Bɔ Wo Koma Ho Ban
Bɔ Wo Koma Ho Ban
“Kora wo koma so sen nea wode sie nyinaa, na emu na nneyɛe nyinaa fi.”—MMEBUSƐM 4:23.
1, 2. Dɛn nti na ehia sɛ yɛbɔ yɛn koma ho ban?
AKWAKORAA bi a ɔwɔ Caribbean supɔw bi so pue fii baabi a okohintawee bere a ahum bi a ano yɛ den twaam no. Bere a ɔhwɛɛ nneɛma a asɛe atwa ne ho ahyia no, ohui sɛ dua kɛse bi a asi ne fie aboboano mfe pii no abu. Obisaa ne ho sɛ: ‘Ɛyɛɛ dɛn na nnua nketewa a ɛwɔ mpɔtam hɔ no ammubu?’ Dua a abu no dunsin anim a ɔhwɛe no ma onyaa mmuae. Ná dua a ɛte sɛ nea entumi mmu no mfinimfini aporɔw, na ahum no ma wohuu ɔporɔw a na ahintaw no kɛkɛ.
2 Hwɛ awerɛhosɛm a ɛyɛ bere a nokware somfo bi a ɛte sɛ nea n’ase atim wɔ Kristofo asetra kwan so hwe ase wɔ gyidi ho sɔhwɛ bi mu no. Bible no ka ma ɛfata sɛ “onipa komam adwene yɛ bɔne fi ne mmofraase.” (Genesis 8:21) Eyi kyerɛ sɛ sɛ yɛamma yɛn ani anna hɔ bere nyinaa a, wobetumi adaadaa yɛn a yɛwɔ koma pa sen biara no ma yɛayɛ bɔne. Esiane sɛ nnipa a yɛnyɛ pɛ nyinaa betumi ayɛ bɔne nti, ɛsɛ sɛ yɛfa afotu yi aniberesɛm: “Kora wo koma so sen nea wode sie nyinaa, na emu na nneyɛe nyinaa fi.” (Mmebusɛm 4:23) Ɛnde, ɔkwan bɛn so na yɛbɛfa abɔ yɛn sɛnkyerɛnne kwan so koma no ho ban?
Yɛn Ho Mu a Yɛbɛhwehwɛ Daa—Ɛyɛ Adeyɛ a Ɛho Hia
3, 4. (a) Nsɛm bɛn na yebetumi abisa afa yɛn koma ankasa ho? (b) Dɛn na ɛbɛboa yɛn ma yɛahwehwɛ yɛn sɛnkyerɛnne kwan so koma no mu?
3 Sɛ wokɔ oduruyɛfo bi nkyɛn sɛ ɔnyɛ wo nipaduam nhwehwɛmu a, ɛda adi sɛ ɔbɛhwɛ wo koma. So w’akwahosan nyinaa, a wo koma ka ho, kyerɛ sɛ wunya nnuannuru a ɛfata? Wo mogya ahoɔden te dɛn? So sɛnea wo koma bɔ no di mũ na ɛwɔ ahoɔden? So woteɛteɛ w’apɔw mu sɛnea ɛfata? So wo koma yɛ adwuma tra so?
4 Sɛ ɛho hia sɛ wɔyɛ wo koma ankasa mu nhwehwɛmu daa a, ɛnde na wo sɛnkyerɛnne kwan so koma no nso ɛ? Yehowa hwehwɛ mu. (1 Beresosɛm 29:17) Saa ara na ɛsɛ sɛ yɛn nso yɛhwehwɛ mu. Ɔkwan bɛn so? Denam nsɛm te sɛ nea edidi so yi a yebebisa so: So me koma nya honhom fam nnuan a ɛfata denam kokoam adesua a meyɛ no daa ne asafo nhyiam a mekɔ so? (Dwom 1:1, 2; Hebrifo 10:24, 25) So Yehowa asɛm no da me koma so te sɛ “ogya a ɛredɛw a wɔato mu me nnompe mu” a ɛkanyan me ma mede me ho hyɛ Ahenni asɛnka ne asuafoyɛ adwuma no mu? (Yeremia 20:9; Mateo 28:19, 20; Romafo 1:15, 16) So biribi kanyan me ma mede me ho hyɛ bere nyinaa som adwuma no fã bi mu denneennen bere a metumi ayɛ bi no? (Luka 13:24) Nsɛm bɛn na mede me sɛnkyerɛnne kwan so koma si so? So merehwehwɛ afoforo a wɔn koma ayɛ biako wɔ nokware som mu fekubɔ? (Mmebusɛm 13:20; 1 Korintofo 15:33) Ɛmmra sɛ yɛbɛyɛ ntɛm ahu sintɔ biara na yɛasiesie no ntɛm so.
