Hwehwɛ Yehowa Ansa Na N’abufuw Da No Aba
Hwehwɛ Yehowa Ansa Na N’abufuw Da No Aba
“Monhwehwɛ [Yehowa, “NW”], . . . Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa, “NW”] abufuw da no.”—SEFANIA 2:3.
1. Ná Yuda honhom fam tebea te dɛn bere a Sefania fii ne nkɔmhyɛ adwuma ase no?
SEFANIA fii ne nkɔmhyɛ adwuma no ase wɔ Yuda abakɔsɛm mu bere a na emu yɛ den mu. Ná ɔman no honhom fam tebea nye koraa. Sɛ anka nkurɔfo no de wɔn ho bɛto Yehowa so no, wɔhwehwɛɛ akwankyerɛ fii abosonsomfo ne nsoromma mu ahwɛfo hɔ. Ná Baalsom ne emu abawo amanne abu so wɔ asase no so. Ná ɔman no mu akannifo—mmapɔmma, atitiriw, ne atemmufo—rehyɛ nkurɔfo a ɛsɛ sɛ wɔbɔ wɔn ho ban no so. (Sefania 1:9; 3:3) Ɛnyɛ nwonwa sɛ Yehowa sii gyinae sɛ ‘ɔbɛteɛ ne nsa’ wɔ Yuda ne Yerusalem so asɛe wɔn no!—Sefania 1:4.
2. Anidaso bɛn na na ɛwɔ hɔ ma Onyankopɔn asomfo anokwafo a na wɔwɔ Yuda no?
2 Nanso, ɛmfa ho sɛ na tebea no nye no, na anidaso kakra wɔ hɔ. Amon ba, Yosia, na na odi ade saa bere no. Ná Yosia yɛ abarimaa koraa de, nanso na ɔwɔ ɔdɔ a emu yɛ den ma Yehowa. Sɛ na ɔhene foforo yi de nokware som bɛsan aba Yuda a, hwɛ sɛnea na ɛbɛyɛ abotɔyam ama nnipa kakraa bi a na wɔde nokwaredi resom nokware Nyankopɔn no! Na ebetumi aka afoforo ma wɔakɔka wɔn ho, na wɔakora wɔn nso so Yehowa abufuw da no.
Ahwehwɛde Ahorow a Ɛma Wɔkora Obi So
3, 4. Ahwehwɛde abiɛsa bɛn na na ɛsɛ sɛ obi du ho ansa na wɔakora no so wɔ ‘Yehowa abufuw da’ no mu?
3 So na wobetumi akora ankorankoro bi so wɔ Yehowa abufuw da no? Yiw, na nea ehia ne sɛ wobedi ahwehwɛde abiɛsa a wɔada no adi wɔ Sefania 2:2, 3 no so. Bere a yɛkenkan saa nkyekyem yi no, momma yɛnhyɛ ahwehwɛde ahorow yi nsow. Sefania kyerɛwee sɛ: “Mommma ahyɛde no mmma ansa, da no resen aba sɛ ntɛtɛwa, mommma [Yehowa, NW] abufuw mu gya no mmma mo so ansa, mommma [Yehowa, NW] abufuw da no mmma mo so ansa. Monhwehwɛ [Yehowa, NW], asase sofo a mobrɛ mo ho ase na moyɛ n’atemmude nyinaa! Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa, NW] abufuw da no.”
4 Sɛ wɔbɛkora obi so a, ɛnde na ɛsɛ sɛ (1) ɔhwehwɛ Yehowa, (2) ɔhwehwɛ trenee, na (3) ɔhwehwɛ ahobrɛase. Ɛsɛ sɛ yesusuw saa ahwehwɛde ahorow yi ho yiye nnɛ. Dɛn ntia? Efisɛ sɛnea Yuda ne Yerusalem hyiaa atemmu da wɔ afeha a ɛto so ason A.Y.B. mu no, saa ara na Kristoman—nokwasɛm ni, abɔnefo nyinaa—rebehyia Yehowa Nyankopɔn atemmu wɔ “ahohiahia kɛse” a ɛreba no mu. (Mateo 24:21) Ɛsɛ sɛ obiara a ɔpɛ sɛ wɔkora ne so saa bere no si gyinae pa nnɛ. Ɔkwan bɛn so? Denam Yehowa, trenee, ne ahobrɛase a ɔbɛhwehwɛ no ntɛm no so!
