“So Onyankopɔn Bu Nnipa Fɔ Ma Wɔhyew Wɔn Wɔ Hell Ankasa?”

“So moresua nyamesɛm?”

Asɛmmisa yi maa Joel ne Carl ho dwiriw wɔn. Ná mmerante baanu yi—atuhoamafo a wɔresom wɔ Yehowa Adansefo adwumayɛbea ti a ɛwɔ Brooklyn, New York no—rebuebue nhoma mu wɔ nhomatɔnbea bi a ɛbɛn hɔ. Bere a na Joel rehwehwɛ Bible mu nsɛm a wɔahyehyɛ mu no, na Carl reka nkɔmmɔ bi a na ɔne obi abɔ wɔ asɛnka mu ho asɛm akyerɛ no. Bere a ɔbarima bi a na ɔbɛn wɔn tee nkɔmmɔbɔ yi fã bi no, ɛkaa no ma ɔbɛn wɔn.

Nanso, na ɔbarima no wɔ n’ankasa asɛm bi a ehia no kɛse sen nyamesɛm a ebia na mmerante baanu no resua no. Ɔkyerɛkyerɛɛ mu sɛ: “Meyɛ Yudani, na me nnamfo Kristofo bi aka akyerɛ me sɛ wɔbɛhyew me wɔ Hell esiane sɛ Yudafo poo Yesu nti. Eyi rehaw me yiye. Ɛte sɛ nea asotwe a ɛte saa a efi Onyankopɔn a ɔwɔ dɔ hɔ no nteɛ no. So Onyankopɔn bu nnipa fɔ ma wɔhyew wɔn wɔ hell ankasa?”

Joel ne Carl ka kyerɛɛ ɔbarima komapafo yi sɛ wɔyɛ nkurɔfo a wosua Bible no anibere so. Wofii Kyerɛwnsɛm no mu kyerɛɛ no sɛ awufo nnim hwee na wɔadeda wɔ owu mu retwɛn owusɔre. Enti, wɔnyɛ wɔn ayayade wɔ hellgya biara mu. (Dwom 146:3, 4; Ɔsɛnkafo 9:5, 10; Daniel 12:13; Yohane 11:11-14, 23-26) Wɔ simma 45 nkɔmmɔbɔ no akyi no, ɔbarima no de n’address maa Joel ne Carl, na ɔkae sɛ ohia ɔsɛmpɔw no ho nsɛm pii.

Sɛ hell yɛ baabi a ɛhɔ yɛ hyew a wɔyɛ nkurɔfo ayayade a, so anka obi bɛsrɛ sɛ wɔmma no nkɔ hɔ? Nanso, bere a na tete agya Hiob pɛ sɛ ofi n’amanehunu no mu no, ɔde adesrɛde yi too gua sɛ: “Hena na ɔbɛyɛ eyi ama me, sɛ wode me besie hell, na wode me ahintaw akosi sɛ w’abufuw bɛsen akɔ?” (Hiob 14:13, Douay Version) Ɛda adi pefee sɛ na Hiob nnye nni sɛ hell yɛ baabi a wɔyɛ nkurɔfo ayayade. Mmom no, ɔhwehwɛɛ sɛ wɔkora no so wɔ hɔ. Owu yɛ tebea a obi kɔ mu a na onnim baabiara, na hell a Bible ka ho asɛm no yɛ adesamma nyinaa damoa.

Sɛ wopɛ nea sɛ yewu a ɛba yɛn so ne anidaso a ɛwɔ hɔ ma owu akyi asetra ho nsɛm pii a, yɛde anigye to nsa frɛ wo sɛ gye ɔfrɛ a edi hɔ yi so.