So Woagye Nokware No Atom?

“Momfa adwenem foforoyɛ nsakra mo ho, na moasɔ nea Onyankopɔn pɛ a eye, na ɛsɔ ani, na ɛyɛ pɛ no ahwɛ.”—ROMAFO 12:2.

1, 2. Dɛn nti na ɛnyɛ mmerɛw sɛ obi bɛyɛ nokware Kristoni nnɛ?

ƐNYƐ mmerɛw sɛ wobɛyɛ nokware Kristoni wɔ nna a edi akyiri—saa “mmere a emu yɛ den”—yi mu. (2 Timoteo 3:1) Nokwasɛm ne sɛ, sɛ obi betumi adi Kristo nhwɛso no akyi a, ɛsɛ sɛ odi wiase no so nkonim. (1 Yohane 5:4) Kae nea Yesu ka faa Kristofo asetra kwan ho no: “Monhyɛn ɔpon teateaa no mu; na ɔpon a ɛso ne ɔkwan a ɛtrɛw no ne nea ɛkɔ ɔsɛe mu no, na wɔn a wɔhyɛn mu no yɛ pii. Na ɔpon teateaa ne ɔkwan hihiaa no ne nea ɛkɔ nkwa mu, na wɔn a wohu no sua.” Ɔkae nso sɛ: “Ɔka kyerɛɛ wɔn nyinaa sɛ: Sɛ obi pɛ sɛ odi m’akyi a, ɔmpa ne ho akyi, na ɔmfa n’asɛndua daa, na onni m’akyi.”—Mateo 7:13, 14; Luka 9:23.

² Sɛ Kristoni hu ɔkwan hihiaa no wie a, nea edi hɔ a ɛyɛ den a ɛsɛ sɛ ɔyɛ ne sɛ ɔbɛkɔ so anantew so. Dɛn nti na ɛyɛ den? Ɛte saa efisɛ yɛn ahosohyira ne asubɔ no ma yɛbɛyɛ nkurɔfo a Satan de ne nnaadaa, anaa anifere nnɛɛdɛe no ba yɛn so. (Efesofo 6:11) Ohu yɛn mmerɛwyɛ na ɔhwehwɛ sɛ ɔde bedi dwuma de asɛe yɛn honhom fam yiyedi. Ɔbɔɔ mmɔden sɛ ɔbɛma Yesu mpo ahwe ase, na dɛn nti na ɛsɛ sɛ ɔma yɛfa yɛn ho di?—Mateo 4:1-11.

Satan Nnaadaa Akwan

3. Ɔkwan bɛn so na Satan maa Hawa adwenem yɛɛ no nãã?

³ Satan kwan biako a ɔde di dwuma ne sɛ ɔbɛma yɛn adwenem ayɛ yɛn nãã. Ɔhwehwɛ sɛ obehu yɛn honhom fam akode no afã a ɛyɛ mmerɛw no. Mfiase pɛɛ no, ɔfaa kwan a ɛte saa so bisaa Hawa sɛ: “Ampa na Onyankopɔn aka sɛ: Munnni turom ha nnua nyinaa bi?” (Genesis 3:1) Ɔkwan foforo so no, na Satan reka sɛ, ‘So ɛyɛ ampa ankasa sɛ Onyankopɔn na ɔde anohyeto a ɛte saa maa mo? So ɔde biribi pa a ɛte saa bɛkame mo? Hwɛ, Onyankopɔn nim sɛ ɛda a mubedi dua yi aba no bi no, mo ani bebue na moayɛ sɛ Onyankopɔn ahu papa ne bɔne!’ Satan de adwenem naayɛ bi duaa Hawa mu na ɔhwɛɛ kwan sɛ ɛbɛyɛ adwuma.—Genesis 3:5.