5. Dɛn na ‘Yehowa a yɛbɛhwehwɛ’ no nnɛ no kyerɛ?
5 Ebia wobɛka sɛ: ‘Meyɛ Yehowa Dansefo, Onyankopɔn somfo a mahyira me ho so agye asubɔ. So minnuu saa ahwehwɛde no ho dedaw?’ Nokwarem no, ɛhwehwɛ pii sen yɛn ho so a yebehyira ama Yehowa. Ná Israel yɛ ɔman a wɔahyira wɔn ho so ama Onyankopɔn, nanso wɔ Sefania bere so no, na Yudafo no nyɛ ade a ɛne saa ahosohyira no hyia. Ne saa nti, awiei koraa no, Yehowa poo ɔman no. ‘Yehowa a yɛbɛhwehwɛ’ no nnɛ no hwehwɛ sɛ yɛne no nya abusuabɔ a ɔdɔ wom denam n’asase so ahyehyɛde no a yɛde yɛn ho bɛbɔ no so. Ɛkyerɛ sɛ yebehu Onyankopɔn adwene wɔ nsɛm ho na yɛayɛ aso ama ne nsusuwii ahorow. Sɛ yesua N’asɛm yiye, dwennwen ho, na yɛde emu afotu di dwuma wɔ yɛn asetram a, na yɛhwehwɛ Yehowa. Sɛ yɛn nso yɛnam mpaebɔ so hwehwɛ Yehowa akwankyerɛ anibere so na yedi honhom kronkron no akwankyerɛ akyi a, yɛne Yehowa ntam abusuabɔ mu yɛ den, na yɛn koma bɛka yɛn ma yɛde ‘yɛn ahoɔden nyinaa’ asom no.—Deuteronomium 6:5; Galatifo 5:22-25; Filipifo 4:6, 7; Adiyisɛm 4:11.
6. Ɔkwan bɛn so na ‘yɛhwehwɛ trenee,’ na dɛn nti na eyi betumi ayɛ yiye wɔ wiase yi mu mpo?
6 Ahwehwɛde a ɛto so abien a wɔbɔɔ din wɔ Sefania 2:3 no ne sɛ ‘yɛbɛhwehwɛ trenee.’ Yɛn mu dodow no ara yɛɛ nsakrae a ɛho hia wɔ yɛn asetram sɛnea ɛbɛyɛ a yebetumi afata ama Kristofo asubɔ, nanso ɛsɛ sɛ yɛkɔ so kura Onyankopɔn trenee gyinapɛn mu yɛn nkwa nna nyinaa. Ebinom a wofii ase yiye wɔ saa kwan yi so no ama wiase nkekae asɛe wɔn. Ɛnyɛ mmerɛw sɛ yɛbɛhwehwɛ trenee, efisɛ nnipa a wobu ɔbarima ne ɔbea nna ho ɔbrasɛe, atorodi, ne bɔne afoforo sɛ nea asɛm biara nni ho atwa yɛn ho ahyia. Nanso, sɛ yenya ɔpɛ a emu yɛ den sɛ yɛbɛsɔ Yehowa ani a, ebetumi adi su biara a ɛbɛma yɛahwehwɛ wiase no anim dom denam mmɔden a yɛbɛbɔ sɛ yɛne wɔn bɛbɔ so no so. Yuda hweree Nyankopɔn anim dom esiane sɛ osuasuaa abosonsomfo aman a na atwa ne ho ahyia no nti. Ɛnde, sɛ́ anka yebesuasua wiase no, momma ‘yensuasua Onyankopɔn’ mmom, na ‘yɛnhyɛ nipasu foforo a wɔbɔɔ no Nyankopɔn suban so, nokware ne trenee ahotew mu no’ daa.—Efesofo 4:24; 5:1.
