So Eyi Betumi Ayɛ Adwuma a Eye Ma Wo Sen Biara?

SƐ WOYƐ Kristoni a woabɔ asu a, akyinnye biara nni ho sɛ Onyankopɔn ho dɔ na ɛma woyɛ n’apɛde. Afei nso, akyinnye biara nni ho sɛ ɔsom adwuma no ne adwuma a w’ani gye ho kɛse. Anyɛ yiye koraa no, Yesu Kristo maa n’akyidifo nyinaa ahyɛde sɛ wɔnyɛ asuafo. (Mateo 28:19, 20) Yiw, ebia mprempren woyɛ adwuma de hwɛ wo ho. Nanso, sɛ́ Yesu akyidifo ne Yehowa Adansefo mu biako no, nea edi kan koraa no, woyɛ Kristoni somfo—obi a ɔde Ahenni asɛnka adwuma no di kan wɔ n’asetra mu.—Mateo 24:14.

Ebia aka kakra ma woadi mfirihyia aduonu anaasɛ wowɔ wo mfirihyia 20 mfiase. Ebetumi aba sɛ woasusuw adwuma a wobɛyɛ wɔ w’asetram ho kɛse. Bere a woasusuw hokwan ahorow a wowɔ ho no, ɛda adi sɛ abotɔyam a wubenya yɛ ade a ɛho hia wo.

Afei, susuw nea Jørgen a ɔwɔ Denmark ka fa hokwan a ɔpawee no ho hwɛ. Jørgen ka ho asɛm sɛ “asetra kwan a ɛfata a ɛbɛma woatumi de w’adwene asi adwuma a ɛho hia sen biara so.” Eva, ɔbea bi a wadi mfirihyia 31 a ɔwɔ Greece, ka sɛ: “Sɛ mede m’asetra toto m’atipɛnfo de ho a, meka bere nyinaa sɛ ɛyɛ nea edi mu, abotɔyam wom, na ɛyɛ anigye kɛse.” Adwuma bɛn na ɛma wonya abotɔyam a ɛte saa no? Wobɛyɛ dɛn atumi afa asetra kwan a ɛte saa so?

So Onyankopɔn na Ɔkyerɛ Kwan No?

Adwuma a obi bɛpaw betumi ayɛ adeyɛ a ɛyɛ den. Nokwarem no, ebinom yam a anka Onyankopɔn akyerɛ wɔn nea ɔpɛ sɛ wɔyɛ ankasa.

Bere a na Mose wɔ Midian no, Yehowa ka kyerɛɛ no sɛ ɔnsan nkɔ Misraim na onkodi Israelfo no anim nyi wɔn mfi nkoasom mu. (Exodus 3:1-10) Onyankopɔn bɔfo yii ne ho adi kyerɛɛ Gideon a na wɔapaw no sɛ onnye Israel mfi nhyɛso ase no. (Atemmufo 6:11-14) Ná Dawid rehwɛ nguan bere a Onyankopɔn ka kyerɛɛ Samuel sɛ ɔnsra no sɛ Israel hene a odi hɔ no. (1 Samuel 16:1-13) Wɔmfa akwan a ɛtete saa so nkyerɛ yɛn kwan nnɛ. Mmom no, ɛsɛ sɛ yesusuw nneɛma ho yiye na yesi ɔkwan a yɛde ɔdom akyɛde ahorow a Onyankopɔn de ama yɛn no bedi dwuma no ho gyinae.

Yehowa abue “ɔpon kɛse a emu adwumayɛ bɛsow aba” ama Kristofo mmabun nnɛ. (1 Korintofo 16:9) Ɔkwan bɛn so? Mfirihyia du a atwam mu no, Ahenni adawurubɔfo dodow akɔ anim bɛboro 2,125,000 ma wɔn dodow akodu bɛboro 6,000,000 wɔ wiase nyinaa. Henanom na wɔboa ma wɔyɛ Bible, nhoma, nhomawa, nsɛmma nhoma, ne nkratawa ɔpepem pii a yehia ma awowaw yɛn honhom fam na yɛde ayɛ asɛmpaka adwuma no wɔ wiase nyinaa no? Betel abusua a ɛwɔ wiase nyinaa no mufo na wonya hokwan a nhyira wom yi mu kyɛfa.

Asetra a Mfaso Wɔ So

Betel kyerɛ “Onyankopɔn fi,” na Betel afie na Kristofo a wɔatu wɔn ho ama a wɔresom wɔ Ɔwɛn Aban Asafo no adwumayɛbea ti ne baa dwumadibea ahorow no te. (Genesis 28:19) Yebetumi de nnɛyi Betel mmusua no atoto ‘afie a wɔde nyansa asi’ a wɔahyehyɛ no yiye na egyina ɔdɔ a wɔwɔ ma Yehowa so no ho.—Mmebusɛm 24:3.

