Sɛnea Wubenya Nokware Anigye

BUDDHASOM kannifo, Dalai Lama, kae sɛ: “Migye di sɛ asetra atirimpɔw ankasa ne sɛ yɛbɛhwehwɛ anigye.” Afei ɔkyerɛkyerɛɛ mu sɛ ogye di sɛ yebetumi anya anigye denam yɛn adwene ne yɛn koma a yɛbɛtete no na yɛateɛ so so. Ɔkae sɛ: “Adwene ne adwinnade titiriw a yehia na ama yɛn nsa aka anigye a edi mu.” Osusuw sɛ Onyankopɔn mu gyidi ho nhia. *

Nea ɛne no bɔ abira no, susuw Yesu a na ɔwɔ Onyankopɔn mu gyidi a ɛyɛ den, na ne nkyerɛkyerɛ anya nnipa ɔpepem pii so nkɛntɛnso wɔ mfehaha no mu no ho hwɛ. Ná anigye a nnipa benya ho hia Yesu. Ɔde nsɛm a ɛma anigye akron—nsɛm akron a efi ase sɛ: “Anigye ne . . .” na efii ne Bepɔw so Asɛnka a agye din yiye no ase. (Mateo 5:1-12, NW) Wɔ saa ɔkasa koro no ara mu no, ɔkyerɛkyerɛɛ n’atiefo sɛ wɔnhwehwɛ, wɔntew wɔn adwene ne wɔn koma ho na wɔnteɛ so—na wɔmfa nsusuwii a ɛde asomdwoe, ahotew ne ɔdɔ ba nsi nea ɛde basabasayɛ, ɔbrabɔne, ne pɛsɛmenkominya ba no ananmu. (Mateo 5:21, 22, 27, 28; 6:19-21) Sɛnea akyiri yi n’asuafo no biako hyɛɛ nkuran no, ɛsɛ sɛ ‘yɛkɔ so dwen’ nneɛma a ɛyɛ ‘nokware, anim yɛ duru, ɛteɛ, ɛho tew, ɛwɔ ɔdɔ, ɛwɔ din pa, ɔbra pa, ne nea ɛsɛ ayeyi ho.’—Filipifo 4:8.

Ná Yesu nim sɛ nokware anigye fi abusuabɔ a yɛne afoforo nya mu. Yɛn a yɛyɛ nnipa no fi awosu mu pɛ fekubɔ, enti sɛ yɛtew yɛn ho fi afoforo ho anaasɛ bere nyinaa yɛne wɔn a wɔbɛn yɛn nko ara na ɛbɔ a, yentumi nnya anigye ankasa. Sɛ yɛte nka sɛ afoforo dɔ yɛn na sɛ yɛn nso yɛdɔ afoforo a, yɛn ani betumi agye. Ade titiriw a ɛhyɛ ɔdɔ a ɛte saa a Yesu kyerɛkyerɛe no akyi ne yɛne Onyankopɔn ntam abusuabɔ. Ɛha titiriw na yehu nsonsonoe a ɛda Dalai Lama ne Yesu nkyerɛkyerɛ no ntam, efisɛ Yesu kyerɛe sɛ nnipa ntumi ntew wɔn ho mfi Onyankopɔn ho nnya anigye. Dɛn nti na ɛte saa?—Mateo 4:4; 22:37-39.

Susuw Wo Honhom Fam Ahiade Ho

Nsɛm a ɛma anigye no mu biako ni: “Anigye ne wɔn a wɔn honhom mu nneɛma ho hia wɔn.” (Mateo 5:3, NW) Dɛn nti na Yesu kaa eyi? Efisɛ, esiane sɛ yɛnte sɛ mmoa nti, yɛwɔ honhom fam ahiade ahorow. Esiane sɛ wɔbɔɔ yɛn wɔ Onyankopɔn suban so nti, yebetumi anya Onyankopɔn su ahorow te sɛ ɔdɔ, atɛntrenee, mmɔborohunu, ne nyansa. (Genesis 1:27; Mika 6:8; 1 Yohane 4:8) Nea ɛka yɛn honhom fam ahiade ahorow ho ne hia a ehia sɛ yenya atirimpɔw wɔ yɛn asetram.

