Ɛkyɛ Sen Sika Amapa

SIKA kɔkɔɔ fɛ a ɛyɛ ne kyɛ a ɛkyɛ nti na ɛma nkurɔfo ani bere ho kɛse no. Nea ɛma nkurɔfo ani gye ho kɛse ne hyerɛn a ɛkɔ so hyerɛn ne sɛnea ɛkame ayɛ sɛ biribiara ntumi nsɛe no da no. Eyi te saa efisɛ ɛkame ayɛ sɛ nsu, mframa, sufre, ne biribi foforo biara ntumi nsɛe sika kɔkɔɔ. Sika agude pii a wɔahu wɔ ahyɛn a amem wɔ nsu ase ne mmeae ahorow mfehaha pii ni no da so ara hyerɛn.

Nanso, nea ɛyɛ nwonwa no, Bible ka sɛ biribi wɔ hɔ a ɛkyɛ na “ne bo yɛ den pii sen sika—a wɔsɔ hwɛ wɔ ogya mu, nanso ɛsɛe.” (1 Petro 1:7) Sika kɔkɔɔ a wɔnam ogya so ‘asɔ ahwɛ’ anaa wɔnam akwan foforo so ayiyi mu betumi ayɛ nea edi mũ ɔha biara mu nkyem 99.9. Nanso, sɛ wɔde sika kɔkɔɔ a wɔayiyi mu koraa gu nsu yerɛyerɛw (adehye nsu) mu a ɛsɛe anaasɛ ɛnan. Enti sɛ wokɔ mu paa a, nea Bible ka no ne nyansahu hyia bere a ɛka sɛ sika ‘tumi sɛe’ no.

Sɛ yɛde toto ho a, nokware Kristofo gyidi gye ‘ɔkra nkwa.’ (Hebrifo 10:39) Nnipa betumi akum obi a ɔwɔ gyidi a emu yɛ den, sɛnea wɔyɛɛ Yesu Kristo no. Nanso wɔhyɛ wɔn a wɔwɔ gyidi amapa no bɔ yi sɛ: “Di nokware kodu wu mu, na mɛma wo nkwa abotiri.” (Adiyisɛm 2:10) Onyankopɔn kae anokwafo a wowuwu no, na obenyan wɔn. (Yohane 5:28, 29) Sika kɔkɔɔ dodow biara ntumi nyɛ saa. Saa kwan yi so no, gyidi som bo kɛse ankasa sen sika kɔkɔɔ. Nanso, sɛ gyidi bɛsom bo saa a, ɛsɛ sɛ wɔsɔ hwɛ. Nokwarem no, ɛyɛ ‘gyidi a wɔasɔ’ ahwɛ na Petro kaa ho asɛm sɛ ɛsom bo sen sika no. Yehowa Adansefo ani begye sɛ wɔbɛboa wo ma woasua Bible no sɛnea ɛbɛyɛ a wubenya nokware Nyankopɔn, Yehowa ne ne Ba, Yesu Kristo mu gyidi a emu yɛ den na woakura mu. Sɛnea Yesu kyerɛ no, ‘eyi kyerɛ daa nkwa.’—Yohane 17:3.