Dɛn na yebetumi aka afa Betel abusua no tebea ho? Betel abusua a ɛwɔ Estonia no muni bi a wadi mfirihyia 25 ka sɛ: “M’ani gye sɛ mewɔ Yehowa nnamfo mu bere nyinaa. Eyi da  so ara yɛ ade a ɛsom bo ma me sen biara wɔ Betel.”—Dwom 15:1, 2.

Wɔ wiase nyinaa no, nnipa bɛyɛ 19,500 na wɔrenya Betel som adwuma no mu kyɛfa mprempren. (Dwom 110:3) Wɔ United States no, wɔn a wɔwɔ Betel no mu ɔha biara mu 46 na wɔadi fi mfirihyia 19 kosi 29. Te sɛ Yesaia no, wɔaka sɛ: “Mini, soma me!” (Yesaia 6:8) Ná Yesaia—a wahyira ne ho so ama Yehowa dedaw no—de ne ho rema ɔsom adwuma hokwan foforo. Ɛda adi sɛ na eyi kyerɛ n’ankasa anigyede bi a na ɔde rebɔ afɔre. Wɔn a wɔreyɛ adwuma wɔ Betel no gyaw wɔn afie ne mmeae a wɔn ani ka hɔ, ɛne wɔn nanom, agyanom, nuabarimanom, nuabeanom ne wɔn nnamfonom hɔ. Wofi wɔn pɛ mu na ɛde saa nneɛma yi bɔ afɔre “asɛmpa no nti.”—Marko 10:29, 30.

Na hwɛ honhom fam nhyira ara a wɔn nso wonya wɔ Betel! Betel abusua a ɛwɔ Russia no muni kumaa bi kyerɛkyerɛ mu sɛ: “Esiane sɛ yɛwɔ ahofama nti, yebetumi asua nneɛma pii a ɛbɛboa yɛn ma yɛatra wiase foforo no mu. Me fam no, metumi aka sɛ Yehowa nhyira ahorow a manya no sen nneɛma a mede abɔ afɔre no koraa.”—Malaki 3:10.

Betel Asetra

Betel asetra te dɛn? Betel abusua mufo gye tom sɛ ɛma denhyɛ ne abotɔyam, na ɛyɛ anigye mpo. Jens a wadi mfirihyia 43 no ani gye Betel som adwuma ho. Dɛn ntia? Ɔka sɛ: “Efisɛ yɛte nka sɛ yɛrenya mmɔden kɛse a wɔrebɔ de ayɛ adwuma a ɛho hia no mu kyɛfa. Mitumi hu Yehowa adwuma no kɛse ne sɛnea ɛho hia no.”

Efi Dwoda kosi Memeneda no, wɔde anɔpa som na efi Betel adwuma ase. Eyi yɛ Bible nsusuwho a ɔpanyin a ɔwɔ osuahu na ɔhwɛ so. Dwoda anwummere no wɔde dɔnhwerew biako yɛ abusua Bible adesua denam Ɔwɛn-Aban no so, na ɛtɔ mmere bi a wɔma ɔkasa a egyina Kyerɛwnsɛm mu asɛmti bi a ɛfa Betel abusua no ho titiriw so.

Sɛ obi ba Betel foforo a, dɛn na ɔyɛ? Nea ɛbɛyɛ na abusua no mufo a wɔyɛ foforo ahu Betel asetra ani so no, anuanom a wɔwɔ abusua no mu a wɔn ho akokwaw no ma ɔkasa ahorow a ɛfa Betel som adwuma no afã horow ho kyerɛ wɔn. Betel abusua no muni foforo yi kɔ dapɛn dapɛn sukuu bi a ɛyɛ anigye a wɔyɛ ma onya Kyerɛwnsɛm no mu ntease kɛse adapɛn bi wɔ n’afe a edi kan no mu. Wɔn a wɔyɛ foforo no nya Bible akenkan nhyehyɛe titiriw bi nso mu kyɛfa. Abusua no mufo a wɔyɛ foforo no kenkan Bible mũ no nyinaa wɔ wɔn Betel adwuma no afe a edi kan no mu.