Yɛbɛyɛ dɛn atumi anya honhom fam ahiade ahorow a ɛte saa? Ɛnnam nsusuwii hunu anaa obi ho mu a ɔbɛhwehwɛ kɛkɛ so. Mmom no, Yesu kae sɛ: “Ɛnyɛ abodoo nko so na onipa nam bɛtra ase, na asɛm biara a efi [Yehowa, NW]  anom so.” (Mateo 4:4) Hyɛ no nsow sɛ Yesu kae sɛ “asɛm biara” a ehia ma yɛn asetra no fi Onyankopɔn hɔ. Nsɛm bi wɔ hɔ a, Onyankopɔn nkutoo na obetumi aboa yɛn ma yɛanya ho mmuae. Saa nhumu no aba bere pa mu esiane asetra atirimpɔw ho adwenkyerɛ ne ɔkwan a wɔfa so nya anigye a adɔɔso no nti. Wɔde nhoma a ɛhyɛ akenkanfo bɔ sɛ wobenya akwahosan pa, ahode, ne anigye hyɛ nhomatɔnbea ma. Wɔahyehyɛ mmeae bi wɔ Intanɛt so a ɛka anigye nkutoo ho asɛm.

Nanso nnipa adwene nkutoo a wɔde yɛ ade wɔ eyi mu no ntaa nyɛ nea ɛteɛ. Ɛtɔ kɔ pɛsɛmenkominya akɔnnɔ anaa ahopɛ so. Egyina nimdeɛ ne osuahu a enni mu so, na ɛtaa gyina nsusuwii hunu so. Sɛ nhwɛso no, nea ɛrekɔ so wɔ wɔn a wɔkyerɛw akwankyerɛ nhoma ahorow mu ne sɛ wɔde wɔn nsɛm anaa wɔn nsusuwii begyina “adwene ne nneyɛe ho nimdeɛ a egyina adannandi so” so, a ɛkyerɛ sɛ nnipa nkate fi yɛn nananom a na wɔyɛ mmoa no mu. Nokwasɛm no ne sɛ, mmɔden biara a wɔbɔ sɛ wɔde bɛhwehwɛ anigye a egyina nkyerɛkyerɛ a ebu ani gu yɛn Bɔfo so no so ntumi nyɛ papa, na ɛbɛkɔ akowie huammɔdi mu ɔkwan biara so. Tete diyifo bi kae sɛ: “Anyansafo ani bewu. . . . Hwɛ, [Yehowa, NW] asɛm na wɔapa yi, na nyansa bɛn na wɔwɔ?”—Yeremia 8:9.

Yehowa Nyankopɔn nim sɛnea yɛte, ne nea ɛbɛma yɛn ani agye ankasa. Onim nea enti a ɔde onipa too asase so ne nea ɛbɛba daakye, na ɔka saa asɛm no kyerɛ yɛn wɔ Bible mu. Nea ɔda no adi wɔ saa nhoma a wofi honhom mu kyerɛwee mu no kanyan ankorankoro a wɔwɔ koma pa no, na ɛma wɔn ani gye. (Luka 10:21; Yohane 8:32) Saa na ɛtoo Yesu asuafo baanu bi. Bere a Yesu wui no, wɔyɛɛ basaa. Nanso bere a wɔtee nea Yesu ankasa ka faa dwuma a obedi wɔ Onyankopɔn atirimpɔw ma adesamma nkwagye mu ho fii Yesu a wɔanyan no afi awufo mu anom no, wɔkae sɛ: “Ɔne yɛn rekasa ɔkwan mu na obuee kyerɛw nsɛm no mu kyerɛɛ yɛn no, yɛn koma anhyehye yɛn wɔ yɛn mu anaa?”—Luka 24:32.

