Ma Wo Nkɔso Nna Adi
Ma Wo Nkɔso Nna Adi
“Eyinom ho na bɔ mmɔden, eyinom mu na keka wo ho, na wo nkɔso ada adi ade nyinaa mu.”—1 TIMOTEO 4:15.
1. Wobɛyɛ dɛn atumi akyerɛ bere a aduaba bi abere na adu sɛ wodi?
YƐ ADUABA a w’ani gye ho paa ho mfonini wɔ w’adwenem—borɔfere, paya, mango, anaa aduaba foforo biara. So wubetumi akyerɛ bere a abere a ɛsɛ sɛ wodi? Akyinnye biara nni ho sɛ wubetumi. Ne hua, kɔla, ne sɛnea agono no nyinaa kyerɛ wo sɛ worebɛfɔw w’ano. Sɛ wunya kaw bi hyɛ w’anom a, ebia wubegu ahome anigye so. Aduaba a nsu wom bɛn ni! Ade a ɛyɛ dɛ bɛn ara ni! Ɛma w’ani gye kɛse.
2. Ɔkwan bɛn so na onyin da adi, na nkɛntɛnso bɛn na enya wɔ yɛne ankorankoro ntam abusuabɔ mu?
2 Nneɛma foforo wɔ asetram a ɛyɛ dɛ saa ara. Ade biako ne sɛ, sɛnea ɛte wɔ aduaba a abere ho no, saa ara nso na obi honhom fam onyin da adi wɔ akwan horow so. Yɛnam nhumu, ntease, nyansa, ne nea ɛkeka ho so na ehu sɛ obi anyin. (Hiob 32:7-9) Akyinnye biara nni ho sɛ ɛyɛ anigye sɛ wo ne nnipa a wɔda su a ɛte saa adi wɔ wɔn abrabɔ ne wɔn nneyɛe mu bɛbɔ na wo ne wɔn ayɛ adwuma.—Mmebusɛm 13:20.
3. Dɛn na Yesu bere sofo ho nsɛm a ɔkae no da no adi wɔ onyin ho?
3 Ɔkwan foforo so no, obi betumi anyin honam fam, nanso sɛnea ebia ɔkasa na ɔyɛ n’ade no betumi ada no adi sɛ onyinii wɔ nkate fam ne honhom fam. Sɛ nhwɛso no, bere a na Yesu Kristo reka ne bere so asoɔdenfo ho asɛm no, ɔkae sɛ: “Yohane bae, onnidi na ɔnnom, na wose: Ɔwɔ honhommɔne. Onipa ba no bae, odidi na ɔnom, na wose: Hwɛ, odidifo ne ɔsanomfo.” Ɛwom sɛ na saa nkurɔfo no anyin honam fam de, nanso Yesu kae sɛ wɔyɛɛ wɔn ade sɛ ‘mmofra’—ná wonnyinii ankasa. Enti, ɔde kaa ho sɛ: “Nanso nyansa nam ne nnwuma so di bem.”—Mateo 11:16-19.
4. Nkɔso ne onyin da adi wɔ akwan bɛn so?
4 Ɛdenam Yesu nsɛm no so no, yetumi hu sɛ obi nnwuma a ɔyɛ ne nea efi mu ba no na ɛma yehu sɛ ebia ɔwɔ nyansa ankasa—a ɛyɛ onyin ho sɛnkyerɛnne a ɛda nsow. Ɛdefa eyi ho no, hyɛ afotu a ɔsomafo Paulo de kɔmaa Timoteo no nsow. Bere a Paulo bobɔɔ nneɛma a ɛsɛ sɛ Timoteo di akyi wiei no, ɔkae sɛ: “Eyinom ho na bɔ mmɔden, eyinom mu na keka wo ho, na wo nkɔso ada adi ade nyinaa mu.” (1 Timoteo 4:15) Yiw, nkɔso a Kristoni nya kɔ onyin mu no ‘da adi,’ anaasɛ wotumi hu no pefee. Te sɛ kanea no, Kristofo nyin nyɛ biribi a wonhu anaa su a ahintaw. (Mateo 5:14-16) Enti, yebesusuw akwan atitiriw abien a yɛn nkɔso ne yɛn nyin betumi ada adi wɔ mu ho: (1) nimdeɛ, ntease, ne nyansa mu nyin; (2) honhom aba a wɔda no adi.
