So Nyamesom De Wiase Asomdwoe Bɛba?

EFI August 28 kosi August 31, 2000 no, ananmusifo bɛboro 500 a wofi aman 73 mu hyiaam wɔ New York City. Wohyiaam wɔ Amanaman Nkabom asoɛe yɛɛ “Mfirihyia Apem Wiase Nyamesom ne Honhom Fam Akannifo Asomdwoe Nhyiam.” Akannifo—a pii bobɔ abotiten, hyehyɛ ntade atenten a ne kɔla yɛ akokɔsrade, abotiri a ntakra tuatua ho, anaa batakari atenten tuntum—no begyinaa ɔsom ahorow ananmu. Ɔsom a na wɔka eyinom ho ne Baha’isom, Buddhasom, Hindusom, Jainsom, Kristoman mu asɔreasɔre, Nkramosom, Shintosom, Sikhsom, Taosom, Yudasom, ne Zoroastriasom.

Nhyiamfo no de nnannan nhyiam no mu nnanu a edi kan no hyiaam wɔ Amanaman Nkabom asoɛe hɔ. Nanso, ɛnyɛ Amanaman Nkabom no na ɛyɛɛ ho nhyehyɛe anaasɛ wɔbɔɔ ho ka, na mmom adɔe kuw ahorow. Nanso, UN ne nyamesom akannifo no nyinaa kaa hia a ehia sɛ wɔbom yɛ adwuma na wɔde ohia, nnipa mu nyiyim, nneɛma a atwa yɛn ho ahyia ho haw ahorow, ɔko, ne akode a etumi sɛe nneɛma pii, ba awiei ho asɛm.

Nhyiamfo no de wɔn nsa hyɛɛ kyerɛwtohɔ bi a wɔtoo din “Wiase Nyinaa Asomdwoe Ho Nhyehyɛe” ase. Bere a wogye toom sɛ ‘ɛtɔ mmere bi a wɔyɛ basabasa di ako wɔ nyamesom din mu’ no, kyerɛwtohɔ no kae sɛ wɔn a wɔde wɔn nsa ahyɛ ase no ne “Amanaman Nkabom no . . . bɛyɛ biako na wɔahwehwɛ asomdwoe.” Nanso, wɔanyɛ tirimbɔ pɔtee biara a ɛkyerɛ sɛnea wɔbɛyɛ eyi.

Da a ɛto so abien no, nhyiam no kyerɛwfo panyin, Bawa Jain, de ne nnianim kasa baa awiei denam kyerɛ a ɔkyerɛkyerɛɛ mu sɛ mfe bi a atwam ni no, ohuu mfonini bi wɔ Amanaman Nkabom asoɛe hɔ. Na mfonini no yɛ ɔbarima bi a ɔyɛ tenten sen Amanaman Nkabom Asoɛe dan no. Na ɔrebɔ dan no mu te sɛ nea ɛyɛ ɔpon bi. Na wɔakyerɛw asɛm bi wɔ mfonini no ase sɛ: “Asomdwoe Hene.” Owura Jain kae sɛ: “Bere a mihuu [mfonini] no pɛ no, enyaa me so tumi kɛse. Mibisaa nkurɔfo pii nea [ɛno] kyerɛ. Misusuw sɛ manya mmuae no nnɛ. Mo a moahyiam ha nyinaa, wiase honhom fam akannifo ne nyamesom akannifo, ama mahu sɛ [oyi] ne asomdwoe hene a ɔrebɔ Amanaman Nkabom pon mu no.”

Bible no kyerɛ biribi foforo koraa. Ɛkyerɛ sɛ Asomdwoe Hene no ne Yesu Kristo. Ɔno na ɔde wiase nyinaa asomdwoe bɛba, ɛnnam wiase yi amammui anaa nyamesom akannifo so, na mmom denam Onyankopɔn Ahenni so. Ɛyɛ Ahenni yi—Onyankopɔn soro nniso—na ebetumi ama adesamma asoɔmmerɛfo ayɛ biako, na ɛno na ɛbɛma wɔayɛ Onyankopɔn apɛde wɔ asase so.—Yesaia 9:6; Mateo 6:9, 10.