So Wubetumi “Ayiyi Papa Ne Bɔne Mu”?
So Wubetumi “Ayiyi Papa Ne Bɔne Mu”?
“Monsɔ nea ɛsɔ Awurade ani yiye no nhwɛ.”—EFESOFO 5:10.
1. Ɔkwan bɛn so na asetra betumi ayɛ nea ɛkyere adwene nnɛ, na dɛn ntia?
‘YEHOWA, mahu sɛ onipa kwan nni ne nsam, enni ɔbarima nsam, sɛnea ɔnam a obetutu n’anammɔn.’ (Yeremia 10:23) Nokwasɛm a Yeremia hui no fa yɛn ho kɛse nnɛ. Dɛn ntia? Efisɛ sɛnea Bible ka siei no, yɛte “mmere a emu yɛ den” mu. (2 Timoteo 3:1) Da biara, yehyia tebea horow a ɛkyere adwene a ɛhwehwɛ sɛ yesisi ho gyinae. Sɛ́ gyinae ahorow yi yɛ akɛse anaa nketewa no, ebetumi anya yɛn yiyedi—honam fam, nkate fam, ne honhom fam—so nkɛntɛnso kɛse.
2. Nneɛma a yɛpaw bɛn na yebetumi abu no sɛ ɛho nhia ahe biara, nanso ɔkwan bɛn so na Kristofo a wɔahyira wɔn ho so bu nneɛma a ɛtete saa?
2 Yebetumi afa nneɛma pii a yesisi ho gyinae wɔ yɛn asetram da biara da no sɛ daa adeyɛ anaa nneɛma a ɛho nhia ahe biara. Sɛ nhwɛso no, da biara, yɛpaw ntade a yɛhyɛ, aduan a yedi, nnipa a yɛkɔ wɔn nkyɛn, ne nea ɛkeka ho. Ɛkame ayɛ sɛ yɛpaw saa nneɛma yi a yensusuw ho ahe biara. Nanso, so nneɛma a ɛtete saa no yɛ nneɛma a ɛho nhia ahe biara ankasa? Wɔ Kristofo a yɛahyira yɛn ho so fam no, ɛsɛ sɛ yɛma yɛn ntade ne yɛn ahosiesie, nea yedi ne nea yɛnom, yɛn kasa ne yɛn nneyɛe ho hia yɛn kɛse, na yɛma ɛda adi bere nyinaa sɛ yɛyɛ Ɔsorosoroni, Yehowa Nyankopɔn, asomfo. Wɔkae yɛn ɔsomafo Paulo nsɛm yi sɛ: “Sɛ mudidi oo, monom oo, moyɛ biribiara oo, monyɛ ne nyinaa nhyɛ Onyankopɔn anuonyam!”—1 Korintofo 10:31; Kolosefo 4:6; 1 Timoteo 2:9, 10.
3. Nneɛma a yɛpaw bɛn na ɛyɛ aniberesɛm ankasa?
3 Afei nneɛma foforo a yɛpaw wɔ hɔ a ɛyɛ aniberesɛm ankasa. Sɛ nhwɛso no, akyinnye biara nni ho sɛ gyinae a obi besi sɛ ɔbɛware anaasɛ obedi sigya no betumi anya onii no asetra so nkɛntɛnso a ɛkɔ akyiri. Sɛ́ obi bɛpaw obi a ɔfata a ɔbɛware no, sɛ́ obi bɛyɛ obi hokafo ne nkwa nna nyinaa no nyɛ asɛm ketewa. * (Mmebusɛm 18:22) Afei nso, nnamfo ne mfɛfo, nhomasua, adwumayɛ, ne anigyede ne ahomegye a yɛbɛpaw nya yɛn so nkɛntɛnso kɛse, edi akoten mpo wɔ yɛn honhom fam yiyedi mu—na ɛka yɛn daa yiyedi.—Romafo 13:13, 14; Efesofo 5:3, 4.
