Wubetumi Agyina Abasamtu Ano!

ONYANSAFO bi kae bere bi sɛ: “Wo nsa mu gow ahohia da mu a, w’ahoɔden sua.” (Mmebusɛm 24:10) Sɛ w’abam abu pɛn a, akyinnye biara nni ho sɛ wubegye saa asɛm no atom.

Obiara nni hɔ a obetumi aguan nea abasamtu tumi de ba no. Abasamtu a emu nyɛ den pii betumi adi da koro anaa nnanu, ansa na afi hɔ. Nanso sɛ ɛyɛ yaw na ɛhyɛ abufuw a, ɔhaw no betumi akyɛ kakra. Kristofo binom a wɔde mfe pii adi nokware abam abu araa ma mpo wɔagyae asafo nhyiam ahorow ne asɛnka kɔ.

Sɛ w’abam abu a, nya koma! Asomfo anokwafo a wɔtraa ase tete no tumi gyinaa abasamtu ano, na ɛdenam Onyankopɔn mmoa so no, wo nso wubetumi agyina ano.

Bere a Afoforo Yɛ Ade Ma Ɛhaw Wo

Wuntumi nhwɛ kwan sɛ wɔbɛbɔ wo ho ban afi nsɛm a wɔka a wonsusuw ho anaa nneyɛe a ɛtete saa ho. Nanso, wubetumi akwati sɛ wobɛma afoforo sintɔ asɛe ɔsom a wode ma Yehowa no. Sɛ obi ayɛ ade ma ahaw wo a, ɛbɛyɛ papa sɛ wususuw sɛnea Hana, Samuel maame dii tebea bi a na ebu abam ho dwuma no ho.

Ná Hana hia mma denneennen, nanso na ɔnwo. Ná ne kunu yere a ɔto so abien, Penina awo mmabarima ne mmabea ama ɔbarima no dedaw. Sɛ anka Hana asɛm bɛhaw Penina no, obuu no sɛ ne tamfo, na ɔdaa su bi adi kyerɛɛ Hana a na ɛma “osũ na onnidi.”—1 Samuel 1:2, 4-7.

Da bi Hana kɔɔ asɔrefie hɔ kɔbɔɔ mpae. Israel sɔfo panyin, Eli hui sɛ ɔrebesebese n’ano. Bere a Eli anhu sɛ na Hana rebɔ mpae no, osusuwii sɛ ebia wabow nsa. Obisae sɛ: “Da bɛn na wobɛbow nsa akosi? Yi wo nsa no fi w’ani so.” (1 Samuel 1:12-14) Wususuw sɛ Hana bɛte nka dɛn? Ná waba asɔrefie hɔ rebɛpɛ nkuranhyɛ. Na akyinnye biara nni ho sɛ wanhwɛ kwan sɛ Israel mmarima mu nea ɔwɔ gyinabea pa saa bebu no atɛnkyea saa!

Anka saa tebea yi betumi ama Hana abam abu yiye. Anka obetumi afi asɔrefie hɔ ntɛm ara, aka ntam sɛ bere dodow a Eli som wɔ hɔ sɛ ɔsɔfo panyin no, ɔrensi hɔ bio da. Nanso, ɛda adi pefee sɛ na abusuabɔ a Hana ne Yehowa wɔ no som bo ma no. Ná onim sɛ sɛ ɔyɛ biribi a ɛte saa a, Yehowa ani rennye ho. Asɔrefie hɔ ne beae titiriw a na wɔsom. Ɛhɔ na na Yehowa de ne din ato. Na ɛmfa ho Eli sintɔ nyinaa akyi no, ɔno na na Yehowa apaw no sɛ ne nanmusifo.

Mmuae pa a Hana de maa Eli wɔ sobo a ɔbɔɔ no no ho no yɛ nhwɛso fɛfɛ ma yɛn nnɛ. Wamma wɔammɔ no sobo a ɛmfata, na mmom ofi obu mu yii ano. Obuae sɛ: “Dabi, me wura, meyɛ ɔbea werɛhowfo; bobesa ne nsa biara de, mennom bi ɛ, na mihwiee me kra miguu [Yehowa, NW] anim; mfa w’abaawa nto ɔbea huhuni bi ho, efisɛ m’awerɛhow ne me yamgya dodo mu na makasa mabesi sesɛɛ yi.”—1 Samuel 1:15,16.