Mfaso bɛn na ɛwɔ saa ntetee yi nyinaa so? Joshua a wadi mfirihyia 33 a ɔyɛ Betel abusua a ɛwɔ Hong Kong no muni no bua sɛ: “Betel ama Yehowa ho anisɔ a mewɔ no ayɛ kɛse ankasa. Mitumi ne anuanom pii a wɔwɔ osuahu a wɔde wɔn nkwa nna mu fã kɛse no ara asom Yehowa no bɔ. M’ani gye honhom fam dwumadi ahorow te sɛ anɔpa som ne abusua Ɔwɛn-Aban Adesua no ho titiriw. Afei nso, m’ani gye asetra a biribiara kɔ so wɔano wɔano na ɛnkyere so no ho. Eyi mma minnya dadwen a ɛho nhia. Misua sɛnea medi nneɛma ho dwuma wɔ Kristofo kwan so nso, na eyi ho aba me mfaso bere nyinaa.”

Betel abusua mufo de wɔn bere ne wɔn ahoɔden dodow no ara yɛ nea wɔatu wɔn ho ama sɛ wɔbɛyɛ no. Ɛne sɛ, wɔde wɔn ahoɔden ne wɔn adwene bɛyɛ adwuma a wɔde ama wɔn wɔ Betel no titiriw. Nnwuma pii wɔ hɔ a ɛsɛ sɛ wɔyɛ. Ebinom de tintim mfiri na ɛyɛ adwuma anaasɛ wɔpam nhoma, yɛ nhoma a wɔde kɔma asafo ahorow pii no. Afoforo yɛ adwuma wɔ gyaade, adididan, anaa baabi a wɔhoro ntade. Nnwuma no bi ne afisiesie, kuadwuma, adansi, ne nea ɛkeka ho. Ebinom hwɛ mfiri a wɔde yɛ nnwuma wɔ saa nnwumayɛbea no so. Afoforo hwɛ akwahosan ho nsɛm so na ebinom nso yɛ nnwuma wɔ adwumayɛdan mu. Asɛyɛde ne mfaso ahorow a ɛyɛ anigye wɔ Betel nnwuma nyinaa mu. Adwuma a wɔyɛ wɔ Betel no ma abotɔyam titiriw efisɛ ɛma Ahenni nneɛma nya nkɔso na Onyankopɔn ho dɔ nti na wɔyɛ.

Wɔde Betel abusua no mufo kɔ asafo ahorow  mu, baabi a wohu wɔn adwuma no so mfaso ankasa. Wɔn ani gye asafo nhyiam ahorow kɔ ne asɛnka adwuma mu kyɛfa a wonya no ho. Ne saa nti, Betel abusua no mufo ne wɔn nuanom mmarima ne mmea a wɔwɔ asafo ahorow mu no anya abusuabɔ a emu yɛ den.—Marko 10:29, 30.

Rita a ɔyɛ Betel abusua a ɛwɔ Britain no muni ka sɛ: “M’ani sɔ asafo no kɛse! Sɛ mewɔ asafo nhyiam ase ne asɛnka mu a, ɛhyɛ me gyidi den kɛse sɛ mihu me nuanom mmarima ne mmea, mmofra, ne wɔn a wɔn mfe akɔ anim wɔ hɔ! Wɔba a wɔmma biribiara nsiw wɔn kwan. Ɛno boa me ma meyere me ho kɛse wɔ Betel som adwuma no mu.”

Ɛnyɛ adwuma, asafo nhyiam ahorow, asɛnka adwuma, ne adesua nkutoo na wɔyɛ wɔ Betel. Abusua no wɔ bere a wɔde gye wɔn ahome nso. Bere ne bere mu no, wɔyɛ “Abusua Anigye Da” ho nhyehyɛe a anigye ne honhom fam nneɛma a mfaso wɔ so wom, na ɛma wonya kwan hu afoforo dom akyɛde pii na wosua nneɛma a ɛhyɛ nkuran fi afoforo a wɔresom wɔ Betel no asetra ho nsɛm mu. Ade foforo a ɛno nso yɛ anigye ne nsrahwɛ a ɛfata na ɛhyɛ den a wɔne afoforo nya mu kyɛfa no. Wotumi yɛ ahomegyebea ne nneɛma a wɔde gye ani, ɛne nhomakorabea a ankorankoro kɔkenkan ade na wɔde yɛ nhwehwɛmu ho nhyehyɛe. Na ade a ɛnsɛ sɛ yɛn werɛ fi nso ne nkɔmmɔbɔ a ɛyɛ anigye a ɛkɔ so wɔ didipon ho wɔ adidi bere no.

Tom a ɔyɛ Betel abusua a ɛwɔ Estonia no muni no ka sɛ: “Betel no bɛn po, na kwae bi a ɛyɛ fɛ bɛn hɔ a me ne me yere kotu mpase wom. Me ne me nnamfo a wɔwɔ asafo no mu ne Betel bɔ gɔlf, hɔki, ne tɛnis bere ne bere mu nso. Na sɛ wim tebea ye a, yɛka yɛn sakre.”