4. (a) Dɛn na sɛ yetumi yɛ a, yɛn ani begye ho paa? (b) Nsɛmmisa bɛn na ehia sɛ yesusuw ho?
4 Bere a yehyia tebea horow yi nyinaa no, akyinnye biara nni ho sɛ mfaso wɔ so sɛ yebetumi ayiyi nea ɛyɛ papa ne nea ɛyɛ bɔne mu anaa nea ayɛ sɛ ɛteɛ ne nea ɛteɛ ankasa mu. Bible bɔ kɔkɔ sɛ: “Ɛwɔ ɔkwan bi a ɛteɛ onipa ani so, na n’awiei yɛ owu kwan.” (Mmebusɛm 14:12) Enti, yebetumi abisa sɛ: Ɔkwan bɛn so na yebetumi ayɛ nkurɔfo a yetumi yiyi papa ne bɔne mu? Ɛhe na yebetumi adan akɔ akonya akwankyerɛ a ɛho hia a yɛde besisi gyinae? Dɛn na nnipa a wɔtraa ase tete ne nnɛ ayɛ wɔ eyi mu, na dɛn na afi mu aba?
Wiase “Nyansapɛ ne Nnaadaa Hunu”
5. Wiase bɛn na na afeha a edi kan Kristofo no te mu?
5 Afeha a edi kan no mu Kristofo no traa wiase a na Helafo ne Romafo gyinapɛn ahorow ne adwene agye ntini wom mu. Afei nso, na Romafo asetra kwan a na ɛyɛ dɛ na ɛyɛ fɛ a nnipa pii bu no sɛ ade a ɛsɛ sɛ wɔma wɔn ani bere no wɔ hɔ. Nanso, ɛnyɛ Plato ne Aristotle nyansapɛ adwenhorow no nkutoo na na anyansafo no ani gye ho, na mmom na wɔn ani gye nyansapɛfo akuw foforo te sɛ Epikurofo ne Stoafo de nso ho. Bere a ɔsomafo Paulo baa Atene wɔ n’asɛmpatrɛw akwantu a ɛto so abien mu no, Epikurofo ne Stoafo nyansapɛfo a wɔtee nka sɛ wɔkorɔn sen “ɔkasafo,” Paulo no, ne no dii anobaabae.—Asomafo no Nnwuma 17:18.
6. (a) Dɛn na tete Kristofo binom bɔɔ mmɔden sɛ wɔbɛyɛ? (b) Kɔkɔbɔ bɛn na Paulo de maa wɔn?
6 Enti, ɛnyɛ den sɛ wobɛte nea enti a tete Kristofo binom ani gyee nnipa a na wɔatwa wɔn ho ahyia no akwan huhuw ne wɔn asetra kwan ho no ase. (2 Timoteo 4:10) Ɛyɛɛ sɛnea wɔn a wɔde wɔn ho hyɛɛ nhyehyɛe no mu no nyaa mfaso bebree, na ɛyɛɛ sɛnea na asɛm biara nni nneɛma a wɔpawee no ho. Ná ɛte sɛ nea biribi a mfaso wɔ so bi wɔ wiase no mu a na ebi nni Kristofo asetra kwan a na ɛhwehwɛ ahofama no mu. Nanso, ɔsomafo Paulo bɔɔ kɔkɔ sɛ: “Monhwɛ yiye na obi amfa nyansapɛ ne nnaadaa hunu a ɛnam nnipa atetesɛm ne wiase mfitiasesɛm so na ɛnnam Kristo so ammɛfa mo nnommum.” (Kolosefo 2:8) Dɛn nti na Paulo kaa saa?
