Foforo Wɔ Ukraine

Wɔ 2000 ɔsom afe no mu no, saa man yi nyaa adawurubɔfo dodow 112,720. Eyinom mu bɛboro 50,000 na wosuaa nokware no mfirihyia anum a etwaam no mu. Baa Boayikuw no guamtrani John Didur kae sɛ: “Nokwarem no, Yehowa ama Adansefo mmabun awo ntoatoaso foforo asɔre a wɔrebɔ ne din dawuru!” Ɔde kaa ho sɛ: “Bɛboro mfirihyia abien a atwam no, yɛama nsɛmma nhoma bɛboro ɔpepem 50, a ɛne nnipa dodow a wɔwɔ ɔman no mu dodow yɛ pɛ. Ɔsram biara no, sɛ yɛkyekyem pɛpɛɛpɛ a, yɛn nsa ka nkrataa apem fi anigyefo a wɔrepɛ nsɛm pii hɔ.”

Dwumadi no Mu Nneɛma Foforo a Ɛka Koma

Daniel Sydlik, a ɔyɛ Sodikuw no muni no maa ɔkasa bi a egye adwene yiye. Asɛm a ɛne “Nsonsonoe a Ɛda Sodikuw no ne Mmara Kwan so Ahyehyɛde Ntam” a ɛwɔ nsɛmma nhoma yi mu no, gyina saa asɛm a ɔde too gua no so.

Theodore Jaracz a ɔyɛ Sodikuw no muni no maa ɔkasa bi a ɛkanyan adwene a na n’asɛmti ne “Ahwɛfo ne Asafo mu Asomfo a Wɔpaw Wɔn Teokrase Kwan So.” Nsɛm a ɛwɔ nsɛmma nhoma yi mu biako gyina saa asɛm no so.

Sodikuw no muni David Splane maa kasa bi a ɛka koma a ɛfa 2001 afe asɛm no ho nso wɔ afe afe nhyiam no ase. Ná egyina ɔsomafo Paulo nsɛm yi so: “Mumfi ahotoso a emu yɛ den mu nnyina hɔ pɛ wɔ Onyankopɔn apɛde nyinaa mu.” (Kolosefo 4:12, NW) Yehowa Adansefo a wɔwɔ wiase nyinaa asi wɔn bo sɛ wɔbɛyɛ saa bere a wɔde nokwaredi ka Onyankopɔn Ahenni ho asɛmpa wɔ asase so nyinaa no.—Mateo 24:14.

[Ase hɔ asɛm]