Asetram Nsɛm

Yɛsɔɔ Yehowa Hwɛe

SƐNEA PAUL SCRIBNER KA KYEREƐ

“Mema wo akye Owurayere Stackhouse. Mereyɛ Easter keeki ho nhyehyɛe, na migye di sɛ wobɛpɛ sɛ wunya bi ma w’abusua no.” Ná ɛyɛ fefɛw bere mfiase wɔ 1938 mu, na na mewɔ Atco, New Jersey, U.S.A., na na me ne wɔn a metɔn General Baking Company ade ma wɔn paa no mu biako na ɛrekasa. Ɛyɛɛ me nwonwa sɛ Owurayere Stackhouse dii me huammɔ.

ƆKAE sɛ: “Minnye nni sɛ m’ani begye ho. Yenni Easter.”

Afei na minhu nea menka. Munni Easter? Minni asɛm biara ka, efisɛ adetɔn mu mmara a edi kan ne sɛ, ɔdetɔfo asɛm yɛ dɛ bere nyinaa. Enti afei dɛn na mɛyɛ? Mimiaa m’ani kae sɛ: “Ɛyɛ keeki a ɛyɛ dɛ paa, na minim sɛ w’ani gye yɛn nneɛma ho. Nanso, sɛ wunni Easter mpo a, wunsusuw sɛ w’abusua no ani begye ho?”

Ɔkae bio sɛ: “Minnye nni, nanso mayɛ m’adwene sɛ me ne wo besusuw asɛm bi ho Owura Scribner, na misusuw sɛ bere a ɛfata sɛ meyɛ saa ni.” Ná saa nkɔmmɔbɔ no bɛsakra m’asetra koraa! Owurayere Stackhouse a ɔyɛ Berlin, New Jersey, Yehowa Adansefo Kuw (anaa asafo) no muni no kyerɛkyerɛɛ me faako a Easter afahyɛ no fi, na ɔmaa me nhomawa abiɛsa. Nhomawa ahorow no asɛmti ne Safety, Uncovered, ne Protection. Mede nhomawa no kɔɔ fie, a na mabɔ hu kakra nanso na mepɛ sɛ mihu nea ɛwom. Ná biribi wɔ nea Owurayere Stackhouse ka kyerɛɛ me no mu a na minim fi me mmofraase.

Bere a Edi Kan a Me ne Bible Asuafo no Dii Nkitaho

Wɔwoo me January 31, 1907, na wɔ 1915 mu, bere a na madi mfe awotwe no, kokoram kum me papa. Ne saa nti, me ne Maame kɔtraa  n’awofo nkyɛn wɔ fie kɛse bi mu wɔ Malden, Massachusetts. Ná Benjamin Ransom, a ɔyɛ me wɔfa ne ne yere nso te abansoro dan a ɛto so abiɛsa mu wɔ hɔ bi. Ná Wɔfa Ben ne Amanaman Ntam Bible Asuafo, sɛnea na wɔfrɛ Yehowa Adansefo ansa na afeha a ɛto so aduonu no refi ase no, na ɛbɔ fekuw. Ná m’ani gye Wɔfa Ben ho paa, nanso na Maame abusuafo a na wɔyɛ Metɔdistfo no susuw sɛ, ɔyɛ nipa soronko. Mfe bi akyi, ansa na ne yere regyae no no, otumi ma wɔde no kɔtoo ayaresabea a wɔhwɛ wɔn a wɔwɔ adwenem nyarewa esiane ne som mu gyidi nti! Esiane sɛ nnuruyɛfo a wɔwɔ ayaresabea hɔ huu no ntɛm pa ara sɛ asɛm biara nni Wɔfa Ben adwene ho nti, wɔmaa no dibem, yii no fii hɔ.