5. Atirimpɔw titiriw bɛn na gyidi ho sɔhwɛ betumi adi ho dwuma?
5 Yɛtaa hyia gyidi ho sɔhwɛ wɔ yɛn asetram. Eyinom ma yenya kwan hu sɛnea yɛn koma te. Mose ka kyerɛɛ Israelfo a na wɔrehyɛn Bɔhyɛ Asase no so sɛ: ‘Yehowa wo Nyankopɔn ma wonantew mfirihyia aduanan sare yi so, sɛ ɔrebrɛ wo ase asɔ wo ahwɛ, na wahu nea ɛwɔ wo koma mu, sɛ wubedi ne mmara nsɛm so anaasɛ worenni so.’ (Deuteronomium 8:2) Sɛ yehyia tebea horow a yɛnhwɛ kwan anaa sɔhwɛ ahorow a, so ɛyɛ a nkate, akɔnnɔ, anaa nneyɛe a yɛda no adi no ntaa nyɛ yɛn nwonwa? Akyinnye biara nni ho sɛ sɔhwɛ ahorow a Yehowa ma kwan ma ɛba yɛn so no ma yehu yɛn sintɔ ahorow, na ɛma yenya hokwan siesie yɛn ho. (Yakobo 1:2-4) Ɛmmra sɛ yɛremmu yɛn ani ngu mpae a yɛbɛbɔ de asusuw nea yɛbɛyɛ wɔ sɔhwɛ ahorow mu ho so da!
Dɛn na Nsɛm a Yɛka Da no Adi?
6. Dɛn na nneɛma a yɛn ani gye ho sɛ yɛbɛka ho asɛm no da no adi wɔ yɛn koma ho?
6 Yɛbɛyɛ dɛn atumi ahu nneɛma a yɛaboaboa ano wɔ yɛn koma mu no? Yesu kae sɛ: “Onipa pa fi nnepa a waboaboa ano ne koma mu no mu na oyi adepa adi, na onipa bɔne fi nnebɔne a waboaboa ano ne koma mu no mu na oyi adebɔne adi; na efi nea ayɛ koma ma aboro so no mu na n’ano ka.” (Luka 6:45) Nneɛma a yɛtaa ka ho asɛm yɛ adanse a edi mu a ɛkyerɛ nea ɛwɔ yɛn koma mu. So yɛtaa ka honam fam nneɛma ne wiase yiyedi ho asɛm? Anaasɛ yɛn nkɔmmɔbɔ taa gyina honhom fam nneɛma ne teokrase botae ahorow so? Sɛ́ anka yɛbɛka afoforo mfomso ahorow ho asɛm no, so yefi ɔdɔ mu kata so? (Mmebusɛm 10:11, 12) So yɛtaa ka nkurɔfo ne nneɛma a wɔyɛ wɔ wɔn asetram ho nsɛm pii bere a yɛnka honhom fam ne abrabɔ fam nneɛma ho nsɛm? So eyi betumi ayɛ adanse a ɛkyerɛ sɛ yɛde yɛn ho rehyehyɛ nnipa foforo kokoam nsɛm mu sɛnea ɛnsɛ?—1 Petro 4:15.
