Paulo Yɛ Ntoboa A Woyi Kɔboa Ahotefo Ho Nhyehyɛe

ADE a ɛho hia nokware Kristofo titiriw ne honhom fam nneɛma. Nanso, afoforo honam fam yiyedi nso ho hia wɔn. Mpɛn pii na wɔde nneɛma akɔma wɔn a wɔwɔ ahokyere mu. Onuadɔ kanyan Kristofo ma wɔboa wɔn mfɛfo gyidifo a wohia mmoa no.—Yohane 13:34, 35.

Ɔdɔ a na ɔsomafo Paulo wɔ ma ne honhom fam nuanom mmarima ne mmea no kaa no ma ɔyɛɛ nhyehyɛe ma woyiyii ntoboawɔ asafo ahorow a na ɛwɔ Akaia, Galatia, Makedonia, ne Asia mantam mu no mu. Dɛn na ɛmaa eyi ho behiae? Ɔkwan bɛn so na wɔyɛɛ mmoa no ho nhyehyɛe? Nkurɔfo no yɛɛ wɔn ade dɛn wɔ ho? Na dɛn nti na ɛsɛ sɛ nea ɛkɔɔ so no ho hia yɛn?

Yerusalem Asafo no Mu Tebea

Pentekoste afe 33 Y.B. akyi no, Yudafo ne wɔn a wɔadan Yudafo a wofi mmeae foforo a wɔbɛyɛɛ asuafo wɔ Pentekoste da no kɔɔ so traa Yerusalem bere bi suaa nokware gyidi no ho nneɛma pii. Baabi a ɛho hia no, mfɛfo asomfo fii anigye mu boae ma wɔsoaa mmere tenten a wɔde traa hɔ no ho adesoa no. (Asomafo no Nnwuma 2:7-11, 41-44; 4:32-37) Ebetumi aba sɛ ɔman mu basabasayɛ maa mmoa foforo ho behiae bere a Yudafo ɔmampɛfo kanyan atuatew na wɔyɛɛ basabasa no. Nanso, nea ɛbɛyɛ na ɔkɔm anne Kristo akyidifo biara no, wɔkyekyɛɛ nnuan maa akunafo a na ahia wɔn no. (Asomafo no Nnwuma 6:1-6) Herode ankasa nso taa asafo no, na 40 Y.B. mfinimfini no, ɔkɔm sii Yudea. Ɛdefa Yesu akyidifo ho no, ɛbɛyɛ sɛ eyi na ɛde nea Paulo frɛɛ no “amane,” “ahohia,” ne ‘wɔn nneɛma a wɔfowee’ no bae.—Hebrifo 10:32-34; Asomafo no Nnwuma 11:27–12:1.

Bɛyɛ afe 49 Y.B. mu no, na tebea no da so ara yɛ nea anibere wom. Enti, bere a wɔpenee so sɛ Paulo nyɛ n’asɛnka adwuma no wɔ Amanaman mufo mu no, Petro, Yakobo, ne Yohane hyɛɛ no nkuran sɛ ‘ɔnkae ahiafo.’ Saa na Paulo bɔɔ mmɔden sɛ ɔbɛyɛ.—Galatifo 2:7-10.

Ntoboa no Ho Nhyehyɛe

Paulo hwɛɛ foto a wɔde kɔmaa Kristofo ahiafo a na wɔwɔ Yudea no so. Wɔ bɛyɛ afe 55 Y.B. mu no, ɔka kyerɛɛ Korintofo sɛ: “[Ntoboa, NW] a wɔde kɔma ahotefo no ho de, sɛnea mehyehyɛe Galatia asafo mu no, mo nso monyɛ saa ara. Daa nnawɔtwe mu da a edi kan no, mo mu biara mfa nea ebesi no yiye ama wanya no nsie, . . . [Afei] mɛma wɔn a mobɛkyerɛ sɛ wɔsɛ no de nhoma ne mo ayɛyɛde no  akɔ Yerusalem.” (1 Korintofo 16:1-3) Afe akyi no, Paulo kae sɛ na Makedoniafo ne Akaiafo de wɔn ho ahyem. Na bere a wɔde nea wonyae kɔɔ Yerusalem no, na ɛte sɛ nea na wɔ a Asia mantam no ananmusifo wɔ hɔ no kyerɛ sɛ na asafo ahorow a ɛwɔ ɔmantam no mu nso ayi ntoboa no bi.—Asomafo no Nnwuma 20:4; 2 Korintofo 8:1-4; 9:1, 2.

Wɔanhyɛ obiara sɛ onyi nea ontumi. Mmom no, na ɛyɛ sɛnea biribiara bɛyɛ pɛpɛɛpɛ na mmoroso akogu ahotefo a wɔwɔ Yerusalem ne Yudea no hia mu. (2 Korintofo 8:13-15) Paulo kae sɛ: “Sɛnea obiara asusuw ne komam no, ɔmma, ɛnyɛ amemmenemfe anaa ɔhyɛ mu; efisɛ nea ɔtew n’anim ma no na Onyankopɔn dɔ no.”—2 Korintofo 9:7.