Gyidi ne Nimdeɛ Mu Biakoyɛ
5. Ɔkwan bɛn so na yebetumi akyerɛkyerɛ onyin mu?
5 Nsɛm asekyerɛ nhoma dodow no ara kyerɛkyerɛ onyin mu sɛ biribi a ɛho akokwaw, biribi a adu mpanyin mu, biribi a wohu sɛ ɛfata. Sɛnea yedii kan kaa ho asɛm no, sɛ aduaba wie nyin na ne hwɛbea, kɔla, ne hua, ne ne dɛ du nea wosusuw sɛ ɛfata a, yɛka sɛ anyin, anaasɛ abere. Enti, onyin ne kɛseyɛ, biribi a edi mũ, ne pɛyɛ mpo na ɛnam.—Yesaia 18:5; Mateo 5:45-48; Yakobo 1:4.
6, 7. (a) Dɛn na ɛkyerɛ sɛ Yehowa ani gye ho yiye sɛ n’asomfo nyinaa benya nkɔso akodu honhom fam onyin mu? (b) Dɛn na ɛne honhom fam onyin wɔ abusuabɔ a emu yɛ den?
6 Yehowa Nyankopɔn ani gye ho yiye sɛ n’asomfo nyinaa benya nkɔso akodu honhom fam onyin mu. Wayɛ nsiesiei ahorow a ɛyɛ anigye wɔ Kristofo asafo no mu a ɛbɛma yɛadu ho. Ɔsomafo Paulo kyerɛw kɔmaa Kristofo a wɔwɔ Efeso no sɛ: “Wama ebinom ayɛ asomafo, ebinom adiyifo, ebinom asɛmpakafo, ebinom ahwɛfo ne akyerɛkyerɛfo, na wɔasesɛw ahotefo no yiye ama ɔsom adwuma no, na Kristo nipadua no si akɔ so, akodu sɛ yɛn nyinaa bedu Nyankopɔn ba no ho gyidi ne ne hu biakoyɛ mu, ayɛ ɔbarima mu, adu mpanyin afe so a Kristo mayɛ bɛyɛ yɛn ma, na yɛanna so anyɛ mmotafowa a ɔkyerɛ mframa biara wosow wɔn biribiri twe wɔn di akɔneaba nnipa kusumdi mu, anifere a ɛnam nnaadaa nnɛɛdɛe mu.”—Efesofo 4:11-14.
7 Wɔ saa nkyekyem yi mu no, Paulo kyerɛkyerɛɛ nea enti a Onyankopɔn yɛɛ honhom fam nsiesiei pii saa no bi mu sɛ sɛnea ɛbɛyɛ a obiara ‘bɛyɛ biako wɔ gyidi ne nokware nimdeɛ mu,’ ɔbɛyɛ “ɔbarima mu,” na ‘wayɛ ma Kristo mu.’ Ɛba saa nkutoo a na atoro nsusuwii ne nkyerɛkyerɛ ntumi mfa yɛn nni akɔneaba te sɛ honhom fam mmotafowa. Enti yehu abusuabɔ a emu yɛ den a ɛda nkɔso a yenya kodu Kristofo nyin mu ne nya a yenya “Nyankopɔn ba no ho gyidi ne ne hu biakoyɛ mu” no ntam. Nsɛntitiriw pii wɔ Paulo afotu no mu a mfaso wɔ so sɛ yetie.
8. Dɛn na ɛhwehwɛ na ama yɛanya gyidi ne ne hu “biakoyɛ” mu?
8 Nea edi kan no, esiane sɛ ɛsɛ sɛ yekura “biakoyɛ” mu nti, ɛsɛ sɛ Kristoni a wanyin ne ne mfɛfo gyidifo yɛ biako wɔ gyidi ne nimdeɛ mu. Ɛdefa Bible mu ntease ho no, onnyina n’ankasa nsusuwii akyi anaa onkura n’ankasa adwene mu denneennen. Mmom no, onya nokware no a Yehowa Nyankopɔn nam ne Ba, Yesu Kristo, ne “akoa nokwafo ne ɔbadwemma” no so de ama no mu ahotoso koraa. Sɛ yedi honhom fam aduan daa wɔ “ɛbere a ɛsɛ mu”—denam Kristofo nhoma ahorow, asafo nhyiam ahorow, amansin ne amantam nhyiam so—a, yebetumi anya ahotoso sɛ yɛne yɛn mfɛfo Kristofo kura gyidi ne nimdeɛ mu wɔ “biakoyɛ” mu.—Mateo 24:45.