Sɛ yɛma Bible mu nokware kyerɛ yɛn asetra kwan a, anigye a ɛte saa no yɛ kɛse. Eyi ho no, yebetumi de anigye atoto nyankontɔn ho. Ɛto wɔ bere a ewim tebea ye, nanso sɛ wim ye paa a, ɛhyerɛn kɛse—na etumi yɛ nyankontɔn abien. Afei momma yɛnhwɛ sɛnea Bible nkyerɛkyerɛ a yɛde bedi dwuma no betumi ama yɛn anigye ayɛ kɛse no ho nhwɛso kakraa bi.

Kwati Akɛsesɛm Wɔ W’asetra Mu

Nea edi kan no, susuw Yesu afotu a ɛfa ahonyade ho no ho hwɛ. Bere a wakasa atia ahonyade akyidi a yɛbɛma ayɛ asetra mu ade titiriw no, ɔkaa asɛm soronko bi. Ɔkae sɛ: “Enti sɛ w’ani ye a, wo nipadua nyinaa bɛyɛ hann.” (Mateo 6:19-22) Nea ɔkae titiriw ara ne sɛ sɛ yedi ahonyade, tumi, anaa botae ahorow a nkurɔfo de sisi wɔn ani so no akyi a, yɛbɛhwere nneɛma a eye koraa  no. Efisɛ sɛnea Yesu kae bere foforo bi no, “ɛnyɛ onipa ade a wanya na aboro so no mu na ne nkwa wɔ.” (Luka 12:15) Sɛ yɛde nneɛma a ehia ankasa te sɛ yɛne Onyankopɔn ntam abusuabɔ, abusua ahiade, ne nneɛma a ɛtete saa di kan a, ɛno na yɛn “ani” bɛyɛ nea ‘eye,’ a biribiara nkataa so.

Hyɛ no nsow sɛ na ɛnyɛ sɛ Yesu rehyɛ ahotua anaa biribi a obi de bɛkame ne ho denneennen ho nkuran. Efisɛ na Yesu ankasa nyɛ ɔhotuafo. (Mateo 11:19; Yohane 2:1-11) Mmom no, ɔkyerɛkyerɛe sɛ wɔn a wobu asetra sɛ hokwan a wɔde pɛ ahonyade pii ara kwa no hwere asetram biribiara.

Bere a adwene ne nneyɛe ho nimdefo bi a ɔwɔ San Francisco, U.S.A., reka nkurɔfo a wonya wɔn ho ntɛm wɔ asetram no ho asɛm no, ɔkae sɛ sika na “egyaw nkurɔfo adwennwene na ɛma wɔn ani so tan wɔn.” Ɔde kaa ho sɛ, saa nkurɔfo yi “totɔ afie abien anaa abiɛsa, kar, na wɔsɛe sika wɔ nneɛma ho. Na sɛ ɛno amma ansi wɔn yiye [kyerɛ sɛ, amma wɔannya anigye] a, wɔhaw, wɔn aba mu bu, na wonhu nea wɔnyɛ wɔ asetra mu.” Nea ɛne no bɔ abira no, ɛda adi sɛ wɔn a wotie Yesu afotu a ɛne sɛ wonnni honam fam nneɛma akyi pii na mmom wɔmfa honhom fam nneɛma nka ho no betumi anya nokware anigye koraa.

