Wodi Nkonim Wɔ Ɔman Amanyɔ Mmara Asɛnnibea

YEHOWA ADANSEFO a wɔwɔ Germany no dii nkonim a ebi nsii da wɔ Ɔman Amanyɔ Mmara Asɛnnibea a ɛwɔ Karlsruhe no. Wɔnam so yɛɛ biribi a ehia a ɛbɛma aban agye wɔn atom wɔ mmara mu.

Yehowa Adansefo akɔ so aka asɛmpa no bɛboro mfe 100 ni wɔ Germany. Wofii ɔtaa a emu yɛ den mu fii wɔ katabaako nniso abien a ɛkɔɔ so wɔ afeha 20 no mu—Sohyialisfo ne Kɔmunisfo nsam. Efi 1990 no, Adansefo no ahwehwɛ sɛ wobegye wɔn atom wɔ mmara mu sɛ adwumayɛkuw. Bere a Adansefo no dii bem abien na wobuu wɔn fɔ biako no, wɔde asɛm no kɔdan Ɔmantam Amanyɔ Mmara Asɛnnibea no na wɔde wɔn gyinaesi too gua wɔ December 19, 2000.

Wɔyɛɛ Adwenkoro Di Maa Yehowa Adansefo

Atemmufo baason a na wɔwɔ asɛnnibea hɔ no nyinaa di maa Adansefo no. Atemmufo no annye gyinaesi a Ɔman Sohwɛ Asɛnnibea no de too gua wɔ 1997 no antom na wɔhyɛɛ asɛnnibea no sɛ wɔnsan nhwehwɛ Adansefo no asɛm no mu bio.

Ɔman Amanyɔ Mmara Asɛnnibea no de hokwan no kaa abusuabɔ titiriw a ɛda Ɔman no ne nyamesom akuw ntam ho asɛm. Ade titiriw ne sɛ, nyamesom bi gyinabea “nnyina nea wogye di so, na mmom n’abrabɔ so.”

Asɛnnibea no nso hui sɛ, da a Adansefo da wɔn ho adi sɛ “Kristofo a wonni afã biara no,” nsɔre “ntia dodow amammu” na “ɛnyɛ wɔn adwene ne sɛ wɔde nniso foforo bi resi dodow amammu ananmu.” Enti ɛnsɛ sɛ wɔkasa tia Adansefo no sɛ, sɛ wɔanto aba de a ɛnsɛ sɛ wogye wɔn tom wɔ mmara mu.—Yohane 18:36; Romafo 13:1.

Asɛnnibea no san hui sɛ, ɛtɔ da a ogyidini bi—sɛ ɔyɛ Ɔdansefo anaa nyamesom foforo bi muni—betumi aba tebea bi mu a obehu sɛ nea Ɔman no hwehwɛ no ne ne gyidi nhyia. Sɛ obi de n’ahonim “gyina ne nyamesom gyidi akyi sen nea mmara no ka a,” Ɔman no betumi abu no bem sɛ ɛne nyamesom mu ahofadi hyia.—Asomafo no Nnwuma 5:29.

Asɛnnibea a edii asɛm no kyerɛw ɛho asɛm. Ɛkame ayɛ sɛ atesɛm nkrataa a ɛwɔ Germany nyinaa kaa ho asɛm. Television ne radio dwumadibea ahorow akɛse nyinaa bɔɔ ho amanneɛ anaasɛ wobisabisaa ho nsɛm. Wɔmmɔɔ Yehowa din wɔ baguam kɛse saa da wɔ Germany.

[Mfonini Fibea wɔ kratafa 8]

AP Photo/Daniel Maurer