9. Kyerɛkyerɛ nea asɛm “gyidi” kyerɛ wɔ sɛnea Paulo de dii dwuma wɔ ne krataa a ɔde kɔmaa Efesofo mu no mu.
9 Nea ɛto so abien no, asɛm “gyidi” no nkyerɛ nea Kristoni ankorankoro bi gye di, na mmom yɛn nyinaa gyidi, ne “tɛtrɛtɛ ne tenten ne korɔn ne emudɔ.” (Efesofo 3:18; 4:5; Kolosefo 1:23; 2:7) Nokwarem no, sɛ “gyidi” no fã bi pɛ na Kristoni bi gye di anaasɛ ogye tom a, ɔkwan bɛn so na obetumi ne ne mfɛfo gyidifo ayɛ biako? Eyi kyerɛ sɛ ɛnsɛ sɛ yɛma Bible mu mfitiase nkyerɛkyerɛ anaa nokware no ho nimdeɛ a yɛnte ase yiye anaa nimdeɛ kakraa bi a yɛwɔ no ara dɔɔso ma yɛn. Mmom no, ɛsɛ sɛ yɛma yɛn ani gye ho sɛ yɛde Yehowa nsiesiei ahorow nyinaa a ɔnam n’ahyehyɛde so de ama no bedi dwuma de ahwehwɛ N’asɛm mu akɔ akyiri. Ɛsɛ sɛ yɛbɔ mmɔden nya Onyankopɔn apɛde ne n’atirimpɔw ho nokware nimdeɛ ne ntease a edi mu koraa sɛnea yebetumi. Nea ɛka eyi ho ne bere a yebegye de akenkan asua Bible ne Bible ho nhoma ahorow, abɔ Onyankopɔn mpae ahwehwɛ ne mmoa ne akwankyerɛ, akɔ Kristofo nhyiam horow daa, na yɛanya Ahenni asɛnka ne asuafoyɛ adwuma no mu kyɛfa akosi ase.—Mmebusɛm 2:1-5.
10. Dɛn na asɛm “akodu sɛ yɛn nyinaa bedu,” sɛnea wɔde adi dwuma wɔ Efesofo 4:13 no kyerɛ?
10 Nea ɛto so abiɛsa no, Paulo de nsɛm “akodu sɛ yɛn nyinaa bedu” na edii botae ahorow abiɛsa no ho asɛm a ɔkae no anim. Ɛdefa asɛm “yɛn nyinaa” ho no, Bible ho nhwehwɛmu nhoma bi kyerɛ ase sɛ “ɛnyɛ yɛn nyinaa sɛ ankorankoro, sɛ́ nnipa mmiako mmiako, na mmom yɛn nyinaa sɛ́ kuw.” Ɔkwan foforo so no, ɛsɛ sɛ yɛn mu biara bɔ mmɔden yɛ nea obetumi sɛ ɔne onuayɛ kuw no nyinaa bedu Kristofo botae a ɛne onyin no ho. The Interpreter’s Bible ka sɛ: “Ankorankoro bi nkutoo ntumi ntew ne ho na ɔnyɛ ma honhom mu, sɛnea nipadua no fã biako pɛ ntumi nnyin nwie gye sɛ nipadua no nyinaa kɔ so nyin wɔ ɔkwan a ɛfata so no.” Paulo kaee Efesofo Kristofo no sɛ ɛsɛ sɛ ‘wɔne ahotefo nyinaa’ bɔ mmɔden te gyidi no ase koraa.—Efesofo 3:18a.
11. (a) Dɛn na honhom fam nkɔso a obi benya no nkyerɛ? (b) Dɛn na ɛsɛ sɛ yɛyɛ na ama yɛanya nkɔso?