7. Mfaso bɛn na ɛwɔ wiase nyansa so ankasa?
7 Paulo de saa kɔkɔbɔ no mae efisɛ ohui sɛ na asiane ankasa wɔ wɔn a wiase no twetwe wɔn no nsusuwii no mu. “Nyansapɛ ne nnaadaa hunu” a ɔde dii dwuma no ho hia titiriw. Nea asɛmfua “nyansapɛ” kyerɛ ankasa ne “nyansa ho anigye ne akyidi.” Nyansapɛ ankasa betumi ayɛ nea mfaso wɔ so. Nokwarem no, Bible hyɛ nimdeɛ ne nyansa a ɛfata a yɛbɛhwehwɛ ho nkuran, titiriw, wɔ Mmebusɛm nhoma no mu. (Mmebusɛm 1:1-7; 3:13-18) Nanso, Paulo de “nyansapɛ” bataa “nnaadaa hunu” ho. Ɔkwan foforo so no, Paulo buu nyansa a na wiase de ma no sɛ adehunu ne nnaadaa. Te sɛ baluu a wɔahu no, na ɛte sɛ nea ɛyɛ den, nanso na mfaso biara nni so. Sɛ obi gyina biribi a enni nnyinaso te sɛ wiase “nyansapɛ ne nnaadaa hunu” so paw nea ɛyɛ papa ne bɔne a, akyinnye biara nni ho sɛ ɛbɛyɛ adehunu, na ebetumi akowie amanehunu mu mpo.
Wɔn a “Wɔfrɛ Bɔne sɛ Papa, ne Papa sɛ Bɔne”
8. (a) Henanom nkyɛn na nkurɔfo kogye afotu? (b) Afotu bɛn na wɔde ma?
8 Nneɛma te saa ara nnɛ. Ɛkame ayɛ sɛ abenfo abu so wɔ nnipa asetram dwumadi biara mu. Aware ne abusua ho afotufo, nsɛnkyerɛwfo, wɔn a wɔfrɛ wɔn ho ayaresafo, nsoromma mu ahwɛfo, ahonhonsɛmdifo, ne afoforo ayɛ krado sɛ wɔde afotu bɛma—agye sika. Nanso afotu bɛn na wɔde ma? Mpɛn pii no, wopia ɔbra pa ho gyinapɛn ahorow a Bible de ma no to nkyɛn, na wɔde nea wɔfrɛ no abrabɔ ho mmara foforo ma. Sɛ nhwɛso no, bere a Canada atesɛm krataa titiriw The Globe and Mail, samufo reka pene a aban no mpene so sɛ ɔde “nnipa a wokura bɔbeasu biako aware” bɛhyɛ mmara ase ho asɛm no, ɔkae sɛ: “Bere a yɛadu afe 2000 mu no, ɛyɛ nea ntease nnim koraa sɛ wɔde ade a nnipa baanu a wɔdɔ wɔn ho na wɔwɔ ahofama ma wɔn ho wɔn ho no ani gye ho sen biara no bɛkame wɔn esiane sɛ wokura bɔbeasu koro nti.” Nea ɛrekɔ so nnɛ ne sɛ ɛsɛ sɛ wɔma biribiara ho kwan, ɛnsɛ sɛ wobu biribiara ho ntɛn. Biribiara nni hɔ a enye koraa; papa biara nni hɔ a ewie pɛyɛ, saa ara na bɔne biara nni hɔ a enye koraa.—Dwom 10:3, 4.
9. Dɛn na nkurɔfo a ɔmanfo bu wɔn no taa yɛ?
9 Afoforo hwɛ wɔn a wodi yiye wɔ asetra mu—asikafo ne nnipa atitiriw—sɛ wɔn nhwɛsofo wɔ wɔn gyinaesi mu. Ɛwom sɛ wobu asikafo ne nnipa atitiriw kɛse wɔ nnɛ wiase de, nanso wɔn ano kɛkɛ na wɔde ka ɔbra pa te sɛ nokwaredi ne ahotoso ho asɛm. Sɛ nnipa pii repɛ tumidi ne mfaso a, ɛnhaw wɔn koraa sɛ wobebu wɔn ani agu abrabɔ mu nnyinasosɛm ahorow so atiatia so. Sɛ ebinom pɛ sɛ wogye din a, wɔboapa tow gyinapɛn ahorow a wogye tom nyinaa gu kɔfa nea ɛmfa kwan mu na ɛyɛ ahodwiriw. Nea efi mu ba ne nnipa a wɔpɛ mfaso na wɔma biribiara ho kwan a ɛfene a wodi ne sɛ, “Biribiara ye.” So ɛyɛ nwonwa sɛ nnipa adwene atu afra na wonhu nea wɔnyɛ wɔ nea ɛyɛ papa ne bɔne ho no?—Luka 6:39.
