So Wote Nka sɛ Wɔnte Wo Ase?

ANTONIO yɛɛ basaa. N’adamfo pa Leonardo munamuna kyerɛɛ no prɛko pɛ wɔ ɔkwan a ntease nnim so. * Mpɛn pii na Antonio akyia no a wannye so, na afei sɛ ɛka ɔne no nko a, ɛte sɛ nea ɔfasu bi wɔ wɔn ntam. Antonio fii ase susuw sɛ ɛbɛyɛ sɛ wayɛ biribi anaa waka biribi a n’adamfo no ante ase. Na ɛyɛ dɛn?

Te a wɔnte afoforo ase abu so. Emu pii yɛ nsɛm nketenkete na wotumi siesie no ntɛm ara. Ebi nso betumi ahaw adwene, titiriw bere a obi nni obi ho adwempa ɛmfa ho mmɔden biara a ɔbɔ sɛ obeyi afi hɔ no. Dɛn na ɛmma wɔnte afoforo ase? Ɔkwan bɛn so na ɛka nnipa a ɛba wɔn ntam no? Sɛ afoforo nte biribi a woyɛ ase a, dɛn na wubetumi ayɛ? Nanso, so sɛnea afoforo susuw wo ho no ho hia ankasa?

Ade a Wontumi Mmu Ani Ngu So

Esiane sɛ afoforo ntumi nhu nea ɛwɔ yɛn adwenem nti, ɛnkyɛ na obi akyerɛ yɛn asɛm anaa yɛn nneyɛe bi ase akyea no. Nneɛma a ɛmma wɔnte afoforo ase no yɛ pii. Ɛtɔ mmere bi a, ɛyɛ kyerɛ ara na yentumi nkyerɛkyerɛ yɛn nsɛm mu yiye sɛnea anka yɛbɛpɛ sɛ yɛyɛ no no. Dede a ɛwɔ baabi a yɛrekasa anaa nneɛma foforo a etwitware yɛn nsɛm mu betumi ama ayɛ den sɛ afoforo bɛyɛ aso atie yɛn yiye.

Su ahorow bi nso wɔ hɔ a afoforo nte ase. Sɛ nhwɛso no, wobetumi adi mfomso abu obi a ɔyɛ ohufo sɛ obi a ɔmpɛ nnipa, afoforo asɛm mfa ne ho, anaasɛ ɔyɛ ahantan. Osuahu ahorow a obi anya atwam betumi ama wafi nkate mu ayɛ ade sen sɛ obesusuw tebea horow ho yiye. Abusua ne kasa mu nsonsonoe nti ebetumi aba sɛ wɔrente afoforo ase ankasa. Esiane afoforo nsɛm a wotumi kyinkyim no ne nseku nti, ɛnsɛ sɛ ɛyɛ yɛn nwonwa sɛ ɛtɔ mmere bi a sɛnea wɔkyerɛkyerɛ nsɛm anaa nneɛma bi a obi yɛe mu no taa yɛ soronko koraa wɔ nea na ɔrepɛ akyerɛ ankasa ho. Ɛwom, eyi nyinaa ma wɔn a wosusuw sɛ wɔnte wɔn nsɛm ase no nya awerɛkyekye kakra.

 Sɛ nhwɛso no, Anna kaa gye a n’adamfo bi a na onni hɔ agye din ho asɛm a na onni ne ho adwemmɔne biara. Wɔkyerɛɛ asɛm no ase ɔkwan foforo so koraa kyerɛɛ n’adamfo no ma enti ɔde abufuw kaa Anna anim wɔ nnipa pii anim sɛ ɔretwe aberante bi a ɔne no bɔ ho ninkunu maa no ho dwiriw no. Ná wɔakyinkyim Anna asɛm no koraa, na mmɔden biara a ɔbɔe sɛ ɔbɛma n’adamfo no ahu sɛ na onkura adwemmɔne biara no ankosi baabiara. Saa tebea no haw no yiye, na bere pii twaam ansa na Anna retumi akyerɛkyerɛ asɛm no mu.