Tom, a osisi adan wɔ Hawaii, tuu ne ho mae sɛ obesisi mmeae a wɔsom wɔ Pacific nsupɔw a ɛhɔfo nni honam fam nneɛma pii no so. Tom hyɛɛ biribi nsow wɔ nkurɔfo a wɔn ho dwo yi ho. Ɔkae sɛ: “Na me nuanom Kristofo mmarima ne mmea a wɔwɔ nsupɔw yi so no wɔ anigye ankasa. Wɔboaa me ma mihuu pefee sɛ ɛnyɛ sika ne ahonyade na ɛde anigye ba.” Afei nso ɔhwɛɛ wɔn a wɔatu wɔn ho ama a wɔne no yɛ adwuma wɔ nsupɔw no so no ne sɛnea wɔwɔ abotɔyam no. Tom kae sɛ: “Anka wobetumi anya sika pii. Nanso wɔpawee sɛ wɔde honhom fam nneɛma bedi kan na wɔama wɔn asetra ayɛ nea ɛkwati akɛsesɛm.” Esiane sɛ nhwɛso horow yi kaa Tom nti no, ɔno ankasa yɛɛ ne ho awiɛmfoɔ sɛnea ɛbɛyɛ a obenya bere pii ama n’abusua ne honhom fam nneɛma—adeyɛ a onnuu ne ho wɔ ho da.

Anigye ne Obu a Yebenya Ama Yɛn Ho

Ade a ehia na ama obi anya anigye ne sɛ obenya obu anaa nidi ama ne ho. Esiane nnipa sintɔ ne mmerɛwyɛ a efi mu ba nti, ebinom mmu wɔn ho, na wɔ pii fam no, saa nkate no fi wɔn mmofraase. Ebetumi ayɛ den sɛ obi bedi nkate a atra ne mu akyɛ a ɛte saa so, nanso ebetumi ayɛ yiye. Ano aduru ne sɛ yɛde Onyankopɔn Asɛm bedi dwuma.

Bible kyerɛkyerɛ sɛnea Ɔbɔadeɛ no te nka wɔ yɛn ho fa mu. So ne nsusuwii ho nhia nsen onipa biara de—yɛn ankasa de mpo? Onyankopɔn a ɔyɛ ɔdɔ no nnya yɛn ho tan anaa adwemmɔne. Ogye yɛn tom nim sɛnea yɛte nso. (1 Samuel 16:7; 1 Yohane 4:8) Nokwarem no, wɔn a wɔpɛ sɛ wɔsɔ n’ani no som bo ma no, yiw, wɔn sintɔ ahorow nyinaa akyi no, n’ani gye wɔn ho.—Daniel 9:23; Hagai 2:7.

Ɛwom, Onyankopɔn mmu n’ani ngu yɛn mmerɛwyɛ ne bɔne biara a yɛyɛ so. Ɔhwɛ kwan sɛ yɛbɛbɔ mmɔden yiye ayɛ nea ɛteɛ, na sɛ yɛyɛ saa a, ɔboa yɛn. (Luka 13:24) Nanso Bible no ka sɛ: “Sɛ agya yam hyehye no mma ho no, sɛ [Yehowa, NW] yam yɛ no wɔn a wosuro no ho ne no.” Ɛsan ka sɛ: “Yah, sɛ wudi amumɔyɛde  akyi a, [Yehowa, NW] hena na anka obegyina? Na wo na fafiri wɔ wo fam, na wɔasuro wo.”—Dwom 103:13; 130:3, 4.

Enti sua sɛ wubehu wo ho sɛnea Onyankopɔn hu wo no. Hu a obi behu sɛ wɔn a wɔdɔ Onyankopɔn no som bo ma no na ɔwɔ wɔn mu ahotoso—ɛmfa ho sɛ wommu wɔn ho—no, betumi ama onii no anigye ayɛ kɛse.—1 Yohane 3:19, 20.