7. Ɔkwan bɛn so na ‘yɛhwehwɛ ahobrɛase’?
7 Asɛm a ɛto so abiɛsa a wɔkae wɔ Sefania 2:3 ne sɛ sɛ yɛpɛ sɛ wɔkora yɛn so wɔ Yehowa abufuw da no a, ɛsɛ sɛ ‘yɛhwehwɛ ahobrɛase.’ Da biara da no, yɛne mmarima, mmea, ne mmofra a wonni ahobrɛase di nkitaho. Wɔn fam no, ɛyɛ mfomso sɛ obi bɛbrɛ ne ho ase. Wobu ahobrɛase sɛ mmerɛwyɛ a anibere wom ankasa. Wɔhwehwɛ pii fi afoforo hɔ, wɔyɛ pɛsɛmenkominya, wɔyɛ katee, na wodi nea wobu no sɛ “hokwan” a ɛsɛ sɛ wonya ne wɔn akɔnnɔde ho dwuma ɔkwan biara so. Sɛ yɛma su a ɛtete saa bi hyɛn yɛn mu a, hwɛ awerɛhow ara a ɛbɛyɛ! Eyi ne bere a ɛsɛ sɛ ‘yɛhwehwɛ ahobrɛase.’ Ɔkwan bɛn so? Denam yɛn ho ase a yɛbɛbrɛ ama Onyankopɔn, na yɛafi ahobrɛase mu agye ne nteɛso atom na yɛayɛ n’apɛde no so.
Dɛn Nti na “Ebia” Wɔbɛkora Yɛn So?
8. Dɛn na asɛmfua “ebia” a wɔde dii dwuma wɔ Sefania 2:3 no kyerɛ?
8 Hyɛ no nsow sɛ Sefania 2:3 ka sɛ: “Ebia wɔbɛkora mo so, [Yehowa, NW] abufuw da no.” Dɛn nti na Sefania de asɛmfua “ebia” dii dwuma bere a na ɔne ‘asase no so ahobrɛasefo’ na ɛrekasa no? Wiɛ, ná saa ahobrɛasefo no atu anammɔn a ɛfata, nanso na ɛnsɛ sɛ wɔn mu biara gye ne ho di dodo. Ná wɔmfaa wɔn asetra mmaa awiei wɔ nokwaredi mu ɛ. Ná ebetumi aba sɛ wɔn mu binom bɛsan ayɛ bɔne. Ɛte saa wɔ yɛn fam. Yesu kae sɛ: “Nea obegyina akodu awiei no, ɔno na wobegye no.” (Mateo 24:13) Yiw, nkwagye a yebenya wɔ Yehowa abufuw da no mu no gyina kɔ a yɛbɛkɔ so ayɛ nea ɛteɛ wɔ n’ani so no so. So ɛno ne wo gyinaesi ankasa?