Mpɛn pii no, sɛnea afoforo bu wo no gyina adwene a wokura wɔ wo nsusuwii ho no so. Enti ɛnyɛ nwonwa sɛ ɛbɛhaw wo sɛ afoforo nte wo ase. Wo bo betumi afuw, na woaka sɛ wunhu nea enti a ɛnsɛ sɛ obi te wo ase. Wo fam no, nsusuwho a ɛte saa no nni nnyinaso pa, ɛyɛ kasatia, anaa ɛyɛ mfomso koraa, na ebetumi apira kɛse—titiriw sɛ wubu wɔn a wɔresusuw wo ho wɔ ɔkwan a ɛnteɛ so no a.

Ɛwom sɛ wo bo betumi afuw wɔ ɔkwan a afoforo fa so susuw wo ho no ho de, nanso ɛfata sɛ wokyerɛ obu ma afoforo nsusuwii. Ɛnyɛ Kristofo su sɛ wobebu afoforo nsusuwii animtiaa, na saa ara na yɛmpɛ sɛ yɛbɛma yɛn nsɛm apira afoforo. (Mateo 7:12; 1 Korintofo 8:12) Enti ɛtɔ bere bi a, ebehia sɛ wobɔ mmɔden sɛ wubesiesie adwene a ɛnteɛ a obi anya wɔ wo ho no. Nanso sɛ woma gye a wobegye wo atom no ho hia wo pii a, mfaso biara remma so, na ɛbɛma woahwere obu a wowɔ ma wo ho anaa wobɛte nka sɛ wɔapo wo. Efisɛ onipa ko a woyɛ ankasa no nnyina sɛnea afoforo bu wo no so.

Nanso, ebia wubehu sɛ nea wɔka tia wo no wɔ nnyinaso. Ɛno nso betumi ayɛ yaw, nanso sɛ wufi wo pɛ mu gye wo mmerɛwyɛ ahorow tom nokwarem a, osuahu a ɛtete saa no betumi aboa wo na akanyan wo ma woayɛ nsakrae horow a ehia.

Nneɛma Bɔne a Efi Mu Ba

Te a wɔnte wo ase no betumi de ɔhaw a anibere wom aba anaasɛ biribiara remfi mu mma. Sɛ nhwɛso no, sɛ wote sɛ ɔbarima bi rekasa denneennen wɔ adidibea bi a, ebia wobɛka sɛ ɔyɛ ahomaso anaa ɔhohoahoafo. Wubetumi adi mfomso. Ebetumi aba sɛ onipa a ɔne no rekasa no aso mu yɛ den. Anaa wubetumi abu obi a ɔte sotɔɔ ano sɛ ɔntew n’anim, nanso ebia na nneɛma nkɔ yiye mma no. Ɛwom sɛ te a wɔnte afoforo ase saa no ma wonya wɔn ho adwemmɔne de, nanso ɛda adi sɛ asiane titiriw anaa ɔhaw a ɛtra hɔ kyɛ biara remfi mu mma. Nanso ɛtɔ mmere bi a, te a wɔnte obi ase no betumi de asiane aba. Susuw nsɛm abien bi a esii wɔ tete Israel abakɔsɛm mu ho hwɛ.

Bere a Amonfo hene Nahas wui no, Dawid somaa abɔfo sɛ wɔnkɔma ne ba Hanun, a na wafi ase redi n’agya ade no hyɛden. Nanso wodii mfomso susuwii sɛ abɔfo no yɛ akwansrafo a wɔrebɛhwehwɛ Amonfo asase no so, enti ɛmaa Hanun dii kan sopaa abɔfo no, na ɔne Israel koe. Nea efii mu bae ne sɛ, anyɛ yiye koraa no, nnipa 47,000 wuwui—a ne nyinaa fi te a wɔante nsusuwii pa bi ase nti.—1 Beresosɛm 19:1-19.

Ansa na ɛno reba wɔ Israel abakɔsɛm mu  no, wodii ntease a na wonni bi ho dwuma ɔkwan soronko so. Ruben ne Gad mmusua no ne Manase abusua no fã sii afɔremuka tenten bi wɔ Yordan Asubɔnten no ho. Israelfo nkae no buu eyi sɛ ɛnkyerɛ nokwaredi, na wɔatew Yehowa so atua. Enti wɔboaboaa wɔn ho ano sɛ wɔrekotu wɔn so sa. Ansa na Israelfo yi bɛyɛ biribi a ɛbɛsɛe nneɛma no, wɔsomaa abɔfo ma wɔkɔdaa wɔn bo a na afuw wɔ ɔwae a na wosusuw sɛ wɔawae no ho adi. Na eye sɛ wɔyɛɛ saa, efisɛ wɔn a wosii afɔremuka no kae sɛ na wonni adwene biara sɛ wɔbɛwae afi nokware som ho. Nea ɛne no bɔ abira no, na afɔremuka no bɛyɛ nokware a na wobedi ama Yehowa no ho nkaedum. Anka ntease a na ɛnyɛ adwuma yi betumi akowie mogyahwiegu mu, nanso nyansa siw ade bɔne a ɛte saa no ano.—Yosua 22:10-34.