7. Yɛn koma ho ban a yɛbɛbɔ ho asuade bɛn na yebetumi anya afi Yosef nuanom du no asɛm no mu?
7 Susuw nea ɛtoo abusua kɛse bi ho hwɛ. Ná Yakob mma mpanyimfo du no ne wɔn nua kumaa Yosef ‘nkasa abodwo so.’ Dɛn ntia? Na wɔn ani bere no efisɛ na ɔne wɔn agya dɔba. Akyiri yi, bere a Onyankopɔn hyiraa Yosef ma ɔsoo dae a ɛma ɛdaa adi sɛ ɔwɔ Yehowa anim dom no, wonyaa ‘biribi gyinaa so tan no.’ (Genesis 37:4, 5, 11) Wɔtɔn wɔn nua no kɔɔ nkoasom mu atirimɔden so. Afei, bere a wɔbɔɔ mmɔden sɛ wɔbɛkata wɔn bɔne so no, wɔdaadaa wɔn agya ma osusuwii sɛ aboa bi na akum Yosef. Yosef nuanom du no antumi ammɔ wɔn koma ho ban saa bere no. Sɛ yɛyɛ ntɛm kasa tia afoforo a, so ebetumi ayɛ adanse a ɛkyerɛ sɛ anibere anaa ahoɔyaw wɔ yɛn koma mu? Ɛsɛ sɛ yɛma yɛn ani da hɔ wɔ nea efi yɛn anom ba ho, na yɛyɛ ntɛm yi nneɛma a ɛmfata biara fi yɛn mu.
8. Sɛ yedi atoro a, dɛn na ɛbɛboa yɛn ma yɛahwehwɛ yɛn komam?
8 Bere a ‘Onyankopɔn ntumi nni atoro’ no, nnipa a yɛnyɛ pɛ de, yetumi di atoro. (Hebrifo 6:18) Odwontofo no bɔɔ abubuw sɛ: “Nnipa nyinaa yɛ atorofo.” (Dwom 116:11) Ɔsomafo Petro mpo dii atoro paa Yesu mprɛnsa. (Mateo 26:69-75) Ɛda adi pefee sɛ, ɛsɛ sɛ yɛhwɛ yiye na yɛkwati atorodi, efisɛ Yehowa tan “atoro tɛkrɛma.” (Mmebusɛm 6:16-19) Sɛ yedi atoro a, ɛbɛyɛ papa sɛ yesusuw dekode a ɛma yɛyɛɛ saa no ho. So na ɛyɛ onipa ho suro? So ɛyɛ asotwe a na yesuro nti? Ebia animguase a na yesuro anaa pɛsɛmenkominya ankasa na ɛma yɛyɛɛ saa? Sɛnea ɛte biara no, hwɛ fata a ɛfata sɛ yesusuw asɛm no ho, fi ahobrɛase mu gye yɛn sintɔ tom, srɛ Yehowa hɔ bɔne fafiri, na yɛhwehwɛ ne mmoa a yɛde bedi mmerɛwyɛ no so! “Asafo no mu mpanyimfo” yɛ wɔn a wɔfata a wobetumi de mmoa a ɛte saa ama.—Yakobo 5:14.
9. Dɛn na yɛn mpaebɔ betumi ada no adi wɔ yɛn koma ho?
9 Bere a Yehowa rema Ɔhene Salomo aberante no nyansa ne nimdeɛ a ɔsrɛe ho mmuae no, ɔkae sɛ: “Esiane sɛ eyi wɔ wo koma mu, na woammisa ahonya, akorade ne anuonyam . . . nyansa ne nimdeɛ no, wɔde ama wo, na ahonya ne akorade ne anuonyam nso, mɛma wo.” (2 Beresosɛm 1:11, 12) Nea Salomo bisae ne nea wammisa nyinaa mu no, na Yehowa nim nea ɛwɔ Salomo koma mu. Dɛn na nkitaho a yɛne Yehowa di no da no adi wɔ yɛn koma ho? So yɛn mpaebɔ da no adi sɛ nimdeɛ, nyansa, ne nhumu ho sukɔm de yɛn? (Mmebusɛm 2:1-6; Mateo 5:3) So Ahenni nneɛma ho nsɛm wɔ yɛn koma mu? (Mateo 6:9, 10) Sɛ yɛn mpaebɔ abɛyɛ nea emfi komam, na yɛbɔ no kɛkɛ a, eyi betumi ayɛ adanse a ɛkyerɛ sɛ ɛsɛ sɛ yegye bere susuw Yehowa nneyɛe ho. (Dwom 103:2) Ɛsɛ sɛ Kristofo nyinaa ma wɔn ani da hɔ na wohu nea wɔn mpaebɔ da no adi.
Dɛn na Yɛn Nneyɛe Da no Adi?
10, 11. (a) Ɛhe na awaresɛe ne aguamammɔ fi ase? (b) Dɛn na ɛbɛboa yɛn mma ‘yɛnsɛe aware wɔ yɛn komam’?