So Hana tumi yii ne ho ano? Ɛte saa. Nanso, ɔde anifere na ɛne Eli kasae, a wanyɛ biribiara sɛ ɔde rekasa atia no wɔ sobo a ɛnteɛ a ɔde bɔɔ no no ho. Enti ɔno nso fi ayamye mu buaa no sɛ: “Fa asomdwoe kɔ, na Israel Nyankopɔn bɛma wo w’ade a wosrɛɛ no hɔ no.” Bere a asɛm no twae no, Hana  “siim kɔe kodidii, na n’anim nte sɛ kan no bio.”—1 Samuel 1:17, 18.

Dɛn na yesua fi asɛm yi mu? Hana yɛɛ ade ntɛm de siesiee ntease a na ɛnyɛ adwuma no, nanso ofi obu kɛse mu na ɛyɛɛ saa. Ne saa nti, ɔmaa abusuabɔ pa traa ɔne Yehowa ne Eli ntam. Hwɛ sɛnea mpɛn pii no, nkitahodi pa ne anifere kakra a wɔde di dwuma tumi siw nsɛnnennen nketenkete ano na anyɛ kɛse!

Ɛsɛ sɛ yɛhyɛ no nsow sɛ, yɛne afoforo ntam nsɛm a yebesiesie no hwehwɛ sɛ afanu no nyinaa da ahobrɛase adi na wɔyɛ fakaa. Sɛ yɛn yɔnko gyidini amma kwan amma wo ne no ansiesie mo ntam asɛm bi a, wubetumi agyae asɛm no mu ama Yehowa, na woahwɛ kwan sɛ obedi ho dwuma wɔ n’ankasa ne bere mu wɔ ɔkwan a ɛfata so.

So Ɔsom Hokwan Bi Afi Wo Nsa?

Ebinom ahaw esiane sɛ wɔde ɔsom hokwan a wɔn ani gye ho wɔ Onyankopɔn som mu ato hɔ nti. Ná wɔn ani gye ho sɛ wɔbɛsom wɔn nuanom, enti bere a hokwan no fii wɔn nsa no, wɔtee nka sɛ wɔn ho nni mfaso bio mma Yehowa anaa n’ahyehyɛde no. Sɛ saa na wote nka a, wubetumi anya nhumu denam Bible kyerɛwfo Marko a na wɔsan frɛ no Yohane no ho a wubesusuw no so.—Asomafo no Nnwuma 12:12.

Marko dii Paulo ne Barnaba akyi wɔ wɔn asɛmpatrɛw akwantu a edi kan no mu, nanso ɔkwan mu no, ogyaw wɔn hɔ san n’akyi baa Yerusalem. (Asomafo no Nnwuma 13:13) Akyiri yi, na Barnaba pɛ sɛ ɔfa Marko di wɔn akyi wɔ akwantu foforo mu. Nanso, Bible ka sɛ: “Paulo susuwii sɛ enye sɛ wɔbɛfa nea ɔtwee ne ho fii wɔn ho Pamfilia na ɔne wɔn ankɔyɛ adwuma no aka wɔn ho.” Barnaba ne no anyɛ adwene. Kyerɛwtohɔ no toa so sɛ: ‘Ɛnna akasakasa a emu yɛ den bae, na ɛma wɔpaapae mu, na Barnaba faa Marko faa nsu ani kɔɔ Kipro; na Paulo faa Silas, na osiim kɔe.’—Asomafo no Nnwuma 15:36-40.

Ɛbɛyɛ sɛ ɛbɛhaw Marko yiye sɛ ɔtee sɛ ɔsomafo Paulo a wobu no no ampɛ sɛ ɔne no bɛyɛ adwuma, ne sɛ akasakasa a ɛbaa fata a na ɔmfata ho no maa Paulo ne Barnaba ntam totoe. Nanso ɛnyɛ asɛm no nyinaa ne no.