4. Adwenem naayɛ bɛn na ebetumi anya ebinom so nkɛntɛnso nnɛ?

⁴ Ɔkwan bɛn so na Satan de saa kwan yi di dwuma nnɛ? Sɛ yebu yɛn ani gu yɛn Bible akenkan, yɛn kokoam adesua, yɛn mpaebɔ, ne yɛn Kristofo som adwuma ne asafo nhyiam ahorow so a, nsɛm a ɛde adwenem naayɛ ba a afoforo bɛma asɔre no betumi anya yɛn so nkɛntɛnso. Sɛ nhwɛso no: “Yɛyɛ dɛn hu sɛ eyi ne nokware a Yesu kyerɛkyerɛe no?” “So nna a edi akyiri no ankasa ni? Anyɛ yiye koraa no, yɛadu afeha a ɛto so 21 no mu dedaw.” “So yɛabɛn Harmagedon pɛɛ, anaasɛ ɛwɔ akyirikyiri?” Sɛ yɛn adwenem yɛ yɛn nãã saa a, dɛn na yebetumi ayɛ de ayi afi hɔ?

5, 6. Sɛ yɛn adwenem yɛ yɛn nãã a, dɛn na ɛsɛ sɛ yɛyɛ?

⁵ Yakobo de afotu a mfaso wɔ so mae bere a ɔkyerɛwee sɛ: “Sɛ ɛka mo mu bi nyansa a, ommisa Onyankopɔn a ɔma nnipa nyinaa ade kwa na ahohora nnim no, na wɔde bɛma no. Na gyidi mu na ommisa, na onnnye  biribiara ho kyim, efisɛ nea ogye kyim no te sɛ ɛpo asorɔkye a mframa bɔ de no redi akɔneaba. Na mma saa onipa no nnsusuw sɛ obenya [Yehowa, NW] hɔ biribi. Onipa a ne kra yɛ nta hinhim n’akwan nyinaa mu.”—Yakobo 1:5-8.

⁶ Ɛnde, dɛn na ɛsɛ sɛ yɛyɛ? Ɛsɛ sɛ yɛkɔ so bɔ mpae ‘bisa Onyankopɔn’ gyidi ne ntease, na yɛyere yɛn ho wɔ kokoam adesua a yɛyɛ wɔ nsɛmmisa anaa adwenem naayɛ ho no mu. Yebetumi ahwehwɛ mmoa nso afi wɔn a wɔyɛ den wɔ gyidi mu no hɔ, a yɛrennye boa a Yehowa bɛboa yɛn no ho kyim da. Yakobo kae nso sɛ: “Momfa mo ho nhyɛ Onyankopɔn ase. Munsiw ɔbonsam kwan, na obeguan afi mo nkyɛn. Mommɛn Onyankopɔn, na ɔbɛbɛn mo.” Yiw, sɛ yɛnam adesua ne mpaebɔ so bɛn Onyankopɔn a, adwenem naayɛ a yɛwɔ no betu ayera.—Yakobo 4:7, 8.

7, 8. Gyinapɛn atitiriw a yegyina so hu ɔsom a Yesu kyerɛkyerɛe no bi ne dɛn, na henanom na wodu saa gyinapɛn ahorow yi ho?

⁷ Fa asɛmmisa yi sɛ nhwɛso: Yɛyɛ dɛn hu sɛ ɔsom a Yesu kyerɛkyerɛe no ara na yɛwɔ mu yi? Gyinapɛn bɛn na ɛsɛ sɛ yesusuw ho na ama yɛanya eyi ho mmuae? Bible da no adi sɛ ɛsɛ sɛ nokware Kristofo nya nokware dɔ ma wɔn ho wɔn ho. (Yohane 13:34, 35) Ɛsɛ sɛ wɔtew Onyankopɔn din Yehowa ho. (Yesaia 12:4, 5; Mateo 6:9) Na ɛsɛ sɛ wɔma wohu saa din no.—Exodus 3:15; Yohane 17:26.

⁸ Nokware som ho agyiraehyɛde foforo ne obu a wobenya ama Onyankopɔn Asɛm Bible no. Ɛyɛ nhoma soronko a ɛda Onyankopɔn nipasu ne n’atirimpɔw ahorow adi. (Yohane 17:17; 2 Timoteo 3:16, 17) Afei nso, nokware Kristofo bɔ Onyankopɔn Ahenni ho dawuru sɛ onipa anidaso koro pɛ a ɛbɛma wanya daa nkwa wɔ paradise asase so. (Marko 13:10; Adiyisɛm 21:1-4) Wɔtwe wɔn ho fi wiase yi amammuisɛm a aporɔw ne emu asetra kwan a egu nnipa ho fĩ no ho. (Yohane 15:19; Yakobo 1:27; 4:4) Henanom na wɔadu saa gyinapɛn ahorow yi ho ankasa nnɛ? Nokwasɛm no da no adi sɛ mmuae biako pɛ na ɛwɔ hɔ—Yehowa Adansefo.