9. Anammɔn a ɛteɛ bɛn na Ɔhene Yosia a na ɔyɛ abofra no tutui?
9 Ɛte sɛ nea Sefania nsɛm no kanyan Ɔhene Yosia ma ‘ɔhwehwɛɛ Yehowa.’ Kyerɛwnsɛm no ka sɛ: “Na n’ahenni afe a ɛto so awotwe a [Yosia da so] yɛ abofra [bɛyɛ mfe 16] no, ofii ase hwehwɛɛ n’agya Dawid Nyankopɔn.” (2 Beresosɛm 34:3) Afei nso Yosia kɔɔ so ‘hwehwɛɛ trenee,’ efisɛ yɛkenkan sɛ: “Na afe a ɛto so dumien so [bere a na Yosia adi mfe 20] no, ofii ase tew Yuda ne Yerusalem ho fii sorɔnsorɔmmea ne Asera nnua ne osen ahoni ne gu ahoni no ho. Na woburuw Baalim afɔremuka no n’anim.” (2 Beresosɛm 34:3, 4) Yosia ‘hwehwɛɛ ahobrɛase’ nso, denam ahobrɛase mu a ofi yɛɛ ade de sɔɔ Yehowa ani yii ahonisom ne atoro som mu nneyɛe afoforo fii asase no so no so. Hwɛ sɛnea ɛbɛyɛ sɛ ahobrɛasefo a aka no dii saa adeyɛ yi ho ahurusi!
10. Dɛn na esii wɔ Yuda wɔ afe 607 A.Y.B. mu, nanso henanom na wonyaa wɔn ti didii mu?
10 Yudafo pii san baa Yehowa nkyɛn bere a na Yosia redi ade no. Nanso, ɔhene no wui akyi no, wɔn mu dodow no ara san kɔɔ wɔn kan abrabɔ no mu—kɔyɛɛ nneɛma a na Onyankopɔn mpɛ koraa no. Sɛnea na Yehowa ahyɛ no, wɔ afe 607 A.Y.B. mu no, Babilonfo bu faa Yuda so sɛee n’ahenkurow, Yerusalem. Nanso, na anidaso wɔ hɔ. Wɔkoraa odiyifo Yeremia, Etiopiani Ebed-Melek, Yonadab asefo, ne afoforo a na wodi Onyankopɔn nokware no so wɔ Yehowa abufuw da no mu.—Yeremia 35:18, 19; 39:11, 12, 15-18.
Onyankopɔn Atamfo—Monhyɛ no Nsow!
11. Dɛn nti na ɛnyɛ mmerɛw sɛ obi bɛkɔ so adi Onyankopɔn nokware nnɛ, na dɛn na ɛsɛ sɛ wɔn a wɔtan Yehowa nkurɔfo no susuw ho?
11 Bere a yɛretwɛn da a Yehowa behwie n’abufuw agu nhyehyɛe bɔne yi so no, ‘yɛbɛhwe sɔhwɛ ahorow mu.’ (Yakobo 1:2) Wɔ nsase a wɔkyerɛ sɛ wɔwɔ obu ma ɔsom mu ahofadi no bi so no, asɔfo a wɔwɔ nkɛntɛnso adaadaa wiase atumfoɔ no ma wɔde ɔtaa a emu yɛ den aba Onyankopɔn nkurɔfo so. Mmarima ahuhufo ka Yehowa Adansefo ho nsɛmmɔne, na wɔfrɛ wɔn “kuw a wɔn ho yɛ hu.” Onyankopɔn hu wɔn nneyɛe yi nyinaa—na ɔremma wɔmfa wɔn ho nni. Ɛbɛyɛ papa sɛ n’atamfo no susuw nea ɛtoo ne nkurɔfo atamfo a wɔtraa ase tete no te sɛ Filistifo no ho. Nkɔmhyɛ no ka sɛ: “Gasa bɛyɛ kurow a wɔagyaw, na Askalon ayɛ akurofõ; Asdod de, wobetu wɔn awia ketee, na Ekron ase nso, wobetutu.” Ná wɔbɛsɛe Filistifo nkurow Gasa, Askalon, Asdod, ne Ekron pasaa.—Sefania 2:4-7.