Ná Paulo ne Silas da so ara hia obi a wɔne no betu kwan. Bere a woduu Listra no, wonyaa obi a wɔde no besi Marko ananmu, aberante bi a wɔfrɛ no Timoteo. Bere a wɔpaw Timoteo no, ɛbɛyɛ sɛ na ogyee asubɔ bɛyɛ mfe abien anaa abiɛsa pɛ. Nanso, na Marko ne Kristofo asafo no abɔ fi ne mfiase pɛɛ—nokwarem no, na wakyɛ sen Paulo ankasa mpo. Nanso, Timoteo na wɔde ɔsom hokwan no maa no.—Asomafo no Nnwuma 16:1-3.

Bere a Marko tee sɛ wɔde aberante a onni osuahu pii na asi n’ananmu no, dɛn na ɔyɛe? Bible no nka ho asɛm. Nanso, ɛma yehu sɛ Marko kɔɔ so yɛɛ Yehowa som adwuma denneennen. Ɔde hokwan ahorow a onyae no dii dwuma. Ɛwom sɛ wantumi ne Paulo ne Silas ansom de, nanso otumi ne Barnaba tuu kwan kɔɔ Kipro, a na ɛyɛ asasesin a Barnaba fi mu no mu. Marko ne Petro somee wɔ Babilon nso. Awiei koraa no, onyaa hokwan ne Paulo—ne Timoteo—yɛɛ adwuma wɔ Roma. (Kolosefo 1:1; 4:10; 1 Petro 5:13) Akyiri yi, honhom kaa Marko ma ɔkyerɛw Nsɛmpa no mu biako!

Asuade a mfaso wɔ so wɔ eyi nyinaa mu. Marko amma ɔsom hokwan a efii ne nsa no anhaw no pii amma wammu n’ani angu ɔsom hokwan a na ɔda so ara wɔ no so. Marko yɛɛ pii wɔ Yehowa som adwuma mu, na Yehowa hyiraa no.

Enti sɛ hokwan bi afi wo nsa a, mma w’abam mmmu. Sɛ wokɔ so kura adwempa mu na wokɔ so yere wo ho a, wubetumi anya hokwan afoforo. Yɛwɔ pii yɛ wɔ Awurade adwuma no mu.—1 Korintofo 15:58.

 Ɔsomfo Nokwafo Bi Abam Bu

Ɛnyɛ mmerɛw sɛ wobɛko denneennen agyina wo gyidi mu. Ɛtɔ mmere bi a, w’abam betumi abu. Na ebia wubebu wo ho fɔ wɔ w’abam a abu no ho mpo, na woasusuw sɛ ɛnsɛ sɛ Onyankopɔn somfo nokwafo te nka saa da. Susuw Elia, Israel adiyifo a wɔda nsow no mu biako ho hwɛ.

Bere a Israel hemmaa Isebel a na ɔhyɛ Baalsom ho nkuran denneennen no tee sɛ Elia ama wɔakunkum Baal adiyifo no, ɔkaa ntam sɛ obekum no. Ná Elia ahyia atamfo a wɔsen Isebel de, nanso mpofirim ara no, n’abam bui ma ɔpɛe sɛ owu. (1 Ahene 19:1-4) Dɛn nti na ɛsɛ sɛ ɛba saa? Ná ne werɛ afi biribi.

Ná Elia werɛ afi sɛ ɔde n’ani bɛto Yehowa so sɛ n’ahoɔden Mafo. Hena na ɔmaa Elia tumi a ɔde nyanee awufo ne nea ɔde gyinaa Baal adiyifo no anim no? Yehowa. Akyinnye biara nni ho sɛ na Yehowa betumi ama no ahoɔden a ɔde begyina Ɔhemmaa Isabel abufuw no ano.—1 Ahene 17:17-24; 18:21-40; 2 Korintofo 4:7.

Obiara betumi ahinhim bere bi wɔ Yehowa mu ahotoso a ɔwɔ no mu. Te sɛ Elia no, ɛtɔ mmere bi a, wubetumi anya nnipa adwene wɔ asɛnnennen bi ho sen sɛ wode “nyansa a efi soro no” bedi ho dwuma. (Yakobo 3:17) Nanso, Yehowa annyaw Elia wɔ bere tiaa mu sintɔ yi ho.

