Nsɛmmisa a Efi Akenkanfo Hɔ

Hiob amanehunu no dii bere tenten bɛn?

Ebinom susuw sɛ Hiob huu amane mfe pii, nanso Hiob nhoma no nka bere tenten a ɛte saa ho asɛm.

Ɔhaw a edii kan baa Hiob so, ne mma a wowuwui ne n’agyapade a efii ne nsa, no ankyɛ pii. Yɛkenkan sɛ: ‘Na da bi, ne mmabarima ne ne mmabea redidi na wɔrenom nsa wɔn nua panyin fie.’ Wɔde amanneɛ bɛbɔɔ Hiob sɛ wahwere nneɛma pii—n’anantwi, ne mfurum, ne nguan, ne yoma, ne ne nkoa a na wɔrehwɛ mmoa no so no. Ɛda adi sɛ ɛno akyi pɛɛ na Hiob tee sɛ ne mma mmarima ne ne mmabea no awuwu bere a ‘na wɔredidi na wɔrenom nsa wɔn nua panyin fie,’ no. Ɛda adi sɛ eyinom nyinaa sii da koro.—Hiob 1:13-19.

Ebetumi aba sɛ ɔhaw a edi hɔ a ɛtoo Hiob no kyɛe. Satan kɔka kyerɛɛ Yehowa sɛ sɛ ɔhaw no ka Hiob ankasa—ne were—a obegyaa ne mũdi mu. Enti, “ɔde akuru bɔne kɔtotow Hiob fi ne nan ase kosii ne mpampam.” Ebetumi aba sɛ edii nna kakra ansa na akuru yi retrɛw aka ne nipadua nyinaa. Na ɛda adi sɛ egyee bere ansa na ne nnamfo a wɔbae sɛ wɔrebɛkyekye ne werɛ no tee ‘n’amanehunu no nyinaa.’—Hiob 2:3-11.

Na Elifas fi Teman a ɛwɔ Edom no, na na Sofar nso fi Arabia atifi fam atɔe, ma enti na wɔne Hiob kurow Us a na ɛwɔ Arabia atifi fam no ntam kwan nware. Nanso, na Bildad yɛ Suhini, a ɛda adi sɛ na ɔne ne nkurɔfo te Eufrate Asubɔnten no ho. Sɛ na Bildad wɔ ne kurom bere a Hiob asɛm no sii no a, na ebegye nnawɔtwe anaa asram pii ansa na wate aba abɛhwɛ no wɔ Us. Ɛyɛ ampa sɛ ebetumi aba sɛ na nnipa baasa no bɛn Hiob bere a wɔtee ne haw no. Sɛnea ɛte biara no, bere a Hiob nnamfo baasa no duu hɔ no, “wɔne no tratraa fam nnanson adekyee ne adesae,” na wɔankasa.—Hiob 2:12, 13.

Afei Hiob haw a etwa to a ɛno na wɔka ho nsɛm pii wɔ ne nhoma no mu no dii hɔ. Wɔn a wɔbae sɛ wɔrebɛkyekye ne werɛ no bisabisaa nsɛm pii ma Hiob nso maa wɔn ho mmuae. Ɛno akyi no, aberante Elihu kaa Hiob anim na Yehowa fi soro teɛɛ Hiob so.—Hiob 32:1-6; 38:1; 40:1-6; 42:1.

Enti, ebetumi aba sɛ amanehunu a ɛtoo Hiob ne ne mũdi mu kura no sii asram kakraa bi mu, ebia annu afe mpo. Ebia w’ankasa woahu sɛ ɔhaw a emu yɛ den taa kyɛ. Nanso, enni sɛ yɛma yɛn werɛ fi sɛ egyae, sɛnea Hiob de no baa awiei no. Nanso, ɛmfa ho bere tenten a ɔhaw bi bedi no, momma yɛnkae sɛ Onyankopɔn bɛboa yɛn sɛnea ɛda adi wɔ kyerɛw nsɛm yi mu no: “Yɛn mprempren amanehunu a ɛyɛ hare yi nya daa anuonyam a ɛso kokuroo tra so bebree ma yɛn.” (2 Korintofo 4:17) Ɔsomafo Petro kyerɛwee sɛ: “Ɔdom nyinaa Nyankopɔn a wafrɛ mo aba ne daa anuonyam no mu Kristo mu no, ɔno ara na sɛ munya hu amane kakra ansa a, obesiesie mo pɛ, ɔbɛma mo ase atim, ɔbɛhyɛ mo den, ɔbɛma moanya nnyinaso.”—1 Petro 5:10.