12. Dɛn na ɛtoo Filistea, Moab, ne Amon?
12 Nkɔmhyɛ no toa so sɛ: “Mate Moab nsopa ne Amonfo yaw a wɔde asopa me man na wɔama wɔn ho so atia wɔn hye no.” (Sefania 2:8) Nokwarem no, Misraim ne Etiopia huu amane wɔ Babilon ntuafo no nsam. Nanso atemmu bɛn na Onyankopɔn de baa Moab ne Amon, aman a wofi Abraham wɔfase Lot mu, no so? Yehowa hyɛɛ nkɔm sɛ: “Moab bɛdan sɛ Sodom, na Amonfo ayɛ sɛ Gomora.” Nea ɛnte sɛ wɔn nananom mmea—Lot mmabea baanu a wonyaa wɔn ti didii mu wɔ Sodom ne Gomora sɛe mu—no, wɔrenkora Moab ne Amon a na wɔyɛ ahantan no so wɔ Onyankopɔn atemmu a ɛyɛ hu no mu. (Sefania 2:9-12; Genesis 19:16, 23-26, 36-38) Ɛhe na Filistea ne ne nkurow no wɔ nnɛ? Na Moab ne Amon a bere bi na wɔyɛ ahantan no nso ɛ? Wobɛhwehwɛ wɔn, nanso worenhu wɔn.
13. Dɛn na wotutuu fam hui wɔ Niniwe?
13 Wɔ Sefania bere so no, na Asiria Ahemman no adu ne mpɔmpɔnso. Bere a Austen Layard a otutu fam hwehwɛ tetefo nneɛma mu reka ahemfie no fã bi a okohui wɔ Asiria ahenkurow Niniwe mu ho asɛm no, ɔkyerɛwee sɛ: “Ná wɔakyekyɛ adan no nsɛmso . . . no mu ahinanan ahinanan, na wɔadi nhwiren anaa mmoa adwinni agu so de asiesie mu. Ná wɔde asonse asiesie ebi mu, na na wɔde nneɛma a ɛyɛ fɛ asiesie ɔdan no biara mu. Ná wɔde sika ne dwetɛ; ne nnua a ɛho yɛ nã sen biara, te sɛ kyeneduru, ayeyɛ adan no mpuran ne n’afã nyinaa.” Nanso, sɛnea na wɔayɛ ho kyerɛwtohɔ wɔ Sefania nkɔmhyɛ mu no, na wɔbɛsɛe Asiria, na n’ahenkurow, Niniwe, bɛdan “amamfõ.”—Sefania 2:13.
14. Ɔkwan bɛn so na Sefania nkɔmhyɛ no nyaa mmamu wɔ Niniwe so?
14 Sefania kaa saa nsɛm yi akyi mfe 15 pɛ no, wɔsɛee Niniwe a ɛyɛ den no, dwiriw n’ahemfie no gui. Yiw, wɔsɛee ahantan kurow no pasaa. Wɔkaa sɛnea na kurow no bɛsɛe afa ho asɛm sɛ: “Pokupoku ne, apɛsɛe nso bɛtra n’adum no so; wɔbɛte nnomaa sũ mfɛnsere mu, nwura dodow begugu apongua ase.” (Sefania 2:14, 15) Niniwe adan a ɛyɛ fɛ no bɛyɛ apɛsɛe ne pokupoku trabea. Nea wɔnte ho asɛm bio wɔ kurow no mmɔnten so ne aguadi, akofofo nnwonto, ne asɔfo nteɛm. Ɛnne a na wɔbɛte wɔ mfɛnsere mu ara ne nnwom a aba nnim, nnomaa sũ a ɛyɛ awerɛhow ne dede a mframa yɛ wɔ beae a kan no, na nkurɔfo di akɔneaba a adagyew nnim koraa wɔ hɔ no. Ɛmmra sɛ Onyankopɔn atamfo nyinaa awiei bɛba saa kwan no so!
