“Awurade Anyan Ampa”

Hwɛ sɛnea Yesu asuafo no werɛ howee bere a wokum wɔn Wura no. Wɔn anidaso wui te sɛ nipadua a nkwa nnim a Yosef a ofi Arimatea de too ɔboda mu no. Anidaso biara a na wɔwɔ sɛ Yesu begye Yudafo no afi Romafo kɔndua ase no nso wui.

SƐ SAA ara na asɛm no kowiei a, anka ebia Yesu asuafo no bɛyera te sɛ atoro Mesia pii a wɔsɔree no asuafo no ara pɛ. Nanso, na Yesu te ase! Sɛnea Kyerɛwnsɛm no kyerɛ no, oyii ne ho adi kyerɛɛ n’akyidifo no mpɛn pii wɔ ne wu akyi bere tiaa bi. Enti, ɛkaa wɔn mu binom ma wɔkae sɛ: “Awurade anyan ampa.”—Luka 24:34.

Wɔmaa asuafo no dii wɔn gyidi a ɛne sɛ Yesu ne Mesia no ho adanse. Ne saayɛ mu no, wɔtwee adwene sii ne wusɔre no so titiriw sɛ ɛne adanse a emu yɛ den a ɛkyerɛ sɛ ɔne Mesia no. Nokwarem no, “asomafo no de tumi kɛse dii Awurade Yesu sɔre ho adanse.”—Asomafo no Nnwuma 4:33.

Sɛ obi tumi de adanse mae sɛ saa owusɔre yi yɛ atoro—ebia otumi maa asuafo no biako gye toom sɛ ɛyɛ atoro anaasɛ ɔdaa no adi sɛ Yesu nipadua no kaa ɔboda no mu—a, anka Kristosom dii nkogu mfiase no ara. Nanso, anni nkogu. Esiane sɛ na Yesu asuafo no nim sɛ Kristo te ase nti, wɔkaa ne wusɔre no ho asɛm wɔ baabiara, na nnipa pii begyee Kristo wusɔre no dii.

 Dɛn nti na wo nso wubetumi anya Yesu wusɔre no mu gyidi? Adanse bɛn na ɛwɔ hɔ a ɛkyerɛ sɛ eyi yɛ asɛm a esii ankasa?

Dɛn Nti na Ɛsɛ sɛ Wususuw Adanse Ahorow no Ho?

Nsɛmpa anan no nyinaa bɔɔ Yesu wusɔre no ho amanneɛ. (Mateo 28:1-10; Marko 16:1-8; Luka 24:1-12; Yohane 20:1-29) * Kristofo Hela Kyerɛwnsɛm no afã foforo ka Kristo a wonyan no fii awufo mu ho asɛm pefee.

Ɛnyɛ nwonwa sɛ Yesu akyidifo abɔ ne wusɔre no ho dawuru! Sɛ Onyankopɔn nyanee no ampa a, ɛnde na ɛyɛ anwonwasɛm a ɛsen biara a wiase no ate pɛn. Ɛkyerɛ sɛ Onyankopɔn wɔ hɔ. Afei nso, ɛkyerɛ sɛ Yesu te ase mprempren.

Ɔkwan bɛn so na ɛno fa yɛn ho? Wiɛ, Yesu bɔɔ mpae sɛ: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Yiw, yebetumi anya Yesu ne N’agya ho nimdeɛ a ɛma nkwa no. Sɛ yɛde nimdeɛ a ɛte saa di dwuma, na sɛ yewu mpo a, wobetumi anyan yɛn, esiane sɛ wonyanee Yesu nti. (Yohane 5:28, 29) Yebetumi anya daa nkwa wɔ paradise asase so wɔ Onyankopɔn soro Ahenni a ɛwɔ ne Ba a wɔahyɛ no anuonyam, Yesu Kristo, ahene mu Hene nsam no mu anidaso.—Yesaia 9:6, 7; Luka 23:43; Adiyisɛm 17:14.

