‘Ɛbɛyɛ Ahoɔden Ama Wo Funuma’

WOGYE di sɛ ɔhaw bi te sɛ ehu, awerɛhow, ahoɔyaw, menasepɔw, nitan, ne afodi na ɛde adesamma nyarewa pii ba. Esiane eyi nti, hwɛ sɛnea Bible mu asɛm a ɛka sɛ ‘Yehowa suro’ yɛ ‘ahoɔden ma wo funuma, ne akwahosan ma wo nnompe’ no yɛ awerɛkyekye!—Mmebusɛm 3:7, 8.

Nipadua no yɛbea nyinaa gyina nnompe no so. Enti, Bible de asɛmfua “nnompe” di dwuma sɛnkyerɛnne kwan so de gyina hɔ ma obi nipasu—titiriw nea ɛfa ne nsusuwii ne nkate ahorow ho no kɛse. Nanso ɔkwan bɛn so na Yehowa suro yɛ ‘akwahosan ma wo funuma’?

Ɛsono sɛnea Bible ho abenfo pii susuw ‘funuma’ a wɔbɔ din wɔ asɛm yi mu no ho. Sɛnkyerɛwfo bi ka sɛ esiane sɛ ‘funuma’ no wɔ “nipadua no mfinimfini” nti, ebetumi agyina hɔ ama nipadua nkwaa no nyinaa. Nhomanimfo foforo nso kyerɛ sɛ asɛmfua ‘funuma’ no betumi agyina hɔ ama funuma hama, sɛnea wɔde di dwuma wɔ Hesekiel 16:4 no. Sɛ eyi te saa a, ɛnde na Mmebusɛm 3:8 resi hia a ehia sɛ yɛde yɛn ho nyinaa to Onyankopɔn so—sɛnea yafunum ba a ontumi nyɛ biribiara no dan ne maame koraa na ama wanya aduan ara pɛ no. Adwene foforo nso ne sɛ ‘funuma’ yi betumi agyina hɔ ama nipadua no mpɔw ne ntini ahorow no. Wɔ nsɛm a ɛwɔ nkyekyem yi mu mu no, ebetumi aba sɛ wɔde nkwaa yi totoo “nnompe”—nipadua akwaa a ɛyɛ den no ho.

Nea ɛkyerɛ biara no, ade biako da adi pefee: Osuro pa a yebenya ama Yehowa no yɛ ade a nyansa wom. Onyankopɔn gyinapɛn ahorow a yebedi so no betumi aboa ma yɛanya akwahosan pa mprempren. Nea ɛsen saa no, ebetumi ama yɛanya Yehowa anim dom na ama yɛanya nkwa a enni awiei wɔ akwahosan a ɛyɛ pɛ mu—nipadua ne nkate fam—wɔ ne wiase foforo a ɛreba no mu.—Yesaia 33:24; Adiyisɛm 21:4; 22:2.

[Mfonini Fibea wɔ kratafa 32]

Dr. G. Moscoso/SPL/Photo Researchers