Asetram Nsɛm

Mesomee Wɔ Baabiara A Na Wohia Me

SƐNEA JAMES B. BERRY KA KYERƐE

Ná ɛyɛ 1939 mu. Ná Sikasɛm Mu Ahokyere Kɛse no ama asetram reyɛ den wɔ United States, na na ɔko repempɛn so wɔ Europa. Ná me ne me nuabarima kumaa Bennett atu kwan afi yɛn fie wɔ Mississippi aba Houston, Texas rebɛpɛ adwuma.

DA KORO bi a na ahohuru bere rekɔ n’awiei no, yɛtee amanneɛbɔ nwonwaso bi wɔ radio so: Hitler asraafo adu Poland. Me nuabarima no teɛɛm sɛ: “Harmagedon afi ase!” Yegyaee yɛn nnwuma ntɛm ara. Yɛkɔɔ Ahenni Asa a ɛbɛn yɛn paa so kɔɔ yɛn nhyiam a edi kan. Dɛn nti na yɛkɔɔ Ahenni Asa so? Momma menhyɛ ase mfi mfiase.

Wɔwoo me wɔ Hebron, Mississippi, wɔ 1915 mu. Yɛtraa akuraase. Ná Bible Asuafo, sɛnea na wɔfrɛ Yehowa Adansefo saa bere no ba mpɔtam hɔ pɛnkoro afe biara bɛyɛ ɔkasa ho nhyehyɛe wɔ obi fie. Eyi nti na m’awofo wɔ Bible ho nhoma pii. Me ne Bennett gyee nea na nhoma yi kyerɛkyerɛ no dii: Hell nyɛ hyew, ɔkra wu, atreneefo bɛtra asase so daa. Ne nyinaa akyi no, na yɛwɔ nneɛma pii sua. Miwiee sukuu bere bi akyi no, me ne me nuabarima no de yɛn ani kyerɛɛ Texas kɔhwehwɛɛ adwuma.

Bere a awiei koraa no yehuu Adansefo wɔ Ahenni Asa so hɔ no, wobisaa yɛn sɛ yɛyɛ akwampaefo anaa. Ná yennim koraa sɛ ɔkwampaefo yɛ Yehowa Adansefo bere nyinaa somfo. Afei wobisaa yɛn sɛ yɛbɛpɛ sɛ yɛkɔ asɛnka anaa. Yebuae sɛ: “Yiw!” Yesusuwii sɛ wɔbɛma obi aka yɛn ho ma wakyerɛ yɛn sɛnea yɛbɛyɛ no. Mmom no, wɔde asase ho mfonini maa yɛn kɛkɛ ka kyerɛɛ yɛn sɛ, “Monkɔyɛ adwuma  wɔ hɔ!” Wiɛ, na me ne Bennett nnim asɛnka ho hwee, na na yɛmpɛ sɛ yɛbɛkɔ ama wɔadwoodwoo yɛn. Awiei koraa no, yɛde asasesin ho kratasin no kɔhyɛɛ amenade adaka mu, na yɛsan kɔɔ Mississippi!

Bible mu Nokware a Yegye Toom

Bere a yɛsan kɔɔ fie no, yɛde bɛyɛ afe kenkanee Adansefo no nhoma ahorow da biara. Ná anyinam nkanea nni yɛn fie, enti sɛ edu anadwo a, yɛde ogya a yɛasɔ hann na ɛkenkan. Saa mmere no mu no, na dantaban asomfo, anaa ahwɛfo akwantufo srasra Yehowa Adansefo asafo ahorow ne Adansefo a wɔwɔ mmeae a atew ne ho hyɛ wɔn den honhom fam. Asomfo yi mu biako, Ted Klein, bɛsraa yɛn asafo no na ɔne me ne Bennett kɔyɛɛ afie afie asɛnka adwuma, a na mpɛn pii no ɔfa yɛn baanu nyinaa bom kɔ prɛko. Ɔkyerɛkyerɛɛ nea akwampae adwuma no kyerɛ nyinaa ase.

Ɔno a yɛne no bɔe no ankasa na ɛma yenyaa adwene sɛ yɛbɛyɛ pii de asom Onyankopɔn. Enti nea ɛbae ne sɛ, wɔ April 18, 1940 mu no, Onua Klein bɔɔ me ne Bennett ne yɛn nuabea Velva, asu. Bere a wɔrebɔ yɛn asu no, na yɛn awofo gyina hɔ, na wɔn ani gyee yɛn gyinaesi no ho. Bɛyɛ mfe abien bi akyi no, wɔn nso gyee asubɔ. Wɔn baanu nyinaa dii Onyankopɔn nokware kosii sɛ wowuwui—Paapa wui wɔ 1956 mu na Maame nso wui wɔ 1975 mu.

