Di Wo Nkɔso Mu Akwanside Ahorow So!

WOASƆ wo kar gya asi so ma ɛreyɛ adwuma, nanso sɛ wutia so a, kar no nkɔ. Biribi asɛe wom anaa? Dabi, ɔbo kɛse bi na akɔhyɛ tae no biako anim. Nea ehia na ama kar no atumi akɔ ara ne sɛ wubeyi afi hɔ.

Ɔkwan a ɛte saa ara so no, nnipa binom a wɔne Yehowa Adansefo resua Bible no wɔ nneɛma bi a ebetumi asiw wɔn nkɔso kwan. Sɛ nhwɛso no, Yesu bɔɔ kɔkɔ sɛ nneɛma bi te sɛ “wiase asetra yi mu dadwen ne haw ne ahonyade nnaadaa” betumi ‘amia’ nokware no, na asiw nkɔso kwan.—Mateo 13:22.

Wɔ afoforo fam no, nneɛma bi a ne yɛ aka wɔn hɔ anaa mmerɛwyɛ bi na esiw wɔn nkɔso kwan. Ná Japanni barima bi a wɔfrɛ no Yutaka ani gye Bible mu asɛm no ho, nanso na ɛyɛ den ma no sɛ obegyae kyakyato. Na wabɔ mmɔden mpɛn pii sɛ obedi subammɔne yi so, nanso anyɛ yiye. Adeyɛ a na ne yɛ aka ne hɔ yi maa ɔhweree sika pii, afie abiɛsa, obu a n’abusua de bɛma no, ne n’ankasa anuonyam. So na obetumi ayi akwanside yi na wabɛyɛ Kristoni?

Anaasɛ susuw ɔbea bi a wɔfrɛ no Keiko no ho hwɛ. Ɛdenam Bible no mmoa so no na watumi agyae nneyɛe bɔne te sɛ ahonisom, ɔbrasɛe,  ne adebisa. Nanso Keiko ka sɛ: “Ade a na ɛyɛ akwanside kɛse paa ma me ne sigaretnom. Mebɔɔ mmɔden mpɛn pii sɛ megyae, nanso mantumi.”

Ebia wo nso wowɔ biribi a ɛte sɛ akwanside a wuyi a enyi a esiw wo nkɔso kwan. Sɛnea ɛte biara no, nya awerɛhyem sɛ ɛdenam Onyankopɔn mmoa so no, wubetumi adi so.

Kae afotu a Yesu de maa n’asuafo no bere a wɔantumi antu honhommɔne a na ɛwɔ ɔbarima bi a na otwa abiribiriw so no. Bere a Yesu tumi yɛɛ nea n’asuafo no antumi anyɛ no, ɔka kyerɛɛ wɔn sɛ: “Mowɔ gyidi sɛ sinapi fua a, anka mobɛka akyerɛ bepɔw yi sɛ: Twiw fi ha kɔ nohɔ, na ebetwiw, na biribiara nni hɔ a morentumi nyɛ.” (Mateo 17:14-20; Marko 9:17-29) Yiw, biribi a ɛhaw yɛn a ɛte sɛ bepɔw wɔ yɛn ani so no yɛ ketewaa koraa wɔ yɛn Bɔfo a ne tumi nni ano no ani so.—Genesis 18:14; Marko 10:27.

Nneɛma a Esiw Nkɔso Kwan a Yebehu

Ansa na wubetumi adi w’akwanside ahorow so no, ɛsɛ sɛ wuhu nea saa akwanside ahorow no yɛ ankasa. Wobɛyɛ dɛn atumi ayɛ saa? Ɛtɔ mmere bi a asafo no muni bi te sɛ ɔpanyin anaa obi a wo ne no resua Bible no bɛtwe w’adwene asi biribi so. Sɛ́ anka wo bo befuw afotu a ɔdɔ wom yi no, ɛsɛ sɛ wufi ahobrɛase mu ‘tie nteɛso na wuhu nyansa.’ (Mmebusɛm 8:33) Wɔ mmere foforo mu no, wonam Bible no a wubesua so behu wo mmerɛwyɛ ahorow. Yiw, Onyankopɔn asɛm “wɔ nkwa, na ahoɔden wɔ mu.” (Hebrifo 4:12) Bible ne Bible ho nhoma a wobɛkenkan no betumi ama wo nsusuwii, nkate ne wo komam adwene ada adi. Ɛboa wo ma wugyina Yehowa gyinapɛn ahorow a ɛkorɔn so hwehwɛ wo ho mu. Ɛma wuhu nneɛma a ebetumi asiw yɛn honhom fam nkɔso kwan no.—Yakobo 1:23-25.