Ná Wɔfa Ben de me kɔ Amanaman Ntam Bible Asuafo no nhyiam ahorow ase wɔ Boston, titiriw bere a wobenya ɔkasafo bi afi baabi anaa bere a na wɔreyɛ biribi titiriw no. Bere bi, nea na obefi baabi abɛma ɔkasa no nyɛ obiara sɛ, Charles Taze Russell, a na ɔhwɛ asɛnka adwuma no so saa bere no. Bere foforo no, na ade titiriw a wɔreyɛ ne “Photo-Drama of Creation” sini a na wɔreyi no. Ɛwom sɛ na saa bere no yɛ 1915 mu tɔnn de, nanso ɛde besi nnɛ, meda so ara kae Abraham a na ɔne Isak reforo bepɔw de no akɔbɔ afɔre no yiye. (Genesis, ti 22) Meda so ara tumi hu Abraham ne Isak a ɔso nnyina a wɔreforo bepɔw, bere a Abraham de ne ho nyinaa to Yehowa so no. Esiane sɛ na meyɛ ayisaa nti, m’ani gyee ho yiye.

Ɛno akyi no, Wɔfa Ben ne ne yere tu kɔɔ Maine, na Maame san waree ma yɛn abusua no tu kɔɔ New Jersey. Enti manhu Wɔfa Ben bere tenteenten. Bere a miduu mpanyin afe so a na mewɔ New Jersey no, mihyiaa Marion Neff, a na ɔka mmofra baawɔtwe a wɔwɔ Presby abusua bi a na metaa kɔ wɔn nkyɛn mu ho no. Me ne saa abusua no ne wɔn asɔre mmabun kuw bi bɔɔ fekuw Kwasida anwummere mpɛn pii araa ma awiei koraa no, mebɛyɛɛ Presbyni. Nanso na meda so ara kae nneɛma a misuae wɔ Bible Asuafo no nhyiam ahorow ase no bi. Me ne Marion waree wɔ 1928 mu, na yɛwoo yɛn mmabea, Doris ne Louise wɔ 1935 ne 1938 mu. Bere a yenyaa abofra ketewa ne akokoaa wɔ yɛn abusua no mu no, yɛn nyinaa tee nka sɛ yehia honhom fam akwankyerɛ na yɛde atete yɛn abusua no.

Nokware no a Yehui Wɔ Nhomawa Ahorow no Mu

Ná me ne Marion rehwehwɛ asɔre bi akɔdɔm, na yɛfaa adwene bi. Sɛ edu Kwasida biara a, na yedi nsesa ma yɛn mu biako ne mmofra no tra fie, na ɔfoforo no akɔ asɔre a yɛpɛ sɛ yɛkɔ no. Eduu Kwasida bi no, na adu Marion so sɛ ɔtra fie, nanso mituu me ho mae sɛ mɛtra fie ahwɛ mmofra no sɛnea ɛbɛyɛ a metumi akenkan Safety, nhomawa abiɛsa a Owurayere Stackhouse de maa me no mu nea edi kan no. Mifii ase no, mantumi amfa anto hɔ! Migye dii paa sɛ mahu biribi a asɔre biara ntumi nkyerɛ me. Dapɛn a edi hɔ no, asɛm koro no ara sii, na mifi me pɛ mu paw sɛ mɛtra fie ahwɛ mmofra no na makenkan nhomawa a ɛto so abien, Uncovered, no. Ná ɛte sɛ nea minim nea merekenkan no. So eyi na na Wɔfa Ben gye di no anaa? Ná yɛn abusuafo no susuw sɛ ne som no nye. Dɛn na Marion  bedwen? Ná ɛnsɛ sɛ mehaw me ho koraa. Bere a mekenkan Uncovered no wiei akyi nna kakraa bi no, da koro, bere a mifii adwumam baa fie no, Marion maa me ho dwiriw me bere a ɔkae sɛ, “Makenkan nhomawa abien a wode baa fie no. Emu nsɛm yɛ dɛ paa.” Ɛmaa me ho tɔɔ me!