Bere a Onua Klein bisaa me sɛ ebia metumi ayɛ akwampae adwuma no, meka kyerɛɛ no sɛ m’ani begye ho sɛ mɛyɛ, nanso minni sika, minni ntade, minni hwee. Ɔkae sɛ: “Eye, mɛhwɛ adi ɛno ho dwuma.” Na ɔyɛe. Nea edi kan no, ɔde m’akwampae adwuma ho akwammisa krataa no kɔe. Ɛno akyi no, ɔde me kɔɔ New Orleans, a ɛwɔ bɛyɛ kilomita 300, na ɔkyerɛɛ me ɔdan fɛfɛ bi a ɛwɔ Ahenni Asa bi atifi. Ná ɛyɛ akwampaefo dea. Ankyɛ na mitu kɔɔ hɔ kofii m’adwuma sɛ ɔkwampaefo no ase. Adansefo a wɔwɔ New Orleans no boae denam akwampaefo no a wɔmaa wɔn ntade, sika ne aduan no so. Ɛyɛ a na anuanom de aduan ba besi yɛn pon akyi anaasɛ mpo wɔde hyɛ yɛn frigye mu ma yɛn. Onua bi a na ɔyɛ adidibea bi a ɛbɛn hɔ wura no too nsa frɛɛ yɛn sɛ da biara sɛ ɔpɔn a, yɛmmra mmegye nnuan—te sɛ nam, paanoo, mako, ne paanoo a wɔde nam ahyehyɛ mu atõ—a aka no bi.

Basabasayɛfo Kuw Ntua Ano a Yegyina

Bere bi akyi no, wɔde me kɔɔ Jackson, Mississippi, sɛ menkɔyɛ akwampae adwuma. Me ne me yɔnko kumaa no hyiaa basabasayɛfo ntua wɔ hɔ, na na ɛte sɛ nea atumfo a wɔhyɛ mmara no taa basabasayɛfo kuw no akyi no! Saa ara na na ɛte wɔ yɛn dwumadi a edi hɔ no mu—Columbus, Mississippi. Esiane sɛ yɛkaa asɛm kyerɛɛ nnipa a wofi mmusua ne aman nyinaa mu nti, aborɔfo binom nyaa yɛn ho tan. Ebinom susuwii sɛ yetutu ɔman ase. Ná Amerika Asraafo a Onyin Ama Wɔagyae Adwumayɛ Fekuw so panyin bi kura adwene a ɛte saa. Ɔhyɛɛ basabasayɛfo kuw nkuran mpɛn pii ma wɔtow hyɛɛ yɛn so.

Bere a edi kan a basabasayɛfo bɛtow hyɛɛ yɛn so wɔ Columbus no, wodii yɛn akyi bere a na yɛrekyekyɛ nsɛmma nhoma wɔ abɔnten so no. Wɔkaa yɛn hyɛɛ ahwehwɛ sotɔɔ bi ho. Nnipakuw bi betwaa yɛn ho hyiae bɛhwɛɛ nea na ɛrekɔ so. Ankyɛ na polisifo bae bɛfaa yɛn kɔɔ asɛnnibea. Basabasayɛfo kuw a na wɔadi yɛn akyi akɔ asɛnnibea hɔ no kae wɔ mpanyimfo a wɔwɔ hɔ nyinaa anim sɛ sɛ yefi kurow no mu wɔ bere  pɔtee bi a, yɛbɛfa yɛn ho adi. Nanso sɛ yɛma bere no pa ho a, asɛm bɛto yɛn! Yehuu sɛ ɛbɛyɛ papa sɛ yefi kurom hɔ kakra. Nanso adapɛn kakra bi akyi no, yɛsan bae befii asɛnka ase bio.

Ɛno akyi bere tiaa bi no, kuw bi a wɔyɛ mmarima baawɔtwe bɛtow hyɛɛ yɛn so hyɛɛ yɛn de yɛn wuraa wɔn kar abien bi mu. Wɔde yɛn kɔɔ wuram, bɔɔ yɛn kwaterekwa, na wɔde me bɛlt twaa yɛn mu biara akyi 30! Ná wokurakura atuo ne nhama, na sɛ mɛka a na yesuro. Ná misusuw sɛ wɔrekɔkyekyere yɛn atow yɛn akyene asubɔnten no mu. Wɔtetew yɛn nhoma mu tow petee, na mpo wobubuu yɛn gramafon no pasaa wɔ dunsin bi so.