10. Ɔkwan bɛn so na Yesaia nsɛm a ɛfa papa ne bɔne ho no abam?
10 Awerɛhosɛm a afi gyinae bɔne a wɔagyina akwankyerɛ bɔne so asisi mu aba atwa yɛn ho ahyia, na sɛ yɛbɛbobɔ emu kakraa bi din a—awaregyae ne mmusua a emu apaapae, nnubɔnenom ne mmosa, mmabun a wɔbɔ apoo, ɔbrasɛe, ne nyarewa a wonya fi nna mu. Nokwarem no, yɛbɛyɛ dɛn atumi ahwɛ nneɛma pa kwan bere a nkurɔfo apo papa ne bɔne ho gyinapɛn ahorow anaa nnyinasosɛm nyinaa no? (Romafo 1:28-32) Ɛte sɛ nea odiyifo Yesaia kae no ara pɛ: “Wonnue, wɔn a wɔfrɛ bɔne sɛ papa, ne papa sɛ bɔne, wɔn a wɔde sum yɛ hann, na wɔde hann yɛ sum, wɔde nwenenwene yɛ fremfrem, na wɔde fremfrem yɛ nwenenwene! Wonnue, wɔn a wɔyɛ wɔn ankasa ani so anyansafo na wɔyɛ wɔn ani so nhumufo no!”—Yesaia 5:20, 21.
11. Dɛn nti na nyansa nnim sɛ obi de ne ho bɛto n’ankasa so bere a ɔresusuw papa ne bɔne ho no?
11 Nokwasɛm a ɛyɛ sɛ Onyankopɔn twee saa tete Yudafo a wɔbɛyɛɛ “wɔn ankasa ani so anyansafo” no aso no ma ɛyɛ nea ɛho hia yɛn kɛse sɛ yɛbɛkwati sɛ yɛde yɛn ho bɛto yɛn ho so asi papa ne bɔne ho gyinae. Ɛnnɛ, nnipa pii agye adwene a ɛne sɛ “yɛ nea wo koma pɛ,” anaasɛ “yɛ nea wususuw sɛ ɛteɛ” no atom. So ɔkwan a ɛte saa a wɔfa so yɛ ade no fata? Bible nkyerɛ saa, ɛka no pefee sɛ: “Koma wɔ hɔ yi, ɛyɛ okontomponi sen ade nyinaa na emuɔ, hena na obenya mu ahuye?” (Yeremia 17:9) So wode wo ho bɛto okontomponi ne oniberefo so sɛ ɔnkyerɛ wo kwan mma wunsi gyinae? Dabida. Sɛ wobɛyɛ ho biribi koraa a, ebia wobɛyɛ biribi a ɛbɔ nea onipa a ɔte saa ka kyerɛ wo no abira. Ɛno nti na Bible kae yɛn sɛ: “Nea ne ho da ne koma so no yɛ ɔkwasea, na nea ɔnam nyansa mu no benya aguanye.”—Mmebusɛm 3:5-7; 28:26.