Enti, afei, asɛm a ɛne sɛ ebia Yesu sɔre fii awufo mu ankasa no yɛ asɛm a ɛho hia. Ɛfa asetra a yɛwom mprempren ne yɛn daakye anidaso ho. Ɛno nti na yɛto nsa frɛ wo sɛ hwehwɛ adanse ahorow anan a ɛkyerɛ sɛ Yesu wui na wonyanee no no mu no.

Yesu Wui Wɔ Dua so Ampa

Akyinnyegyefo bi kyerɛ sɛ, wɔde Yesu fam dua ho de, nanso wanwu ankasa wɔ dua no ho. Wɔkyerɛ sɛ wu na anka ɔreyɛ awu, na esiane ɔboda no mu nwini nti, n’ani so tetew no. Nanso, adanse biara a ɛwɔ hɔ da no adi sɛ Yesu nipadua a na nkwa nnim no na wɔde too ɔboda no mu.

Esiane sɛ wokum Yesu baguam nti, na adansefo pii wɔ hɔ a ɛkyerɛ sɛ owui wɔ dua so ankasa. Asraafo ha so panyin a na ɔwɔ baabi a wokum no hɔ no dii ne wu no ho adanse. Na ɔsraani panyin no yɛ obi a onim adwuma a nea na ɛka n’adwuma ho ne sɛ otumi kyerɛ sɛ obi awu ankasa. Afei nso, osii so dua sɛ Yesu awu no ansa na Roma Amrado Pontio Pilato de Yesu amu no rema Yosef a ofi Arimatea sɛ onkosie no.—Marko 15:39-46.

Na Hwee Nni Ɔboda no Mu

Ɔboda a na hwee nnim no na ɛmaa asuafo no nyaa adanse a edi kan sɛ Yesu anyan, na saa adanse yi yɛ nea wontumi nnye ho kyim. Wosiee Yesu wɔ ɔboda foforo koraa, nea na wonsiee obiara wom da, mu. Na ɛbɛn baabi a wɔbɔɔ no asɛnduam no, na na ɛnyɛ den koraa sɛ wobehu saa bere no. (Yohane 19:41, 42) Nsɛmpa kyerɛwtohɔ no nyinaa ka sɛ bere a Yesu nnamfo baa ɔboda no ho wɔ ne wu akyi anɔpa a ɛto so abien no, na n’amu no nni hɔ.—Mateo 28:1-7; Marko 16:1-7; Luka 24:1-3; Yohane 20:1-10.

Ɔboda a na hwee nnim no maa Yesu atamfo ho dwiriw wɔn, sɛnea ne nnamfo no ho dwiriw wɔn ara pɛ no. Na n’atamfo fi bere tenten na abɔ mmɔden sɛ wɔbɛma wɔakum no asie no. Bere a wonyaa nea wɔhwehwɛ no, wɔbɔɔ mmɔden de awɛmfo kɔwɛnee, na wosiw ɔboda no ano. Nanso, dapɛn no da a edi kan anɔpa no, na hwee nnim.

So Yesu nnamfo no na wɔfaa n’amu no fii ɔboda no mu? Entumi mma saa, efisɛ Nsɛmpa  no da no adi sɛ wokum no akyi no, wɔhaw kɛse. Afei nso, anka ɛbɛyɛ den sɛ n’asuafo no begyina ɔtaa ano ma wɔakum wɔn wɔ biribi a na wonim sɛ ɛyɛ atoro ho.

Hena na okoyii amu no fii ɔboda no mu? Ɛda adi sɛ na ɛbɛyɛ den sɛ Yesu atamfo no bɛkɔ akoyi amu no. Akyinnye biara nni ho sɛ, sɛ wɔn na wokoyii mpo a, anka wɔde bɛkyerɛ akyiri yi de akyerɛ sɛ ka a asuafo no reka sɛ Yesu asɔre afi awufo mu na ɔte ase no nyɛ nokware. Nanso biribi a ɛte saa ansi, efisɛ Onyankopɔn na ɔyɛɛ adwuma no.