Ná nhoma a wɔayi no adi foforo, Enemies, a na ɛpa atoro som ho ntama denneennen no ho nsɛm wɔ nhomawa no akyi. Yesii gyinae sɛ yɛbɛma yɛn nsa aka bi. Nanso ansa na yɛde yɛn abisade no bɛmena no, Ɔdansefo bi bɛbɔɔ yɛn pon mu, na ɔde saa nhoma no bi maa yɛn. Asɛm no nyinaa ni! Yegyaee asɔre ahorow no kɔ, na yefii ase kɔɔ Yehowa Adansefo Kuw a ɛwɔ Camden, New Jersey no nhyiam ahorow. Asram kakraa bi akyi, wɔ Kwasida, July 31, 1938 no, nnipakuw a yɛyɛ bɛyɛ 50 hyiae wɔ Onuawa Stackhouse aboboano—wɔ fie a mebɔɔ mmɔden sɛ mɛtɔn Easter keeki no mu—tiee asubɔ kasa a Ɔtemmufo Rutherford mae a na wɔakyere agu hama so no. Afei yɛn mu 19 sesaa yɛn ntade, na wɔbɔɔ yɛn asu wɔ asuwa bi a na ɛbɛn hɔ mu.

Misii Me Bo sɛ Mɛyɛ Ɔkwampaefo

M’asubɔ akyi pɛɛ no, onuawa biako a ɔwɔ kuw no mu kaa nkurɔfo bi a wɔfrɛ wɔn akwampaefo  a wɔde baguam asɛnka adwuma no ayɛ wɔn adwuma titiriw ho asɛm kyerɛɛ me. Ntɛm ara mepɛe sɛ mihu sɛnea wɔte, na ankyɛ na mihuu abusua mũ a na wɔn nyinaa yɛ akwampaefo. Ná ɔbarima bi a ne mfe akɔ anim, Onua Konig, ne yere, ne ne babea a wanyin nyinaa yɛ akwampaefo wɔ asafo a na ɛbɛn yɛn no mu. Sɛ́ agya wɔ abusua a yenni suahu pii mu no, anigye kɛse a na Konig abusua no wɔ wɔ asɛnka adwuma no mu no hyɛɛ me nkuran. Ná metaa gyina, de me lɔre a mede tɔn paanoo no si hɔ, na me ne wɔn kɔ afie afie asɛnka no kakra. Ankyɛ na mepɛe sɛ m’ankasa meyɛ ɔkwampaefo. Nanso na mɛyɛ dɛn ayɛ? Ná me ne Marion wɔ mma nkumaa baanu, na na adagyew nni m’adwuma no mu koraa. Nokwasɛm ni, bere a Wiase Ko II fii ase wɔ Europa na mmerante pii de wɔn ho hyɛɛ sraadi mu wɔ United States no, nnwuma bɛdɔɔso maa yɛn a na yɛnyɛ asraafo adwuma no. Bere nyinaa na wɔhyɛ me nkuran sɛ mentrɛw mmeae a metɔn nneɛma no mu, na na minim sɛ saa nhyehyɛe no remma mintumi nyɛ ɔkwampaefo da.

Bere a mekaa ɔpɛ a mewɔ sɛ mɛyɛ ɔkwampaefo ho asɛm kyerɛɛ Onua Konig no, ɔkae sɛ: “Wo de, kɔ so bɔ wo ho mmɔden wɔ Yehowa som mu, na kɔ so fa wo botae no to n’anim wɔ mpaebɔ mu. Ɔbɛboa wo ma woadu ho.” Mekɔɔ so yɛɛ saa ara bɛboro afe. Mpɛn pii no na misusuw kyerɛw nsɛm te sɛ Mateo 6:8 a ɛma yɛn awerɛhyem sɛ Yehowa nim yɛn ahiade mpo ansa na yɛrebisa no no ho. Na mekɔɔ so bɔɔ mmɔden sɛ medi afotu a ɛwɔ Mateo 6:33 no so—sɛ mɛkɔ so ahwehwɛ Onyankopɔn Ahenni ne ne trenee kan. Onua Melvin Winchester, dantaban somfo (a mprempren wɔfrɛ no ɔmansin sohwɛfo no), nso hyɛɛ me nkuran.