Nea Onyankopɔn Pɛ a Yebesua
12. Dɛn nti na ɛsɛ sɛ yehu ‘Onyankopɔn apɛde’?
12 Esiane sɛ ɛnsɛ sɛ yɛde yɛn ho to wiase nyansa anaa yɛn ankasa de so wɔ ade a ɛyɛ papa ne bɔne ho nti no, dɛn na ɛsɛ sɛ yɛyɛ? Hyɛ afotu yi a emu da hɔ a ɔsomafo Paulo de mae no nsow: “Monnyɛ mo ho sɛ wiase yi, na mmom momfa adwenem foforoyɛ nsakra mo ho, na moasɔ nea Onyankopɔn pɛ a eye, na ɛsɔ ani, na ɛyɛ pɛ no ahwɛ.” (Romafo 12:2) Dɛn nti na ɛsɛ sɛ yehu Onyankopɔn apɛde? Wɔ Bible mu no, Yehowa kyerɛ yɛn nea enti a ɛsɛ sɛ yɛyɛ saa no pefee, bere a ɔka sɛ: “Sɛ ɔsoro korɔn sen asase no, saa ara na m’akwan korɔn sen mo akwan, na m’adwene nso sen mo adwene.” (Yesaia 55:9) Enti sɛ anka yɛde yɛn ho bɛto yɛn ankasa nyansa anaa yɛn nkate so no, wotu yɛn fo sɛ: “Monsɔ nea ɛsɔ Awurade ani yiye no nhwɛ.”—Efesofo 5:10.
13. Ɔkwan bɛn so na Yesu nsɛm a ɛwɔ Yohane 17:3 no si hia a ehia sɛ yehu nea Onyankopɔn pɛ so dua?
13 Yesu Kristo sii ahiade yi so dua bere a ɔkae sɛ: “Eyi ne daa nkwa, sɛ wobenya wo, nokware Nyankopɔn koro no, ne nea wosomaa no, Yesu Kristo, ho nimdeɛ.” (Yohane 17:3, NW) Asɛm ‘sɛ́ wobenya nimdeɛ’ no kyerɛ pii koraa sen sɛ́ ‘wobehu’ ara kɛkɛ. Sɛnea Vine’s Expository Dictionary, kyerɛ no, “ɛkyerɛ abusuabɔ a ɛda obi ne dekode a onim no ntam; eyi mu no, dekode a onim no som bo anaasɛ ɛho hia onii a onim no, na ɛno na ɛma wonya abusuabɔ no.” Abusuabɔ a wo ne obi wɔ no kyerɛ pii sen hu a wubehu saa nipa no anaa ne din kɛkɛ. Nea ɛka ho nso ne nea saa nipa no pɛ ne nea ɔmpɛ a wubehu, nneɛma a ɛho hia no, ne ne gyinapɛn ahorow a wubehu—na woadi so.—1 Yohane 2:3; 4:8.
Yɛn Nkatede a Yɛbɛtete No
14. Dɛn na Paulo kae sɛ ɛyɛ nsonsonoe titiriw a ɛda honhom fam mmotafowa ne nnipa a wɔanyin no ntam?
14 Ɛnde, ɔkwan bɛn so na yebetumi ayiyi papa ne bɔne mu? Yenya mmuae no wɔ Paulo nsɛm a ɔkyerɛw kɔmaa afeha a edi kan Hebrifo Kristofo no mu. Ɔkyerɛwee sɛ: ‘Obiara a onum nufu no nhuu trenee asɛm no mu ɛ, na ɔyɛ akokoaa. Na aduan a ɛyɛ den no fata wɔn a wɔanyin honhom fam a dwuma a wɔde wɔn nkatede di nti akokwaw papa ne bɔne mu yiyi ho.’ Ɛha no, Paulo de “nufusu” a ɔkaa ho asɛm sɛ “Onyankopɔn nsɛm mu mfitiasesɛm” wɔ nkyekyem a edi anim mu no bɔɔ “aduan a ɛyɛ den” a ɛfata “wɔn a wɔanyin” a “wɔn nkatede akokwaw papa ne bɔne mu yiyi ho” no abira.—Hebrifo 5:12-14.