Ɔsomafo no kyerɛɛ Korintofo no nea enti a ɛsɛ sɛ wɔda ayamye adi. Ná Yesu ‘abɛyɛ ohiani, sɛ wɔmfa ne hia no so nyɛ adefo.’ (2 Korintofo 8:9) Akyinnye biara nni ho sɛ na ɛsɛ sɛ wosuasua ɔma honhom a na ɔwɔ no. Afei nso, esiane sɛ na Onyankopɔn ama wɔanya ‘wɔn ho afa nyinaa’ nti, na ɛfata sɛ wɔboa ma wɔde ahotefo no ahiade kɔma wɔn.—2 Korintofo 9:10-12.

Su a Wɔn a Woyi Ntoboa no Da no Adi

Yebetumi asua pii afa ade a wofi ɔpɛ mu de ma ho denam sɛnea wɔn a woyii ntoboa no yɛɛ wɔn ade wɔ afeha a edi kan no mu wɔ mmoa a wɔde maa ahotefo no ho so. Ntoboa no dii dwuma kɔɔ akyiri sen wɔn mfɛfo Yehowa asomfo a wɔyɛ ahiafo ho a wosusuwii. Ɛkyerɛe sɛ na onuayɛ bi wɔ Yudafo ne Amanaman mufo Kristofo no ntam. Ɔma ne gye a na wogye ntoboa ahorow no kyerɛe sɛ na biakoyɛ ne adamfofa wɔ saa Amanaman mufo ne Yudafo no ntam. Na wɔn adekyɛ no yɛ honam fam ne honhom fam nneɛma.—Romafo 15:26, 27.

Ebetumi aba sɛ mfiase no, Paulo anka ankyerɛ Makedonia Kristofo no sɛ wonyi ntoboa no bi—na wɔn nso di hia buruburoo. Nanso, ‘wɔkotɔ srɛe sɛ wɔmma wonyi ntoboa no bi.’ Hwɛ, ɛwom mpo sɛ na wɔwɔ “ahohia sɔhwɛ kɛse mu” de, nanso wɔde anigye maa “nea ɛboro wɔn ahoɔden so po”! (2 Korintofo 8:1-4) Ɛda adi sɛ nea ɛmaa wohyiaa sɔhwɛ kɛse no bi ne sobo a wɔbɔɔ wɔn sɛ na wɔredi ɔsom a Romafo mmara mma kwan akyi no. Enti ntease wom sɛ wonyaa tema maa wɔn nuanom a wɔwɔ Yudea a na wɔrehu amane a ɛte saa ara no.—Asomafo no Nnwuma 16:20, 21; 17:5-9; 1 Tesalonikafo 2:14.

Ɛwom sɛ na Paulo de mmɔden a Korintofo no bɔe wɔ ntoboa no ho adi dwuma de ahyɛ Makedoniafo nkuran de, nanso na Korintofo no anigye ano abrɛ ase. Afei ɔsomafo no kaa Makedoniafo no ayamye ho asɛm sɛnea ɛbɛyɛ a ɔde bɛkanyan Korintofo no. Ohui sɛ ɛho hia sɛ ɔkae wɔn sɛ ɛbere adu sɛ wowie nea na wɔafi ase wɔ afe a atwam no mu no. Dɛn na na asi?— 2 Korintofo 8:10, 11; 9:1-5.

Tito na ofii ntoboa no gyigye ase wɔ Korinto, nanso ɛda adi sɛ ɔhaw ahorow bi sɔree a ɛsɛee ne mmɔdenbɔ no. Bere a ɔne Paulo susuw asɛm no ho wɔ Makedonia no, Tito ne anuanom foforo baanu san kɔhyɛɛ asafo a ɛwɔ Korinto no den, na wowiee ntoboa no gyigye. Ebetumi aba sɛ na ebinom aka sɛ Paulo pɛ sɛ odidi Korintofo no ho. Ebia eyi nti na ɔsomaa mmarima baasa ma wokowiee ntoboa no gyigye, na ɔkamfoo wɔn mu biara kyerɛe no. Paulo kae sɛ: “Yɛda yɛn ho so, na obi annunu yɛn, akyɛde kɛse a yɛsom ho yi ho; na yedwen nea ɛfata, ɛnyɛ [Yehowa, NW] anim nko, na nnipa anim nso.”—2 Korintofo 8:6, 18-23; 12:18.