Na sɛ Adwenem Naayɛ Kɔ so Tra Hɔ Nso Ɛ?

9, 10. Dɛn na yebetumi ayɛ de adi adwenem naayɛ ahorow a ɛkɔ so tra hɔ so?

⁹ Na sɛ yɛn adwenem yɛ yɛn nãã wɔ nneɛma bebree mu nso ɛ? Dɛn na ɛsɛ sɛ yɛyɛ wɔ bere a ɛte saa mu? Ɔhene Salomo nyansafo no ma yɛn mmuae sɛ: ‘Me ba, sɛ wutie me nsɛm, na wode me mmara nsɛm sie wo nkyɛn, sɛ wobɛyɛ asõ atie nyansa, na woakom  wo koma ama ntease, yiw, sɛ wusu frɛ nhumu, na woma wo nne so frɛ ntease, sɛ wohwehwɛ n’akyi kwan sɛ dwetɛ, na wobɔre hwehwɛ no sɛ akorade a ahintaw a, ɛno na wubehu Yehowa suro, na woahu Onyankopɔn ho nimdeɛ.’—Mmebusɛm 2:1-5.

¹⁰ So ɛno nyɛ nsusuwii a ɛyɛ nwonwa? Sɛ yɛpɛ sɛ yetie Onyankopɔn nyansa ankasa a, ‘yebehu Onyankopɔn ho nimdeɛ.’ Yiw, sɛ yɛpɛ sɛ yenya Amansan Hene no ho nimdeɛ na yɛkyerɛ obu ma ne nsɛm a, yɛn nsa betumi aka. Ɛno hwehwɛ sɛ yɛfa mpaebɔ ne kokoam adesua so kɔ Yehowa nkyɛn. N’asɛm mu akorade a ahintaw no betumi ayi adwenem naayɛ biara afi hɔ na aboa yɛn ma yɛahu nokware hann no.

11. Ɔkwan bɛn so na Elisa somfo no adwenem yɛɛ no nãã?

¹¹ Sɛnea mpaebɔ boaa Onyankopɔn somfo a ehu kaa no maa n’adwenem yɛɛ no nãã ho nhwɛso a emu da hɔ ne nea ɛwɔ 2 Ahene 6:11-18 no. Ná Elisa somfo no nni honhom mu ntease. Wantumi anhu sɛ na ɔsoro asafo wɔ hɔ a wɔbɛboa Onyankopɔn diyifo a na Siria asraafo aka no ahyem no. Ehu kaa ɔsomfo no ma ɔteɛɛm sɛ: “Ao, me wura, yɛbɛyɛ dɛn?” Elisa buaa no dɛn? “Nsuro, na wɔn a wɔka yɛn ho dɔɔso sen wɔn a wɔka wɔn ho no.” Nanso, na ɛbɛyɛ dɛn na ɔsomfo no atumi agye adi? Na ontumi nhu ɔsoro asafo no.

12. (a) Ɔkwan bɛn so na wodii ɔsomfo no adwenem naayɛ no ho dwuma? (b) Ɔkwan bɛn so na yebetumi adi adwenem naayɛ biara a ebia yɛwɔ no ho dwuma?