10 Wɔaka sɛ nneyɛe kɔ akyiri pii sen ɔkasa. Akyinnye biara nni ho sɛ yɛn nneyɛe da nea ɛwɔ yɛn mu adi kɛse. Sɛ nhwɛso no, ɛdefa abrabɔ pa ho no, yɛn koma ho ban a yɛbɛbɔ kyerɛ pii sen aguamammɔ anaa awaresɛe a yɛbɛkwati. Wɔ Yesu Bepɔw so Asɛnka mu no, ɔkae sɛ: “Obiara a ɔhwɛ ɔbaa na ne kɔn dɔ no no, na wafa no ne komam dedaw.” (Mateo 5:28) Ɔkwan bɛn so na yebetumi akwati aware a yɛbɛsɛe no wɔ yɛn komam?
11 Tete agya nokwafo Hiob yɛɛ nhwɛso maa Kristofo mmarima ne mmea awarefo. Akyinnye biara nni ho sɛ Hiob ne mmabaa dii nkitaho wɔ da biara da asetram, na sɛ wohia mmoa a, na ofi ayamye mu boa wɔn. Nanso, ɔbarima nokwafo yi annya wɔn ho akɔnnɔ wɔ nna fam da. Dɛn ntia? Efisɛ na wabɔ ne tirim sɛ ɔrenhwɛ mmea nnya wɔn ho akɔnnɔ bɔne. Ɔkae sɛ: “Apam na me ne m’aniwa apam, na adɛn na memfa m’ani menkari ababaa?” (Hiob 31:1) Ɛmmra sɛ yɛne yɛn aniwa bɛyɛ apam saa ara na yɛabɔ yɛn koma ho ban.
12. Ɔkwan bɛn so na wode Luka 16:10 bedi dwuma wɔ wo koma ho ban a wobɛbɔ mu?
12 Onyankopɔn Ba no kae sɛ: “Nea odi ade ketewaa mu nokware no di pii mu nokware; na nea ɔnteɛ ade ketewaa mu no, na ɔnteɛ bebree mu nso.” (Luka 16:10) Yiw, ɛsɛ sɛ yɛhwehwɛ yɛn nneyɛe mu wɔ nneɛma nketenkete a yɛyɛ no daa mu, nea yɛyɛ no kokoam wɔ yɛn fie mu mpo. (Dwom 101:2) Bere a yɛte yɛn fie, bere a yɛrehwɛ television, anaa Intanɛt no, so yɛhwɛ sɛ yɛde Kyerɛwnsɛm mu afotu yi redi dwuma: “Na aguamammɔ ne afideyɛ nyinaa anaa anibere de, mommma wɔmmmɔ din po wɔ mo mu, sɛnea ɛsɛ ahotefo, ɛne aniwude ne nkwaseasɛm anaa asereseresɛm a ɛnsɛ”? (Efesofo 5:3, 4) Na basabasayɛ a ebia ɛba television so anaa video agodie mu nso ɛ? Odwontofo no kae sɛ: “[Yehowa, NW] sɔ ɔtreneeni hwɛ, na ɔbɔnefo ne nea ɔpɛ amim de, ne kra tan no.”—Dwom 11:5.
13. Sɛ yɛresusuw nea efi yɛn komam ba ho a, ahwɛyiye bɛn na ɛsɛ sɛ yɛyɛ?
13 Yeremia bɔɔ kɔkɔ sɛ: “Koma wɔ hɔ yi, ɛyɛ okontomponi sen ade nyinaa na emuɔ.” (Yeremia 17:9) Nkontompo a koma yɛ yi tumi da adi bere a yeyiyi yɛn ho ano wɔ yɛn mfomso ahorow ho, yebu yɛn sintɔ ahorow adewa, yennye yɛn nipasu mu sintɔ ahorow a anibere wom ntom, anaa yɛka nneɛma a yɛayɛ ho asɛm ma ɛtra so no. Koma a ɛwɔ ahoyeraw mu betumi ayɛ koma nta nso—ɛde ano fremfrem bɛka ade biako, na ayɛ ade foforo. (Dwom 12:2; Mmebusɛm 23:7) Hwɛ sɛnea ɛho hia sɛ yedi nokware bere a yɛhwehwɛ nea efi yɛn komam ba mu no!
