Obi A Ɔyɛ Ahwehwɛniwa Gu Aba

Abusuabɔ bɛn na mmɔden a obi a ɔyɛ ahwehwɛniwa wɔ Lviv, Ukraine, ne Yehowa Adansefo asafo a wɔka Russia kasa a ɛwɔ Haifa, Israel, a ɛwɔ akyirikyiri bɛyɛ kilomita 2,000, no wɔ? Eyi yɛ asɛm bi a ɛma yehu nokware a Bible mu asɛm a ɛwɔ Ɔsɛnkafo 11:6 no yɛ: “Gu w’aba anɔpa, na anwummere nso nyi wo nsa mfi ho, na wunnim nea ɛbɛyɛ yiye.”

YEFI yɛn asɛm no ase fi 1990 mu bere a na Ella, Yudani bea bi te Lviv no. Ná Ella ne n’abusua reboaboa wɔn ho atu akɔtra Israel. Bere tiaa bi ansa na wɔrekɔ no, Ella kɔɔ obi a ɔyɛ ahwehwɛniwa a na ɔyɛ Yehowa Dansefo nkyɛn. Saa bere no, na wɔabara Yehowa Adansefo adwuma no wɔ Ukraine. Nanso nea ɔyɛ ahwehwɛniwa no fii ase kaa ne gyidi horow a egyina Bible so no ho asɛm kyerɛɛ Ella. Ɔmaa ɔbea no ho dwiriw no denam ka a ɔkae  sɛ Onyankopɔn wɔ din ankasa no so. Ɛno maa Ella ho peree no sɛ obehu, na ɛma wɔbɔɔ Bible mu nkɔmmɔ a ɛyɛ anigye.

Ella ani gyee nkɔmmɔbɔ no ho araa ma ɔsrɛe sɛ wɔmmɔ bio dapɛn a edi hɔ no na ɛno akyi no, ɔsan srɛe bio. Ná n’anigye no reyɛ kɛse, nanso na ɔwɔ asɛnnennen bi. Ná bere a abusua no betu akɔ Israel no rebɛn ntɛmntɛm. Ná Ella da so ara wɔ nneɛma pii sua! Nea ɛbɛyɛ na ɔde bere a aka no adi dwuma yiye no, ɔsrɛe sɛ wɔne no nyɛ Bible adesua da biara kosi sɛ ɔbɛkɔ. Ɛwom sɛ bere a Ella duu Israel bere a edi kan no wansan antoa adesua no so de, nanso na aba no agye ntini wɔ ne komam. Ebeduu afe no awiei no, na wasan resua Bible no denneennen.

Wofii ɔko ase wɔ Persia Po Basa no so, na Iraqfo tow aprɛm guu Israelfo so. Eyi yɛ asɛm a na wɔtaa bɔ ho nkɔmmɔ. Da koro bi wɔ aguadidan bi mu no, Ella tee sɛ abusua bi a wɔka Russia kasa a wɔatu aba ɔman no mu no rebɔ nkɔmmɔ. Ɛwom sɛ na Ella da so ara resua Bible no de, nanso ɔkɔɔ abusua no nkyɛn ne wɔn kɔkaa Bible bɔhyɛ a ɛfa wiase a asomdwoe wom ho no ho asɛm. Nea efii mu bae ne sɛ nanabea a ɔwɔ abusua no mu Gelina; maame Natasha; ɔbabarima, Sasha (Ariel); ne ɔbabea Ilana nyinaa de wɔn ho hyɛɛ Ella Bible adesua no mu.

Sasha ne abusua no muni a odii kan bɔɔ asu—ɛmfa ho ɔtaa pii a ohyiae no. Ɛwom sɛ na onim ade yiye wɔ sukuu mu de, nanso woyii no adi fii sukuu mu esiane sɛ na ne Kristofo ahonim remma no kwan mma ɔmfa ne ho nhyɛ asraadi ho ntetee, ahwehwɛde a na ɛka nneɛma a wosua wɔ sukuu no mu ho no mu nti. (Yesaia 2:2-4) Sasha asɛm no koduu Israel Asɛnnibea Kunini a ɛwɔ Yerusalem, a sɛnea ɛfata nkamfo no, wɔhyɛe sɛ wɔnsan nnye Sasha sɛnea ɛbɛyɛ a obewie sukuu no. Wɔbɔɔ asɛm no ho dawuru wɔ ɔman no mu nyinaa. Ɛnam so ma Israelfo pii behuu nea Yehowa Adansefo gye di. *

Bere a Sasha wiee ntoaso sukuu no, ɔde ne ho hyɛɛ Yehowa Adansefo bere nyinaa som adwuma mu. Ɛnnɛ, ɔsom sɛ ɔkwampaefo titiriw ne asafo mu panyin. Ne nuabea, Ilana akɔka ne ho wɔ bere nyinaa som adwuma no mu. Wɔn maame ne wɔn nanabea nyinaa yɛ Adansefo a wɔagye asubɔ. Aba a nea ɔyɛ ahwehwɛniwa gui no da so ara resow aba!