¹² “Elisa bɔɔ mpae sɛ: [Yehowa, NW], bue n’ani na onhu. Na [Yehowa, NW] buee aberante no aniwa, na ohui, na hwɛ, ogya apɔnkɔ ne nteaseɛnam ayɛ bepɔw no so ma atwa Elisa ho ahyia.” Ɛbaa saa no, Yehowa maa ɔsomfo no huu ɔsoro asafo a na wɔrebɔ Elisa ho ban no. Nanso, ɛnsɛ sɛ yɛhwɛ Onyankopɔn mmoa a ɛte saa ara kwan nnɛ. Kae sɛ, na odiyifo no somfo no nni Bible mũ no nyinaa a obesua ma ahyɛ ne gyidi den. Yɛwɔ Bible no. Sɛ yɛde di dwuma yiye a, ebetumi ahyɛ yɛn gyidi den saa ara. Sɛ nhwɛso no, yebetumi asusuw kyerɛw nsɛm pii a ɛka Yehowa a ɔte ne soro abangua so ho asɛm no ho. Eyinom remma yɛn adwenem nyɛ yɛn nãã sɛ Yehowa wɔ ɔsoro ahyehyɛde a ɛreboa n’asomfo wɔ nkyerɛkyerɛ adwuma a wɔreyɛ wɔ wiase nyinaa no mu nnɛ.—Yesaia 6:1-4; Hesekiel 1:4-28; Daniel 7:9, 10; Adiyisɛm 4:1-11; 14:6, 7.

 Hwɛ Yiye Wɔ Satan Mfiri Ahorow Ho!

13. Ɔkwan bɛn na Satan bɔ mmɔden sɛ ɔbɛfa so ama yɛayɛ mmerɛw wɔ nokware no mu?

¹³ Akwan foforo a Satan fa so ma yɛyɛ mmerɛw wɔ honhom fam na ɔnam so ma yegyae nokware no mu bi ne dɛn? Emu biako ne ɔbrasɛe a wɔda no adi wɔ akwan horow nyinaa so no. Wɔ nnɛ wiase a nna ho nsɛm agye nkurɔfo adwene mu no, ka a wɔbɛka sɛ obi ne obi wɔ hɔ (ɔbrasɛe din foforo) anaa obi atwa ne ho (obiara kɛkɛ a wɔne no bɔ aguaman) no abɛyɛ adeyɛ a ɛkɔ so da biara da ama awo ntoatoaso a anigye ntraso agye wɔn ti na wɔpɛ sɛ wogye wɔn ani a wonsusuw nea ebefi mu aba biara ho no. Sini, TV, ne video ahorow hyɛ saa asetra kwan yi ho nkuran. Nguamansɛm abu so wɔ nsɛm ho amanneɛbɔ mu, ne titiriw no, Intanɛt so. Wɔn a wɔrepɛ biribi ahu no behyia sɔhwɛ.—1 Tesalonikafo 4:3-5; Yakobo 1:13-15.

14. Dɛn nti na Kristofo binom atɔ Satan mfiri mu?

¹⁴ Kristofo binom ama asɛmpɛ adi wɔn so ma wɔahwɛ mfonini ahorow a nguamansɛm nketewa ne akɛse wom de asɛe wɔn adwene ne wɔn koma. Wɔagyae wɔn ho mu ama Satan nnaadaa afiri ayi wɔn. Mpɛn pii na wɔn a wɔyɛ saa no hwe ase honhom fam. Saafo no ankɔ so anyɛ wɔn ho ‘mmofra wɔ bɔne mu.’ ‘Wɔanwie nyin wɔ ntease mu.’ (1 Korintofo 14:20) Afe biara, nnipa mpempem pii hu amane sɛ wɔanni Onyankopɔn Asɛm mu nnyinasosɛm ne gyinapɛn ahorow so. Wɔankɔ so anhyɛ “Onyankopɔn akode no nyinaa.”—Efesofo 6:10-13; Kolosefo 3:5-10; 1 Timoteo 1:18, 19.

