Asiane Ahorow Mu Asetra

“Biribiara nni hɔ a wubetumi ayɛ da biara da—a da a wobɛda ka ho—a entumi ntwa wo nkwa so.”—Discover nsɛmma nhoma.

WƆDE asetra atoto asase a atopae hyehyɛ fam a ɛso nantew yɛ hu a obi nam so ho, efisɛ ebetumi apira no anaa akum no bere biara, a n’ani nna ne ho so. Nneɛma a ɛde asiane ba gu ahorow wɔ ɔman biara mu. Ebi ne kar akwanhyia, amanko, aduankɔm, AIDS, kokoram, komayare, ne nneɛma afoforo pii. Sɛ nhwɛso no, U.S.News & World Report ka fa Afrika Sahara anafo fam ho sɛ AIDS abɛyɛ ade a ekunkum nnipa sen biara, na nnansa yi afe bi mu no “ekunkum nnipa ɔpepem 2.2, a ɛyɛ nnipa dodow a amanko akunkum wɔn wɔ Afrika nyinaa no mmɔho 10.”

Saa bere yi nyinaa no, wiase no sɛe sika ɔpepepem pii wɔ nkwa tenten a wobenya ne nyarewa ne dɛmdi ano a wobesiw ho. Mfaso horow betumi afi nsusuwii ahorow a wɔhyɛ ho nkuran, te sɛ adidi ne ɔnom a ɛsɛ ne apɔwmu teɛteɛ no mu aba. Nanso, ade foforo wɔ hɔ a ebetumi ama woanya nsɛm a wubetumi de wo ho ato so wɔ asetram afã titiriw nyinaa mu, na ebetumi aboa wo ma woanya asetra a ɛyɛ dwoodwoo, na ahobammɔ wom kɛse. Saa ade no ne Bible. Akwankyerɛ a wɔde di nsɛm ahorow a ɛfa yɛn akwahosan ne yɛn yiyedi ho dwuma wom. Ɛwom, ɛnyɛ ɔhaw biara na Bible ka ho nsɛm nyinaa. Nanso, ɛma yenya nnyinasosɛm ahorow a ɛkyɛn so a ɛbɛboa yɛn wɔ nneɛma te sɛ adidi, nipaduam ahoɔden, adwenem tebea, ɔbea ne ɔbarima nna, mmosanom, tawanom, ne nnuru a wɔkyerɛ sɛ wɔnom de gyigye ani, ne nneɛma ahorow pii mu.

Nnipa pii fam no, sika ho dadwen nso ayɛ asetra mu ma. Ɛha nso, Bible no boa yɛn. Ɛnyɛ sɛ ɛhyɛ sika ho adwene a ɛteɛ a yebenya ne hwɛ a yɛbɛhwɛ so yiye ho nkuran nko, na mmom ɛsan kyerɛ sɛnea obi betumi ayɛ adwumawura anaa odwumayɛfo pa nso. Sɛ yebetwa no tiawa a, ɛnyɛ sikasɛm ne nipaduam yiyedi ho akwankyerɛ a nyansa wom nko na Bible no de ma, na mmom asetra ankasa nso. Wobɛpɛ sɛ wubehu sɛnea wotumi de Bible no di dwuma ma mfaso ba so nnɛ no? Ɛnde yɛsrɛ sɛ kenkan nea edi so no.