Mekaa me botae ahorow no ho asɛm kyerɛɛ Marion. Yesusuw nsɛm a ɛwɔ Malaki 3:10, a ɛhyɛ yɛn nkuran sɛ yɛnsɔ Yehowa nhwɛ sɛ ɔrenhwie ne nhyira ngu yɛn so no ho. Ne mmuae yi hyɛɛ me den: “Sɛ wopɛ sɛ woyɛ akwampae adwuma a, ntwentwɛn wo nan ase esiane me nti. Metumi ahwɛ mmeawa no bere a woyɛ akwampae adwuma no. Na mpo, yenhia honam fam nneɛma pii.” Bere a na yɛaware mfirihyia 12 akyi no, na minim sɛ Marion yɛ ɔyere a onim nneɛma so hwɛ yiye. Wada ne ho adi sɛ ɔhokafo pa wɔ akwampae adwuma no mu mfe pii ni, na ade a ama yɛatumi de mfirihyia 60 asom sɛ bere nyinaa asomfo no biako ne sɛnea ɔma n’ani sɔ honam fam nneɛma kakra a ɔwɔ na ɔma ɛyɛ te sɛ nea ɛdɔɔso no.

Eduu 1941 ahohuru bere mu, bere a na mede mpaebɔ asusuw nneɛma ho akyi no, Me ne Marion tumi siee sika kakra, na yɛtɔɔ fie bi a esi lɔre so a na yɛn abusua no betumi atra mu a ne tenten yɛ mita 5.5. Migyaee m’adwuma no bɛyɛɛ ɔkwampaefo wɔ July 1941 mu, na mayɛ bere nyinaa som adwuma no fi saa bere no. Baabi a midii kan yɛɛ adwuma ne mmeae du a bɔs gyina wɔ Route 50 a ɛwɔ New Jersey ne St. Louis, Missouri ntam, faako a na yɛbɛyɛ yɛn mantam nhyiam wɔ August mfiase mu no. Wɔde anuanom a wɔte saa kwan no so din ne wɔn address maa me, na mekyerɛw wɔn krataa dii m’anim kyerɛɛ wɔn bere a ɛsɛ sɛ wɔhwɛ m’anim. Bere a yeduu nhyiam no ase no, na ɛsɛ sɛ mekɔ akwampaefo dwumadibea hɔ ma wɔma me dwumadi foforo.

“Merekɔsɔ Yehowa Ahwɛ”

Yɛde nhoma hyɛɛ yɛn fie ketewa no mu ma kɔɔ yɛn nhyiam a etwa to wɔ Camden ne anuanom no kodii nkra. Bere a na yɛwɔ mmofra nkumaa baanu a ɛsɛ sɛ yɛhwɛ wɔn na yennim baabi a sɛ yewie nhyiam no a yɛbɛkɔ no, na ɛte sɛ nea anuanom no binom nte yɛn nhyehyɛe no ase no, na wɔn mu pii kae sɛ: “Ɛrenkyɛ koraa na moasan aba.” Mekae sɛ mekaa sɛ: “Ɛwom, ɛnyɛ sɛ mereka sɛ meremma bio. Yehowa na ɔkae sɛ ɔbɛhwɛ me, enti merekɔsɔ Yehowa ahwɛ.”