Yɛnkyerɛ Nea Yɛwɔ no Ho Anisɔ

15. Dɛn nti na ebetumi ayɛ den ama ebinom sɛ wɔbɛkyerɛ wɔn honhom fam apɛgyade ho anisɔ?

¹⁵ Yesu kae sɛ: “Mubehu nokware, na nokware no ama moanya ahofadi.” (Yohane 8:32, NW) Adansefo dodow no ara na wɔtwee wɔn ho fii wɔn kan asetra kwan ne ɔsom ahorow ho. Enti, ɛnyɛ den sɛ wobetumi ahu ahofadi a nokware no ma wonya no yiye. Nanso, ebetumi ayɛ den ama mmofra binom a wɔn awofo a wɔwɔ nokware no mu tetee wɔn no sɛ wɔbɛkyerɛ wɔn honhom fam apɛgyade no ho anisɔ. Wɔnkɔɔ atoro som anaa wiase yi fã bi a esi anigyede akyidi, nnubɔnenom, ne ɔbrasɛe so dua mu da. Ne saa nti, ebia wontumi nhu nsonsonoe kɛse a ɛda yɛn honhom fam paradise ne Satan wiase a aporɔw no ntam no. Ebinom mpo betumi akɔka wiase awuduru no ahwɛ sɛnea ɛbɛyɛ a wobehu nneɛma a wɔrehwere no!—1 Yohane 2:15-17; Adiyisɛm 18:1-5.

16. (a) Nsɛm bɛn na yebetumi abisa yɛn ho? (b) Dɛn na wɔakyerɛkyerɛ yɛn ahyɛ yɛn nkuran sɛ yɛnyɛ?

¹⁶ So ɛho hia ankasa sɛ yɛhyew yɛn nsa ansa na yɛahu sɛnea ɛyaw ne amanehunu te? So yentumi nsua biribi mfi afoforo amanehunu mu? So ɛsɛ sɛ yɛyantam wiase yi “dontori” mu na ama yɛahu sɛ ebia yɛrehwere biribi ankasa? (2 Petro 2:20:22) Petro kaee afeha a edi kan no mu Kristofo a bere bi na wɔwɔ Satan wiase  mu no sɛ: “Ɛdɔɔso sɛ yɛn asetra bere a atwam no mu yɛyɛɛ nea amanaman no pɛ, sɛ yɛnantew ahohwi, akɔnnɔ, asabow, agobɔne, didimee ne abosonsom a wokyi mu.” Nokwarem no, ɛho nhia sɛ yɛde yɛn ho hyɛ wiase “sakasaka dontori” no mu ansa na yɛahu sɛnea asetra betumi ayɛ ahuhude afa. (1 Petro 4:3, 4) Nea ɛne no bɔ abira no, wɔkyerɛkyerɛ yɛn Yehowa abrabɔ gyinapɛn a ɛkorɔn wɔ yɛn Ahenni Asa ahorow so—mmeae a wɔde Bible nkyerɛkyerɛ ma no. Na wɔhyɛ yɛn nkuran sɛ yɛmfa yɛn adwene tumi nni dwuma mfa nna no adi sɛ yɛahu nokware no, na yɛagye atom.—Yosua 1:8; Romafo 12:1, 2; 2 Timoteo 3:14-17.

Yɛn Din no Nyɛ Agyiraehyɛde Ara Kwa

17. Ɔkwan bɛn so na yebetumi ayɛ Yehowa Adansefo a yetu mpɔn?

¹⁷ Sɛ yegye nokware no tom a, yɛbɛka ho asɛm akyerɛ afoforo bere biara a ɛfata. Eyi nkyerɛ sɛ yɛde bɛhyɛ nkurɔfo a wɔnkyerɛ ho anigye no so. (Mateo 7:6) Mmom no, yɛbɛda yɛn ho adi sɛ Yehowa Adansefo a yɛmmɔ hu. Sɛ obi da anigye kakra adi denam asɛm a obefi ne pɛ mu abisa anaa Bible ho nhoma a obegye so a, yɛbɛka yɛn anidaso ho asɛm akyerɛ no a yɛntwentwɛn yɛn nan ase. Nokwarem no, ɛsɛ sɛ yɛma eyi hyɛ yɛn nkuran na bere nyinaa yɛde nhoma bi hyɛ yɛn ho wɔ baabiara a yɛwɔ—ofie, sukuu, sotɔɔ, anaa anigyebea.—1 Petro 3:15.

18. Ɔkwan bɛn so na da a yɛbɛda yɛn ho adi pefee sɛ Kristofo no betumi ayɛ ade pa wɔ yɛn asetra mu?