Bere a wɔhwee yɛn wiei no, wɔka kyerɛɛ yɛn sɛ yɛmfa yɛn ntade nhyɛ na yɛmfa wuram kwan bi so a yɛnhwɛ yɛn akyi. Bere a yɛrekɔ no, na yenim yiye sɛ sɛ yɛdan yɛn ani a, wɔbɛto yɛn tuo akum yɛn—afa wɔn ho adi! Nanso simma kakraa bi akyi no, yɛtee sɛ wɔatu wɔn kar no kɔ.

Bere foforo nso no, basabasayɛfo kuw a wɔn bo afuw yɛn pam yɛn, na na ɛsɛ sɛ yɛworɔw yɛn ntade de kyekyere yɛn kɔn guare asubɔnten bi na yɛatumi aguan. Ɛno akyi bere tiaa bi no, wɔkyeree yɛn, bɔɔ yɛn sobo sɛ yetutu ɔman ase. Yedii adapɛn abiɛsa wɔ afiase ansa na wɔrekodi yɛn asɛm. Wɔbɔɔ asɛm no ho dawuru kɛse wɔ Columbus. Wɔmaa sukuufo bi mpo fii wɔn adesua dan mu ntɛm sɛnea ɛbɛyɛ a wɔbɛba abetie bi. Bere a da no durui no, na asɛnnibea dan no mu ayɛ ma—a na baabiara nni hɔ a ebinom bɛtra gye sɛ wogyinagyina hɔ! Wɔn a na wɔredi adanse ama ɔman no yɛ, asɛnkafo baanu, Kurow sohwɛfo, ne polisifo.

Wɔsomaa Adansefo mmaranimfo G. C. Clarke ne ne yɔnko ma wobegyinaa yɛn ananmu. Wɔkae sɛ wontwa sobo a ɛne sɛ yetutu ɔman ase no mu esiane sɛ wonni adanse biara nti. Mmaranimfo a na ɔne Onua Clarke yɛ adwuma no kaa nsɛm bi a na tumi wom maa yɛn, ɛmfa ho sɛ na ɔnyɛ Yehowa Dansefo. Eduu baabi no, ɔka kyerɛɛ ɔtemmufo no sɛ, “Nkurɔfo ka sɛ Yehowa Adansefo yɛ abɔdamfo. Abɔdamfo? Wɔbɔɔ Thomas Edison sobo sɛ wabɔ dam!” Ɛnna ɔde ne nsa kyerɛɛ kanea bi a ɛbɔ hɔ so kae sɛ, “Nanso hwɛ anyinam kanea a ɛbɔ hɔ no!” Ebia ebinom buu Edison a ɔyɛɛ anyinam kanea no sɛ na wabɔ dam, nanso obiara ntumi nnye nea otumi yɛe no ho kyim.

Bere a asɛnnibea temmufo no tiee adanse no wiei no, ɔde too nea ɔbɔɔ sobo no anim sɛ, “Wunni asɛm biara a wubetumi agyina so abu wɔn sɛ wotutu ɔman ase, na wɔwɔ hokwan sɛ wɔyɛ adwuma yi. Mommfa wɔn mmma asɛnnibea ha bio mmmɛsɛe Ɔman no bere ne sika ne m’adagyew kosi sɛ mubenya adanse!” Yedii nkonim!

Nanso ɛno akyiri no, ɔtemmufo no frɛɛ yɛn kɔɔ ne dan mu. Ná onim sɛ ɔman mũ no nyinaa mpene n’atemmu no so. Enti ɔbɔɔ yɛn kɔkɔ sɛ: “Nea mekae no gyina mmara so, nanso afotu a m’ankasa mede ma mo ne sɛ: Mumfi ha nkɔ, anyɛ saa a, wobekum mo!” Ná yenim sɛ n’asɛm no wom, enti yefii kurow no mu.

Efi hɔ no, mekɔkaa Bennett ne Velva a na wɔresom sɛ akwampaefo atitiriw wɔ Clarksville, Tennessee, no ho. Asram kakraa bi akyi no, wɔmaa yɛn dwumadi wɔ Paris, Kentucky. Afe ne fã  akyi no, na anka yɛrebɛhyehyɛ asafo wɔ hɔ na me ne Bennett nyaa nsato bi a na ɛyɛ soronko.