Sɛ nhwɛso no, fa no sɛ Bible suani bi wɔ su a ɛma odwennwen ɔbrasɛe ho. Ebia na onhu aniberesɛm biara wɔ saayɛ mu, na ɛma osusuw sɛ ɛnyɛ ade bɔne bi na ɔreyɛ ankasa. Bere a ogu so resua ade no, ohyia nsɛm a ɛwɔ Yakobo 1:14, 15 no: “Wɔsɔ obiara hwɛ a, na ɛyɛ n’ankasa akɔnnɔ a egyigye na ɛdaadaa no na ɛsɔ no hwɛ; ansa na akɔnnɔ no nyinsɛn a, ɛwo bɔne, na bɔne no wie nyin a, ɛwo owu.” Afei ohu sɛnea sɛ ɔkɔ so yɛ saa a ɛbɛsɛe ne nkɔso no! Ɔkwan bɛn so na obetumi ayi akwanside yi afi hɔ?—Marko 7:21-23.

Akwanside Ahorow a Yebedi So

Ebia ɛdenam Kristoni a ne ho akokwaw mmoa so no, osuani no betumi ayɛ nhwehwɛmu a ɛkɔ akyiri wɔ Onyankopɔn Asɛm mu, bere a ɔde Watch Tower Publications Index di dwuma no. * Sɛ nhwɛso no, wɔ asɛmti “Thoughts,” ase no, wɔtwe ɔkenkanfo no adwene kɔ nsɛm a wɔatintim a ɛfa sɛnea wodi nsusuwii bɔne a epira so ho no so. Asɛm no twe adwene si Bible kyerɛw nsɛm a mfaso wɔ so so te sɛ Filipifo 4:8, a ɛka sɛ: “Nea ɛyɛ nokware, nea anim yɛ duru, nea ɛteɛ, nea ɛho tew, nea ɛwɔ ɔdɔ, nea ɛwɔ din pa, sɛ ɔbra pa bi wɔ hɔ a, sɛ ayeyi bi wɔ hɔ a, saa nneɛma yi ho na munnwen.” Yiw, ɛsɛ sɛ yɛde nsɛm a ɛhyɛ nkuran si ɔbrasɛe ho nsusuwii ananmu!

Wɔ osuani no nhwehwɛmu no mu no, akyinnye biara nni ho sɛ obehu Bible nnyinasosɛm ahorow a ɛbɛboa no ma wakwati sɛ ɔbɛma ne haw no ayɛ kɛse no. Sɛ nhwɛso no, Mmebusɛm 6:27 ne Mateo 5:28 bɔ kɔkɔ wɔ obi adwene a ɔde besi nsɛm a ɛkanyan nna ho akɔnnɔ so no ho. Odwontofo no bɔɔ mpae sɛ: “Ma m’ani ntwa adehunu hwɛ ho.” (Dwom 119:37) Ɛwom, Bible kyerɛw nsɛm yi a ɔbɛkenkan kɛkɛ no ara nnɔɔso. Onyansafo no ka sɛ: ‘Ɔtreneeni koma dwen nsɛm ho.’ (Mmebusɛm 15:28) Bere a osuani no nsusuw nea Onyankopɔn ka nkutoo ho, na mmom osusuw nea enti a ɔka saa ho no, obetumi anya nyansa ne ntease a ɛwɔ Yehowa akwan mu no mu ntease a ɛkɔ akyiri.

 Awiei koraa no, ɛnsɛ sɛ ɛyɛ den ma nea ɔrebɔ mmɔden adi ne nkɔso ho akwanside yi so no sɛ ɔbɛhwehwɛ Yehowa hɔ mmoa. Efisɛ anyɛ hwee koraa no, Onyankopɔn nim yɛn su sɛ yefi dɔte mu, na yɛnyɛ pɛ. (Dwom 103:14) Awiei koraa no, Onyankopɔn a yɛbɛkɔ so abɔ no mpae, ne mmɔden a yɛbɛbɔ sɛ yɛremfa yɛn ho nhyɛ ɔbrasɛe ho nsusuwii mu no bɛsow aba pa—ahonim pa a biribiara renhaw yɛn.—Hebrifo 9:14.

