Dɛn Ne Po a Awu Nhoma Mmobɔwee No Ho Nokwasɛm?

Bɛboro mfirihyia 50 ni no, ɔbo a Bedouinni guanhwɛfo bi tow kɔtoo ɔbodan bi mu no maa wohuu ade a ebinom afrɛ no afeha a ɛto so 20 mu fam a wotutu hwehwɛ tetefo nneɛma mu adehu a ɛsen biara no. Bedouinni no tee sɛ ɔbo no apae dɔtebo anwenne bi. Bere a ɔkɔhwɛe no, ohuu ade a wɔabɛfrɛ no Po a Awu Nhoma Mmobɔwee no mu nea edi kan no.

SAA nhoma mmobɔwee yi abɛyɛ ade a nhomanimfo ne nsɛm ho amanneɛbɔfo nyinaa atwe adwene asi so agye ho akyinnye. Ɛho atosɛm pii a wɔka no ama ɔmanfo adwene atu afra. Atesɛm a ahyeta sɛ wɔakatakata emu nsɛm pii so no ama ehu aka ebinom sɛ nokwasɛm ahorow bi wɔ nhoma mmobɔwee no mu a ɛbɛsɛe Kristofo ne Yudafo nyinaa gyidi. Nanso, dɛn na saa nhoma mmobɔwee yi kyerɛ ankasa? Bɛboro mfirihyia 50 akyi no, so yebetumi ahu mu nokwasɛm no?

Dɛn Ne Po a Awu Nhoma Mmobɔwee No?

Po a Awu Nhoma Mmobɔwee no yɛ tete Yudafo nsaano nkyerɛwee a wɔkyerɛw emu dodow no ara wɔ Hebri kasa mu, ebi wɔ Aram kasa mu, na kakraa bi wɔ Hela kasa mu. Saa nhoma mmobɔwee yi ne nhoma asinasin no adi boro mfirihyia 2,000, na wɔkyerɛwee ansa na wɔrewo Yesu. Nsaano nkyerɛwee atenten ason bi ka nhoma mmobɔwee a edi kan a wonya fii Bedouinfo no hɔ a na emu bi reyɛ asɛe koraa no ho. Bere a wɔhwehwɛɛ abodan pii mu no, wohuu nhoma mmobɔwee foforo ne nhoma asinasin mpempem pii. Afe 1947 ne 1956 ntam hɔ no, wohuu abodan 11 a na nhoma mmobɔwee wom wɔ beae a ɛbɛn Qumran, a ɛwɔ Po a Awu no ho no.

Sɛ wɔhyehyɛ nhoma mmobɔwee ne nhoma  asinasin no nyinaa a, wonya nsaano nkyerɛwee bɛyɛ 800. Nsaano nkyerɛwee no mu nkyem anan mu biako, anaa nea ɛboro 200 kakraa bi na ɛbɛyɛ sɛ ɛyɛ Hebri Bible nkyerɛwee no afã bi. Nsaano nkyerɛwee foforo no yɛ Yudafo nkyerɛwee a ɛnka Bible no ho, Apocrypha ne Pseudepigrapha. *

Nhoma mmobɔwee no bi a nhomanimfo ani gye ho sen biara no yɛ nhoma ahorow a bere bi na wonnim. Nea ɛka eyinom ho ne nneɛma bi a ɛfa Yudafo mmara ho ho nkyerɛkyerɛmu, nyamesom kuw bi a na wɔte Qumran mmara ahorow pɔtee, anwensɛm a na wɔde yɛ asɔre ne mpaebɔ ahorow, ɛne wiase awiei ho nsɛm a ɛkyerɛ adwene a na wɔwɔ wɔ Bible nkɔmhyɛ mmamu ne nna a edi akyiri ho no. Bible ho nsɛm a ɛda nsow, tete nsɛmfua paa a wɔde kyerɛkyerɛ nnɛyi Bible nkyerɛwee mu nso wom.

Henanom na Wɔkyerɛw Po a Awu Nhoma Mmobɔwee No?

Akwan pii a wɔfa so kyerɛ bere a wɔde kyerɛw tete nhoma no kyerɛ sɛ ɛbɛyɛ sɛ wɔkyerɛw nhoma mmobɔwee no wɔ afeha a ɛto so abiɛsa A.Y.B. ne afeha a edi kan Y.B. mu hɔ. Nhomanimfo bi akyerɛ sɛ Yudafo a wofii Yerusalem ansa na wɔresɛe asɔrefie no wɔ afe 70 Y.B. no na wɔde nhoma mmobɔwee no kosiee abodan no mu. Nanso, nhomanimfo dodow no ara a wɔreyɛ nhoma mmobɔwee no mu nhwehwɛmu no hu sɛ saa adwene yi ne nhoma mmobɔwee no mu nsɛm nhyia ankasa. Nhoma mmobɔwee no pii ka nsɛm ne amanne ahorow ho nsɛm a ɛne Yerusalem som mu mpanyimfo adwene nhyia. Saa nhoma mmobɔwee yi ka nnipakuw bi a wogye di sɛ Onyankopɔn apo Yerusalem asɔfo ne asɔrefie som no, ɛne sɛ obu wɔn kuw no som a wɔde ma wɔ anhweatam so no sɛ nea wɔde asi asɔrefie som no ananmu ho asɛm. Ɛte sɛ nea Yerusalem asɔrefie mpanyimfo no remfa nhoma ahorow a nhoma mmobɔwee a ɛte saa ka ho no nsie.