11 Paulo nsɛm no ma emu da hɔ pefee sɛ ɛnyɛ nea honhom fam nkɔso kyerɛ ara ne sɛ yɛde nimdeɛ ne nhomanim bebrebe bɛhyɛ yɛn adwene ma. Ɛnyɛ Kristoni a wanyin ne nea ɔde n’adenim ma afoforo ho dwiriw wɔn. Mmom no, Bible no ka sɛ: “Treneefo kwan te sɛ owia hann, ɛkɔ so hyerɛn kodu awia ketee.” (Mmebusɛm 4:18) Yiw, ɛyɛ “kwan” no na “ɛkɔ so hyerɛn” na ɛnyɛ onipa no. Sɛ yɛbɔ mmɔden kɔ so kura Onyankopɔn Asɛm mu ntease a ɛkɔ so hyerɛn a Yehowa de ma ne nkurɔfo no mu a, na yɛrenya honhom fam nkɔso. Eyi mu no, emu a yebekura no kyerɛ anim a yɛbɛkɔ, na ɛyɛ ade a yɛn nyinaa betumi ayɛ.—Dwom 97:11; 119:105.
Da “Honhom Aba” Adi
12. Dɛn nti na honhom aba a yɛbɛda no adi ho hia wɔ honhom fam nkɔso a yɛhwehwɛ no mu?
12 Bere a “gyidi ne ne hu biakoyɛ mu” a yebedu ho hia no, saa ara na ɛho hia nso sɛ yɛda Onyankopɔn honhom aba no adi wɔ yɛn asetram biribiara mu. Dɛn ntia? Nea enti a eyi te saa ne sɛ, sɛnea yɛahu no, onyin nyɛ ade a wontumi nhu anaasɛ ahintaw, na mmom ɛyɛ su horow a afoforo hu no pefee tumi nya so mfaso a ebetumi ahyɛ wɔn den. Nokwarem no, honhom fam nkɔso a yɛhwehwɛ no nyɛ mmɔden a yɛbɔ sɛ ɛbɛma yɛn ani abue anaasɛ yɛbɛma yɛn ho so. Mmom no, bere a yenyin wɔ honhom fam, na yedi Onyankopɔn honhom akwankyerɛ akyi no, nsakrae bi a ɛyɛ nwonwa bɛba yɛn abrabɔ ne yɛn nneyɛe mu. Ɔsomafo Paulo kae sɛ: “Monnantew honhom mu, na munnni ɔhonam akɔnnɔ akyi.”—Galatifo 5:16.
13. Nsakrae bɛn na ɛyɛ nkɔso ho sɛnkyerɛnne pefee?
13 Paulo kɔɔ so bobɔɔ “ɔhonam nnwuma” a ɛdɔɔso na ‘ɛda adi’ no din. Ansa na obi behu Onyankopɔn ahwehwɛde ahorow no, na wafa wiase akwan so ma ebia ɔde ne ho ahyehyɛ nneɛma a Paulo bobɔɔ din no bi mu: “aguamammɔ, efi, ahohwi, abosonsom, aduto, ɔtan, akayɛ, ahoɔyaw, abufuw, atutuw, kunsunkunsun, mpaapaemu, nitan, asabow, agobɔne ne nea ɛtete saa.” (Galatifo 5:19-21) Nanso bere a onipa no nya honhom fam nkɔso no, ɔde nkakrankakra di saa “ɔhonam nnwuma” a ɛmfata yi so, na ɔsow “honhom aba.” Nsakrae a aniwa hu yi yɛ adanse a ɛda no adi pefee sɛ onipa no renya nkɔso akodu Kristofo nyin mu.—Galatifo 5:22.
14. Kyerɛkyerɛ nsɛm abien a ɛne “ɔhonam nnwuma” ne “honhom aba” no mu.
14 Ɛsɛ sɛ yɛhyɛ nsɛm abien yi, “ɔhonam nnwuma” ne “honhom aba” no nsow. “Nnwuma” yɛ ade a efi nea obi yɛ mu ba, obi nneyɛe so aba. Ɔkwan foforo so no, nneɛma a Paulo bobɔɔ din sɛ ɔhonam nnwuma no yɛ ade a ebia onipa no hyɛ da yɛ anaasɛ ɔhonam mmerɛwyɛ ma ɔyɛ. (Romafo 1:24, 28; 7:21-25) Nanso, asɛm “honhom aba” no kyerɛ sɛ su ahorow a wɔabobɔ din no mfi nea wɔfrɛ no suban mu nkɔanim anaa nipasu mu nkɔso no, na mmom efi Onyankopɔn honhom a ɛyɛ adwuma wɔ onipa no so no. Sɛnea wɔhwɛ dua so yiye a ɛbɛsow aba no, saa ara na sɛ honhom kronkron yɛ adwuma wɔ obi asetram a, ɔbɛsow honhom aba.—Dwom 1:1-3.