Dɛn na Wubetumi Ayɛ na Ama Woafata?

Nokwarem no, Betel yɛ baabi a Kristofo a wɔn ho akokwaw titiriw de ɔsom kronn ma Yehowa na wɔyɛ adwuma ma mfɛfo gyidifo a  wɔwɔ wiase nyinaa. Ɛsɛ sɛ wɔn a wɔbɛyɛ Betel abusua mufo no du ahwehwɛde ahorow bi ho. Dɛn na wubetumi ayɛ na ama woafata ama Betel som adwuma?

Te sɛ Timoteo a ɔne ɔsomafo Paulo somee no, ɛsɛ sɛ wɔn a wogye wɔn ma wɔsom wɔ Betel no yɛ wɔn a wɔwɔ gyinabea pa wɔ asafo no mu. (1 Timoteo 1:1) “Na anuanom a wɔwɔ Listra ne Ikonion no bɔ [Timoteo] din pa.” (Asomafo no Nnwuma 16:2) Ɛwom sɛ na Timoteo sua de, nanso na onim Kyerɛwnsɛm no, na na n’ase atim nokware no mu. (2 Timoteo 3:14, 15) Saa ara na wɔhwehwɛ sɛ wɔn a wogye wɔn ma wɔsom wɔ Betel no yɛ wɔn a wɔwɔ Bible mu nimdeɛ.

Ɛsɛ sɛ Betel abusua no mufo nya ahofama honhom. Ná Timoteo ahofama honhom ne ɔpɛ a na ɔwɔ sɛ ɔde Ahenni nneɛma bedi  n’ankasa de kan no da adi araa ma Paulo tumi kaa ne ho asɛm sɛ: “Minni obi a ɔne m’adwene sɛ, te sɛ ɔno a mo ho asɛm hia no no; efisɛ wɔn nyinaa hwehwɛ wɔn ankasa de, na ɛnyɛ nea ɛyɛ Kristo Yesu de. Na ne fata a ɔfata no, munim sɛ ɔne me som asɛmpa no fam sɛ ɔba yɛ n’agya.”—Filipifo 2:20-22.

Betel som adwuma hwehwɛ mmarima ne mmea a wɔyɛ honhom mufo. Nhyehyɛe a wɔayɛ ama Betel abusua mufo no ma wotumi nyin honhom fam denam Bible adesua, Kristofo nhyiam ahorow ne asɛnka a wɔkɔ daa, ne Kristofo a wɔn ho akokwaw a wɔne wɔn bɔ so. Enti wɔboa Betelfo ma wodi Paulo afotu yi akyi: “Monnantew [Kristo Yesu] mu sa, sɛ wɔn a wɔagye ntini, na wɔde wɔn asi no so, na wɔayɛ den gyidi mu, sɛnea wɔkyerɛkyerɛ mo no, na wɔboro so, aseda mu.”—Kolosefo 2:6, 7.

Esiane sɛnea Betel adwuma no te nti, ɛsɛ sɛ wɔn a wogye wɔn ma wɔyɛ saa ɔsom adwuma yi no yɛ nkurɔfo a wɔte apɔw. Sɛ wudu ahwehwɛde ahorow a yɛaka ho asɛm no ho, na woadi mfirihyia 19 anaa nea ɛboro saa, na anyɛ yiye koraa no wɔbɔɔ wo asu adi afe biako a, yɛhyɛ wo nkuran sɛ susuw Betel som adwuma ho.

Yɛn Nyinaa Wɔ Kyɛfa

Sɛ́ Kristofo no, akyinnye biara nni ho sɛ yɛn nyinaa pɛ sɛ yɛde Ahenni nneɛma di kan wɔ yɛn asetram na yefi yɛn kra nyinaa mu yɛ Yehowa som adwuma no. (Mateo 6:33; Kolosefo 3:23) Yebetumi ahyɛ wɔn a wɔresom wɔ Betel no nkuran nso ma wɔakɔ so de ɔsom kronn ama wɔ hɔ. Na ne titiriw no, ɛsɛ sɛ yɛhyɛ anuanom mmarima a wɔyɛ mmabun a wɔfata ma Betel som adwuma no nkuran ma wɔpere du hokwan a nhyira wom yi ho.