Mfe 60 a yɛde ayɛ akwampae adwuma wɔ nkurow 20 mu fi Massachusetts kosi Mississippi akyi no, yebetumi aka sɛ Yehowa adi ne bɔhyɛ so ma aboro so. Nhyira a wɔahwie agu me ne Marion, ne yɛn mmabea baanu no so no boro biribiara a mehwɛɛ kwan sɛ menya wɔ 1941 mu no so. Ebi ne sɛ wama yɛn mmabea no som sɛ akwampaefo anokwafo wɔ asafo horow a ɛbɛn yɛn mu, na (bere a etwa to a yɛkan  wɔn dodow no) na yɛwɔ honhom fam mmabarima ne mmabea bɛyɛ ɔha a wɔapete United States Apuei fam Mpoano nyinaa. Me ne nnipa 52 na asua ade ma wɔahyira wɔn nkwa so ama Yehowa Nyankopɔn, na Marion ne nnipa 48 na ayɛ saa.

Yeduu St. Louis wɔ August 1941 mu, na ɛhɔ na mihyiaa Onua T. J. Sullivan a ofi Betel. Ná okura m’asomfo krataa a na mihia esiane ɔko a na ɛreba ne hyɛ a na wɔhyɛ nkurɔfo de wɔn kɔ sraadi no nti. Meka kyerɛɛ Onua Sullivan sɛ me ne me yere nyinaa kɔ asɛnka pɛ enti ɔpɛ sɛ ɔne me yɛ akwampae adwuma no. Ɛwom sɛ na wonnya nhyehyɛɛ akwampae dwumadibea wɔ nhyiam no ase de, nanso ɛhɔ ara na Onua Sullivan de Marion din kaa akwampaefo no ho na obisaa yɛn sɛ: “Ɛhefa na sɛ yewie nhyiam no a, mobɛkɔ akɔyɛ akwampae adwuma no?” Na yennim. Ɔkae sɛ: “Ɛnyɛ hwee, mommma ɛnnhaw mo, mubehyia obi wɔ nhyiam no ase a ofi baabi a wohia akwampaefo, na nneɛma bɛkɔ yiye. Nea ɛsɛ sɛ moyɛ ara ne sɛ mobɛkyerɛw yɛn akyerɛ baabi a mowɔ, na yɛbɛma mo dwumadi.” Ɛno ara na esii. Ɛkɔbae sɛ na Onua Jack DeWitt, a na kan no ɔyɛ ɔmansin somfo no nim nkurɔfo bi wɔ New Market, Virginia, a na wɔwɔ akwampaefo fie a ehia akwampaefo kakra. Enti nhyiam no akyi no, yesiim kɔɔ New Market.

Bere a yeduu New Market no, yehyiaa anigyesɛm bi. Ɛnyɛ obiara na na ofi Philadelphia abɛka yɛn ho ma yɛayɛ akwampae adwuma no sɛ Benjamin Ransom! Yiw, Wɔfa Ben! Hwɛ anigye ara a na ɛyɛ sɛ yɛne no bɛyɛ afie afie asɛnka adwuma no wɔ bɛboro mfirihyia 25 akyi, bere a na wagu nokware no aba wɔ me komam wɔ Boston no! Ɛmfa ho sɛ ohyiaa animtiaabu ne fɛwdi, ne mpo ɔtaa wɔ abusuafo nsam no, ɔdɔ a na Wɔfa Ben wɔ ma Yehowa ne ɔsom adwuma no amfi ne mu.

Yɛne no traa akwampaefo fie hɔ asram awotwe wɔ New Market. Saa bere no na yesuaa nneɛma pii a ebi ne sɛnea yɛde nhoma ma de gye nkokɔ ne nkesua. Ɛno akyi no, wɔmaa me ne Marion, Wɔfa Ben, ne afoforo baasa dwumadi sɛ yɛnkɔsom sɛ akwampaefo atitiriw wɔ Hanover, Pennsylvania—dwumadi a edi kan wɔ asia a yɛyɛe wɔ Pennsylvania fi 1942 kosi 1945 mu no.