Asɛmpatrɛw Adwuma a Yɛkɔyɛ

Bere a yehuu sɛ wɔato nsa afrɛ yɛn sɛ yɛmmra Ɔwɛn Aban Gilead Bible Sukuu adesuakuw a ɛto so abien no, na yesusuw sɛ, ‘Wɔadi mfomso! Dɛn nti na wɔto nsa frɛ Mississippi mmerante baanu a yennim hwee yi sɛ yɛnkɔ saa sukuu no?’ Yesusuwii sɛ na wɔpɛ nhomanimfo, nanso ne nyinaa akyi no, yɛkɔe. Adesuafo 100 na na wɔwɔ adesuakuw no mu, na adesua no dii asram anum. Yewiee adesua no wɔ January 31, 1944, na na yɛn ho pere yɛn sɛ yɛbɛsom wɔ amannɔne. Nanso saa mmere no, na akwantu ho nkrataa a yɛbɛyɛ no gye bere tenten, enti na wɔtaa ma adesuafo no bere tiaa dwumadi wɔ United States. Bere a me ne Bennett som sɛ akwampaefo wɔ Alabama ne Georgia kakra no, awiei koraa no, yɛn nsa kaa yɛn dwumadi—Barbados, West Indies.

Ná Wiase Ko II rekɔ so, na na wɔabara Yehowa Adansefo nhoma ne adwuma wɔ mmeae pii, a na Barbados ka ho. Adwumayɛfo a wɔhwehwɛ akwantufo nneɛma mu wɔ hɔ no buee yɛn bag mu hwehwɛɛ mu na wohuu nhoma a yɛde asie mu no. Na yenim sɛ, ‘Yɛawu awie.’ Nanso ɔpanyin biako ka kyerɛɛ yɛn kɛkɛ sɛ, “Ɛyɛ yɛn yaw sɛ yɛatu mo nneɛma; wɔabra saa nhoma yi wɔ Barbados.” Ne nyinaa akyi no, ɔmaa yɛde yɛn nhoma a yɛahyehyɛ no nyinaa kɔe! Akyiri yi, bere a yedii aban mpanyimfo no adanse no, wɔkae sɛ wonnim nea enti a wɔabara yɛn nhoma ahorow no. Asram bi akyi no, wotwaa bara a wɔabara yɛn no mu.

Yenyaa nkɔso pii wɔ ɔsom adwuma no mu wɔ Barbados. Anyɛ yiye koraa no, yɛn mu biara yɛɛ Bible adesua 15, na asuafo no mu dodow no ara nyaa honhom fam nkɔso. Yɛn ani gyei sɛ yehui sɛ ebinom baa asafo nhyiam ahorow ase. Nanso, esiane sɛ na wɔbaraa nhoma horow no akyɛ kakra nti, na anuanom a wɔwɔ hɔ no nnim sɛnea ɛsɛ sɛ wɔhwɛ nhyiam ahorow no so saa bere yi. Nanso ankyɛ biara na yetumi tetee anuanom mmarima a na wɔbɔ wɔn ho mmɔden no bi. Yɛn ani gyei sɛ yetumi boaa yɛn asuafo no mu pii ma wofii Kristofo som adwuma no ase, na asafo no dɔe no.

Mma a Metetee Wɔn

Asram 18 akyi wɔ Barbados no, na ehia sɛ wɔyɛ me oprehyɛn, enti mesan kɔɔ United States. Bere a mewɔ hɔ no, mewaree Ɔdansefo bi a wɔfrɛ no Dorothy a na me ne no di nkrataakyerɛw. Saa bere no me ne me yere yɛɛ akwampae adwuma wɔ Tallahassee, Florida, nanso asram asia akyi no, yetu kɔɔ Louisville, Kentucky, baabi a na Ɔdansefo bi ama me adwuma no. Me nuabarima Bennett toaa ne som adwuma so wɔ Barbados mfe pii. Akyiri yi ɔwaree yɔnko ɔsɛmpatrɛwfo bi, na wɔyɛɛ ahwɛfo akwantufo adwuma wɔ supɔw ahorow so. Awiei koraa no, na ɛsɛ sɛ  wɔsan ba United States bɛhwɛ wɔn ho yare. Wɔtoaa so ara somee wɔ asafo ahorow a wɔka Spania kasa mu wɔ akwantu adwuma no mu kosii sɛ Bennett wui wɔ 1990 mu bere a na wadi mfe 73.