Ná Elia aguan kɔ Beer-Seba ne afei sare so baabi a na osusuw sɛ obiara ntumi nhu no. Nanso Yehowa huu no. Ɔsomaa ɔbɔfo bi ma ɔkɔkyekyee ne werɛ. Ɔbɔfo no hwɛ hui sɛ Elia benya abodoo a wɔato no foforo ne nsu a ɔbɛnom. Bere a Elia agye n’ahome no, ɔbɔfo no ka kyerɛɛ no sɛ ontwa kwan bɛyɛ kilomita 300 nkɔ Bepɔw Horeb so, baabi a na Yehowa bɛhyɛ no den bio.—1 Ahene 19:5-8.

Wɔ Bepɔw Horeb so no, Elia huu Yehowa tumi a ɛhyɛ gyidi den a wɔdaa no adi. Afei Yehowa de nne a ɛba fam koraa maa no awerɛhyem sɛ, ɛnkaa ne nko. Ná Yehowa ka Elia ho, na na ne nuanom 7,000 nso ka no ho a na onnim. Awiei koraa no, Yehowa maa Elia adwuma sɛ ɔnkɔyɛ. Wanyi Elia adi sɛ ne diyifo!—1 Ahene 19:11-18.

Mmoa Wɔ Hɔ

Sɛ ɛtɔ mmere bi na sɛ wote nka sɛ w’abam abu a, w’ahome kakra anaa aduan pa bi a wubenya adi no betumi ama wo ho atɔ wo kakra. Nathan H. Knorr a na ɔsom sɛ Yehowa Adansefo Sodikuw no muni kosii sɛ owui wɔ 1977 mu no kae bere bi sɛ, sɛ wutumi da yiye anadwo a, ade bɛkye no na wo haw akɛse no so atew abɛyɛ ketewaa bi. Nanso sɛ ɔhaw no ankɔ a, ebia na ɛno ntumi mmoa—wubehia mmoa na wode ako atia abasamtu no.

Yehowa somaa ɔbɔfo ma ɔkɔhyɛɛ Elia den. Ɛnnɛ, Onyankopɔn nam mpanyimfo ne Kristofo afoforo a wɔn ho akokwaw so de nkuranhyɛ ma. Mpanyimfo no betumi ayɛ sɛ “mframa ano hintabea” ankasa. (Yesaia 32:1, 2) Nanso sɛ wubenya nkuranhyɛ afi wɔn nkyɛn a, ebia ebehia sɛ wudi kan tu anammɔn. Ɛmfa ho sɛnea na Elia abam abu no, otwaa kwan kɔɔ Bepɔw Horeb so kogyee akwankyerɛ fii Yehowa nkyɛn. Yɛnam Kristofo asafo no so nya akwankyerɛ a ɛma denhyɛ.

Sɛ yegye mmoa na yefi akokoduru mu gyina sɔhwɛ ahorow te sɛ yawdi anaa hokwan a efi yɛn nsa ano a, yegyina Yehowa afã wɔ ɔsɛmpɔw titiriw bi mu. Ɔsɛmpɔw bɛn? Satan ka sɛ mfaso a nnipa nya nti na wɔsom Yehowa. Satan nka sɛ sɛ yɛn asetra mu biribiara kɔ so yiye a yɛbɛsom Onyankopɔn, na mmom nea ɔka ne sɛ sɛ yehyia ɔhaw ahorow a, yebegyae Onyankopɔn som. (Hiob, ti 1 ne 2) Abasamtu nyinaa akyi sɛ yɛkɔ so yɛ Yehowa som adwuma a yenhinhim a, yɛnam so betumi aboa ma wɔabua Ɔbonsam atoro sobo no.—Mmebusɛm 27:11.

Hana, Marko, ne Elia nyinaa hyiaa ɔhaw  ahorow a ɛmaa wodii awerɛhow bere tiaa bi. Nanso, wogyinaa ɔhaw no ano, na wɔbɔɔ wɔn ho mmɔden wɔ asetra mu. Ɛdenam Yehowa mmoa so no, wo nso, wubetumi agyina abasamtu ano!