15. Dɛn nti na ɛho hia sɛ yɛde yɛn adwene si “honhom aba” no nyinaa so?
15 Asɛm foforo a ɛsɛ sɛ yesusuw ho ne asɛmfua “aba” a Paulo de dii dwuma de kaa su pa horow a ɔbobɔɔ din no nyinaa ho asɛm no. * Honhom no nsow aba ahorow pii sɛnea ɛbɛyɛ a yɛbɛpaw nea yɛn ani gye ho. Su pa horow a Paulo bobɔɔ din no nyinaa—ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ.—ho hia pɛpɛɛpɛ, na ne nyinaa ka bom na ɛma obi tumi nya Kristofo nipasu foforo no. (Efesofo 4:24; Kolosefo 3:10) Enti, bere a yebetumi ahu sɛ saa su pa horow yi bi da adi kɛse wɔ yɛn abrabɔ mu esiane yɛn ankasa nipasu ne yɛn nsusuwii nti no, ɛho hia kɛse sɛ yɛde yɛn adwene si su ahorow a Paulo bobɔɔ din no nyinaa so. Sɛ yɛyɛ saa a, yebetumi ada Kristo nipasu adi yiye wɔ yɛn asetra mu.—1 Petro 2:12, 21.
16. Dɛn na ɛyɛ yɛn botae wɔ Kristofo nyin a yɛhwehwɛ no mu, na ɔkwan bɛn so na yebetumi adu ho?
16 Asuade titiriw a yebetumi asua afi Paulo nkɔmmɔbɔ no mu ne sɛ bere a yɛrepere akɔ Kristofo nyin mu no, ɛnyɛ yɛn botae ne sɛ yɛbɛhwehwɛ nimdeɛ na ama yɛn adenim adɔɔso, na saa ara nso na ɛnyɛ sɛ yebenya nipasu horow a ɛbɛma yɛn ani abue. Na mmom sɛ ɛbɛma yɛakɔ so anya Onyankopɔn honhom wɔ yɛn asetram bere nyinaa. Sɛ Onyankopɔn honhom na ɛkyerɛ yɛn nsusuwii ne yɛn nneyɛe kwan a, ɛnde na yɛanyin wɔ honhom fam. Yɛbɛyɛ dɛn atumi adu saa botae yi ho? Ɛsɛ sɛ yebue yɛn koma ne yɛn adwenem ma Onyankopɔn honhom yɛ mu adwuma. Eyi hwehwɛ sɛ yɛkɔ Kristofo nhyiam ahorow daa na yenya mu kyɛfa. Ɛsɛ sɛ yesua Onyankopɔn Asɛm na yedwennwen ho daa, na yɛma emu nnyinasosɛm kyerɛ yɛn kwan wɔ yɛne afoforo nsɛnnii ne nneɛma a yɛpaw ne gyinae a yesisi mu. Sɛ yɛyɛ saa a, akyinnye biara nni ho sɛ yɛn nkɔso bɛda adi pefee.
Nya Nkɔso Fa Hyɛ Onyankopɔn Anuonyam
17. Ɔkwan bɛn so na nkɔso a yebenya ne anuonyam a yɛbɛhyɛ yɛn soro Agya no wɔ abusuabɔ?
17 Nea edi akyiri koraa no, yɛn nkɔso a yɛbɛma ada adi no de anuonyam ne ayeyi bɛbrɛ yɛn soro Agya, Yehowa, a ɔma yetumi nyin honhom fam no, na ɛnyɛ yɛn ankasa. Ade rebɛkye ma wɔakum Yesu anadwo no, ɔka kyerɛɛ n’asuafo no sɛ: “Eyi mu na wɔahyɛ m’agya anuonyam, sɛ mosow aba pii; ɛno na mobɛyɛ me asuafo.” (Yohane 15:8) Asuafo no nam wɔn honhom aba ne Ahenni aba a wɔn asɛnka adwuma no sowee so hyɛɛ Yehowa anuonyam.—Asomafo no Nnwuma 11:4, 18; 13:48.