 Ntoboa no a Wɔde Kɔma

Eduu afe 56 Y.B. fefɛw bere mu no, na wɔaboa sika no ano a na wɔde rebɛkɔ Yerusalem. Na Paulo bɛka asomafo a wɔn a woyii ntoboa no paw wɔn no ho akɔ. Asomafo no Nnwuma 20:4 ka sɛ: “Na Beroiani Sopater, Piro ba, ne Tesalonikafo Aristarko ne Sekundo ne Derbeni Gaio ne Timoteo ne Asiafo Tihiko ne Trofimo ka ne ho.” Ɛda adi sɛ ɛbɛyɛ sɛ na Luka a ɔyɛɛ Filipifo Kristofo no ananmusifo no nso ka wɔn ho. Enti, anyɛ yiye koraa no, bɛyɛ mmarima baakron na wotuu saa kwan yi.

Nhomanimfo Dieter Georgi ka sɛ: “Ɛbɛyɛ sɛ na sika a wɔboaboaa ano no dɔɔso, ɛnyɛ saa a, anka mfaso biara nni ɔhaw ne ɛka pii a Paulo ne nnipa pii a wɔsomaa wɔn no bɔe wɔ adwuma a edi akyiri no ho no so.” Ɛnyɛ sika no ho ban nko na nnipakuw no bɔe na mmom sɛ wɔbɛbɔ Paulo ho ban afi sobo biara a ɛfa amimdi ho nso. Wɔn a wɔsomaa wɔn no kɔyɛɛ Amanaman mufo asafo ahorow no ananmusifo wɔ ahotefo no anim wɔ Yerusalem.

Esiane sɛ asomafo no faa po so fii Korinto kɔɔ Siria nti, na anka ɛsɛ sɛ wodu Yerusalem Twam bere. Nanso, tɛw a na wɔretɛw Paulo akum no ho asotiw a woyii wɔn nti wɔsesaa wɔn nhyehyɛe no. (Asomafo no Nnwuma 20:3) Ebia na n’atamfo no ayɛ wɔn adwene sɛ wobekum no wɔ po so.

Na nneɛma foforo haw Paulo. Ansa na wɔretu no, ɔkyerɛw Kristofo a wɔwɔ Roma no sɛ wɔmmɔ mpae mma no na ama ‘wɔayi no afi asoɔdenfo a wɔwɔ Yudea no nsam, na ne som a ɔrekɔsom Yerusalem no ayɛ ahotefo no fɛ.’ (Romafo 15:30, 31) Ɛwom sɛ akyinnye biara nni ho sɛ na ahotefo no de fɛw kɛse na ebegye ntoboa no de, nanso ebia na odwen ɔhaw a na ne mmae no betumi ama asɔre wɔ Yudafo no mu no ho.

Akyinnye biara nni ho sɛ ɔsomafo no kaee ahiafo no. Bere a Kyerɛwnsɛm no nka bere a wɔde ntoboa no mae ho asɛm no, ma a wɔde mae no hyɛɛ biakoyɛ ho nkuran, na ɛmaa Amanaman mufo Kristofo no kyerɛɛ anisɔ wɔ honhom fam ahonyade a wonya fii wɔn mfɛfo Yudafo gyidifo no hɔ no ho. Asɔrefie hɔ a Paulo kɔe bere a woduu Yerusalem akyi bere tiaa bi no de basabasayɛ bi bae, na ɛma wɔkyeree no. Nanso, awiei koraa no, eyi ma onyaa hokwan ahorow dii amradofo ne ahemfo adanse.—Asomafo no Nnwuma 9:15; 21:17-36; 23:11; 24:1–26:32.

Ntoboa Ahorow a Yeyi Nnɛ

Efi afeha a edi kan no reba no, nneɛma pii asesa—nanso nnyinasosɛm a ɛwom no nsesae. Wɔde sika fam ahiade ho asɛm to Kristofo anim wɔ ɔkwan a ɛfata so. Ɛsɛ sɛ ntoboa biara a woyi kɔboa wɔn a ahia wɔn no fi wɔn pɛ mu, na ɔdɔ a wɔwɔ ma Onyankopɔn ne wɔn yɔnko nnipa no kanyan wɔn ma woyi.—Marko 12:28-31.

Nhyehyɛe a wogyinaa ahotefo no ananmu yɛe wɔ ntoboa yi ho wɔ afeha a edi kan no mu no da no adi sɛ ɛsɛ sɛ wɔyɛ ntoboa a ɛte saa sohwɛ ho nhyehyɛe yiye na wodi ho dwuma nokwaredi mu. Nokwarem no, Yehowa Nyankopɔn nim yɛn ahiade, na ɔyɛ nsiesiei ma n’asomfo sɛnea ɛbɛyɛ a wobetumi akɔ so aka Ahenni ho asɛmpa no akyerɛ afoforo, ɛmfa ho ahokyere. (Mateo 6:25-34) Nanso, yɛn mu biara betumi ayɛ ne fam de, sɛnea yɛn sikasɛm te biara. Saa kwan no so no, ‘nea ɔboaboa bebree ano no, ebi mmoro no so, na nea ɔboaboaa ketewaa ano no, ɛrenhia no hwee.’—2 Korintofo 8:15.