15. Dɛn na yebetumi asua afi nea ɛtoo Filistea, Moab, Amon, ne Asiria no mu?
15 Dɛn na yebetumi asua afi nea ɛtoo Filistea, Moab, Amon, ne Asiria no mu? Ɛne sɛ: Sɛ́ Yehowa asomfo no, biribiara nni hɔ a enti ɛsɛ sɛ yesuro yɛn atamfo. Onyankopɔn hu nea wɔn a wɔsɔre tia ne nkurɔfo yɛ no. Yehowa yɛɛ ade tiaa n’atamfo tete no, na ɔde n’atemmu bɛba asase sofo nyinaa so nnɛ. Nanso ebinom benya wɔn ti adidi mu—‘nnipakuw kɛse a wofi aman nyinaa mu no.’ (Adiyisɛm 7:9) Wubetumi aka wɔn ho—nanso gye sɛ wokɔ so hwehwɛ Yehowa, hwehwɛ trenee, na wohwehwɛ ahobrɛase.
Adebɔneyɛfo a Wɔhoahoa Wɔn Ho Nnue!
16. Dɛn na Sefania nkɔmhyɛ no ka fa Yuda mmapɔmma, ne nyamesom akannifo no ho, na dɛn nti na eyi fata Kristoman?
16 Sefania nkɔmhyɛ no san twe adwene si Yuda ne Yerusalem so. Sefania 3:1, 2, ka sɛ: “Due, atuatew kurow a wɔahura ho, nhyɛsofo kurow. Wante asɛm, wannye nteɛso, wamfa ne ho anto [Yehowa, NW] so, wammɛn ne Nyankopɔn.” Hwɛ awerɛhow a ɛyɛ sɛ Yehowa nkurɔfo buu wɔn ani guu mmɔden a ɔbɔe sɛ ɔbɛteɛ wɔn so no so! Na mmapɔmma, anuonyamfo, ne atemmufo no atirimɔdenne no yɛ aniwu ankasa. Sefania kasa tiaa nyamesom akannifo no ani a na enwu ade no sɛ: “N’adiyifo yɛ ahohoahoafo, nkɔnkɔnsafo ara nko, n’asɔfo hura kronkronbea ho, wodi mmara ho asɛmmɔne.” (Sefania 3:3, 4) Hwɛ sɛnea saa nsɛm yi ka Kristoman adiyifo ne asɔfo a wɔwɔ hɔ nnɛ no ho asɛm ma ɛfata! Wofi ahantan mu ayi Onyankopɔn din afi wɔn Bible nkyerɛase ahorow mu, na wɔakyerɛkyerɛ nkyerɛkyerɛ a egu Onii a wɔkyerɛ sɛ wɔsom no no ho fĩ.
17. Sɛ́ ebia nkurɔfo betie anaasɛ wɔrentie no, dɛn nti na ɛsɛ sɛ yɛkɔ so ka asɛmpa no?
17 Yehowa fi mmɔborohunu mu bɔɔ ne nkurɔfo a wɔtraa ase tete no kɔkɔ wɔ ade a na ɔrebɛyɛ no ho. Ɔsomaa n’asomfo adiyifo—Sefania ne Yeremia ne afoforo pii—sɛ wɔnkɔhyɛ nkurɔfo no nkuran mma wɔnsakra wɔn adwene. Yiw, “[Yehowa, NW] . . . ɔrenyɛ abusude; daa anɔpa ɔde n’atemmu ba hann mu, onnyae da.” Dɛn na efii mu bae? Sefania kae sɛ: “Nanso ɔkɔntɔnkyeni nnim aniwu.” (Sefania 3:5) Kɔkɔbɔ a ɛte saa ara rekɔ so nnɛ. Sɛ woyɛ asɛmpa no ho dawurubɔfo a, worenya saa kɔkɔbɔ yi mu kyɛfa. Kɔ so ka asɛmpa no a wunnyae! Sɛ nkurɔfo tie o, wɔantie o, Onyankopɔn bu no sɛ woayɛ wo som adwuma no, bere tenten a wode nokwaredi yɛ no; ɛho nhia sɛ w’ani wu bere a wode nsi reyɛ Onyankopɔn adwuma no.