¹⁸ Sɛ yɛda yɛn ho adi pefee sɛ Kristofo a, yɛhyɛ yɛn ho den de gyina Satan anifere kwan so ntua ahorow no ano. Sɛ awodadi anaa Buronya apontow rekɔ so anaasɛ wɔreto loto wɔ adwumam a, mfɛfo adwumayɛfo taa ka sɛ, “Munnyae no. Ɔyɛ Yehowa Dansefo.” Saa ara nso na nkurɔfo ntaa nka ahuhusɛm wɔ yɛn anim. Enti, ɛyɛ papa sɛ yɛbɛma afoforo ahu yɛn gyinabea sɛ Kristofo, sɛnea ɔsomafo Petro daa no adi no: “Na sɛ mudi papa akyi a, hena ne nea ɔbɛhaw mo? Na sɛ trenee nti muhu amane nso a, nhyira ne mo.”—1 Petro 3:13, 14.

19. Yɛyɛ dɛn hu sɛ yɛadu akyiri wɔ nna a edi akyiri yi mu?

¹⁹ Nokware no a yebegye atom so mfaso foforo ne sɛ ɛbɛma yɛagye adi sɛ nneɛma nhyehyɛe yi nna a edi akyiri no ankasa ni. Yebehu sɛ Bible nkɔmhyɛ pii renya ne mmamu koraa wɔ yɛn bere yi mu. * Ahude a ɛkɔɔ so wɔ afeha a etwaam no mu no si Paulo kɔkɔbɔ a ɛne sɛ “nna a edi akyiri mu no, mmere a emu yɛ den bɛba” no so dua kɛse. (2 Timoteo 3:1-5; Marko 13:3-37) Ná atesɛm krataa bi mu asɛm a ɛfa afeha a ɛto so 20 no ho a epuee nnansa yi no asɛmti ne: “Wɔbɛkae No sɛ Atirimɔdensɛm Bere.” Asɛm no kae sɛ: “Afe 1999 ne afe a wodii awu wom sen biara wɔ afeha a wodii awu wom sen biara no fã a ɛto so abien no mu.”

20. Dɛn na bere aso sɛ yɛyɛ nnɛ?

²⁰ Ɛnyɛ nnɛ ne bere a ɛsɛ sɛ yehinhim. Yehowa nhyira da adi pefee wɔ Bible nkyerɛkyerɛ adwuma a wɔnyɛɛ ɛso bi da a wɔreyɛ wɔ wiase nyinaa de adi amanaman nyinaa adanse no so. (Mateo 24:14) Gye nokware no tom, na ka ho asɛm kyerɛ afoforo. Daa nkwa a wubenya no gyina nea woreyɛ nnɛ so. Sɛ yɛgow yɛn nsam a yɛrennya Yehowa nhyira. (Luka 9:62) Mmom no, bere adu sɛ ‘yetintim, na yenhinhim, na yɛkɔ so Awurade adwuma no mu daa, efisɛ yenim sɛ yɛn brɛ renyɛ ɔkwa, Awurade mu.’—1 Korintofo 15:58.

[Ase hɔ asɛm]

So Wokae?

• Ɔkwan bɛn so na yebetumi ayi adwenem naayɛ afi hɔ?

• Dɛn na yebetumi asua afi Elisa somfo no nhwɛso no mu?

• Abrabɔ ho sɔhwɛ ahorow bɛn na ɛsɛ sɛ yɛma yɛn ani da hɔ wɔ ho bere nyinaa?

• Dɛn nti na ɛsɛ sɛ yɛda yɛn ho adi pefee sɛ Yehowa Adansefo?

[Adesua no ho Nsɛmmisa]

[Mfonini ahorow wɔ kratafa 10]

Bible adesua ne mpae a yɛbɛbɔ no daa betumi aboa yɛn ma yɛayi adwenem naayɛ afi hɔ

[Mfonini wɔ kratafa 11]

Wɔnam anisoadehu so na edii Elisa somfo no adwenem naayɛ no ho dwuma

[Mfonini wɔ kratafa 12]

Wɔkyerɛkyerɛ yɛn Yehowa abrabɔ ho gyinapɛn ahorow wɔ Ahenni Asa ahorow te sɛ eyi a ɛwɔ Benin no so