Ɛwom sɛ ɛda adi sɛ na akyerɛwfo kuw bi wɔ Qumran de, nanso ebetumi aba sɛ gyidifo no kɔfaa nhoma mmobɔwee no mu dodow no ara fii baabi foforo na ɛbaa hɔ. Ɔkwan bi so no, Po a Awu Nhoma Mmobɔwee no yɛ nhoma ahorow pii a wɔaboaboa ano. Na sɛnea ɛte wɔ nhomakorabea biara no, nhoma ahorow a ɛwɔ hɔ no betumi ayɛ nea ekura adwenhorow a ɛnyɛ ne nyinaa na ɛne nyamesom ho adwene a n’akenkanfo wɔ no behyia. Nanso, ɛda adi sɛ saa nhoma ahorow a ɛwɔ hɔ a wɔahwɛ so ayeyɛ pii no bɛyɛ nea kuw no ani gye ho kɛse na ɛne wɔn gyidi hyia.

So na Qumranfo no Yɛ Essenefo?

Sɛ na saa nhoma mmobɔwee yi wɔ Qumranfo nhomakorabea a, na henanom na wɔte hɔ? Ɔbenfo Eleazar Sukenik, a onyaa nhoma mmobɔwee no abiɛsa maa Hebri Sukuupɔn a ɛwɔ Yerusalem wɔ afe 1947 mu no ne onipa a odii kan susuw sɛ na saa nhoma mmobɔwee no bɛyɛ Essenefo dea.

Na Essenefo no yɛ Yudafo matew-me-ho kuw bi a afeha a edi kan no mu akyerɛwfo Josephus, Philo a ofi Alexandria, ne Pliny Ɔpanyin no, kyerɛw wɔn ho nsɛm no. Obiara ntumi nkyerɛ bere pɔtee a Essenefo kuw no fii ase, nanso ɛte sɛ nea wɔsɔree wɔ Maccabeefo sɔretia bere no mu wɔ afeha a ɛto so abien A.Y.B. mu. * Josephus bɔɔ amanneɛ sɛ na wɔwɔ hɔ saa bere no, bere a ɔkyerɛkyerɛɛ sɛnea na ɔsom mu gyidi a wokura ne Farisifo ne Sadukifo de nhyia no mu no. Pliny kaa beae a na Essenefo no te wɔ Po a Awu no ho wɔ Yeriko ne Engedi ntam no ho asɛm.

Ɔbenfo James VanderKam, Po a Awu Nhoma Mmobɔwee ho ɔbenfo no ka sɛ na “Essenefo a wɔte Qumran no yɛ Essene kuw kɛse” a Josephus kae sɛ wɔn dodow bɛyɛ mpem anan no “fã ketewaa bi pɛ.” Ɛwom sɛ nsɛm a ɛwɔ Qumran nkyerɛwee mu no ne Essenefo ho nsɛm nyinaa nhyia pɛpɛɛpɛ de, nanso ɛfa wɔn ho sen Yudafo kuw foforo biara a wonim wɔn.

Ebinom akyerɛ sɛ Kristosom nyaa ne mfiase fii Qumran. Nanso, yebetumi ahu nsonsonoe atitiriw bi wɔ ɔsom mu gyidi a na Qumran kuw no  kura ne tete Kristofo no de mu. Na Homedadi ho mmara katee wɔ Qumran nhoma ahorow mu, na ɛkame ayɛ sɛ na amanne kwan so ahotew agye wɔn adwene dodo. (Mateo 15:1-20; Luka 6:1-11) Yebetumi aka Essenefo no ho asɛm saa ara sɛ na wɔtwe wɔn ho fi afoforo ho, na wogye nkrabea ne ɔkra a enwu da di, na wɔtwe adwene si sigyadi ne anwonwade a ɛne sɛ wɔne abɔfo na ɛsom no so. Eyi kyerɛ sɛ na wonnye Yesu ne tete Kristofo no nkyerɛkyerɛ ntom.—Mateo 5:14-16; Yohane 11:23, 24; Kolosefo 2:18; 1 Timoteo 4:1-3.