Anidaso—Ɛho Hia Ma Anigye

Adwene a ɛte saa na ɛwɔ nsusuwii a nnansa yi wɔahyɛ ho nkuran a wɔato din adwene ne nneyɛe mu ahotoso mu sɛ, sɛ obi nya adwempa na ɔde n’adwene si nea obetumi ayɛ so a, ebetumi ama wanya anigye. Nnipa kakraa bi pɛ na wobegye kyim aka sɛ sɛ yenya asetra ne daakye ho adwempa a ɛmma yɛn anigye nyɛ kɛse. Nanso, ɛsɛ sɛ akwanhwɛ a ɛte saa no gyina nokwasɛm so, ɛnyɛ nsusuwii hunu biara kwa. Ne nyinaa akyi no, nneɛma pa a yɛbɛhwɛ kwan anaa adwempa a yebenya no nkutoo ntumi nyi akodi, ɔkɔm, ɔyare, efĩ, mpanyinyɛ, anaa owu—nneɛma a ɛmma nnipa pii nnya anigye—no mfi hɔ. Nanso nneɛma pa a yɛbɛhwɛ kwan no wɔ dwuma a edi.

Anigyesɛm ne sɛ, ɛnyɛ nneɛma pa a wɔhwɛ kwan na Bible de di dwuma; ɛde asɛmfua a emu yɛ duru—anidaso—na edi dwuma. Vine’s Complete Expository Dictionary kyerɛ “anidaso” ase sɛnea wɔde di dwuma wɔ Bible mu no sɛ “ahotoso pa a wɔde hwɛ biribi kwan, . . . anigye a wɔde hwɛ adepa kwan.” Sɛnea wɔde di dwuma wɔ Bible mu no, anidaso kyerɛ pii sen adwempa a wɔde hwɛ tebea bi kwan ara kwa. Ɛsan kyerɛ ade a obi de n’ani to so. (Efesofo 4:4; 1 Petro 1:3) Sɛ nhwɛso no, Kristofo anidaso ne sɛ ɛrenkyɛ wobeyi nneɛma bɔne a wɔabobɔ din wɔ nkyekyem a edi eyi anim no mu nyinaa afi hɔ. (Dwom 37:9-11, 29) Nanso pii ka ho.

Kristofo hwɛ bere a nnipa anokwafo benya asetra a ɛyɛ pɛ wɔ paradise asase so kwan. (Luka 23:42, 43) Bere a Adiyisɛm 21:3, 4 retrɛw saa anidaso no mu no, ɛka sɛ: “Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, . . . Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”

Ɛsɛ sɛ obiara a ɔhwɛ kwan sɛ obenya daakye a ɛte saa no ani gye, ɛmfa ho mpo sɛ n’ani nnye ne tebea a ɔwom ho no. (Yakobo 1:12) Ɛnde dɛn nti na wonhwehwɛ Bible mu nhwɛ nea enti a wubetumi anya mu gyidi. Hyɛ w’anidaso mu den denam bere a wubegye da biara de akenkan Bible no so. Saa a wobɛyɛ no bɛma woayɛ den honhom fam, na ɛbɛboa wo ma woakwati nneɛma a ɛmma nkurɔfo nnya anigye no, na ama woanya abotɔyam. Yiw, ade a ɛde nokware anigye ba ankasa ne sɛ wobɛyɛ Onyankopɔn apɛde. (Ɔsɛnkafo 12:13) Asetra a wobɛma agyina Bible nnyinasosɛm ahorow so no yɛ asetra a anigye wom efisɛ Yesu kae sɛ: “Anigye ne wɔn a wɔte Onyankopɔn asɛm na wodi so.”—Luka 11:28, NW.

[Ase hɔ asɛm]

[Mfonini ahorow wɔ kratafa 5]

Ɛnyɛ ahonyade a wubenya, wo ho a wobɛtew afi afoforo ho, anaa nnipa nimdeɛ a ɛtɔ sin mu ahotoso a wubenya na ɛbɛma woanya anigye

[Mfonini wɔ kratafa 6]

Asetra a egyina Onyankopɔn Asɛm a wodi so so yɛ asetra a anigye wom

[Mfonini wɔ kratafa 7]

Kristofo anidaso no ma obi nya anigye