Betel som adwuma yɛ honhom fam asetra kwan a abotɔyam wom—nea ebetumi ayɛ adwuma a ɛsen biara ama wo ankasa. Eye ma Nick a ofii Betel som adwuma ase na wadi mfirihyia 20 no. Bere a ɔde mfirihyia du asom wɔ Betel no, ɔka sɛ: “Metaa bɔ Yehowa mpae da no ase wɔ n’adom ho. Dɛn bio na metumi abisa? Kristofo anokwafo a wɔreyɛ nea wobetumi biara asom Yehowa na yɛne wɔn te ha.”

[Adaka/Mfonini wɔ kratafa 22]

DƐN NA MPANYIMFO NE AWOFO BETUMI AYƐ?

Ɛsɛ sɛ mpanyimfo ne ahwɛfo akwantufo titiriw hyɛ mmerante nkuran ma wobisa Betel som ho kwan. Nnansa yi, nhwehwɛmu bi a wɔyɛe wɔ Betel abusua mufo nkumaa mu daa no adi sɛ Kristofo mpanyimfo titiriw na wɔhyɛɛ wɔn mu ɔha biara mu 34 nkuran ma wɔde Betel som adwuma yɛɛ wɔn botae. Yiw, ɛwom sɛ wɔn asafo ahorow a wɔwom no bɛhwere wɔn de. Nanso ɛyɛ papa sɛ wɔkae sɛ bere a akyinnye biara nni ho sɛ Timoteo nyaa mmofra foforo so nkɛntɛnso pa wɔ Listra ne Ikonion no, mpanyimfo a na wɔwɔ hɔ no antwentwɛn wɔn nan ase sɛ wɔbɛma ɔne Paulo akɔsom. Wɔanka sɛ sɛ wɔma Timoteo ka ɔsomafo no ho kɔ a, wɔn asafo no bɛhwere ade kɛse.—1 Timoteo 4:14.

Ɛsɛ sɛ Kristofo a wɔyɛ awofo titiriw bɔ mmɔden sɛ wobenya wɔn mma so nkɛntɛnso pa wɔ asɛm yi mu. Wɔ nhwehwɛmu a yɛaka ho asɛm mprempren mu no, nnipa a wobisabisaa wɔn nsɛm no ɔha biara mu 40 na wɔkyerɛe sɛ wɔn awofo na wɔhyɛɛ wɔn nkuran titiriw ma wɔde wɔn ho hyɛɛ Betel som adwuma mu. Onuawa bi a wasom wɔ Betel mfe kakra ni kae sɛ: “M’awofo abrabɔ pa wɔ Yehowa som adwuma mu na ɛhyɛɛ me nkuran kɛse ma mede me ho hyɛɛ Betel som adwuma mu. Bere a mihuu wɔn nhwɛso wɔ bere nyinaa som adwuma no mu no, ɛnna mihui sɛ eyi na ɛbɛyɛ asetra kwan a eye na abotɔyam wom sen biara.”

[Adaka wɔ kratafa 24]

WƆN ANI SƆ BETEL SOM ADWUMA NO

“M’ani sɔ adwuma a meyɛ wɔ Betel no. Me bo tɔ me yam sɛ mihu sɛ masom Yehowa da mũ no nyinaa, na mɛyɛ saa ara ɔkyena, ne ɔkyena akyi, ne daa. Eyi ma minya ahonim pa, na ɛma minya nsusuwii pa.”

“Betel yɛ baabi a wubetumi de wo bere ne w’ahoɔden nyinaa ayɛ Yehowa som adwuma a biribiara ntwetwe w’adwene. Eyi ma wunya komam anigye. Na wubetumi ahu Yehowa ahyehyɛde no wɔ ɔkwan soronko so nso. Wote nka sɛ wobɛn ahyehyɛde no paa, na eyi ma ɛyɛ anigye kɛse.”

“Ade a eye sen biara a manya ne Betel a mebae. Yennyae adesua wɔ ha da. Ɛha adesua no nyɛ nea mede bɛyɛ biribi afa, mmom mede bɛyɛ ama Yehowa. M’adwuma renyɛ ɔkwa da wɔ ha.”

“Me dom akyɛde a mede yɛ adwuma wɔ Betel no ma minya abotɔyam ne asomdwoe efisɛ mede yɛ adwuma ma Yehowa ne anuanom.”

“Mantumi annya abotɔyam ne anigye ankasa wɔ adwuma a na meyɛ kan no mu. Mede mfirihyia pii na ahwɛ kwan sɛ me ne anuanom mmarima ne mmea bɛyɛ adwuma na mayɛ adwuma ama wɔn. Ɛno nti na mebaa Betel. Minya abotɔyam sɛ minim sɛ me mmɔdenbɔ nyinaa so bɛba afoforo mfaso honhom fam na ɛde ayeyi abrɛ Yehowa.”