So Yɛn Ani Hwɛ Tẽẽ?
14, 15. (a) Dɛn ne ani a ‘ɛhwɛ tẽẽ’? (b) Ɔkwan bɛn so na yɛn ani a yɛbɛma ahwɛ tẽẽ no bɛboa yɛn ma yɛabɔ yɛn koma ho ban?
14 Yesu kae sɛ: “Nipadua kanea ne aniwa.” Ɔde kaa ho sɛ: “Enti sɛ w’ani ye a, wo nipadua nyinaa bɛyɛ hann.” (Mateo 6:22) Ani a ɛhwɛ tẽẽ si botae, anaa atirimpɔw koro so, ɛmma nneɛma foforo ntwetwe no. Nokwarem no, ɛsɛ sɛ yɛde yɛn ani si ‘Onyankopɔn ahenni ne ne trenee a yɛbɛhwehwɛ so kan.’ (Mateo 6:33) Sɛ yɛamma yɛn ani anhwɛ tẽẽ a, dɛn na ebetumi ato yɛn sɛnkyerɛnne kwan so koma no?
15 Susuw sɛnea yɛn nsa bɛka yɛn asetram ahiade no ho hwɛ. Yɛn abusua ahiade a yɛde bɛma wɔn yɛ Kristofo ahwehwɛde. (1 Timoteo 5:8) Nanso sɛ yɛn ani gye ho sɛ yɛn nsa bɛka biribi a aba so, nea eye sen biara, ne biribi te sɛ aduan, ntade, adan, ne nneɛma foforo a nkurɔfo ani gye ho kɛse nso ɛ? So ɛno ntumi nnya yɛn koma ne yɛn adwene so tumi ankasa, mma yɛmfa koma fã nsom? (Dwom 119:113; Romafo 16:18) Dɛn nti na ɛsɛ sɛ yɛma honam fam ahiade ho dwuma a yebedi gye yɛn adwene araa ma yɛn asetra nyinaa gyina abusua, adwuma, ne honam fam nneɛma nkutoo so? Kae afotu a efi honhom mu no: “Monhwɛ mo ho so yiye, na potwaa ne asabow ne nkwa yi mu nneɛma ho dadwen ne haw anhyɛ mo koma so, na ɛda no ammɛto mo mpofirim te sɛ afiri, na ɛbɛba wɔn a wɔte asase nyinaa ani nyinaa so.”—Luka 21:34, 35.
16. Aniwa ho afotu bɛn na Yesu de mae, na dɛn ntia?
16 Aniwa yɛ ade titiriw a adwene ne koma nam so di nkitaho. Ade a ɛtwe adwene si so betumi anya yɛn nsusuwii, yɛn nkate, ne yɛn nneyɛe so nkɛntɛnso kɛse. Bere a Yesu rema mfatoho no, ɔkaa tumi kɛse a nneɛma a yɛn aniwa hu wɔ no ho asɛm sɛ: “Sɛ w’aniwa nifa to wo hintidua a, tu, na tow fi wo ho kyene! Na eye ma wo sɛ wo ho akwaa mu biako bɛsɛe, na wɔamfa wo nipadua nyinaa ankɔto amanehunu kurom.” (Mateo 5:29) Ɛnsɛ sɛ yɛde yɛn ani si nneɛma a ɛmfata so. Sɛ nhwɛso no, ɛnsɛ sɛ yɛkɔ so hwɛ nneɛma a wɔayeyɛ a wɔde kanyan akɔnnɔ bɔne no.
17. Ɔkwan bɛn so na dwuma a yɛde Kolosefo 3:5 bedi no bɛboa yɛn ma yɛabɔ yɛn koma ho ban?
17 Nanso, ɛnyɛ aniwa nkutoo ne nkatede a yɛnam so ne nneɛma a ɛwɔ wiase di nkitaho. Nkatede foforo te sɛ ade mu so ne asɛm tie, wɔ dwuma a edi, na ɛsɛ sɛ yɛyɛ ahwɛyiye wɔ nipadua no akwaa foforo nso ho. Ɔsomafo Paulo tuu fo sɛ: “Munkum mo akwaa a ɛwɔ asase so no: aguamammɔ, afideyɛ, akɔnnɔ nhyɛso, akɔnnɔ bɔne ne anibere a ɛyɛ abosonsom.”—Kolosefo 3:5.