Akwampaefo Atitiriw Bere a Wiase Ko II Rekɔ So

Bere a na Wiase Ko II rekɔ so no, edu bere bi a na yehyia ɔtan esiane afã biara a na yenni no nti, nanso Yehowa di boaa yɛn bere nyinaa. Bere bi a na yɛwɔ Provincetown, Massachusetts no, yɛn Buick kar a na ayɛ dedaw no sɛee, ma enti na ɛsɛ sɛ mitwa kwan kilomita pii kɔfa mpɔtam bi a na Katolekfo a wɔmpɛ yɛn asɛm wɔ kɔyɛ sankɔhwɛ. Mitwaa mmerante kuw bi a wɔyɛ basabasa ho, na wohuu me fii ase teɛteɛɛm. Memaa ne nantew mu yɛ hyew hwɛe sɛ wonni m’akyi bere a na abo a wɔretotow no nenam m’aso ho no. Miduu onigyefo no fie a mampira. Nanso ofiewura no a ɔyɛ Amerika Asraafo a Onyin Ama Wɔagyae Adwumayɛ Fekuw muni a wobu no no de kyɛwpa kae sɛ: “Minnya adagyew mma wo anadwo yi efisɛ me werɛ fii sɛ yɛbɛkɔ kurom akɔhwɛ sini anadwo yi.” Bere a mekaee sɛ mmerante a wɔtoto abo wɔ kwan ho no retwɛn sɛ mɛsan aba no, me koma tui. Nanso me ho tɔɔ me bere a ɔpanyin no kae sɛ: “Dɛn nti na wo ne yɛn mmom nnantew? Yebetumi abɔ nkɔmmɔ wɔ kwan so.” Enti midii no adanse, na mitwaam wɔ baabi a ɛhɔ yɛ hu no.

Abusua ne Ɔsom Adwuma a Mema Ɛkari Pɛ

Ɔko no akyi no, yenyaa dwumadi pii wɔ Virginia, na yɛde mfe awotwe nso traa Charlottesville somee sɛ akwampaefo atitiriw ne daa akwampaefo. Eduu 1956 no, na mmabaa no anyinyin awareware, na me ne Marion toaa yɛn akwantu no so bio, somee sɛ akwampaefo wɔ Harrisonburg, Virginia, ne sɛ akwampaefo atitiriw wɔ Lincolnton, Carolina Atifi fam.

Wɔ 1966 mu no, wɔmaa me ɔmansin dwumadi, na mitutuu akwan fii asafo mu kɔɔ asafo mu hyɛɛ anuanom no nkuran, sɛnea Onua Winchester hyɛɛ me nkuran wɔ New Jersey wɔ 1930 mfe no mu tɔnn no. Mede mfe abien som asafo ahorow a wɔyɛ ɔmansin biako wɔ Tennessee no. Ɛno akyi no, wɔmaa me ne Marion san kɔyɛɛ adwuma a yɛn ani gye ho paa, akwampaefo atitiriw. Efi 1968 kosi 1977 no, yɛsomee sɛ akwampaefo atitiriw wɔ Deep South, fi Georgia kosi Mississippi.

 Wɔpaw me sɛ asafo mu ɔhwɛfo (ɛnnɛ ɛyɛ ɔhwɛfo guamtrani) wɔ Eastman, Georgia de me sii Powel Kirkland, onua dɔfo bi a na ne mfe akɔ anim a na ɔde mfe pii asom sɛ ɔmansin sohwɛfo nanso na ɔnte apɔw no ananmu. Ɔkyerɛɛ ho anigye, na ɔboaa me ma ɛyɛɛ me nwonwa. Na ne mmoa ho hia paa efisɛ na wontwiwontwi bi wɔ asafo no mu a na mpanyimfo no binom ho wom. Asɛm no mu bɛyɛɛ den, na mede nnɔnhwerew pii bɔɔ Yehowa mpae. Kyerɛwnsɛm te sɛ Mmebusɛm 3:5, 6 baa m’adwenem: “Fa wo koma nyinaa bata [Yehowa, NW] ho, na mfa wo ho ntweri wo nhumu. Hu no w’akwan nyinaa mu, na ɔno na ɔbɛteɛ w’akwan.” Bere a yɛbɔɔ mmɔden sɛ yɛbɛbom asusuw nsɛm ho no, yetumi maa biakoyɛ baa asafo no mu, na yɛn nyinaa ani gyei.