Fa Ɔdɔ Kyerɛkyerɛ Nsɛm Mu

Yebenya asuade afi nsɛm yi a yɛde bɛtoto ho no mu. Ɛda adi sɛ nsɛm a yɛbɛma emu ada hɔ no ne ade a nyansa wom sɛ yɛyɛ. Wɔ asɛm a etwa to no mu no, hena na onim nnipa dodow a anka wobewuwu a wɔannya anwuwu, esiane sɛ afanu no kasae nti? Mpɛn pii no, sɛ woantumi anhu obi nsusuwii ankasa mu a, ebia ɛnyɛ nkwa na ɛbɛda asiane mu, na mmom adamfofa. Enti sɛ wote nka sɛ obi afom wo a, so wugye di sɛ wote nsɛm ase sɛnea ɛte ankasa no, anaa worekyerɛ ase ɔkwan foforo so? Na dɛn ne onipa foforo no adwene? Bisa no. Wo wote nka sɛ wɔnte wo ase? Ka ho asɛm. Mma ahantan nnsiw wo kwan.

Yesu kyerɛɛ ɔkwan a eye sen biara a yɛbɛfa so adi ntease a ɛnyɛ adwuma ho dwuma: “Enti sɛ wo wode w’ayɛyɛde ba afɔremuka ho, na ɛhɔ wokae sɛ wo nua wɔ asɛm bi tia wo a, gyaw w’ayɛyɛde no afɔremuka no anim hɔ, na kɔ na wo ne wo nua no nkɔbom kan ansa na woaba abɛma w’ayɛyɛde no.” (Mateo 5:23, 24) Enti ade a ɛfata sɛ woyɛ ne sɛ wobɛkɔ onii ko no nkyɛn kokoam, a afoforo nte. Sɛ nea wafom wo no te sɛ woadi kan aka w’asɛm akyerɛ obi foforo a, ɛremmoa. (Mmebusɛm 17:9) Nea ɛsɛ sɛ ɛyɛ wo botae ne sɛ wonam ɔdɔ so bɛhwehwɛ asomdwoe. To wo bo ase fa nsɛm a emu da hɔ a adwemmɔne biara nni akyi kyerɛkyerɛ asɛm no mu. Kyerɛkyerɛ sɛnea tebea no ma wo wote nka no mu. Na afei fa adwempa tie nea afoforo wɔ ka no. Mpere wo ho sɛ wubenya afoforo ho adwene a ɛnteɛ. Nya ɔpɛ sɛ wubenya onipa foforo no ho adwempa. Kae sɛ, ɔdɔ ‘gye ade nyinaa di.’—1 Korintofo 13:7.

Ɛwom, sɛ nsɛm mu da hɔ mpo a, ebetumi aba sɛ ɛyawdi anaa nkate bɔne betumi ahyɛ wo mu. Dɛn na wubetumi ayɛ? Akyinnye biara nni ho sɛ ɛbɛyɛ papa sɛ wubefi komam apa kyɛw baabi a ɛho behia no, na woayɛ nneɛma foforo a ebetumi ama moasiesie mo ntam. Wɔ tebea horow a ɛtete saa nyinaa mu no, ɛbɛyɛ papa sɛ nea wafom no no bedi afotu a efi honhom mu yi akyi: “Na sɛ obi ne obi nya asɛm bi a, munhuhu mma mo ho na momfa nkyekyɛ mo ho; sɛnea Awurade de akyɛ mo no, sɛnea mo nso monyɛ ne no. Na eyinom nyinaa so na monhyɛ ɔdɔ a ɛne pɛyɛ hama no ngu.”—Kolosefo 3:13, 14; 1 Petro 4:8.