Mpa Abaw

Hyɛ no nsow sɛ ɛtɔ mmere bi a, nneɛma bi bɛtwe wo asan wɔ mmɔden a wobɔ sɛ wubedi ɔhaw bi so no mu. Sɛ ɛba saa a, ɛnyɛ nwonwa sɛ w’abam bebu na woahaw. Nanso kae nsɛm a ɛwɔ Galatifo 6:9 no: “Mommma yɛmmmrɛ papayɛ mu; na sɛ yɛampa abaw a, yebetwa so aba ne bere mu.” Onyankopɔn asomfo a na wɔwɔ ahofama te sɛ Dawid ne Petro hyiaa huammɔdi bi a na enye koraa. Nanso wɔampa abaw. Wofi ahobrɛase mu gyee afotu toom, yɛɛ nsakrae a ehia, na wɔkɔɔ so daa wɔn ho adi sɛ Onyankopɔn asomfo a wɔda nsow. (Mmebusɛm 24:16) Ɛmfa ho mfomso ahorow a Dawid yɛe no, Yehowa kaa ne ho asɛm sɛ “ɔbarima a me koma pɛ no, ɔno na ɔbɛyɛ nea mepɛ nyinaa.” (Asomafo no Nnwuma 13:22) Petro nso tumi dii ne mfomso ahorow so bɛyɛɛ odum wɔ Kristofo asafo no mu.

Nnipa pii atumi adi nkonim a ɛte saa ara nnɛ wɔ akwanside ahorow a wɔadi so mu. Yutaka a yɛkaa ne ho asɛm mfiase no penee so ma wɔne no yɛɛ Bible adesua. Ɔka sɛ: “Yehowa mmoa a minyae wɔ anammɔn biara a mitui mu no na ɛboaa me ma midii kyakyato a na ɛhaw me no so. Minya anigye kɛse wɔ Yesu nsɛm yi a mahu ne mmamu no mu—sɛ yɛwɔ gyidi a, yebetumi atutu ‘mmepɔw’ mpo.” Bere bi akyi no, Yutaka bɛyɛɛ asafo mu somfo.

Keiko a na ontumi nnyae sigaretnom no nso ɛ? Onuawa a na ɔne no sua ade no hyɛɛ no nyansa sɛ ɔnkenkan Nyan! mu nsɛm ahorow a ɛfa tawanom a ɛka nkurɔfo hɔ ho no. Na mpo, Keiko kyerɛw 2 Korintofo 7:1 bɔɔ ne kar mu sɛnea ɛbɛyɛ a ɛbɛkae no ma ne ho atew wɔ Yehowa ani so. Nanso ne nyinaa akyi no, wantumi annyae. Keiko ka sɛ: “Ɛhaw m’adwene yiye. Enti mifii ase bisaa me ho nea mepɛ sɛ meyɛ ankasa—so mepɛ sɛ mesom Yehowa anaa Satan?” Bere a onya sii gyinae sɛ Yehowa na ɔpɛ sɛ ɔsom no no, ɔbɔɔ mpae denneennen de hwehwɛɛ mmoa. Ɔka sɛ: “Nea ɛyɛɛ me nwonwa no, mitumi gyaee sigaretnom a mammrɛ ho koraa. Nea midi ho yaw ara ne sɛ mannyae no ntɛm.”

Wo nso, wubetumi adi nneɛma ahorow a esiw wo nkɔso kwan no so. Dodow a woma wo nsusuwii, akɔnnɔ, nsɛm, ne wo nneyɛe ne Bible gyinapɛn ahorow hyia no, dodow no ara na wunya obu ne ahotoso. Sɛ wo honhom fam nuanom mmarima ne mmea, ne abusuafo ne wo bɔ a, wɔn ani begye na ɛbɛhyɛ wɔn nkuran. Nea ɛsen biara no, wo ne Yehowa Nyankopɔn ntam abusuabɔ mu bɛyɛ den. Ɔhyɛ bɔ sɛ ‘obeyi akwanside biara afi ne nkurɔfo anim’ bere a wɔreguan afi Satan nkɛntɛnso ase no. (Yesaia 57:14) Na wubetumi anya awerɛhyem sɛ sɛ wobɔ mmɔden sɛ wubedi nneɛma a esiw wo honhom fam nkɔso kwan no so a, Yehowa behyira wo pii.

[Ase hɔ asɛm]

[Mfonini wɔ kratafa 28]

Yesu hyɛɛ bɔ sɛ, sɛ yenya gyidi a, yebedi akwanside ahorow a ɛte sɛ bepɔw so

[Mfonini wɔ kratafa 30]

Bible no a yɛbɛkenkan no hyɛ mmɔden a yɛbɔ sɛ yebedi honhom fam mmerɛwyɛ so no mu den