Eduu 1977 no, na yɛafi ase rete onyin nka, na wɔsan de yɛn kɔɔ Charlottesville hɔ, baabi a yɛn mmabea baanu no nyinaa ne wɔn mmusua te no. Wɔ mfirihyia 23 a atwam mu no, yɛn ani agye sɛ yɛresom wɔ mpɔtam ha na yɛaboa ma wɔafi Ruckersville, Virginia asafo no ase, na afei yɛrehu yɛn Bible asuafo a wodi kan no mma ne mmanana sɛ wɔanyin abɛyɛ asafo mu mpanyimfo, akwampaefo, ne Betelfo. Me ne Marion da so ara tumi yɛ asɛnka adwuma ho nhyehyɛe pa, na manya hokwan som  sɛ ɔpanyin wɔ Charlottesville East Asafo no mu, na mehwɛ nhoma adesua so, ma baguam kasa ahorow.

Yɛahyia nsɛnnennen sɛnea obiara hyia bi no wɔ mfe a abɛsen kɔ no mu. Sɛ nhwɛso no, ɛmfa ho mmɔden a yɛbɔe no, Doris bɛyɛɛ mmerɛw honhom fam kakra bere a na aka kakra ma wadi mfe aduonu no, na ɔkɔwaree ɔbarima bi a na ɔnyɛ Ɔdansefo. Nanso ɔdɔ a na ɔwɔ ma Yehowa no ansa koraa, na ne babarima Bill asom wɔ Wallkill, New York Betel mfirihyia 15 ni. Mprempren Doris ne Louise nyinaa yɛ akunafo, nanso wɔde anigye som sɛ akwampaefo wɔ baabi a ɛbɛn yɛn.

Asuade a Manya Wɔ Mfe a Abɛsen Kɔ no Mu

Masua sɛ mede mmara a ɛnyɛ den a ɛma obi tumi som Yehowa no bedi dwuma: Yɛ wo ho awiɛmfoɔ. Da nhwɛso pa adi wɔ wo nneyɛe nyinaa mu ne wo kokoam asetra nso mu. Fa “akoa nokwafo ne ɔbadwemma” no akwankyerɛ di dwuma wɔ biribiara mu.—Mateo 24:45.

Marion akyerɛw nyansahyɛ ntiantiaa a ɛma obi tumi yɛ akwampae adwuma bere a ɔretete mmofra no: Yɛ nhyehyɛe a wotumi de di dwuma. Fa akwampae adwuma no yɛ w’adwuma ankasa. Di aduan pa. Nya bere gye w’ahome. Mfa wo ho nhyɛ ahomegye mu bebree. Ma wo mma no ani nnye nokware no ne ɔsom adwuma no afã horow nyinaa ho wɔ wɔn asetra mu. Ma asɛnka adwuma no nyɛ ade a ɛma wɔn ani gye bere nyinaa.

Mprempren yɛwɔ yɛn mfe 90 mu. Mfe aduosia abien ni a yetiee asubɔ kasa wɔ Stackhouse aboboano no, na yɛde mfe 60 ayɛ bere nyinaa som adwuma no. Me ne Marion betumi aka no nokwarem sɛ yɛn ani gye nea yɛwɔ wɔ asetram no ho paa. M’ani sɔ nkuranhyɛ a minyae sɛ agya a na minnyinii, a na ɛne sɛ, memfa honhom fam botae nni kan na menkɔ so nyɛ ho adwuma no ho yiye, na meda me yere a medɔ no, Marion, ne mmabaa baanu no ase wɔ mmoa a wɔde aboa me mfe a abɛsen kɔ no nyinaa ho. Bere a yenni honam fam ahonyade pii no, metaa de Ɔsɛnkafo 2:25 toto me ho sɛ: “Hena na odidi, na hena na onya biribi sen me?”