Wɔnkataa Biribiara So, Wɔmfaa Nhoma Mmobɔwee no Nsiei

Mfe a edi bere a wohuu Po a Awu Nhoma Mmobɔwee no akyi mu no, wɔyeyɛɛ nhoma ahorow bi a ɛmaa nhomanimfo a wɔwɔ wiase nyinaa nsa kaa emu nsɛm a wodii kan hui no. Nanso, nhoma asinasin mpempem pii a wonya fii abodan no biako a wɔfrɛ no Ɔbodan 4 mu no de ɔhaw pii bae. Saa nhoma asinasin no kodii amanaman ntam nhomanimfo kuw bi a wɔhyehyɛe wɔ Yerusalem Apuei fam (a saa bere no na ɛyɛ Jordan fã) wɔ Palestina wɔ Tetefo Nneɛma a Wɔatutu Fam Ahu Akorae no nsam. Na Yudafo anaa Israelfo nhomanimfo biara nka kuw yi ho.

Kuw no hyehyɛɛ mmara sɛ wɔremma afoforo nhu nhoma mmobɔwee no mu nsɛm kosii sɛ wɔde wɔn nhwehwɛmu no ho nsɛm too gua. Wɔtoo nhomanimfo dodow a na wɔwɔ kuw no mu no ano hye. Sɛ kuw no muni bi wu a, na nhomanimfo biako pɛ na wɔde no ka ho ma ɔkɔhyɛ n’ananmu. Sɛnea na adwuma no kɛse te no hwehwɛe sɛ kuw no mufo dɔɔso, na ɛtɔ mmere bi a na egye nkurɔfo a wɔwɔ tete Hebri ne Aram kasa ho nimdeɛ kɛse. James VanderKam kaa no saa kwan yi so sɛ: “Ɛmfa ho sɛnea nnipa baawɔtwe no ho akokwaw afa no, na wontumi nyɛ nhoma asinasin mpempem pii no ho adwuma.”

Wɔ Nnansia Ko a esii wɔ afe 1967 mu no, Yerusalem Apuei fam ne ne nhoma mmobɔwee no bedii Israelfo no nsam, nanso wɔanyɛ nsakrae biara wɔ kuw no nhyehyɛe no mu. Bere a wɔantintim nhoma mmobɔwee a wohu fii Ɔbodan 4 no mu ntɛm ma edii mfirihyia pii no, nhomanimfo pii kasa tiae. Wɔ afe 1977 mu no, Ɔbenfo Geza Vermes a ɔwɔ Oxford Sukuupɔn mu frɛɛ no afeha a ɛto so 20 mu nhomanim mu aniwusɛm a ɛsen biara. Atesɛm fii ase trɛwee sɛ Katolek Asɔre no ahyɛ da na wɔde nhoma mmobɔwee no mu nsɛm a ɛbɛsɛe Kristosom no asie na wɔakata so.

Awiei koraa no, wɔ 1980 mfe no mu no, wɔtrɛw kuw no nhomanimfo dodow mu koduu 20. Afei, wɔ afe 1990 mu no, wɔ kuw no samufo panyin foforo a wɔpaw no, Emanuel Tov, a ɔwɔ Hebri Sukuupɔn mu wɔ Yerusalem no akwankyerɛ ase no, wɔtrɛw kuw no mu bio koduu nhomanimfo bɛboro 50. Wɔyɛɛ nhyehyɛe denneennen tintim nea nhomanimfo no ahu afa nhoma mmobɔwee nkae no ho nyinaa.

Bere a na wɔnhwɛ kwan koraa no, wotumi tintimii wɔ afe 1991 mu. Nea edi kan no, wotintimii A Preliminary Edition of the Unpublished Dead Sea Scrolls no. Wɔnam kɔmputa so gyinaa kuw no nsɛm a wɔahyehyɛ so na ɛkaa eyi boom. Nea edi hɔ no, Huntington Nhomakorabea a ɛwɔ San Marino, California no bɔɔ amanneɛ sɛ wɔde nhoma mmobɔwee no nyinaa mfonini a wɔatwitwa bɛma nhomanimfo biara. Ankyɛ na bere a wotintim A Facsimile Edition of the Dead Sea Scrolls no, nkurɔfo nsa kaa nhoma mmobɔwee a na wonnii kan ntintimii no mfonini a wɔammrɛ ho.

Enti mfirihyia du a atwam mu no, nkurɔfo nsa aka Po a Awu Nhoma Mmobɔwee no nyinaa ayɛ mu nhwehwɛmu. Nhwehwɛmu no da no adi sɛ wɔnkataa biribiara so; na wɔmfaa nhoma mmobɔwee no biara nsiei. Bere a wɔretintim nhoma mmobɔwee no fã a etwa to no, afei na wobetumi afi ase ayɛ emu nhwehwɛmu ankasa. Wɔanya nhoma mmobɔwee no ho nhomanimfo foforo. Nanso, saa nhwehwɛmu yi ho hia Bible asuafo dɛn?

[Ase hɔ nsɛm]

[Mfonini wɔ kratafa 3]

Abodan yi a ɛbɛn Po a Awu ho no ka nea wohuu tete nhoma mmobɔwee wom no ho

[Mfonini Fibea wɔ kratafa 3]

Scroll fragment: Pages 3, 4, and 6: Courtesy of Israel Antiquities Authority

[Mfonini Fibea wɔ kratafa 5]

Courtesy of Shrine of the Book, Israel Museum, Jerusalem