18. (a) Otwa adwuma a ɛyɛ anigye bɛn na ɛrekɔ so nnɛ? (b) Asɛyɛde bɛn na otwa adwuma yi de ba?
18 Ɛnnɛ, Yehowa nhyira wɔ ne nkurɔfo so bere a wɔyɛ wiase nyinaa honhom fam otwa adwuma no. Mfe kakra a abɛsen mu no, wɔn a wɔyɛ foforo bɛyɛ 300,000 na afe biara wohyira wɔn ho so ma Yehowa na wɔde nsu mu asubɔ yɛ wɔn ahosohyira ho sɛnkyerɛnne. Eyi ma yɛn ani gye, na akyinnye biara nni ho sɛ ɛma Yehowa nso koma ani gye. (Mmebusɛm 27:11) Nanso, sɛ eyi bɛkɔ so ama Yehowa ani agye na ahyɛ no anuonyam a, ɛsɛ sɛ wɔn a wɔyɛ foforo no nyinaa ‘kɔ so nantew Kristo mu saa, sɛ wɔn a wɔagye ntini, na wɔde wɔn asi no so, na wɔayɛ den gyidi mu.’ (Kolosefo 2:6, 7) Eyi ma Onyankopɔn nkurɔfo nya asɛyɛde a ɛbɔ ho abien. Ɔkwan foforo so no, sɛ woyɛ obi a wabɔ asu foforo a, so wubegye asɛyɛde yi atom na woabɔ mmɔden ama “wo nkɔso ada adi ade nyinaa mu”? Ɔkwan foforo so no, sɛ wobaa nokware no mu akyɛ kakraa a, so wubegye asɛyɛde no atom na woahwɛ adi wɔn a wɔyɛ foforo no honhom fam yiyedi ho dwuma? Ne nyinaa mu no, ɛda adi pefee sɛ ɛho hia sɛ yɛpere kɔ onyin mu.—Filipifo 3:16; Hebrifo 6:1.
19. Sɛ woma wo nkɔso da adi a, hokwan ne nhyira bɛn na wubetumi anya?
19 Nhyira ahorow a ɛyɛ anigye wɔ hɔ ma wɔn a wɔbɔ mmɔden ma wɔn nkɔso da adi no nyinaa. Kae Paulo nkuranhyɛ nsɛm a ɔkae bere a otuu Timoteo fo sɛ onnya nkɔso wiei no: “Ma w’ani mmra wo ho ne kyerɛ no so na tra mu, efisɛ woyɛ saa a, wubegye wo ho ne w’atiefo nkwa.” (1 Timoteo 4:16) Sɛ wobɔ mmɔden ma wo nkɔso da adi a, wo nso wubetumi anya ho kwan ahyɛ Onyankopɔn din anuonyam na woanya ne nhyira pii.
[Ase hɔ asɛm]
^ nky. 15 Nea asɛmfua “aba” gyina hɔ ma ara ne “aduaba” wɔ mfitiase kasa no mu.—Galatifo 5:22, Kingdom Interlinear Translation.
So Wokae?
• Akwan bɛn so na yebetumi ada honhom fam onyin adi?
• Nimdeɛ ne ntease bɛn na ɛda onyin adi?
• Ɔkwan bɛn so na “honhom aba” a wɔda no adi kyerɛ honhom fam nkɔso?
• Asɛyɛde bɛn na ɛsɛ sɛ yegye tom bere a yɛpere kɔ onyin mu no?
[Adesua no ho Nsɛmmisa]
[Mfonini wɔ kratafa 13]
Yetumi hu ade a abere, anaasɛ anyin pefee
[Mfonini wɔ kratafa 15]
Yenya honhom fam nkɔso denam nokware no a wɔada no adi a yebekura mu no so
[Mfonini wɔ kratafa 17]
Mpaebɔ boa yɛn ma yɛda “honhom aba” adi