Yesu atamfo no ansɔre annyina annye akyinnye denneennen bere a adapɛn bi akyi Petro dii adanse sɛ: “Israel mmarima, muntie nsɛm yi! Yesu, Nasareni no, ɔbarima a Onyankopɔn de ahoɔdenne ne anwonwade ne nsɛnkyerɛnne a ɔno Nyankopɔn no ara nam no so yɛe mo mu yii no kyerɛɛ mo, sɛnea mo ankasa nso munim no, ɔno ara a wɔnam Onyankopɔn agyina a otui ne ne nim a onim dedaw so yii no mae no na mofaa no nam wɔn a wonni mmara nsa so de no fam dua ho kum no. Ɔno na Onyankopɔn anyan no, na wasan owuyaw hama, efisɛ antumi amma sɛ etintim no so. Na Dawid kaa ne ho asɛm sɛ: Mihuu [Yehowa, NW] m’anim daa, . . . na me honam nso bɛda anidaso mu, efisɛ wɔrennyaw me kra asaman, na woremma wo kronkronni no nhu porɔw.”—Asomafo no Nnwuma 2:22-27.

Nnipa Pii Huu Yesu a Wɔanyan no No

Wɔ Asomafo no Nnwuma mu no, Asɛmpa kyerɛwfo Luka kae sɛ: ‘Asomafo no nso na Yesu amanehunu akyi no, ɔnam adanse bebree so yii ne ho kyerɛɛ wɔn sɛ ɔteasefo adaduanan mu ma wohuu no, na ɔkaa Onyankopɔn ahenni ho asɛm.’ (Asomafo no Nnwuma 1:2, 3) Asuafo no pii huu Yesu a wɔanyan no no mpɛn pii—wɔ turom, kwan so, adidi ase, ne Tiberia Po ho.—Mateo 28:8-10; Luka 24:13-43; Yohane 21:1-23.

Akasatiafo kasa tia nokware a ɛyɛ sɛ oyii ne ho adi kyerɛe no. Wɔka sɛ akyerɛwfo no na wɔbɔɔ wɔn tirim kyerɛw biribi, anaasɛ wɔtwe adwene si nsɛm bi a ɛte sɛ nea ɛbɔ abira no so. Nokwarem no, nsonsonoe nketenkete a ɛwɔ Nsɛmpa no kyerɛwtohɔ mu no yɛ adanse a ɛkyerɛ sɛ ɛnyɛ nea wɔhyɛɛ da hyehyɛɛ ho. Sɛ ɔkyerɛwfo biako de nkyerɛkyerɛmu bi ka ne kyerɛwtohɔ a ɛfa nsɛm bi a esisii wɔ Kristo asase so asetra ho a enni kyerɛwtohɔ a aka no mu a, ɛma Yesu ho nimdeɛ a yɛwɔ no dɔɔso.

So na Yesu ho adi a oyii wɔ ne wusɔre akyi no yɛ anisoadehu? Eyi ho akyinnye biara a wobegye no nyɛ nokware, efisɛ nnipa pii na wohuu no. Ná nnipa a wohuu no no bi yɛ apofofo, mmea, ɔman dwumayɛni bi, a na ɔsomafo Toma kyinnyegyefo a bere a ohuu adanse a edi mũ koraa ansa na ɔregye adi sɛ wɔanyan Yesu afi awufo mu no ka ho. (Yohane 20:24-29) Mpɛn pii na Yesu asuafo no huu wɔn Wura a wɔanyan no no nea edi kan no, wɔanhu sɛ ɔno a. Bere bi, nnipa bɛboro 500 huu no, na na wɔn mu dodow no ara da so te ase bere a ɔsomafo Paulo de saa asɛm no dii owusɔre no ho adanse no.—1 Korintofo 15:6.