15. Dɛn nti na ɛsɛ sɛ yɛyere yɛn ho denneennen de nya Onyankopɔn ho nokware nimdeɛ?
15 Nea edi kan koraa no, eyi kyerɛ sɛ ɛsɛ sɛ yɛyere yɛn ho denneennen nya Onyankopɔn gyinapɛn ahorow a ɛwɔ N’asɛm, Bible, mu no ho ntease a edi mu. Ɛnyɛ nneɛma a ɛsɛ sɛ yɛyɛ anaa nea ɛnsɛ sɛ yɛyɛ ho mmara tenteenten na yɛrehwehwɛ. Bible no nyɛ nhoma a ɛte saa. Mmom no, Paulo kyerɛkyerɛɛ mu sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn. Na Onyankopɔn nipa ayɛ pɛ a wɔasiesie no koraa ama nnwuma pa nyinaa.” (2 Timoteo 3:16, 17) Ɛsɛ sɛ yɛde yɛn adwene ne yɛn nsusuwii di dwuma na ama yɛanya saa nkyerɛkyerɛ, ntɛnyi, ne nteɛso no so mfaso. Eyi gye mmɔdenbɔ, nanso nea efi mu ba—a ɛma onipa ‘yɛ pɛ a wɔasiesie no koraa ama nnwuma pa nyinaa’—no fata.—Mmebusɛm 2:3-6.
16. Obi nkatede a ɔbɛtete no no kyerɛ dɛn?
16 Afei, sɛnea Paulo kyerɛe no, nnipa a wɔanyin no “nkatede akokwaw papa ne bɔne mu yiyi ho.” Ɛha na asɛm no pɔw ankasa wɔ. Nea asɛm ‘nkatede a akokwaw’ no kyerɛ ankasa ne “nkatede a wɔatete no (te sɛ afunibufo).” (Kingdom Interlinear Translation) Afunibufo a ne ho akokwaw de adwinnade bi a wapaw te sɛ nhankare anaa mpuran a ɛda adum so di dwuma dannan ne ho ahoɔhare so ma ɛyɛ sɛ nea ne mu nyɛ duru koraa. Otumi di n’akwaa horow so koraa bere nyinaa, na ɛkame ayɛ sɛ otumi hu nea ɛsɛ sɛ ɔyɛ na ama watumi awie n’adeyɛ no ansa mpo na n’ani aba ne ho so. Nea ɛma otumi yɛ eyinom nyinaa ne ntetee ne ahosiesie a ɛyɛ den a ɔyɛ no daa no.
17. Ɔkwan bɛn so na ɛsɛ sɛ yɛyɛ sɛ afunibufo?
17 Honhom fam no, sɛ yɛpɛ sɛ yehu sɛ gyinae horow a yesi ne nneɛma a yɛpaw no yɛ nea ɛfata bere nyinaa a, ɛsɛ sɛ yɛn nso yesiesie yɛn ho te sɛ afunibufo. Ɛsɛ sɛ yetumi di yɛn nkatede ne yɛn akwaa horow so koraa bere nyinaa. (Mateo 5:29, 30; Kolosefo 3:5-10) Sɛ nhwɛso no, so wohyɛ wo ho so a womfa w’ani nhwɛ nneɛma a ɔbrasɛe wom anaasɛ wusisi w’aso na amma woantie nnwom anaa nsɛm a ɛmfata? Ɛyɛ nokware sɛ nneɛma a ɛmfata saa no atwa yɛn ho ahyia. Nanso, sɛ ebia yɛbɛma ho kwan ma agye ntini wɔ yɛn koma ne yɛn adwene mu no da so ara gyina yɛn so. Yebetumi asuasua odwontofo a ɔkaa eyi no: “Meremma ahuhusɛm bi nsi m’ani so, mikyi ahohwisɛmdi, ɛremfam me ho. . . nea ɔkeka atosɛm rennyina m’anim.”—Dwom 101:3, 7.