Bere dodow a yɛnyɛ pɛ no, bere bi bɛba a yɛrente yɛn ho ase na yebedi yaw. Obiara betumi adi mfomso anaa wakasa wɔ kwan bi so a enye anaa ɛyɛ yaw. Bible ka sɛ: “Yɛn nyinaa fom nneɛma pii mu. Sɛ obi mfom asɛm mu a, ɔno ara na ɔyɛ onipa a owie pɛyɛ a obetumi ato nipadua nyinaa nnareka adi so.” (Yakobo 3:2) Esiane sɛ Yehowa Nyankopɔn nim eyi yiye nti, ɔde ho akwankyerɛ ama yɛn: “Mma wo honhom mmpere abohuru ho, na nkwasea kokom na abohuru te. Nso mfa wo koma nsi nsɛm a wɔka nyinaa so, na woante sɛ w’akoa redome  wo. Na wo koma nim mpɛn bebree a wo nso wodomee ebinom.”—Ɔsɛnkafo 7:9, 21, 22.

‘Yehowa Kari Koma’

Na sɛ ɛte sɛ nea wuntumi nteɛ adwemmɔne a obi wɔ wɔ wo ho no nso ɛ? Mpa abaw. Kɔ so da Kristofo su pa adi sɛnea wubetumi biara. Srɛ Yehowa ma ɔmmoa wo na yɛ nsakrae a ehia sɛ woyɛ no. Ɛnyɛ sɛnea afoforo bu wo no na awiei koraa no ɛbɛkyerɛ nnipa ko a woyɛ. Yehowa nkutoo na obetumi ‘akari koma’ yiye. (Mmebusɛm 21:2) Yesu mpo, wɔammu no, na nnipa buu no animtiaa, nanso ɛno ansakra sɛnea Yehowa bu no no. (Yesaia 53:3) Ɛwom sɛ ebinom betumi abu wo atɛnkyea de, nanso wubetumi ‘aka wo komam asɛm’ akyerɛ Yehowa bere a wunim sɛ ɔte wo ase ‘efisɛ ɛnyɛ nea onipa hwɛ na Onyankopɔn hwɛ, na onipa hwɛ nea etua aniwa, na Yehowa de, ɔhwɛ komam.’ (Dwom 62:8; 1 Samuel 16:7) Sɛ wokɔ so yɛ ade pa a, bere kɔ so no, wɔn a wɔanya wo ho adwemmɔne no behu wɔn mfomso na wɔasakra wɔn nsusuwii.—Galatifo 6:9; 2 Timoteo 2:15.

So wokae Antonio a yɛkaa ne ho asɛm wɔ asɛm yi mfiase no? Ɔbɔɔ mmɔden dii Kyerɛwnsɛm mu afotu akyi, na ɔne n’adamfo Leonardo kasae bisaa no nea wayɛ a ahaw no no. Dɛn na efii mu bae? Leonardo ho dwiriw no. Obuae sɛ Antonio nyɛɛ biribiara a ahaw no, na ɔmaa no awerɛhyem sɛ ɛnyɛ n’adwene ne sɛ ɔbɛyɛ ade ma ahaw no. Sɛ ɛte sɛ nea wayɛ dinn a, ebia na ɔredwen biribi ho ntia. Leonardo paa kyɛw sɛ wanhyɛ da na ɔhaw n’adamfo no, na ɔdaa no ase sɛ ɔkaa asɛm no kyerɛɛ no. Ɔtoaa so sɛ efi saa bere no rekɔ no ɔbɛhwɛ yiye sɛ ɔremma afoforo nnya ne ho adwene a ɛte saa. Asɛm de n’asɛm kɔe, na nnamfo baanu no abusuabɔ mu yɛɛ den sɛ kan no ara.

Ɛnyɛ anigye koraa sɛ afoforo nte wo ase. Nanso sɛ wode Kyerɛwnsɛm mu nnyinasosɛm ahorow a ɛne ɔdɔ ne fafiri di dwuma na wobɔ mmɔden biara a wubetumi de kyerɛkyerɛ nsɛm mu a, ɛda adi sɛ nneɛma pa betumi afi mu aba saa ara.

[Ase hɔ asɛm]

[Mfonini ahorow wɔ kratafa 23]

Nneɛma pa betumi afi ɔdɔ ne fafiri a wode bedi dwuma de akyerɛkyerɛ nsɛm mu no mu aba