Yesu a Ɔte Ase no Wɔ Nnipa so Tumi

Yesu wusɔre ho asɛm nyɛ asɛm a nkurɔfo ani gye ho anaasɛ wogye ho kyim kɛkɛ.  Nokwasɛm a ɛyɛ sɛ ɔte ase no anya nnipa a wɔwɔ mmaa nyinaa so nkɛntɛnso pa. Efi afeha a edi kan mu no, nnipa pii na wɔagyae Kristosom ho anibiannaso anaa sɔre a na wɔsɔre tia koraa no abegye adi sɛ ɛne nokware som ankasa. Dɛn na ɛma wɔsakrae? Kyerɛwnsɛm no a wosuae ma wohui sɛ Onyankopɔn nyan Yesu kɔɔ nkwa mu sɛ honhom abɔde a ɔwɔ anuonyam wɔ soro no. (Filipifo 2:8-11) Wɔakyerɛ Yesu ne Yehowa Nyankopɔn nsiesiei ma nkwagye denam Kristo agyede afɔre no so no mu gyidi. (Romafo 5:8) Nnipa a wɔte saa no nam Onyankopɔn apɛde a wɔyɛ ne wɔn asetra a wɔama ɛne Yesu nkyerɛkyerɛ ahyia so anya anigye.

Susuw nea na Kristoni a obi bɛyɛ wɔ afeha a edi kan no mu kyerɛ no ho hwɛ. Ná anuonyam, tumi, anaa ahonyade biara nnim. Nanso nea ɛne no bɔ abira no, esiane tete Kristofo pii gyidi nti ‘wɔpenee wɔn nneɛma fow’ so. (Hebrifo 10:34) Ná Kristosom hwehwɛ sɛ obi de ne nkwa bɔ afɔre na ohyia ɔtaa a mpɛn pii no ekowiee mogya dansefo wu mu.

Ansa na ebinom rebɛyɛ Kristo akyidifo no na wɔwɔ anidaso sɛ wobenya anuonyam ne ahonyade. Saul a ofi Tarso no suaa ade wɔ Mmarakyerɛfo Gamaliel a na wagye din no nan ase, na na wafi ase regye din wɔ Yudafo mu. (Asomafo no Nnwuma 9:1, 2; 22:3; Galatifo 1:14) Nanso, Saul bɛyɛɛ ɔsomafo Paulo. Ɔno ne nnipa pii gyaw anuonyam ne tumi a na wobenya wɔ wiase yi mu no hɔ. Dɛn ntia? Sɛnea ɛbɛyɛ a wɔbɛtrɛw nokware anidaso a egyina Onyankopɔn bɔhyɛ ahorow ne nokwasɛm a ɛyɛ sɛ na wɔanyan Yesu Kristo afi awufo mu so no ho asɛm no mu. (Kolosefo 1:28) Na wɔwɔ ɔpɛ sɛ wobehu amane wɔ adeyɛ a na wonim sɛ egyina nokware so no mu.

Ɛte saa ara wɔ nnipa ɔpepem pii fam nnɛ. Wubetumi ahu wɔn wɔ Yehowa Adansefo asafo ahorow a ɛwɔ wiase nyinaa mu. Adansefo no de anigye to nsa frɛ wo sɛ bra Kristo wu afe afe nkaedi a ɛbɛba so Kwasida, April 8, 2001, bere a owia akɔtɔ no ase. Wɔn ani begye sɛ wobehu wo wɔ ase saa da no, ɛne wɔn nhyiam ahorow a wosua Bible wɔ ase a wɔyɛ wɔ wɔn Ahenni Asa ahorow so no nyinaa ase.

Dɛn nti na wunsua pii, ɛnyɛ Yesu wu ne ne wusɔre ho ade nko na mmom n’asetra ne ne nkyerɛkyerɛ ho nso? Ɔto nsa frɛ sɛ yɛmmra ne nkyɛn. (Mateo 11:28-30) Keka wo ho mprempren fa hwehwɛ Yehowa Nyankopɔn ne Yesu Kristo ho nimdeɛ. Saa a wobɛyɛ no betumi ama woanya daa nkwa wɔ Onyankopɔn Ahenni a ɛwɔ ne Dɔba no nsam no mu.

[Ase hɔ asɛm]

[Mfonini ahorow wɔ kratafa 7]

Nnipa ɔpepem pii nya nokware anigye sɛ Yesu Kristo akyidifo

[Mfonini Fibea wɔ kratafa 6]

From the Self-Pronouncing Edition of the Holy Bible, containing the King James and the Revised versions