Ne nyinaa mu no, Ella kɔɔ so ara nyaa honhom fam nkɔso, na ankyɛ na ɔkaa asɛm wɔ afie afie. Wɔ ofie a edi kan pɛɛ mu no, Ella hyiaa Faina, a otu fii Ukraine bae nkyɛe no. Ná Faina anya adwenemhaw. Akyiri yi Ella behui sɛ bere tiaa bi ansa na ɔrekɔbɔ Faina pon no, na ɔbea a wanya adwenemhaw yi abɔ Onyankopɔn mpae sɛ: “Minnim onii ko a woyɛ, nanso sɛ wote nea mereka yi a, boa me.” Ɔne Ella bɔɔ nkɔmmɔ a na ɛhyɛ nkuran yiye. Faina bisaa nsɛm pii, na ɔtoo ne bo ase susuw mmuae a wɔde maa no no ho. Bere bi akyi no, obegye dii sɛ Yehowa Adansefo na wɔkyerɛkyerɛ Bible mu nokware. Ɔyɛɛ nhyehyɛe wɔ ade a na ɔresua wɔ sukuupɔn mu no mu sɛnea ɛbɛyɛ a obenya bere pii ama asafo no ne asɛnka adwuma no. Wɔ May 1994 mu no, wɔbɔɔ Faina asu.  Ɔde ne ho hyɛɛ akwampae adwuma no mu, yɛɛ adwuma a wɔde bere fã yɛ de hwɛɛ ne ho.

Wɔ November 1994 mu bere a na ɔreyɛ asɛnka adwuma no, Ella tee nka sɛ wayɛ mmerɛw paa. Ɔkɔɔ ayaresabea ma wɔyɛɛ nhwehwɛmu kohui sɛ ekuru bi aba ne nsono ho a ɛretu mogya. Eduu anwummere no, na Ella mogya so atew abedu 7.2. Ɔpanyin bi a na ɔwɔ Ella asafo mu, nea ɔyɛ ɛhɔnom Ayaresabea Ntam Nkitahodi Boayikuw (HLC) no guamtrani no maa nnuruyɛfo no nsɛm a ɛfa nnuruyɛ a enhia sɛ wɔde mogya di dwuma wom ho. * Wɔyɛɛ Ella oprehyɛn a wɔamma no mogya, na ne ho tɔɔ no koraa.—Asomafo no Nnwuma 15:28, 29.

Ella duruyɛfo, Karl, Yudani a wɔwoo no wɔ Germany no ani gyei yiye. Afei ɔkaee sɛ na n’awofo, a wonyaa wɔn ti didii mu wɔ Okunkɛse no mu no nim Yehowa Adansefo wɔ nneduaban mu. Karl bisaa nsɛm pii. Ɛwom sɛ na adwuma a Karl yɛ sɛ oduruyɛfo no ama onni adagyew koraa de, nanso onyaa bere de yɛɛ Bible adesua daa. Eduu afe a edi hɔ mu no, na ɔkɔ Kristofo nhyiam ahorow a wɔyɛ no dapɛn biara no.

Dɛn na afi aba a nea ɔyɛ ahwehwɛniwa no gui no mu aba? Yɛadi kan ahu nea esii wɔ Sasha ne n’abusua no ho. Ella de, ɔyɛ ɔkwampaefo titiriw. Ne babea, Eina, a owiee ntoaso sukuu nkyɛe koraa no afi n’ankasa adwuma ase sɛ ɔkwampaefo. Faina nso som sɛ ɔkwampaefo titiriw. Karl, Ella oduruyɛfo no de, mprempren ɔyɛ Ɔdansefo a wagye asubɔ ne asafo mu somfo, a ɔka Bible mu nokware a ɛsa yare no ho asɛm kyerɛ wɔn a ɔhwɛ wɔn yare no ne afoforo.

Kuw ketewa a na wɔka Russia kasa a wɔyɛ ahɔho a wɔatu aba hɔ a mfitiase no na wɔka Haifa Hebri Asafo no ho no abɛyɛ Russiafo asafo a wɔyɛ nsi a wɔwɔ Ahenni adawurubɔfo bɛboro 120. Saa nkɔanim yi fã gyina nokwasɛm a ɛyɛ sɛ obi a ɔyɛ ahwehwɛniwa wɔ Lviv de hokwan a onyae guu aba no so!

[Ase hɔ nsɛm]

[Asase mfonini wɔ kratafa 29]

(Wopɛ nsɛm a wɔahyehyɛ awie no a, hwɛ nhoma no mu)

UKRAINE

ISRAEL

[Asɛm Fibea]

Mountain High Maps® Copyright © 1997 Digital Wisdom, Inc.

[Mfonini ahorow wɔ kratafa 30]

Ella ne ne babea, Eina

[Mfonini wɔ kratafa 31]

Adansefo a wɔka Russia kasa a wɔwɔ Haifa. Efi benkum kɔ nifa so: Sasha, Ilana, Natasha, Galina, Faina, Ella, Eina, ne Karl