18. Ɔkwan bɛn so na Sefania 3:6 benya mmamu?
18 Ɛnyɛ Kristoman nkutoo na Onyankopɔn bebu wɔn fɔ asɛe wɔn. Yehowa trɛw ne kasatia no mu ma ɛka aman nyinaa sɛ: “Matwitwa amanaman agu, wɔn abantenten atifi adannan afõ, mama wɔn mmorɔn so adeda mpan a obiara ntwam hɔ, wɔasɛesɛe wɔn nkurow.” (Sefania 3:6) Saa nsɛm yi yɛ nokware araa ma Yehowa ka ɔsɛe no ho asɛm sɛ nea asi dedaw. Dɛn na ɛtoo Filistea, Moab, ne Amon, nkurow no? Na Asiria ahenkurow, Niniwe, nso ɛ? Ɔsɛe a ɛbaa wɔn so no yɛ kɔkɔbɔ ma aman a wɔwɔ hɔ nnɛ no. Onyankopɔn wonsi no atwetwe.
Kɔ so Hwehwɛ Yehowa
19. Nsɛmmisa a ɛkanyan adwene bɛn na yebetumi abisa?
19 Wɔ Sefania bere so no, Onyankopɔn hwiee n’abufuw guu wɔn a wɔnam kwammɔne so “sɛesɛee wɔn nneyɛe nyinaa” no so. (Sefania 3:7) Saa ara na ɛbɛba wɔ yɛn bere yi so. So wuhu adanse a ɛkyerɛ sɛ Yehowa abufuw da no abɛn no? So wugu so ‘rehwehwɛ Yehowa’ denam N’asɛm a wokenkan no—daa—so? So ‘wohwehwɛ trenee’ denam abrabɔ pa a wode tra ase ma ɛne Onyankopɔn gyinapɛn ahorow hyia so? Na so ‘worehwehwɛ ahobrɛase’ denam odwo ne ahobrɛase a woda no adi wɔ Onyankopɔn ne ne nhyehyɛe ma nkwagye ho no so?
20. Nsɛmmisa bɛn na yebesusuw ho wɔ Sefania nkɔmhyɛ ho adesua a edidi so yi asɛm a etwa to no mu?
20 Sɛ yɛde nokwaredi kɔ so hwehwɛ Yehowa, trenee, ne ahobrɛase a, yebetumi ahwɛ nhyira pii kwan nnɛ—yiw, wɔ “nna a edi akyiri” a wɔsɔ yɛn gyidi hwɛ yi mu mpo. (2 Timoteo 3:1-5; Mmebusɛm 10:22) Saa ara nso na yebetumi abisa sɛ, ‘Akwan bɛn so na wɔrehyira yɛn sɛ Yehowa nnɛyi asomfo, na daakye nhyira bɛn na Sefania nkɔmhyɛ no de si wɔn a wɔbɛkora wɔn so wɔ Yehowa abufuw da a ɛreba ntɛmntɛm mu no anim?’
Wubebua Dɛn?
• Ɔkwan bɛn so na nkurɔfo ‘hwehwɛ Yehowa’?
• Dɛn na ‘trenee a wɔhwehwɛ’ no kyerɛ?
• Ɔkwan bɛn so na yebetumi ‘ahwehwɛ ahobrɛase’?
• Dɛn nti na ɛsɛ sɛ yɛkɔ so hwehwɛ Yehowa, trenee, ne ahobrɛase?
[Adesua no ho Nsɛmmisa]
[Mfonini wɔ kratafa 18]
So wonam Bible adesua ne mpae a wobɔ no anibere so rehwehwɛ Yehowa?
[Mfonini wɔ kratafa 21]
Esiane sɛ wɔkɔɔ so hwehwɛɛ Yehowa nti, nnipakuw kɛse bi benya wɔn ti adidi mu n’abufuw da no