Wɔ 1950 mu no, Dorothy woo yɛn abakan, abeawa a yɛtoo no din Daryl. Awiei koraa no, yɛwoo mma baanum. Amemene ne berɛmo mu yare kum nea ɔto so abien no, Derrick, bere a na wadi mfe abien ne fã pɛ. Nanso yɛwoo Leslie wɔ 1956 mu, na Everett nso dii so wɔ 1958 mu. Me ne Dorothy bɔɔ mmɔden sɛ yɛde Bible mu nokware bɛtete yɛn mma no. Yɛbɔɔ mmɔden sɛ yɛbɛyɛ abusua Bible adesua dapɛn biara, na yɛama mmofra no nyinaa ani agye ho. Bere a Daryl, Leslie ne Everett da so ara yɛ mmofra no, na yɛma wɔn nsɛmmisa a ɛsɛ sɛ wɔyɛ ho nhwehwɛmu dapɛn biara, na dapɛn a edi hɔ no wɔde ho mmuae ama. Afei nso na wɔyɛ sɛnea wɔyɛ afie afie asɛnka ho ɔyɛkyerɛ. Ɛyɛ a, wɔn mu biako kɔhyɛ ɔdan a wɔn ntade wom no mu yɛ ne ho sɛ ofiewura. Ɔfoforo gyina akyi bɔ mu. Wodii agoru kaa nsɛm de hunahunaa wɔn ho, nanso eyi boaa wɔn ma wonyaa asɛnka adwuma no ho anigye. Ná yɛne wɔn kɔ asɛnka daa nso.

Bere a yɛwoo yɛn kaakyire, Elton, wɔ 1973 mu no, na Dorothy reyɛ adi mfe 50 na na me nso mabɛn 60. Ná wɔfrɛ yɛn Abraham ne Sara wɔ asafo no mu! (Genesis 17:15-17) Sɛ mmarima mpanyimfo no rekɔ asɛnka a, na wɔde Elton kɔ. Yɛtee nka sɛ na ɛyɛ adanse kɛse sɛ nkurɔfo behu sɛ abusua—anuanom mmarima ne mmea, awofo ne mmofra—bom yɛ adwuma, ka Bible mu nokware ho asɛm kyerɛ afoforo. Ná Elton nuanom mpanyimfo no mu biara de no si akɔnkɔn, na na wɔde Bible ho nkratawa hyɛ ne nsam. Ɛkame ayɛ sɛ baabiara a wɔbɛkɔ no, na obiara tie wɔn bere a sɛ wobue wɔn pon a, wohu abarimaa yi sɛ osi ne nuanom mpanyimfo kɔn ho no. Mmerante yi kyerɛɛ Elton sɛnea ɔde kratawa bɛma na waka nsɛm kakra aka ho bere a wɔne obi abɔ nkɔmmɔ awie no. Saa na ɛyɛe na ofii asɛnka ase.

Yɛde mfe pii a abɛsen kɔ no aboa afoforo ma wɔabehu Yehowa. Wɔ 1970 mfe no awiei mu no, yetu fii Louisville kɔɔ Shelbyville, Kentucky, kɔsom wɔ asafo bi a na mmoa ho hia wɔ hɔ mu. Bere a yɛwɔ hɔ no, ɛnyɛ dɔ nko na asafo no dɔe, na mmom yetumi boae ma wonyaa asase sii Ahenni Asa nso. Akyiri yi wɔma yɛkɔsomee wɔ asafo foforo a ɛbɛn hɔ mu.

Abusua Asetra a Yennim Sɛnea Ebewie

Anka m’ani begye ho sɛ mɛka sɛ yɛn mma no nyinaa traa Yehowa fie, nanso amma saa. Bere a wonyinyinii na wofii fie no, yɛn mma baanan a aka no mu baasa fii nokware no mu. Nanso yɛn babarima Everett dii me nhwɛso akyi de ne ho hyɛɛ bere nyinaa som adwuma no mu. Akyiri yi ɔsomee wɔ Yehowa Adansefo wiase nyinaa adwumayɛbea ti a ɛwɔ New York no, na wɔ 1984 mu no, wɔtoo nsa frɛɛ no ma ɔkɔɔ Gilead adesuakuw a ɛto so 77 no bi. Bere a owiei no, ɔkɔɔ baabi a wɔmaa no dwumadi wɔ Sierra Leone, Afrika Atɔe fam. Ɔwaree Marianne, ɔkwampaefo bi a ofi Belgium, wɔ 1988 mu. Wɔabom asom sɛ asɛmpatrɛwfo fi saa bere no.