Nokwarem, yɛn fam no, Yehowa adi ne bɔhyɛ a ɛwɔ Malaki 3:10 no so ma aboro so. Ampa ara, ‘wɔahwie nhyira agu yɛn so ma aboro so’!

[Adaka/Mfonini wɔ kratafa 29]

NNEƐMA A MEKAE WƆ ƆKO MMERE NO MU

Mfirihyia bɛyɛ 60 a ɔko no baa awiei ni no, abusua no nyinaa da so ara kae nsɛm a esisii saa bere no yiye.

Doris ka sɛ: “Na Pennsylvania tumi yɛ nwini paa.” “Anadwo bi na ɛyɛ Celsius 35.” Louise de ka ho sɛ: “Na me ne Doris tratra yɛn nan so wɔ Buick kar a ayɛ dedaw no akyi sɛnea ɛbɛyɛ na awɔw no nkye yɛn.”

Doris ka sɛ: “Nanso yɛante nka sɛ yɛyɛ ahiafo anaasɛ yɛn ho akyere yɛn. Yenim sɛ na yɛtaa tu kɔ mmeae foforo sen afoforo de, nanso na bere nyinaa yedi aduan pa, na na yenya ntade a ɛnyɛɛ dedaw a ɛyɛ fɛ fi yɛn nnamfonom a na wɔwɔ Ohio a na wɔn mmabea anyinyin sen yɛn kakra no nkyɛn.”

Louise ka sɛ: “Bere nyinaa na Maame ne Paapa ma yɛte nka sɛ wɔdɔ yɛn, na na yɛne wɔn de bere pii kɔ asɛnka. Ɛmaa yɛtee nka sɛ yɛsom bo ma wɔn na yɛbɛn wɔn paa.”

Paul ka sɛ: “Na mewɔ 1936 Buick kar Soronko bi a na ne nhyɛmudua no taa tu. Misusuw sɛ na engine no ahoɔden so sen kar no afã a aka no nyinaa. Ɛte sɛ nea na bere biara ɔsram a awɔw wom paa anadwo no na na ɛtaa tu, na ɛba saa a na masi kwan so kɔ beae a wɔtɔn nnadegow no akɔpɛ nhyɛmudua foforo. Me ho bɛkokwawee wɔ sɛnea wotu de foforo hyɛ no mu.”

Marion ka sɛ: “Mma wo werɛ mmfi nkratasin a na yɛde tɔ ade no. Ná wosusuw biribiara—nnam, pɛtro, kar tae, ne biribiara. Bere biara a yebedu baabi a wɔama yɛn dwumadi foforo no, na ɛsɛ sɛ yɛkɔ hɔnom atumfoɔ anim kogye kratasin a yɛde bɛtɔ ade. Etumi di asram bi ansa na yɛn nsa aka bi, na ɛkɔbae sɛ bere biara a yɛn nsa bɛka yɛn kratasin no, na wɔama yɛn dwumadi foforo, na yɛasan afi ase bio. Nanso, bere nyinaa na Yehowa hwɛ yɛn.”

[Mfonini]

Me ne Marion ne Doris (benkum) ne Louise, afe 2000 mu

[Mfonini wɔ kratafa 25]

Me ne me maame wɔ 1918 mu bere a na madi mfe 11

[Mfonini wɔ kratafa 26]

Me ne Louise, Marion, ne Doris wɔ 1948 mu bere a mmeawa no bɔɔ asu no

[Mfonini wɔ kratafa 26]

Yɛn ayeforohyia mfonini, October 1928

[Mfonini wɔ kratafa 26]

Me ne me mmabea (benkum so ne nifa so) wɔ Yankee Staduim, 1955