Tete Wo Nkatede Denam Dwuma a Wode Bedi So
18. Dɛn na asɛm ‘dwuma a wɔde di’ a ɛwɔ Paulo nkyerɛkyerɛmu a ɛfa obi nkatede a ɔtete no ho mu no kyerɛ?
18 Ɛsɛ sɛ yɛkae sɛ ɛyɛ ‘dwuma’ a yɛde yɛn nkatede ‘di’ so na yɛnam betumi atete no ma ayiyi papa ne bɔne mu. Ɔkwan foforo so no, bere biara a ɛsɛ sɛ yesi gyinae no, ɛsɛ sɛ yesua sɛ yɛde yɛn adwene tumi bedi dwuma de ahu Bible nnyinasosɛm a ɛwom ne sɛnea yebetumi de adi dwuma no. Fa yɛ wo su sɛ wobɛyɛ nhwehwɛmu wɔ Bible ho nhoma a wɔnam “akoa nokwafo ne ɔbadwemma” no so ayɛ no mu. (Mateo 24:45) Ɛwom, yebetumi ahwehwɛ mmoa afi Kristofo a wɔn ho akokwaw hɔ. Nanso, awiei koraa no, yebenya mfaso pii wɔ mmɔden a yɛbɛbɔ de asua Onyankopɔn Asɛm, abɔ Yehowa mpae ahwehwɛ n’akwankyerɛ ne ne honhom no so.—Efesofo 3:14-19.
19. Sɛ yɛkɔ so tete yɛn nkatede a, nhyira ahorow bɛn na yebetumi anya?
19 Sɛ yɛde nkakrankakra tete yɛn nkatede a, botae no ne sɛ ‘yɛrenna so nyɛ mmotafowa a ɔkyerɛ mframa biara wosow yɛn biribiri twe yɛn di akɔneaba nnipa kusumdi mu, anifere a ɛnam nnaadaa nnɛɛdɛe mu bio.’ (Efesofo 4:14) Mmom no, ɛdenam Onyankopɔn apɛde ho nimdeɛ ne ntease a yɛanya so no, yebetumi asisi gyinae akɛse ne nketewa a ɛso bɛba yɛn mfaso, ahyɛ mfɛfo asomfo den, na nea ɛsen ne nyinaa no, ɛbɛma yɛn soro Agya no ani agye. (Mmebusɛm 27:11) Hwɛ nhyira ne ahobammɔ a ɛno yɛ wɔ mmere a emu yɛ den yi mu!
[Ase hɔ nsɛm]
^ nky. 3 Wɔ nsɛm 40 a ɛde adwennwene a emu yɛ den sen biara ba a Nnuruyɛfo Thomas Holmes ne Richard Rahe hyehyɛe mu no, aware mu ɔhokafo wu, awaregyae, ne ntetewmu ne nneɛma abiɛsa a na edi kan. Ná ware a obi bɛware to so ason.
Wubetumi Akyerɛkyerɛ Mu?
• Nimdeɛ bɛn na yehia na ama yɛasisi gyinae ahorow a ɛfata?
• Dɛn nti na nyansa nnim sɛ yɛbɛhwɛ nnipa atitiriw anaasɛ yɛde yɛn ho bɛto yɛn ankasa nsusuwii so bere a yɛresi papa ne bɔne ho gyinae no?
• Sɛ yɛresisi gyinae ahorow a, dɛn nti na ɛsɛ sɛ yehu nea Onyankopɔn pɛ, na ɔkwan bɛn so na yebetumi ayɛ saa?
• ‘Yɛn nkatede a yɛbɛtete no’ no kyerɛ dɛn?
[Adesua no ho Nsɛmmisa]
[Mfonini wɔ kratafa 9]
Mfaso nni so sɛ yɛbɛhwehwɛ akwankyerɛ afi asikafo ne nnipa atitiriw hɔ
[Mfonini wɔ kratafa 10]
Te sɛ afunibufo no, ɛsɛ sɛ yedi yɛn nkatede ne yɛn akwaa horow nyinaa so