Sɛnea ɔwofo biara betumi de n’adwene abu no, na ɛyɛ yaw paa sɛ yehu sɛ yɛn mma no mu baasa gyaw asetra kwan a ɛma abotɔyam nnɛ, na ɛwɔ daa nkwa wɔ asase so paradise a ɛbɛba daakye ho anidaso a ɛyɛ anigye no. Ɛtɔ mmere bi a, mibu me ho fɔ. Nanso minya awerɛkyekye fi nim a minim sɛ Yehowa ankasa honhom mu mma, anaa abɔfo, no mu bi mpo gyaee ne som—ɛmfa ho sɛ Yehowa fi ɔdɔ ne ayamye mu de nteɛso ma na onni mfomso da no. (Deuteronomium 32:4; Yohane 8:44; Adiyisɛm 12:4, 9) Eyi ama mahu sɛ ɛmfa ho mmɔden biara a awofo bɛbɔ sɛ wɔbɛtete wɔn mma ma wɔafa Yehowa akwan so no, ebetumi aba sɛ wɔn mu binom rennye nokware no.

Te sɛ dua a mframa a ano yɛ den bɔ no no, ɛsɛ sɛ yɛyɛ fakaa wɔ ahokyere ne ɔhaw ahorow a ɛba yɛn akwan mu no ho. Mede mfe pii ahu sɛ Bible adesua a meyɛ no daa ne nhyiam a mekɔ no daa no ama me ahoɔden a mede bɛyɛ fakaa, na matumi agyina me nan so wɔ honhom fam. Bere a me mfe kɔ anim na mihu mfomso  a midii bere bi a atwam no, mebɔ mmɔden sɛ mede m’adwene besi nneɛma pa a meyɛe no so. Anyɛ yiye koraa no, sɛ yɛkɔ so di nokware a, osuahu ahorow a ɛtete saa no boa yɛn ma yenyin wɔ honhom fam. Sɛ yesua biribi fi mu a, asetra mu fã a enye no betumi anya yɛn so nkɛntɛnso pa bi.—Yakobo 1:2, 3.

Ɛnnɛ, me ne Dorothy nni ahoɔden anaa akwahosan a yɛde bɛyɛ nea yɛpɛ sɛ yɛyɛ wɔ Yehowa som mu. Nanso yɛn ani sɔ mmoa a yɛn nuanom adɔfo Kristofo mmarima ne mmea de ma yɛn no. Ɛkame ayɛ sɛ wɔ nhyiam biara ase no, anuanom no kyerɛ yɛne wɔn asetra no ho anisɔ. Na wɔbɔ wɔn ho mmɔden sɛ wɔde mmoa biara a wobetumi bɛma yɛn—yɛn fie ne yɛn kar siesie mpo.

Yetumi de yɛn ho hyɛ akwampaefo aboafo adwuma no mu bere ne bere mu, na yɛne anigyefo yɛ Bible adesua. Ade a ɛma yɛn ani gye bere nyinaa ne sɛ yebenya nkra afi yɛn babarima a ɔresom wɔ Afrika no hɔ. Yɛda so ara yɛ yɛn abusua Bible adesua no, ɛmfa ho sɛ yɛn baanu pɛ na mprempren yɛyɛ no. Ɛyɛ yɛn anigye sɛ yɛde mfe pii ayɛ Yehowa som adwuma. Ɔma yɛn awerɛhyem sɛ ne ‘werɛ remfi yɛn dɔ ne adwuma a yɛayɛ wɔ ne din ho no.’—Hebrifo 6:10.

[Mfonini wɔ kratafa 25]

Me ne Velva, ne Bennett, a Ted Klein rebɔ yɛn asu wɔ April 18, 1940

[Mfonini ahorow wɔ kratafa 26]

Me ne me yere Dorothy, wɔ 1940 mfiase ne 1997 mu

[Mfonini wɔ kratafa 27]

Baguam ɔkasa, “Ahene mu Hene” a yɛbɔ ho dawuru wɔ bɔs bi ho wɔ Barbados

[Mfonini wɔ kratafa 27]

Me nuabarima Bennett a ogyina asɛmpatrɛwfo fie anim