18. Akwan bɛn na ɛsɛ sɛ yɛfa so di nsusuwii bɔne so?
18 Akɔnnɔ bɔne betumi afi ase wɔ yɛn adwenem. Dwen a yɛbɛkɔ so adwen nneɛma a ɛte saa ho taa kanyan akɔnnɔ bɔne, na enya koma no so nkɛntɛnso. “Na akɔnnɔ no nyinsɛn a, ɛwo bɔne.” (Yakobo 1:14, 15) Nnipa pii gye tom sɛ eyi ne ɔkwan a boasipem taa fa so ba. Hwɛ sɛnea ɛho hia sɛ yɛkɔ so dwen honhom fam nneɛma ho! (Filipifo 4:8) Na sɛ nsusuwii bɔne ba yɛn adwenem a, ɛsɛ sɛ yɛbɔ mmɔden yi fi hɔ.
‘Fa Koma a Edi Mu Som Yehowa’
19, 20. Ɛbɛyɛ dɛn na yɛatumi de koma a edi mũ asom Yehowa?
19 Ɔhene Dawid kasa kyerɛɛ ne ba wɔ ne nkwakoraabere mu sɛ: “Me ba Salomo, hu w’agya Onyankopɔn no, na fa wo koma mũ ne wo kra anisɔ som no, na [Yehowa, NW] pɛɛpɛe koma nyinaa mu na ohu adwene nyinaa mu. Sɛ wohwehwɛ no a, ɔbɛma woahu no. Na sɛ wugyaw no a, ɔbɛtow wo akyene koraa.” (1 Beresosɛm 28:9) Salomo ankasa bɔɔ mpae hwehwɛɛ “koma a etie.” (1 Ahene 3:9) Nanso, ohyiaa koma a ɛte saa a na obekura mu no ho nsɛnnennen ne nkwa nna nyinaa mu.
20 Sɛ yebedi nkonim wɔ eyi mu a, ɛnyɛ koma a Yehowa pɛ nko na ɛsɛ sɛ yenya na mmom ɛsɛ sɛ yɛbɔ ho ban nso. Sɛ yebetumi ayɛ eyi a, ɛsɛ sɛ yɛma Onyankopɔn Asɛm mu nkaesɛm da yɛn koma so—ɛsɛ sɛ ‘yɛde sie mu.’ (Mmebusɛm 4:20-22) Ɛsɛ sɛ yɛtaa hwehwɛ yɛn komam nso, na yɛde mpaebɔ susuw nsɛm a yɛka ne nea yɛn nneyɛe da no adi ho. Sɛ yɛamfi komam anhwehwɛ Yehowa mmoa amfa ansiesie mmerɛwyɛ biara a yebehu a, mfaso bɛn na ebefi nneɛma ho a yebesusuw mu aba? Na hwɛ sɛnea ɛho hia sɛ yɛhwɛ nneɛma a ɛnam yɛn nkatede so kɔ yɛn mu no yiye! Sɛ yɛyɛ eyi a, yɛwɔ awerɛhyem sɛ “Onyankopɔn asomdwoe a ɛtra adwene nyinaa so no bɛhwɛ [yɛn] koma ne [yɛn] adwene so Kristo Yesu mu.” (Filipifo 4:6, 7) Yiw, momma yensi yɛn bo sɛ yɛbɛbɔ yɛn koma ho ban asen biribi foforo biara a ehia sɛ yɛbɔ ho ban, na yɛde koma a edi mu asom Yehowa.
So Wokae?
•Dɛn nti na ɛho hia sɛ yɛbɔ koma no ho ban?
•Ɔkwan bɛn so na nea yɛka mu a yɛhwehwɛ boa yɛn ma yɛbɔ yɛn koma ho ban?
•Dɛn nti na ɛsɛ sɛ yɛma yɛn aniwa ‘hwɛ tẽẽ’?
[Adesua no ho Nsɛmmisa]
[Mfonini ahorow wɔ kratafa 23]
Dɛn na yɛtaa ka ho asɛm wɔ asɛnka mu, asafo nhyiam horow ase, ne fie?
[Mfonini ahorow wɔ kratafa 25]
Biribi ntwetwe aniwa a ɛhwɛ tẽẽ